ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់តែងតាំង និងផ្ដល់ឋានៈ អ្នកឧកញ៉ា ម៉ម វណ្ណឌី ជាទីប្រឹក្សាសម្តេចតេជោ ហ៊ុន សែន ប្រធានព្រឹទ្ធសភា នីតិកាលទី៥ មានឋានៈស្មើ ទេសរដ្ឋមន្ត្រី ដោយពុំទទួលប្រាក់បំណាច់មុខងារ នៅថ្ងៃទី១៤ ខែកុម្ភៈ ឆ្នាំ២០២៦។
មុនទទួលបានការតែងតាំងតួនាទីដ៏សំខាន់នេះ អ្នកឧកញ៉ា ម៉ម វណ្ណឌី និងភរិយា លោកជំទាវអ្នកឧកញ៉ា ទៀង ផល្លា បានចូលជួបសម្តែងការគួរសម សម្តេចតេជោ ហ៊ុន សែន នៅថ្ងៃទី១៣ ខែកុម្ភៈ ឆ្នាំ២០២៦ ព្រមទាំងបានទទួលសេចក្តីសម្រេចតែងតាំង ជា «អនុប្រធានសមាគមអតីតយុទ្ធជន និងនិវត្តជនកម្ពុជា» ពីសម្តេចជាផ្លូវការ នៅការិយាល័យផ្ទាល់របស់សម្តេច។
សូមជម្រាបថា អ្នកឧកញ៉ា ម៉ម វណ្ណឌី ជាប្រធានក្រុមប្រឹក្សាភិបាលក្រុមហ៊ុន ឌីភីម្ចាស់ចម្ការ, អនុប្រធានសមាគមអតីតយុទ្ធជន និងនិវត្តជនកម្ពុជា ព្រមទាំងធ្លាប់ត្រូវបានព្រះមហាក្សត្រចេញព្រះរាជក្រឹត្យតែងតាំងជា «ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយ» មានឋានៈស្មើ «រដ្ឋមន្ត្រី» កាលថ្ងៃទី១៣ ខែមករា ឆ្នាំ២០២៣ ផងដែរ។
