នៅព្រឹកថ្ងៃទី១០ ខែកុម្ភៈ ឆ្នាំ២០២៦នេះ ក្រសួងរៀបចំដែនដី នគរូបនីយកម្ម និងសំណង់ បានជួបប្រជុំជជែកជាមួយអតិថិជនគម្រោងដីឡូត៍ FOREST HARMONY នៅកំពត និងឧកញ៉ា សុខ ពិសិដ្ឋ តំណាងក្រុមហ៊ុន CIC ដើម្បីស្វែងរកដំណោះស្រាយ បន្ទាប់ពីអតិថិជននៃគម្រោងនេះត្រូវរងគ្រោះ ដោយសារម្ចាស់គម្រោង លោក គុយ វ៉ាត បានជួបបញ្ហាបំណុល។
កិច្ចប្រជុំនេះធ្វើឡើងក្រោមអធិបតីភាព ឯកឧត្តម ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ព្រមទាំងមានការចូលរួមពី មន្ត្រីជំនាញរបស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត រួមទាំងអតិថិជនរងគ្រោះជាច្រើនរូប នៅទីស្តីការក្រសួង។
ឯកឧត្តម ថេង ច័ន្ទសង្វារ រដ្ឋលេខាធិការ ទទួលបន្ទុកការងារដោះស្រាយបញ្ហាបុរី និងដីឡូត៍ បានបង្ហោះរូបភាព និងសារលើទំព័រហ្វេសប៊ុក នៅថ្ងៃអង្គារនេះថា៖ “ទោះត្រូវប្រជុំសម្របសម្រួលច្រើនលើកច្រើនសារ អតិថិជនគម្រោងដីឡូត៍ដែលមានបញ្ហានៅតែបន្តអត់ធ្មត់ចូលរួមជាមួយក្រុមការងារទទួលបន្ទុក ដើម្បីផ្តល់មតិយោបល់ ធាតុចូល និងស្នើជាជម្រើសដោះស្រាយនានា ធ្វើយ៉ាងណាធានាឱ្យបាននូវយុត្តិធម៌អន្តរកាលមួយ ដែលអាចទទួលយកបានពីគ្រប់ភាគីដែលពាក់ព័ន្ធ។ កិច្ចប្រជុំកិច្ចប្រជុំដំណោះស្រាយបញ្ហាលក់ទិញដីឡូត៍ក្នុង បុរី FOREST HARMONY កំពត (១០-០២-២០២៦)”។
