ក្រុមហ៊ុន LHR Asean Inversment គឺជាក្រុមហ៊ុនប្រេងឥន្ធនៈដ៏ធំ និងល្បីល្បាញមួយនៅកម្ពុជា ដែលមានសាខានៅទូទាំងប្រទេស តាមបណ្តារាជធានី ខេត្តនានា។ អ្នកឧកញ៉ា ហ៊ុន តូ គឺជា អគ្គនាយកក្រុមហ៊ុន LHR Asean Inversment។ តើក្រុមហ៊ុននេះ បង្កើតឡើងនៅឆ្នាំណា?
បើតាម Open Corporates បានបង្ហាញឱ្យដឹងថា ក្រុមហ៊ុន LHR Asean Inversment Co., LTD បានចុះបញ្ជីលេខ ០០០១៥២៩៧ នៅថ្ងៃទី ១៩ ខែមេសា ឆ្នាំ២០០៦។ LHR Asean Inversment ជាក្រុមហ៊ុនឯកជនទទួលខុសត្រូវមានកម្រិត និងបានចុះបញ្ជីដាក់ទីស្នាក់ការកណ្តាលនៅផ្ទះលេខ 49CEO ផ្លូវ ១៣៤ សង្កាត់ផ្សារដេប៉ូពីរ ខណ្ឌទួលគោក រាជធានីភ្នំពេញ។ បច្ចុប្បន្ន ក្រុមហ៊ុន LHR Asean Inversment មានសាខា និងដេប៉ូចែកចាយប្រេងឥន្ធនៈ រាប់រយកន្លែង នៅទូទាំងប្រទេសកម្ពុជា។
អ្នកឧកញ៉ា ហ៊ុន តូ ដែលជាកូនប្រុសរបស់លោក ហ៊ុន ណេង និងត្រូវជាក្មួយរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា គឺជាអ្នកជំនួញដ៏ល្បីល្បាញមួយរូបនៅកម្ពុជា និងនៅប្រទេសអូស្ត្រាលី។ ក្រៅពីធ្វើជំនួញ អ្នកឧកញ៉ា ក៏តែងតែចូលរួមជួយការងារសង្គមជាច្រើនផងដែរ ដូចជា បរិច្ចាគថវិកាជួយធ្វើផ្លូវ ជួយឧបត្ថម្ភថវិកាដល់សិស្សានុសិស្សដែលប្រឡងជាប់បាក់ឌុប និងបរិច្ចាគថវិកាជួយជនរងគ្រោះដោយធម្មជាតិ ជាដើម-ល-៕
