លោកជំទាវអ្នកឧកញ៉ា ម៉ៅ ចំណាន គិតម៉េង អនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប និងជាប្រធានសមាគមសិល្បករខ្មែរ បានផ្ញើសារផ្តល់ដំបូន្មានប្រកបដោយអត្ថន័យជូនដល់កូនស្រីទាំងពីរ ដើម្បីសម្រេចចិត្ត ឬជ្រើសរើសជីវិតដែលស័ក្តិសមសម្រាប់ខ្លួនឯង។
នៅលើបណ្តាញសង្គម នាថ្ងៃទី៦ ខែកញ្ញា ឆ្នាំ២០២៦ លោកជំទាវអ្នកឧកញ៉ា បានលើកឡើងបែបនេះថា៖ “ក្នុងនាមជាម្តាយ ម៉ាក់ចង់ឱ្យកូនធំឡើងដោយយល់ថា ចិត្តល្អរបស់កូន មិនមានន័យថាកូនត្រូវយល់ព្រមគ្រប់រឿងនោះទេ។ កូនអាចយកចិត្តទុកដាក់ចំពោះអ្នកដទៃ ហើយនៅតែចេះកំណត់ព្រំដែនសម្រាប់ខ្លួនឯង។ កូនអាចគោរពអ្នកដទៃ ហើយនៅតែហ៊ានការពារខ្លួនឯង។ កូនអាចស្រឡាញ់អ្នកដទៃ ដោយមិនបាត់បង់ខ្លួនឯង”។
“ម៉ាក់ក៏ចង់រំឭកកូនថា តម្លៃរបស់កូនមិនគួរអាស្រ័យលើតំណែង សមិទ្ធផល ឬការទទួលស្គាល់ពីអ្នកដទៃនោះទេ។ ក្នុងដំណើរជីវិតរបស់កូន កូននឹងជួបមនុស្ស ដែលនឹងមានការរំពឹងទុកចង់ឱ្យកូនក្លាយជាមនុស្សបែបណាមួយ ប៉ុន្តែម៉ាក់សង្ឃឹមថា កូននឹងមានភាពក្លាហានក្នុងការស្តាប់ខ្លួនឯង និងជ្រើសរើសជីវិតដែលកូនគិតថាស័ក្តិសមសម្រាប់ខ្លួនឯង”។ លោកជំទាវអ្នកឧកញ៉ា បានបន្ត។
លោកជំទាវអ្នកឧកញ៉ា បានបន្ថែមថា លោកជំទាវមិនអាចសម្រេចចិត្តគ្រប់យ៉ាងជំនួសកូន ឬការពារកូនពីគ្រាលំបាកៗក្នុងជីវិតបានទេ ប៉ុន្តែលោកជំទាវអាចផ្តល់គុណតម្លៃឱ្យកូនយកតាមខ្លួនបាន ក្នុងនោះរួមមាន ការមានចិត្តល្អ ស្គាល់តម្លៃរបស់ខ្លួនឯង ហើយកុំខ្លាចក្នុងការជ្រើសរើសអ្វីដែលល្អសម្រាប់ខ្លួនឯង នៅពេលដែលចាំបាច់។
សូមជម្រាបថា អ្នកឧកញ៉ា គិត ម៉េង និងលោកជំទាវអ្នកឧកញ៉ា ម៉ៅ ចំណាន គិតម៉េង មានបុត្រាបុត្រីចំនួន ៤នាក់រួមមាន កូនប្រុសច្បង ឧកញ៉ា គិត ស៊ូឡា, កូនប្រុសពៅ គិត ស៊ូឡុង និងកូនស្រីចំនួនពីររូបគឺ កញ្ញា គិត ស៊ូរៀរង្សី និងកញ្ញា គិត ស៊ូណាវីន ទេវី៕
