ឧកញ៉ា អ៊ុច សម្បត្តិ ប្រធានក្រុមហ៊ុន គ្រួសារកក់ក្តៅ (Krousar Korkdao Co.,Ltd) បានប្រកាសស្វែងរកអ្នកមានសមត្ថភាពខ្ពស់ ច្បាស់លាស់ មានឆន្ទៈ និងស្មោះត្រង់ ដើម្បីមកអនុវត្តគម្រោងមួយនៃគំនិតរបស់លោក ដែលលោកជឿថាវាមានតម្លៃលើសពី ១លានដុល្លារអាមេរិក។
លោកឧកញ៉ា បានបង្ហោះសារលើទំព័រហ្វេសប៊ុក នៅរសៀលថ្ងៃអង្គារនេះ យ៉ាងដូច្នេះថា៖ “ខ្ញុំមានគំនិត (Idea) ដែលមានតម្លៃ លើសពី១លានដុល្លារ ដែលត្រូវអនុវត្តនៅខែក្រោយនេះ។ ខ្ញុំកំពុងសំលឹងរកមើលមនុស្សមានសមត្ថភាព ច្បាស់លាស់ មានឆន្ទៈ ស្មោះត្រង់ មកធ្វើអោយវាក្លាយជាការពិត ដើម្បីទទួលបានជោគជ័យ ហើយពួកយើងនឹងអបអរ (Cheer) ស្រាក្រហមជាមួយគ្នា”។
លោកឧកញ៉ា បានបន្ថែមថា ពេលលោកគិតគំនិតមួយនេះឡើង វាមានតម្លៃ១លានដុល្លារ ប៉ុន្តែបើគំនិតនេះ អនុវត្តបានដោយមនុស្សមានសមត្ថភាព វាអាចឡើងដល់ ១០០លានដុល្លារ ហើយបើគំនិតលោក ធ្លាក់ទៅលើមនុស្សដែលគ្មានសមត្ថភាព មនុស្សក្បត់ មនុស្សមិនអោយតម្លៃ មនុស្សដែលមិនយកទៅអនុវត្ត នោះគំនិតរបស់លោក មិនស្មើអាចន៍ឆ្កែមួយដុំផង។ យ៉ាងណាមិញ សម្រាប់បងប្អូនដែលចង់រួមដំណើរការងារនៃគម្រោងនេះ អាចទាក់ទងជួបលោកឧកញ៉ាដោយផ្ទាល់បាន។
សូមជម្រាបជូនថា ក្រុមហ៊ុន គ្រួសារកក់ក្ដៅ របស់ឧកញ៉ា អ៊ុច សម្បត្តិ គឺជាក្រុមហ៊ុនផលិតចែកចាយគ្រឿងសម្អាង និងលក់ផលិតផលថែរក្សាសម្រស់តាមអនឡាញដ៏ធំមួយប្រចាំកម្ពុជា។ ក្រុមហ៊ុននេះ បង្កើតឡើង កាលខែមិថុនា ឆ្នាំ២០១៥ ដោយឧកញ៉ា អ៊ុច សម្បត្តិ និងភរិយាលោកជំទាវ ហ៊ឹម សុភ័ក្រ ហើយរហូតដល់បច្ចុប្បន្នមានបណ្ដាញចែកចាយរាប់ម៉ឺននាក់ទូទាំងប្រទេស ខណៈដែលឆ្នាំ២០២២នេះ ក្រុមហ៊ុនកំពុងពង្រីកវិសាលភាពបន្ថែមទៅក្រៅប្រទេស។ សម្រាប់ផលិតផលរបស់ក្រុមហ៊ុន គ្រឿងសម្អាងគ្រួសារកក់ក្ដៅ គឺផ្តោតសំខាន់លើ ការថែរក្សាសម្រស់មួយតួខ្លួនរបស់ស្រី្តតែម្តង៕
