អ្នកឧកញ៉ា តែ អុីឆែ ប្រធានក្រុមប្រឹក្សាភិបាលក្រុមហ៊ុន អុីឆែ គ្រុប (Y Chhe Group Co., Ltd) បានចូលជា សមាជិក នៃសមាគមអ្នកសាងសង់កម្ពុជា។ នេះបើតាមការបង្ហាញឱ្យដឹងពីទំព័រហ្វេសប៊ុកផ្លូវការរបស់សមាគមអ្នកសាងសង់កម្ពុជា កាលថ្ងៃទី១៦ ខែមករា ឆ្នាំ២០២៦។
ក្រុមហ៊ុន អុីឆែ គ្រុប (Y Chhe Group Co., Ltd) ដែលមាន អ្នកឧកញ៉ា តែ អុីឆែ ជាស្ថាបនិក គឺជាក្រុមហ៊ុនផ្គត់ផ្គង់សម្ភារៈសំណង់ឈានមុខគេមួយនៅកម្ពុជា នាពេលបច្ចុប្បន្ន។ ក្រុមហ៊ុននេះ មានសមត្ថភាពផ្គត់ផ្គង់សម្ភារៈសាងសង់សម្រាប់គម្រោងហេដ្ឋារចនាសម្ព័ន្ធធំៗអគារពាណិជ្ជកម្ម និងលំនៅដ្ឋានជាដើម។
ក្រុមហ៊ុន អុីឆែ គ្រុប ត្រូវបានបង្កើតឡើងដំបូងក្នុងឆ្នាំ១៩៨៦ ក្នុងទម្រង់ជាអាជីវកម្មខ្នាតតូចលក្ខណៈគ្រួសារ ដោយផ្តើមចេញពីការលក់គ្រឿងដែក និងលួសចំណង។ នៅឆ្នាំ១៩៩២ ក្រុមហ៊ុនបានពង្រីកអាជីវកម្មទៅជាអ្នកលក់រាយនូវប្រភេទដែកចម្រុះ និងគ្រឿងសម្ភារៈសំណង់ផ្សេងៗ។ លុះដល់ឆ្នាំ២០០២ អ្នកឧកញ៉ា តែ អុីឆែ បានបង្កើតជាក្រុមហ៊ុន អ៊ីឆែ អាហរ័ណ នីហរ័ណ ដែលផ្គត់ផ្គង់គ្រឿងសំណង់ច្រើនប្រភេទ។ បន្ទាប់មក នៅឆ្នាំ២០១២ ក្រុមហ៊ុនបានអភិវឌ្ឍទៅជា ក្រុមហ៊ុន អុីឆែ គ្រុប ដែលមានផ្គត់ផ្គង់សម្ភារៈសំណង់គុណភាពខ្ពស់គ្រប់ប្រភេទ។
សមាគមអ្នកសាងសង់កម្ពុជា (CCA) សម្រាប់អាណត្តិទី៦ (២០២៦-២០២៨) មានសមាសភាពថ្នាក់ដឹកនាំថ្មីចំនួន ១១រូប ក្នុងនោះ ឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានជាប់ជាប្រធានសមាគម។
សូមជម្រាបថា សមាគមអ្នកសាងសង់កម្ពុជា ត្រូវបានបង្កើតឡើងក្រោមការផ្តួចផ្តើមដោយក្រសួងរៀបចំដែនដី នគរូបនីយកម្ម និងសំណង់ និងលោកអ្នកឧកញ៉ា ពុង ឃាវសែ អគ្គនាយកក្រុមហ៊ុន OCIC ហើយបានចុះបញ្ជីនៅក្រសួងមហាផ្ទៃ ជាផ្លូវការ នៅថ្ងៃទី១៦ ខែវិច្ឆិកា ឆ្នាំ២០១១។ សមាគមនេះបង្កើតឡើងមានចក្ខុវិស័យធំៗចំនួន៣ គឺ៖ ១)ប្រែក្លាយឧស្សាហកម្មសំណង់របស់ជាតិ ជាឧស្សាហកម្មប្រកបដោយទំនុកចិត្ត ផលិតភាព គណនេយ្យភាព និងការប្រកួតប្រជែង ទាំងក្នុងទីផ្សារជាតិ និងអន្តរជាតិ, ២)ធ្វើឱ្យសមាជិកទាំងអស់របស់សមាគមក្លាយជាអ្នកសាងសង់មានលំដាប់ស្តង់ដាខ្ពស់ និងចំណាត់ថ្នាក់លំដាប់អន្តរជាតិ និង ៣)ជាអង្គការជួយសម្របសម្រួលទំនាក់ទំនងរវាងរាជរដ្ឋាភិបាល និងផ្នែកឯកជនក្នុងវិស័យសំណង់ ដើម្បីផ្តល់នូវផលប្រយោជន៍ ដល់ឧស្សាហកម្មសំណង់៕
