នាថ្ងៃព្រហស្បតិ៍ ទី១៨ ខែមិថុនា ឆ្នាំ២០២៦ ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានដឹកនាំប្រតិភូ និងសមាជិក សមាជិកា ធ្វើដំណើរបំពេញទស្សនកិច្ចសិក្សាស្វែងយល់ផ្ទាល់ នៅកសិដ្ឋានចិញ្ចឹមគោ និងរោងចក្រផលិតទឹកដោះគោ «គិរីសួគ៌ ហ្វាម» (Kirisu Farm) ដែលជាកសិដ្ឋានគំរូដ៏ធំ និងទំនើបបំផុតមួយនៅក្នុងប្រទេសកម្ពុជា។
សម្ព័ន្ធសមាគមសហគ្រាសធុនតូច និងមធ្យមកម្ពុជា បានឱ្យដឹងថា ដំណើរទស្សនកិច្ចនេះ ធ្វើឡើងក្នុងគោលបំណងបើកឱកាសឱ្យម្ចាស់សហគ្រាសធុនតូច និងមធ្យម (SMEs) ក្នុងស្រុក បានសិក្សាស្វែងយល់ពី៖
– បច្ចេកវិទ្យាចិញ្ចឹម៖ ការគ្រប់គ្រង និងថែទាំហ្វូងគោទឹកដោះតាមស្តង់ដារបច្ចេកវិទ្យាខ្ពស់។
– ខ្សែច្រវាក់ផលិតកម្ម៖ ដំណើរការកែច្នៃ និងការវេចខ្ចប់ទឹកដោះគោស្រស់ប្រកបដោយអនាម័យ និងសុវត្ថិភាពចំណីអាហារ។
– បទពិសោធន៍គ្រប់គ្រង៖ ការស្វែងយល់ពីការគ្រប់គ្រងអាជីវកម្មកសិ-ឧស្សាហកម្មខ្នាតធំ ដើម្បីយកមកអភិវឌ្ឍ និងកែច្នៃក្នុងអាជីវកម្មផ្ទាល់ខ្លួន។
ក្នុងឱកាសនោះដែរ លោកឧកញ៉ា តែ តាំងប៉ បានមានប្រសាសន៍ថា៖ «ការចុះមកពិនិត្យផ្ទាល់នៅកសិដ្ឋាន គិរីសួគ៌ ហ្វាម នាថ្ងៃនេះ គឺដើម្បីបង្ហាញឱ្យសហគ្រិនរបស់យើងបានឃើញពីភាពជោគជ័យនៃសហគ្រាសក្នុងស្រុក ដែលមានសមត្ថភាពផលិត ផលិតផលស្តង់ដារអន្តរជាតិ។ យើងចង់ជំរុញឱ្យមានការតភ្ជាប់បណ្តាញអាជីវកម្ម (Business Networking) និងការផ្លាស់ប្តូរបទពិសោធន៍ ដើម្បីពង្រឹងសមត្ថភាពផលិតកម្មរបស់ SMEs កម្ពុជាឱ្យកាន់តែរឹងមាំ និងអាចប្រកួតប្រជែងបាន»។
ជាមួយគ្នានោះដែរ តំណាងគ្រប់គ្រងកសិដ្ឋាន «គិរីសួគ៌ ហ្វាម» បានសម្តែងការស្វាគមន៍យ៉ាងកក់ក្តៅចំពោះវត្តមានរបស់ លោកឧកញ៉ាប្រធាន និងសមាជិក FASMEC ទាំងអស់ ព្រមទាំងបានណែនាំយ៉ាងលម្អិតអំពីប្រវត្តិរូប បច្ចេកវិទ្យាអ៊ីស្រាអែលដែលកំពុងប្រើប្រាស់ និងចក្ខុវិស័យរបស់ក្រុមហ៊ុនក្នុងការផ្គត់ផ្គង់ទឹកដោះគោស្រស់ធម្មជាតិ ១០០% ជូនដល់ប្រជាជនកម្ពុជា។
គួរបញ្ជាក់ផងដែរថា កសិដ្ឋាន «គិរីសួគ៌ ហ្វាម» ស្ថិតនៅក្នុងតំបន់ភ្នំតាម៉ៅ ស្រុកបាទី ខេត្តតាកែវ ដែលជាការវិនិយោគរួមគ្នាយ៉ាងធំធេងក្នុងការនាំយកបច្ចេកវិទ្យាចិញ្ចឹម និងកែច្នៃទឹកដោះគោទំនើបចុងក្រោយ ដើម្បីរួមចំណែកកាត់បន្ថយការនាំចូល និងលើកកម្ពស់សុខុមាលភាពពលរដ្ឋខ្មែរ តាមរយៈការបរិភោគផលិតផលក្នុងស្រុកដែលមានគុណភាពខ្ពស់៕
