មហាសេដ្ឋីចាស់វស្សា កំពុងវិនិយោគលើសណ្ឋាគារលំដាប់ផ្កាយ សាលពិព័រណ៌សន្និបាត និងរោងការថ្លៃៗនៅភ្នំពេញ

ជុំវិញ​ឧកញ៉ា

កំណើន​ប្រជាជន​នៅក្នុង​រាជធានីភ្នំពេញ កំពុងកើនឡើង​ជាបន្តបន្ទាប់​ពីមួយឆ្នាំទៅមួយឆ្នាំ ហើយ​ការ​កើនឡើង​នៃចំនួន​ប្រជាជន​​នេះដែរ បានធ្វើឱ្យ​តម្រូវការ​សេវា​កម្ម និងសម្ភារៈប្រើប្រាស់​ជា​ច្រើ​ន​ក៏កើនឡើង​ដូចគ្នា ក្នុងនោះ​លំនៅឋានជា​កត្តា​ចាំបាច់មួយសម្រាប់ឆ្លើយតបទៅនឹងកំណើននៃចំនួន​ប្រជាជន ដែល​ទា​ម​ទារ​ឱ្យ​មាន​ការអភិវឌ្ឍ​បន្ថែមដើម្បីបំពេញទៅតាមតម្រូវការ​នៃការរស់នៅ និងវិនិយោគជាដើម។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ខណៈចំនួនប្រជាជននៅរាជធានីភ្នំពេញបន្តកើនឡើងនេះ ដែលជាហេតុបណ្តាឲ្យមានការរៀបចំពិធីជួបជុំផ្សេងៗ លក្ខណៈផ្លូវរដ្ឋ ពាណិជ្ជកម្ម កិច្ចប្រជុំ និងការណ៍តាំងពិពរណ៌នានា ត្រូវមានកន្លែងដ៏ធំសម្រាប់រៀបចំឲ្យសមស្របទៅនឹងកំណើនចំនួនមនុស្សចូលរួម។ ប៉ុន្មានឆ្នាំចុងក្រោយនេះ មជ្ឈមណ្ឌលសន្និបាត និងពិពរណ៌ កន្លែងរៀបអាពាហ៍ពិពាហ៍ ជាច្រើនបានផុសអណ្តែតឡើងជាបន្តបន្ទាប់ក្រោមការវិនិយោគពីអ្នករកស៉ីគ្រាក់ៗនៅក្នុងស្រុក។

ក្នុងនោះសង្កេតឃើញថា មានមហាសេដ្ឋីកំពូលៗ ៧រូប កំពុងក្តោបក្តាប់វិនិយោគលើទីតាំងមជ្ឈមណ្ឌលសន្និបាត និងពិពរណ៌ កន្លែងរៀបអាពាហ៍ពិពាហ៍ និងសណ្ឋាគារលំដាប់ផ្កាយ៥ តម្លៃរាប់លានដុល្លារ ស្ថិតក្នុងតំបន់ដែលមានសក្តានុពល ហើយត្រូវបានរាជរដ្ឋាភិបាលជួលរៀបចំពិធីផ្លូវការរបស់ជាតិធំៗ ដូចជាកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនានាដែលទើបនឹងបញ្ចប់ការពីពេលថ្មីៗនេះ ក៏ដូចជាក្រុមហ៊ុន អង្គការ សមាគម និងប្រជាពលរដ្ឋជួលដើម្បីរៀបចំពិធីផ្សេងៗផងដែរ។

នៅក្នុងអត្ថបទនេះ សូមបង្ហាញសមភាពមហាសេដ្ឋីកំពូលៗ ៧រូប ជោគជ័យលើជំនួញសណ្ឋាគារ និងការជួលទីតាំងមជ្ឈមណ្ឌលសន្និបាត និងពិព័រណ៌ កន្លែងរៀបអាពាហ៍ពិពាហ៍ ដូចខាងក្រោម៖

១/ អ្នកឧកញ៉ា ពុង ឃាវសែ អគ្គនាយកក្រុមហ៊ុន អាណិកជនកម្ពុជា OCIC

អ្នកឧកញ៉ា ពុង ឃាវសែ

អ្នកឧកញ៉ា ជាអ្នកដែលប្រែក្លាយតំបន់​កោះ​ពេជ្រ​ដែល​ដើម​ឡើយ​គ្រាន់​តែ​ជា​លំនៅដ្ឋាននិង​កន្លែង​ដាំ​បន្លែរបស់​គ្រួសារ​ក្រីក្រ​ប៉ុន្មាន​រយ​នាក់នោះ ​បាន​ប្រែ​ក្លាយ​មុខ​មាត់​ទាំងស្រុង​ទៅជាមជ្ឈមណ្ឌល​ពាណិជ្ជកម្ម​និង​សំណង់​ដ៏​លេច​ធ្លោ​មួយ​របស់​កម្ពុជា។ កោះ​ទំហំ​១០០​ហិកតា​ដែល​នៅ​ប្រសព្វ​នឹង​ទន្លេ​បួន​មុខ​នេះ ត្រូវ​បាន​អភិវឌ្ឍ​នៅ​ឆ្នាំ​២០០៤ ​ដោយ​ក្រុមហ៊ុន​វិនិយោគទុន​អាណិកជន​កម្ពុជា (Overseas Cambodian Investment Corporation) របស់​ធនាគារ ​កាណាឌីយ៉ា។

ក្នុងពិធី​សម្ពោធ​​ដាក់​ឱ្យប្រើប្រាស់​​​ជាផ្លូវ​ការ​​នូវ​​ស្ពានទី​៣ ឆ្លង​​ទៅ​តំបន់​អភិវឌ្ឍន៍​ទីក្រុងកោះ​ពេជ្រ ឈ្មោះ​​ថា «ស្ពាន​​ឥន្ទ​ធ​នូ» កាលពីឆ្នាំ២០១១ អ្នក​​ឧកញ៉ា​​ពុង ឃាវ​​សែ ​បាន​ឱ្យដឹង​ថា ​ក្រុមហ៊ុន​​របស់​​លោក​​​បាន​​ចាប់​​ដំណើរការ​​អភិវឌ្ឍ​​កោះពេជ្រ​ចាប់ពីឆ្នាំ​​​២០០៤​ ​ពីរាជរដ្ឋាភិបាលមកម៉្លេះ​​។ ​ជា​ប្រយោជន៍​​​នៃ​ការ​ជួលដី​​កោះពេជ្រ​នេះ​​ រាជ​រដ្ឋាភិ​បាល​​ទទួល​​បាន​សមិទ្ធ​ផល​​​ធំៗ ដូចជា​​​​ស្ពាន​ព្រះ​មុនី​វង្ស ​ស្ពាន​អាកាស​​ក្បាលថ្នល់ ​ស្ពានអាកាស​ស្តុប​​មន្ទីរ​ពេទ្យ​ព្រះ​​កុសុមៈ​ និង​ច្រាំង​ទន្លេ​នានាជា​ច្រើន​​​ទៀត​។ ​​អ្នកឧកញ៉ាបញ្ជាក់​ថា មជ្ឈ​មណ្ឌល​កោះពេជ្រ​​​មាន​វិសាល​ភាព​ទទួល​​ភ្ញៀវ​​​​ចូលទៅ​​​តំបន់​នោះ​​ប្រមាណ​​​​៥ម៉ឺន​នាក់​។

នៅក្នុងតំបន់ កោះពេជ្រ មានគម្រោង​ធំៗ​ជាច្រើនដែល​មាន​តម្លៃ​រាប់លាន​ដុល្លារ ដូចជា​ ខុនដូ​ ​អគារពាណិជ្ជកម្ម អាង​ហែល​ទឹក ផ្សារ​ទំនើប មន្ទីរពេទ្យ និង​សាលារៀន​លំដាប់​អន្តរជាតិ និងគម្រោងបុរីជា​ដើម។ ពិសេសនោះ អ្នកឧកញ៉ា ពុង ឃាវសែ បានបោះទុនវិនិយោគលើមជ្ឈមណ្ឌលសន្និបាត និងពិពរណ៌ កោះពេជ្រ។

កាលពីឆ្នាំ២០១៩ អ្នកឧកញ៉ាក៏បានវិនិយោគ«អគារពិព័ណ៌អន្តរជាតិជ្រោយចង្វារ» សាងសង់លើផ្ទៃដីទំហំសរុបប្រហែល ២៦,៧៧៤.៣៨ ម៉ែត្រការ៉េ ឬស្មើទៅនឹងទំហំក្រឡាផ្ទៃសរុបប្រហែល ១៨,៩៦៨.២៨ ម៉ែត្រការ៉េ ដែលមានទីតាំងស្ថិតក្នុងតំបន់ទីក្រុងរណបជ្រោយចង្វារ។

២) អ្នកឧកញ៉ា លី​ យ៉ុងផាត់ អគ្គនាយកក្រុមហ៊ុន L.Y.P Group

អ្នកឧកញ៉ា លី យ៉ុងផាត់

អ្នកឧកញ៉ាត្រូវបានគេផ្តល់រហ័សនាមថា «ស្តេចកោះកុង» ដែលកំពុងវិនិយោគលើពហុវិស័យនៅក្នុងប្រទេសកម្ពុជា។ នៅឆ្នាំ២០១៩ អ្នកឧកញ៉ា បានសម្ពោធដាក់ឲ្យប្រើប្រាស់ជាផ្លូវការនូវ​អគារ​សន្និបាត​ និង​ពិព័រណ៍ មានឈ្មោះថា The Premier Center Sen Sok នៅ​លើ​ទឹកដី​ខណ្ឌ​សែនសុខ ទល់មុខផ្សារទំនើប អ៉ីអន២ នៅមិនឆ្ងាយពីផ្សារបោះដុំ ម៉ាក្រូ របស់លោកដែលទិញភាគហ៊ុនពីប្រទេសថៃ។

មជ្ឈមណ្ឌល​រៀប​មង្គលការ​ដ៏​ប្រណីត​មួយនេះ មាន​តម្លៃ​ជា​ទឹក​ប្រាក់​វិនិយោគ​ជាង​១០​លាន​ដុល្លារ​នេះ ​ជា​ជំហាន​ដំបូងដែលមាន​អគារ​សរុប​ចំនួន ៧​អគារ ហើយ​ក្នុង​មួយ​បន្ទប់អាច​ដាក់​តុការ​បាន​ចាប់​ពី ៥០​តុ ​ឡើង​ទៅ ​បើ​រំលាយ​បន្ទប់​នៃ​អគារ​ទាំង​៧​នេះ បញ្ចូល​គ្នា អាច​ដាក់​បាន​រហូត​ដល់ ៥០០​តុ​ការ ស្មើនឹង​ចំនួន​មនុស្ស ៥០០០​នាក់។ ចំណែកឯ​ទីធ្លា​ចត​រថយន្ដ​មាន​សមត្ថភាព​ដាក់​រថយន្ដ​បាន​រហូត​ដល់ ១២០០គ្រឿង និង​ម៉ូតូ ៧០០​គ្រឿង។

៣) ឧកញ៉ា ថៃ ជាហួត អគ្គនាយកក្រុមហ៊ុន ប៉េងហួត គ្រុប

ឧកញ៉ា ថៃ ជាហួត

ឧកញ៉ា ថៃ ជាហួត ជាអ្នករកស៊ីជោគជ័យក្នុងវិស័យអចលនទ្រព្យ, អប់រំ និងផ្សារទំនើប។ កាលពីខែឧសភា ឆ្នាំ២០២២ ក្រុមហ៊ុន ប៉េង ហួត គ្រុប បានសម្ពោធសាលសន្និបាត ឬសាលប្រារព្ធពិធីមង្គលការ ភីអេច ហ្គ្រេនហល ក្នុងគម្រោង PH Euro Park បឹងស្នោរ ខណ្ឌច្បារអំពៅ រាជធានីភ្នំពេញ។

សាលប្រារព្ធពិធីមង្គលការ PH Grand Hall ក្នុងគម្រោង PH Euro Park នេះ នឹងក្លាយជាជម្រើសសាលខ្នាតធំមួយបន្ថែមទៀត សម្រាប់ឱ្យប្រជាពលរដ្ឋ ក្រសួង ស្ថាប័នរដ្ឋ បណ្ដាក្រុមហ៊ុនឯកជន ឬអង្គការជាតិ និងអន្តរជាតិផ្សេងៗ ជួលសម្រាប់រៀបចំកម្មវិធី។

ក្រៅពីមហាសេដ្ឋីទាំង៣ខាងលើ ក៏មានមហាសេដ្ឋីគ្រាក់ៗមួយចំនួនទៀត បានវិនិយោគលើសណ្ឋារគារលំដាប់ផ្កាយ ហើយក៏ជាកន្លែងដែលតែងតែរៀបចំកិច្ចប្រជុំលំដាប់ជាតិ និងអន្តរជាតិ ដែលអាចផ្ទុកមនុស្សរាប់ពាន់នាក់បានផងដែរ។

មហាសេដ្ឋីទាំងនោះរួមមាន៖ អ្នកឧកញ៉ា គិត ម៉េង សណ្ឋាគារ កាំបូឌីយ៉ាណា ស្ថិតនៅជាប់មាត់ទន្លេចតុមុខ នៅមិនឆ្ងាយពីមជ្ឈមណ្ឌលល្បែងកម្សាន្ត ណាហ្គាវើលដ៍, អ្នកឧកញ៉ា សុខ គង់ សណ្ឋាគារ សុខា នៅទល់មុខព្រះបរមរាជវាំង ដែលកាលពីឆ្នាំ២០២២ កម្ពុជាក្នុងឋានៈជាម្ចាស់ផ្ទះបានរៀបចំកិច្ចប្រជុំកំពូល និងកិច្ចប្រជុំពាក់ព័ន្ធនានានៅសណ្ឋាគារ សុខាភ្នំពេញ និងសុខាអង្គរ ខេត្តសៀមរាប និងនៅខេត្តព្រះសីហនុ, អ្នកឧកញ៉ា លាង ឃុន សណ្ឋាគារលំដាប់ផ្កាយ ហៃយ៉ាត់ រីជេនស៊ី ភ្នំពេញ និងជាប់នឹងសារមន្ទីរជាតិ និងសាលាវិចិត្រសិល្បៈ, អ្នកឧកញ៉ា ជា រតនា សណ្ឋាគារលំដាប់ផ្កាយ ៥  Sun & Moon Riverside ជាប់នឹងស្ពានអាកាសក្បាលថ្នល់ ទល់មុខអគ្គស្នងការដ្ឋាននរគបាលជាតិ៕

ពីឆ្វេង៖ អ្នកឧកញ៉ា គិត ម៉េង, អ្នកឧកញ៉ា សុខ គង់, អ្នកឧកញ៉ា លាង ឃុន និងអ្នកឧកញ៉ា ជា រតនា