អ្នកឧកញ៉ា ឧកញ៉ា ត្រូវបានរៀបចំឱ្យអង្គុយនៅកន្លែងពិសេសមួយ ក្នុងមង្គលការចៅស្រីលោក ជា សុផារ៉ា

ជុំវិញ​ឧកញ៉ា

អ្នកឧកញ៉ា ឧកញ៉ា និងអ្នកជំនួញធំៗនៅកម្ពុជា ​​ត្រូវបាន​រៀបចំ​ឱ្យ​អង្គុយ​នៅ​ទីតាំង​ពិសេស​មួយ ​សម្រាប់​​ការ​ចូល​រួមពិធី​​ពិសាភោជនាហារ​ពេល​ល្ងាច​នៅ​មជ្ឈមណ្ឌលសន្និបាត និងពិព័រណ៍អន្តរជាតិ​ជ្រោយ​ចង្វារ (OCIC) ក្នុងពិធីមង្គល​ការ​ចៅ​ស្រី​លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និងសំណង់ ​​នា​ល្ងាច​ថ្ងៃទី​០៥ ខែ​ធ្នូ ឆ្នាំ២០២២ ស្អែក​នេះ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ពិធី​​អាពាហ៍ពិពាហ៍​​​របស់​ត្រកូល​គ្រួសារ​ថ្នាក់​ដឹកនាំ​​រាជរដ្ឋាភិបាល​កម្ពុជា​​មួយ​នេះ ​​ក្រុមការងារ​ពិធីការ​ ​​បាន​សម្រេច​យក​អគារ​ចំនួន​៥ នៃ​​មជ្ឈមណ្ឌល​ OCIC ​​ក្នុង​ការ​ទទួល​ភ្ញៀវ​កិត្តិយស ដែល​រួម​មាន​​​ថ្នាក់​ដឹកនាំ​កំពូលៗ ​​អ្នកឧកញ៉ា ឧកញ៉ា និង​អ្នកមុខ​អ្នកការ​ជា​ច្រើន​រូប។ ក្នុង​នោះ​ សម្រាប់​អ្នកឧកញ៉ា ឧកញ៉ា ​អ្នកជំនួញ និង​អ្នក​រក​ស៊ី​ធំៗ ​​​ត្រូវ​បាន​រៀប​ចំ​ឱ្យ​អង្គុយ​នៅ​អគារ E ​​​​ហើយ​ក្នុង​អគារ​ E នេះ ក៏​មាន​តុ​ VIP ​​មួយ​ សម្រាប់​ទទួល​អ្នកឧកញ៉ា​ធំៗ​នៅ​កម្ពុជា​ផង​ដែរ។

ដោយ​ឡែក​សម្រាប់​អគារ​៤​ទៀត ​នឹង​ទទួល​ភ្ញៀវ​ និង​ឥស្សរជន​​ជាន់​ខ្ពស់​​​ផង​ដែរ​ ដែល​ក្នុង​នោះ​រួម​មាន៖ អគារ B ​សម្រាប់​ញាតិ​មិត្ត​កូន​ក្រមុំ និង​មន្ត្រីរាជការ, អគារ C សម្រាប់​បងប្អូន​កូន​ក្រមុំ VIP ក្រុម​កូនៗ​សម្តេច​តេជោ ហ៊ុន សែន និង រដ្ឋមន្ត្រី VIP, អគារ D សម្រាប់​ឆាក​​ និង​តុ​ថ្នាក់​ដឹកនាំ​ជាន់ខ្ពស់​លំដាប់ VVIP និង​អគារ F ​​សម្រាប់​ញាតិ​មិត្ត​កូន​កំលោះ ​រួម​ទាំង​ភ្ញៀវ​ផ្សេងៗ​ទៀត។

សូម​ជម្រាប​ថា ចៅស្រី លោក ជា សុផារ៉ា មាន​ឈ្មោះ​ថា “អ៊ាង និធិជ្ជនី ដឺណេ” ត្រូវ​ជា​កូនស្រីរបស់លោក អ៊ាង សុផល្លែត ជំនួយការផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជារដ្ឋលេខាធិការ​ក្រសួងបរិស្ថាននិង​លោកជំទាវ ជា សុផាកន្នី ​​នឹង​ត្រូវ​ចូល​រោងជ័យ​រៀប​មង្គលការ​ដ៏​ធំ​ជាមួយ​នឹង​កូនកំលោះ​ឈ្មោះ​ថា “ប៉ែន សំអាត សុទ្ធចិត្ត” កូនប្រុស​របស់​លោក​ជំទាវ ហាក់ ស្រីទូច និង​លោក​​​បណ្ឌិត​ ប៉ែន សំអាត ទីប្រឹក្សាផ្ទាល់​សម្តេច​តេជោ ហ៊ុន សែន នាយករដ្ឋមន្ត្រី និង​ជា​អនុរដ្ឋលេខាធិការ​ក្រសួងសេដ្ឋកិច្ច និងហិរញ្ញវត្ថុ និង​ជា​​អគ្គ​នាយករង​គយ និងរដ្ឋាករ​កម្ពុជា។

តាមកម្មវិធីគ្រោងទុក អាពាហ៍ពិពាហ៍​ខាង​លើ​នេះ ត្រូវរៀបចំរយៈពេលពីរថ្ងៃនៅភូមិគ្រឹះ​របស់លោក​ឧប​នាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលត្រូវជាជីតា​របស់កូន​ក្រមុំ ​​ចាប់​ពី​ថ្ងៃទី​០៤ ខែ​ធ្នូ ឆ្នាំ​២០២២​នេះ ខណៈ​ដែល​​​ពិធីញ៉ាំ​អាហារ​ពេលល្ងាច នា​ល្ងាច​​ថ្ងៃទី​០៥ ខែធ្នូ ឆ្នាំ២០២២​ នឹង​ធ្វើ​ឡើង​នៅ​មជ្ឈមណ្ឌលសន្និបាត និងពិព័រណ៍អន្តរជាតិ​ជ្រោយ​ចង្វារ៕