អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប នៅថ្ងៃទី០៥ ខែកុម្ភៈ ឆ្នាំ២០២៦ បានរំឭកអនុស្សាវរីយ៍ប្រវត្តិកសាងផ្លូវ «ម៉ុង ឬទ្ធី» នៅរាជធានីភ្នំពេញ កាលឆ្នាំ២០០៨ ដែលធ្វើឱ្យផ្ទុះការចាប់អារម្មណ៍យ៉ាងខ្លាំងនៅលើបណ្តាញសង្គម។
តាមរយៈទំព័រហ្វេសប៊ុក អ្នកឧកញ៉ា ម៉ុង ឫទ្ធី បានលើកឡើងថា៖ “ថ្ងៃនេះខ្ញុំសរសេរប្រវត្តិ វិថីបណ្ឌិត ម៉ុង ឬទ្ធី ដែលមានទីតាំងស្ថិតនៅក្នុង រាជធានីភ្នំពេញ ដើម្បីអោយប្រិយមិត្តយើងដែលបានធ្វើដំណើរឆ្លងកាត់ និងប្រកបអាជីវកម្មអាស្រ័យផលតាមបណ្តោយផ្លូវនេះ ព្រមទាំងកូនចៅជំនាន់ក្រោយៗបានដឹងផងដែរ”។
អ្នកឧកញ៉ា បន្តថានៅក្នុងឆ្នាំ១៩៩៨ ខ្មែរក្រហមបានយល់ព្រមធ្វើសមាហរណកម្ម ជាមួយរាជរដ្ឋាភិបាលកម្ពុជា ដើម្បីបិតបញ្ចប់សង្គ្រាមបង្ហូរឈាមកាប់សម្លាប់ខ្មែរគ្នាឯង ១៩៧០-១៩៩៨ រយៈពេល២៨ឆ្នាំនៃសង្គ្រាម។ នៅពេលស្រុកមានសង្គ្រាមមិនបានកសាងអភិវឌ្ឍន៍អ្វីនោះទេ គឺយើងជាប់ដៃតែការពារជាតិជាចម្បង។ ដោយសង្កេតឃើញជាក់ស្តែងពីមហន្ដរាយនៃសង្គ្រាម ធ្វើឱ្យហេដ្ឋារចនាសម្ព័ន្ធផ្លូវ ស្ពាន សាលារៀន មន្ទីរពេទ្យ វត្តអារាម លំនៅឋានត្រូវបានខូចខាតស្ទើរតែទាំងអស់។
«ខ្ញុំបានចូលរួមចំណែកកសាងអភិវឌ្ឍន៍ឡើងវិញជាច្រើន ជាមួយរាជរដ្ឋាភិបាលកម្ពុជា។ និយាយដោយឡែកខ្ញុំបានចាប់ផ្តើមជួយសាងសង់ វិថីបណ្ឌិត ម៉ុង ឬទ្ធី ក្នុងឆ្នាំ២០០៨ ហើយរួចរាល់បើកឱ្យដំណើរការប្រើប្រាស់ក្នុងឆ្នាំ២០០៩ ដូចមានភ្ជាប់មកជាមួយនូវរូបថតចាស់ៗនេះស្រាប់។ ខ្ញុំសរសេរនេះគ្មានគោលបំណងរំលើកយកគុណស្រ័យអីទេ បើមានបងប្អូនកូនក្មួយណាដឹងគុណក៏បាន បើរមើលគុណក៏មិនអីទេ»។ អ្នកឧកញ៉ា បានគូសបញ្ជាក់បន្ថែម។
ក្រោយការបង្ហោះសាររបស់អ្នកឧកញ៉ាខាងលើនេះ បានធ្វើឱ្យអ្នកលេងបណ្តាញសង្គមជាច្រើនចាប់អារម្មណ៍ និងបញ្ចេញមតិជាការដឹងគុណ។ ក្នុងនោះដែរ គណនីហ្វេសប៊ុកមួយលើកឡើងថា «សូមគោរពអរគុណ និងដឹងគុណលោកពូ ដែលបានជួយក៏សាងផ្លូវមួយខ្សែនេះ កាលនោះផ្លូវពិបាកធ្វើដំណើរណាស់»។ គណនីមួយទៀត ក៏បានលើកឡើងផងដែរថា «ខ្ញុំជិះធ្វើការរាល់ថ្ងៃ សូមអរគុណលោកពូ ខ្ញុំហៅតែផ្លូវម៉ុងឫទ្ធី»។
សូមជម្រាបថា វិថីឧកញ៉ា ម៉ុង ឬទ្ធី ជាវិថីមួយខ្សែចាប់ផ្តើមពីរង្វង់មូលកាំកូស៊ីធី ឆ្លងកាត់មហាមិត្តភាពកម្ពុជា-វៀតណាម (ផ្លូវហាណូយ) កាត់ផ្សារបឹងបៃតង ហើយទៅភ្ជាប់ត្រឹមវិថីឧកញ៉ា ទ្រី ហេង។ បច្ចុប្បន្ននេះ វិថីមួយខ្សែនេះ ត្រូវបានអាជ្ញាធរសង់ផ្លូវបេតុងបន្តទម្លុះមករហូតដល់បុរីពិភពថ្មីសែនសុខ៕
