កាលពីព្រឹកថ្ងៃទី១៧ ខែតុលា ឆ្នាំ២០២២នេះ ឧកញ៉ា ស្រី ចាន់ថន អគ្គនាយកក្រុមហ៊ុន Jes’t Group & 7NG បាននាំយកសម្ភារគ្រឿងឧបភោគ បរិភោគ និងថវិកាប្រមាណ ជាង ១០លានរៀលបន្ថែមទៀត ជូនដល់គ្រួសារក្មេងៗជនរងគ្រោះដែលជួបឧបទ្ទវហេតុលិចទូកដ កាលពីល្ងាចថ្ងៃទី១៣ ខែតុលា ឆ្នាំ២០២២ កន្លងទៅ។
លោកឧកញ៉ា បានបញ្ជាក់ឱ្យដឹងលើបណ្តាញសង្គម នៅរសៀលថ្ងៃនេះថា នៅព្រឹកថ្ងៃចន្ទនេះ ក្នុងនាមជាប្រធានសមាគមចលនាយុវជនកម្ពុជា (ក្រុម១៥៧ ) សាខាខេត្តកណ្ដាល លោកបានដឹកនាំក្រុមការងារ ចូលរួមសហការជាមួយ អាជ្ញាធរមូលដ្ឋាន និងកងកម្លាំងទាំងពីរ ព្រមទាំងប្រជាការពារ បាននាំយកសម្ភារគ្រឿងឧបភោគ បរិភោគ និងថវិកាមួយចំនួន ជូនដល់មាតាបិតា របស់សិស្សដែលបាត់បង់ជីវិតទាំង១១នាក់ និង សិស្សានុសិស្សមិនបានបាត់បង់ជីវិតទាំង ៥នាក់ ក្នុងឧបទ្ទវហេតុលិចទូកដ នៅភូមិកោះចម្រេីន ឃុំកំពង់ភ្នំ ស្រុកលេីកដែក ខេត្តកណ្តាល កាលពីល្ងាចថ្ងៃទី១៣ ខែតុលា ឆ្នាំ២០២២ កន្លងទៅ ដោយសរុបជាថវិកាចំនួន ១០,៣០៥,៣៥០ រៀល ជួយឧបត្ថម្ភបន្ថែមពីលើថវិកាលើកមុន។
សូមជម្រាបជូនថា ក្នុងឧបទ្ទវហេតុដ៏សោកសៅខាងលើនេះ ឧកញ៉ា ស្រី ចាន់ថន កាលពីថ្ងៃទី១៥ ខែតុលា ឆ្នាំ២០២២ បានជួយថវិកាប្រមាណ ១០០០០ ដុល្លារ រួចមកហើយ ទៅដល់គ្រួសារជនរងគ្រោះដែលបាត់បង់ជីវិត និងគ្រួសារដែលក្មេងនៅមានជីវិតផងដែរ៕
