ឧកញ៉ាបណ្ឌិត គីម ហ៊ាង អគ្គនាយកបុរី វិមានសំណាង បានប្រកាសពីគម្រោងបង្កើតក្លិបអ្នកមានធម្មតាមួយនៅកម្ពុជា នាពេលខាងមុខឆាប់ៗនេះ ដែលសមាជិកម្នាក់ៗត្រូវតែមានទ្រព្យសម្បត្តិពិតប្រាកដលើសពី ១០លានដុល្លារអាមេរិកឡើងទៅ ទើបអាចចូលរួមជាមួយក្លិបនេះបាន។
លោកឧកញ៉ាបណ្ឌិត បានលើកឡើងបែបលេងសើច នៅព្រឹកថ្ងៃសុក្រ ទី០២ ខែធ្នូ ឆ្នាំ២០២២នេះ យ៉ាងដូច្នេះថា៖ “ថ្ងៃទី៣០ ខែកុម្ភៈ ឆ្នាំ២០២៣ ខ្ញុំបាទបុរសមហាសម្រស់ គីម ហ៊ាង នឹងបង្កើតក្លិបអ្នកមានធម្មតាមួយនៅកម្ពុជា ហើយសមាជិកត្រូវតែ៖ ១.មានទ្រព្យសម្បត្តិពិតលើសពី ១០លានដុល្លារឡើងទៅ ២.មានបុគ្គលិក កម្មករ និងក្រុមការងារលើសពី ១០០នាក់ ៣.បាននិងកំពុងបង់ពន្ធឱ្យរដ្ឋលើសពី ១០០K ប្រចាំឆ្នាំ ៤.មានរូបសម្បត្តិស្អាត និងសង្ហាជាង គីម ហ៊ាង និង ៥.អាន Like & Share អត្ថបទនេះទុក ពេលចូលជាសមាជិក”។
សូមជម្រាបជូនថា ឧកញ៉ាបណ្ឌិត គីម ហ៊ាង ត្រូវបានគេចាត់ទុកថា ជាសេដ្ឋីមួយរូបនៅកម្ពុជា ដែលជាម្ចាស់គម្រោងបុរីចំនួន២កន្លែង គឺ បុរី ខេអេស រ៉េស៊ីដេន (Borey KS Residence) និងបុរី វិមានសំណាង (Borey Vimean Samnang)។ បុរី វិមានសំណាង របស់ឧកញ៉ាបណ្ឌិត គីម ហ៊ាង ស្ថិតនៅខាងជើងក្រសួងដែនដី ២៥០០ ម៉ែត្រ សាងសង់លើដី ២៥ហិកតា ជាវីឡាព្រីនបែបក្លាសិក វីឡាឃ្វីនបែបក្លាសិក និងជាវីឡាឃីងបែបក្លាសិក ឬបែបបារាំង ដែលចំណាយថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើបនានា។ បុរី មានសួនច្បារ កន្លែងហាត់ប្រាណ កន្លែងលេងកីឡា ផ្លូវធំ ដើមឈើច្រើន និងព្រែកធម្មជាតិ ស្មើជិត ៤០% នៃផ្ទៃដីសរុប ដែលសាកសមបំផុត សម្រាប់គ្រួសារអភិជនកម្ពុជាស្នាក់នៅប្រចាំថ្ងៃ៕
