ក្រុមហ៊ុន ជីប ម៉ុង គ្រុប និងក្រុមហ៊ុន វ៉ាយអិលភី គ្រុប បានបរិច្ចាគថវិកាចំនួន ១លានដុល្លារជូនមូលនិធិតេជោ១២៥ នៃគណៈយុទ្ធមិត្តជំនាន់បម្រើកងទ័ព ឆ្នាំ១៩៧៨ ។ ថវិកាចំនួន ១លានដុល្លារនេះ ត្រូវបានប្រគល់ដោយផ្ទាល់ជូនលោកស្រី ម៉ែន សំអន ឧបនាយករដ្ឋមន្ត្រី រដ្ឋមន្រ្តីក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច នៅថ្ងៃទី២២ ខែមីនា ឆ្នាំ២០២៣។
ថវិកាសរុប ១លានដុល្លារអាមេរិក អ្នកឧកញ៉ា ភាព ហៀក អ្នកឧកញ៉ា លាង ឃុន សហស្ថាបនិកក្រុមហ៊ុន ជីបម៉ុង គ្រុប ឧបត្ថម្ភ ៥០ម៉ឺនដុល្លារ និងអ្នកឧកញ៉ា លី យ៉ុងផាត់ អគ្គនាយកក្រុមហ៊ុន វ៉ាយអិលភី គ្រុប បរិច្ចាគថវិកាចំនួន ៥០ម៉ឺនដុល្លារ។
សូមជម្រាបជូនបន្តិចថា គណៈយុទ្ធមិត្តបម្រើកងទ័ពឆ្នាំ១៩៧៨ មានសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ជាប្រធានកិត្តិយស។ មែនទែនទៅ អង្គភាព ១២៥ ជាអង្គភាពកងទ័ពដំបូង នៃរណសិរ្សសាមគ្គីសង្គ្រោះជាតិ ដែលត្រូវបានបង្កើតឡើងដោយសម្តេចតេជោ ហ៊ុន សែន នៅថ្ងៃទី១២ ខែឧសភា ឆ្នាំ១៩៧៨៕
