សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហើបពីសមាសភាពនាយករដ្ឋមន្រ្តីថ្មី អាចនឹងមានលទ្ធភាពខ្ពស់ បន្តចុះសួរសុខទុក្ខកម្មករ-កម្មការិនី ជំនួសឱ្យនាយករដ្ឋមន្រ្តីចាស់ ក្រោយដំណើរការបង្កើតរាជរដ្ឋាភិបាលថ្មីបានបញ្ចប់រួចរាល់។
តាមរយៈតេឡេក្រាមនៅព្រឹកថ្ងៃទី២៦ ខែកក្កដា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសសុំយោគយល់អធ្យាស្រ័យពីបងប្អូន កូនក្មួយ កម្មករ-កម្មការិនី ចំពោះគម្រោងជួបសំណេះសំណាលសាកសួរទុក្ខដែលគ្រោងធ្វើចាប់ពីថ្ងៃទី២៧ ខែកក្កដា ឆ្នាំ២០២៣ ចំនួន១០គោលដៅបន្ថែមទៀត ត្រូវលើកទៅក្រោយពេលរាជរដ្ឋាភិបាលថ្មីបង្កើតឡើងវិញ ដោយសារកត្តាពេលវេលា និងភាពមមាញឹកក្នុងដំណើរការបង្កើតរាជរដ្ឋាភិបាលថ្មី។
ទន្ទឹមគ្នានេះ សម្តេចបានបញ្ជាក់បន្ថែមថា៖«ខ្ញុំចង់អ្វីៗថ្មីបានកើតឡើង ដែលរដ្ឋាភិបាលថ្មីចំពោះក្មួយៗ កូនៗ ចៅ ដែលជាកម្មករ-កម្មការីទាំងអស់ ដែលអាចនឹងមានលទ្ធភាពខ្ពស់បំផុត មាននាយករដ្ឋមន្រ្តីថ្មី នឹងទៅចុះសួរសុខទុក្ខកម្មករ-កម្មការិនី ជំនួសឱ្យនាយករដ្ឋមន្រ្តីចាស់ ដែលនេះគឺជាលទ្ធភាពនៃការកើតឡើងនៃរដ្ឋាភិបាលថ្មី ដែលមានទាំងនាយករដ្ឋមន្រ្តីថ្មី ហើយខ្ញុំក៏មិនទៅណាទេ ខ្ញុំនឹងបកស្រាយរឿងនេះនៅថ្ងៃសម្ពោធផ្លូវក្រវ៉ាត់ក្រុងទី៣ នៅថ្ងៃទី៣ ខែសីហាខាងមុខនេះ»។
ជាថ្មីម្តងទៀត សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅតែបន្តអំពាវនាវសុំបាន សុំយោគយល់អធ្យាស្រ័យពីបងប្អូនកម្មករ-កម្មការិនីជាថ្មីម្តងទៀត ចំពោះការខកខានមិនបានចុះសួរសុខទុក្ខ និងសំណេះតាមការសន្យាផងដែរ។
សូមបញ្ជាក់ដែរថា ចំពោះបេក្ខភាពនាយករដ្ឋមន្រ្តីថ្មី ដែលនឹងមកបន្តតំណែងជានាយករដ្ឋមន្រ្តីជំនួសឱ្យសម្តេច ហ៊ុន សែន ដែលកំពុងកាន់តំណែងជានាយករដ្ឋមន្រ្តីបច្ចុប្បន្ន គឺឯកឧត្តមបណ្ឌិត ហ៊ុន ម៉ាណែត ជាកូនប្រុសច្បង និងជាអនាគតបេក្ខជននាយករដ្ឋមន្រ្តីពីគណបក្សប្រជាជនកម្ពុជាផងដែរ៕
អត្ថបទ៖ ពិសី
