អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប (Royal Group) នៅព្រឹកថ្ងៃទី២ ខែមិថុនា ឆ្នាំ២០២៦នេះ បានបង្ហាញសារដ៏មានអត្ថន័យ ដើម្បីអបអរសាទរ រីករាយថ្ងៃខួបកំណើតគម្រប់១៨ឆ្នាំ កូនស្រីសម្លាញ់ គិត ស៊ូណាវីន ទេវី ដែលឈានចូលដល់វ័យ ១៨ឆ្នាំ។
នៅលើទំព័ររហ្វេសប៊ុក នាព្រឹកថ្ងៃព្រហស្បតិ៍នេះ អ្នកឧកញ៉ា បានលើកឡើងបែបនេះថា៖ “វាហាក់ដូចជាម្សិលមិញដែលប៉ាកំពុងបីទារកតូចមួយនៅក្នុងដៃរបស់ប៉ា ហើយពេលនោះ ប៉ាគិតក្នុងចិត្តថា តើកូននឹងមានចរិតលក្ខណៈបែបណានៅពេលកូនធំទ្បើង។
ថ្ងៃនេះ ប៉ាសម្លឹងមើលកូន ហើយដឹងថាក្មេងស្រីតូចដែលធ្លាប់កាន់ដៃប៉ា បានក្លាយជានារីវ័យក្មេងម្នាក់ដែលមានក្តីស្រមៃផ្ទាល់ខ្លួន គំនិតផ្ទាល់ខ្លួន និងឱកាសជាច្រើនដែលកំពុងរង់ចាំនៅពេលអនាគត។
ដូចដែលឪពុកម្តាយគ្រប់រូបដឹងស្រាប់ហើយថា កុមារប្រៀបដូចជាខ្យល់។ មិនថាយើងចង់ឱបក្រសោបពួកគេឱ្យនៅជិតយើងបែបណានោះទេ ពួកគេត្រូវការភាពធំលូតលាស់ ត្រូវការស្វែងយល់ពីពិភពខាងក្រៅ និងកសាងអនាគតផ្ទាល់ខ្លួនរបស់ពួកគេ។ ទោះយ៉ាងណា ក្នុងចិត្តរបស់ប៉ា ប៉ានៅតែនឹកឃើញកូនរត់លេងនៅក្នុងផ្ទះយើង កាលកូននៅតូច។ ប៉ាក៏មានមោទនភាពយ៉ាងខ្លាំងផងដែរដែលបានឃើញកូនកំពុងធំលូតលាស់។
រយៈពេល១៨ឆ្នាំមកនេះ ម៉ាក់កូន និងប៉ាបានខិតខំបង្ហាត់បង្រៀនកូនយ៉ាងច្រើនលើសពីការផ្តល់ភាពសុខស្រួលដល់កូន។ ប៉ាម៉ាក់សង្ឃឹមថាបានបង្រៀនកូនឱ្យស្គាល់គុណតម្លៃពិតនៃជីវិត គឺឱ្យចេះរក្សាចិត្តសប្បុរសនៅពេលមនុស្ស ឬស្ថានភាពនៅជុំវិញកូនមានការលំបាក ឬភាពអាប់អួ ឱ្យមានភាពក្លាហាននៅពេលជីវិតជួបការលំបាក ឱ្យបន្ទន់កាយវាចាឱ្យទន់ភ្លន់នៅពេលទទួលភាពជោគជ័យ និងរក្សាភាពរឹងមាំទោះបីគ្មានអ្នកណាម្នាក់កត់សម្គាល់ឃើញសកម្មភាពរបស់កូនក៏ដោយ។
ដោយសារកូនឈានចូលដល់ភាពពេញវ័យ ចូរកូនចងចាំថា គុណតម្លៃពិតរបស់មនុស្សមិនត្រូវបានវិនិច្ឆ័យដោយផ្អែកលើឋានៈ ប្រជាប្រិយភាព ឬសមិទ្ធផលនោះទេ ប៉ុន្តែតាមរយៈសមានចិត្តសប្បុរសរបស់កូន អត្តចរិតដែលកូនកសាងទ្បើង និងរបៀបនៃការបន្តដំណើរជីវិតរបស់កូនទៅមុខ ទោះបីស្ថិតក្នុងស្ថានភាពប្រឈម ឬមិនប្រាកដប្រជាក៏ដោយ”។
អ្នកឧកញ៉ា គិត ម៉េង បានបន្ថែមថា៖ “ជីវិតមានទាំងគ្រារីករាយ និងគ្រាលំបាក។ ប៉ាមិនអាចឆ្លងកាត់គ្រប់ដំណាក់កាលនៃមាគ៌ាជីវិតជំនួសកូនបានទេ ប៉ុន្តែប៉ាសង្ឃឹមថា កូននឹងចងចាំជានិច្ចថា ទោះកូនទៅដល់ទីណាក៏ដោយ គ្រួសារយើងនឹងនៅតែផ្តល់ក្តីស្រទ្បាញ់ដ៏ជ្រាលជ្រៅដល់កូនជានិច្ច។ ថ្ងៃនេះ យើងមិនត្រឹមតែអបអរសាទរ និងជូនពរថ្ងៃខួបកំណើតរបស់កូនប៉ុណ្ណោះទេ ប៉ុន្តែក៏កោតសរសើរចរិយាសម្បត្តិដែលកូនកំពុងមានផងដែរ។ រីករាយថ្ងៃខួបកំណើតគម្រប់១៨ឆ្នាំ កូនស្រី ស៊ូណាវីន! គ្រួសារយើងស្រឡាញ់កូនជារៀងរហូត”។
សូមជម្រាបថា អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន គិតម៉េង មានបុត្រាបុត្រីចំនួន ៤នាក់គឺ កូនប្រុសច្បង ឧកញ៉ា គិត ស៊ូឡា បច្ចុប្បន្នកំពុងកាន់តួនាទីជា នាយកគ្រប់គ្រងផ្នែកប្រតិបត្តិការនៃក្រុមហ៊ុន រ៉ូយ៉ាល់គ្រុប អន្តរជាតិ, កញ្ញា គិត ស៊ូរៀរង្សី, កញ្ញា គិត ស៊ូណាវីន ទេវី និងកូនប្រុសពៅ គិត ស៊ូឡុង៕
