នាព្រឹកថ្ងៃអង្គារ ទី១០ ខែកុម្ភៈ ឆ្នាំ២០២៦ នៅសណ្ឋារគារសុខា រ៉េស៊ីដិន, ឧកញ៉ា ស៊ិន ចន្ធី តំណាង អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ប្រធានគណៈកម្មការសម្របសម្រួលក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន បានដឹកនាំសមាជិកសភាពាណិជ្ជកម្មកម្ពុជាពាក់ព័ន្ធ អញ្ជើញចូលរួមក្នុងសិក្ខាសាលាពិគ្រោះយោបល់ស្តីពី “យុទ្ធសាស្រ្តជាតិអភិវឌ្ឍន៍វិស័យសហគ្រាសធុនមីក្រូ តូច និងមធ្យម” លើកទី២ ក្រោមអធីបតីភាព ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
យុទ្ធសាស្រ្តជាតិអភិវឌ្ឍន៍វិស័យសហគ្រាសធុនមីក្រូ តូច និងមធ្យម មានគោលបំណងដើម្បីលើកកម្ពស់សមត្ថភាព និងភាពធន់របស់ សហគ្រាសធុនមីក្រូ តូច និងមធ្យម ឱ្យក្លាយជាមូលដ្ឋានគ្រឹះដ៏រឹងមាំនៃសេដ្ឋកិច្ចជាតិ ដែលនឹងនាំមកនូវវិបុលភាព និងវឌ្ឍនភាពសង្គម។
យុទ្ធសាស្រ្តជាតិនេះ មានគោលដៅចំនួន ៣ ដូចជា៖ ទី១. ការអភិវឌ្ឍសមត្ថភាពស្ថាប័នសាធារណៈ ដើម្បីជ្រោមជ្រែង និងគាំទ្រដល់ សហគ្រាសធុនមីក្រូ តូច និងមធ្យម, ទី២. ការពង្រឹងនិងលើកកម្ពស់ប្រសិទ្ធភាព ផលិតភាព និងភាពប្រកួតប្រជែង របស់ សហគ្រាសធុនមីក្រូ តូច និងមធ្យម និង ទី៣. ដោះស្រាយនូវឧបសគ្គ ដែលរារាំងដល់ការអភិវឌ្ឍ សហគ្រាសធុនមីក្រូ តូច និងមធ្យម។
សូមជម្រាបថា យុទ្ធសាស្ត្រជាតិនេះមានចក្ខុវិស័យ ពង្រឹង និងពង្រីកការអភិវឌ្ឍសហគ្រាសធុនមីក្រូ តូច និងមធ្យមកម្ពុជា ឱ្យក្លាយជាមូលដ្ឋានគ្រឹះ និងជាកម្លាំងចលករដ៏រឹងមាំនៃកំណើនសេដ្ឋកិច្ចជាតិ សម្រាប់ការចាកចេញពីចំណាត់ថ្នាក់ប្រទេសមានការអភិវឌ្ឍតិចតួចនៅចុងឆ្នាំ២០២៩ ដោយជោគជ័យ៕
