អ្នកឧកញ៉ា លី ហួរ ប្រធាននាយកប្រតិបត្តិ នៃក្រុមហ៊ុន លី ហួរ គ្រុប (Ly Hour Group) និងលោកជំទាវឧកញ៉ា ស៊ាង លីម បានអញ្ជើញជាអធិបតីក្នុងពិធីបើកសម្ពោធអគារការិយាល័យកណ្តាលរបស់ក្រុមហ៊ុន លី ហួរ គ្រុប ជាផ្លូវការ កាលពីថ្ងៃទី២០ ខែមករា ឆ្នាំ២០២៣។
អគារការិយាល័យកណ្តាលរបស់ក្រុមហ៊ុន លី ហួរ គ្រុប ដ៏ស្រស់ស្អាតថ្មីនេះ មានកម្ពស់៥ជាន់ សាងសង់ឡើងដោយកូនខ្មែរប្រើរយៈពេលត្រឹមតែ ៧ខែប៉ុណ្ណោះ ដែលប្រកបដោយគំនិតច្នៃប្រឌិតខ្ពស់ ផ្សារភ្ជាប់ជាមួយធម្មជាតិ និងផ្អែកលើទំនើបកម្ម ប្រណិតភាព រចនាប្លង់ ដែលប្រើនូវបច្ចេកទេសមាត្រដ្ឋានត្រឹមត្រូវ។ អគារការិយាល័យកណ្តាលនេះ មានទីតាំងស្ថិតនៅដីឡូត៍លេខ ៨៥-៨៨ ផ្លូវ ២៨៩ សង្កាត់បឹងកក់២ ខណ្ឌទួលគោក រាជធានីភ្នំពេញ។
សូមជម្រាបជូនថា ក្រុមហ៊ុន លី ហួរ គ្រុប បានកកើតដំបូង តាំងពីឆ្នាំ១៩៨៦ តាមរយៈការបង្កើតនូវក្រុមហ៊ុន លី ហួរ អ៊ិចឆេង ឯ.ក (លី ហួរ ប្តូរប្រាក់) របស់អ្នកឧកញ៉ា លី ហួរ។ មកទល់បច្ចុប្បន្ននេះ ក្រុមហ៊ុន លី ហួរ គ្រុប មានបុត្រសម្ព័ន្ធជាច្រើនបន្ថែមទៀតដូចជា លី ហួរ ផនសប ខូអិលធីឌី (២០១០), បុរី វិមានភ្នំពេញ (២០១១), ទេពី អាក្រូ វិនិយោគ ខូអិលធីឌី (២០១១), គ្រឹះស្ថានមីក្រូហិរញ្ញវត្ថុ លី ហួរ ភីអិលស៊ី (២០១២), លី ហួរ លីស៊ីង ភីអិលស៊ី (២០១៥), លី ហួរ ផេប្រ៉ូ ភីអិលស៊ី (២០១៦), លី ហួរ អ៊ិនសួរេន ម.ក (២០១៧)។
ជាមួយគ្នានេះ នៅឆ្នាំ២០១៩ គ្រឹះស្ថានមីក្រូហិរញ្ញវត្ថុ លី ហួរ ភីអិលស៊ី ត្រូវបានប្តូរឈ្មោះទៅជា “ធនាគារ អេស ប៊ី អាយ លី ហួរ ម.ក” (SBI Ly Hour Bank) បន្ទាប់ពីធនាគារជាតិនៃកម្ពុជា បានផ្តល់ជូន គ្រឹះស្ថានមីក្រូហិរញ្ញវត្ថុ លី ហួរ ភីអិលស៊ី នូវអាជ្ញាប័ណ្ណធ្វើប្រតិបត្តិការជាធនាគារពាណិជ្ជ ក្នុងការផ្តល់សេវាកម្មហិរញ្ញវត្ថុជូនអតិថិជន ព្រមទាំងសាធារណជនទូទៅ៕
