ក្រុមហ៊ុន រ៉ូយ៉ាល់គ្រុប របស់អ្នកឧកញ៉ា គិត ម៉េង បានបន្តប្តេជ្ញាជាផ្នែកមួយនៃការរីកចម្រើនក្នុងប្រទេសកម្ពុជា បន្ទាប់ពីមានភាពរីកចម្រើនជាមួយប្រជាជនកម្ពុជា ជាង៣ទសវត្សរ៍កន្លងមកនេះ។
តាមរយៈរូបភាពសំខាន់ៗរបស់ថ្នាក់ដឹកនាំ និងសារនៅលើបណ្តាញសង្គមហ្វេសប៊ុក នៅថ្ងៃទី៩ ខែមករា ឆ្នាំ២០២៦នេះ ក្រុមហ៊ុន រ៉ូយ៉ាល់គ្រុប បានលើកឡើងបែបនេះថា៖ “រៀងរាល់ខែមករា ជាពេលដែលរំឭកឲ្យយើងនឹកឃើញអំពីកម្លាំងនៃភាពធន់ តម្លៃនៃការរួបរួម និងក្តីសង្ឃឹមដែលសន្តិភាពបន្តផ្តល់ជូនកម្ពុជា។ ក្រុមហ៊ុន រ៉ូយ៉ាល់គ្រុប បានរីកចម្រើនរួមជាមួយប្រជាជនកម្ពុជាជាងបីទសវត្សរ៍មកហើយ។ យើងបានឆ្លងកាត់ការផ្លាស់ប្តូរ វឌ្ឍនភាព និងពេលវេលាសំខាន់ៗដែលបានគូសបញ្ជាក់ពីអត្តសញ្ញាណជាតិយើង”។
“យើងបន្តប្តេជ្ញាជាផ្នែកមួយនៃការរីកចម្រើនក្នុងប្រទេសកម្ពុជា ក្រោមសន្តិភាព ឯកភាព និងការចូលរួមគាំទ្រគ្រប់វិស័យ”។ ក្រុមហ៊ុនបានបញ្ជាក់បន្ថែម។
គួររំឭកថា អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់គ្រុប ធ្លាប់បានលើកឡើង កាលខែវិច្ឆិកា ឆ្នាំ២០២៥ ថាកត្តាសុខសន្តិភាព បានផ្ដល់ឱកាសឱ្យក្រុមហ៊ុនរ៉ូយ៉ាល់គ្រុប មានលទ្ធភាពក្នុងការអភិវឌ្ឍរីកចម្រើនទាំងការកសាងធនធានមនុស្ស ដែលជាកត្តាសំខាន់មិនអាចខ្វះបាន ដើម្បីធានាបានថា កម្លាំងពលកម្មអាចឆ្លើយតបទៅនឹងបម្រែបម្រួលយ៉ាងឆាប់រហ័សនៃបច្ចេកវិទ្យា ដែលរហូតមកបច្ចុប្បន្នក្រុមហ៊ុនរ៉ូយ៉ាល់គ្រុប មានបុត្រសម្ព័ន្ធលើវិស័យជាច្រើនចំនួន ២២ ក្រុមហ៊ុន។ អ្នកឧកញ៉ា ក៏បានបង្ហាញពីក្តីរីករាយដោយបានចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិឱ្យរីកចម្រើន រួមទាំងសកម្មភាពជួយការងារសង្គម និងការងារមនុស្សធម៌ជាច្រើន ដើម្បីជួយដល់កម្មករនិយោជិត និងប្រជាជនកម្ពុជាផងដែរ៕
