លោក ជា សុផារ៉ា នៅព្រឹកថ្ងៃទី២៣ ខែសីហា ឆ្នាំ២០២៣នេះ បានលាថ្នាក់ដឹកនាំ និងមន្ត្រីរាជការក្រសួងរៀបចំដែនដី នគរូបនីយកម្ម និងសំណង់ ជាផ្លូវការ បន្ទាប់ពីលោកកាន់តួនាទីជា រដ្ឋមន្ត្រីក្រសួងមួយនេះ អស់រយៈពេលប្រមាណជាង ៧ឆ្នាំ តាំងពីឆ្នាំ២០១៦ រហូតមកដល់ចប់អាណត្តិទី៦ នៃរដ្ឋសភា។
ក្នុងពិធីលានិងជូនដំណើរលោក ជា សុផារ៉ា កាលពីព្រឹកមិញនេះ លោកឧបនាយករដ្ឋមន្ត្រី សាយ សំអាល រដ្ឋមន្ត្រីថ្មី នៃក្រសួងរៀបចំដែនដី នគរូបនីយកម្ម និងសំណង់ ក៏បានអញ្ជើញចូលរួមផងដែរ។ ជាមួយគ្នានេះ គេឃើញមានវត្តមាន រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន និងប្រធានមន្ទីរគ្រប់រាជធានី ខេត្ត រួមទាំងមន្ត្រីរាជការក្រសួងគ្រប់លំដាប់ថ្នាក់ ក៏បានអញ្ជើញចូលរួមអមដំណើរ ទះដៃ និងលើកដៃជម្រាបលា ជូនដំណើរលោក ជា សុផារ៉ា ឡើងរថយន្ត ធ្វើដំណើរចាកចេញពីទីស្តីការក្រសួងរៀបចំដែនដី ដោយក្តីអាលោះអាល័យផងដែរ។
លោក ជា សុផារ៉ា អតីតអភិបាលរាជធានីភ្នំពេញ ធ្លាប់ជារដ្ឋមន្ត្រីក្រសួងអភិវឌ្ឍន៍ជនបទ ចន្លោះឆ្នាំ២០០៨ ដល់ឆ្នាំ២០១៦។ នៅថ្ងៃទី០៤ ខែមេសា ឆ្នាំ២០១៦ ព្រះមហាក្សត្រ បានចេញព្រះរាជក្រឹត្យ កែសម្រួលភារកិច្ចរបស់លោក ឱ្យកាន់តួនាទីជា រដ្ឋមន្ត្រីក្រសួងរៀបចំដែនដី ជំនួសលោក អ៊ឹម ឈុនលឹម ដែលទៅកាន់តួនាទីជាប្រធានក្រុមប្រឹក្សាធម្មនុញ្ញ រហូតមកដល់ចប់អាណត្តិទី៦នេះ។
សូមជម្រាបថា ក្នុងរយៈពេលជាង៧ឆ្នាំ ដែលលោក ជា សុផារ៉ា អតីតឧបនាយករដ្ឋមន្ត្រី ដឹកនាំក្រសួងរៀបចំដែនដី លោកបានបន្សល់ទុកស្នាដៃធំៗជាច្រើនដូចជា ការសាងសង់អគារទីស្តីការថ្មីក្រសួងរៀបចំដែនដីដ៏ធំស្គឹមស្គៃ ការចូលរួមសាងសង់ផ្លូវ៣៨ខ្សែ និងការកែលម្អរដងស្ទឹងសៀមរាប ការចូលរួមសាងសង់ផ្លូវថ្មីចំនួន៣៤ខ្សែនៅខេត្តព្រះសីហនុ ការកសាងអាងប្រព្រឹត្តកម្មទឹកកខ្វក់ខេត្តព្រះសីហនុ ការចុះបញ្ជីដីធ្លីទូទាំងប្រទេស និងការដោះស្រាយវិវាទដីធ្លី បានជាច្រើន រួមទាំងសមិទ្ធផលជាច្រើនទៀត។ សម្រាប់អាណត្តិទី៧នេះ លោក ជា សុផារ៉ា គឺជាសមាជិករដ្ឋសភា ដែលលោកនឹងជួយការងារខាងស្ថាប័ននីតិបញ្ញត្តិ ក្នុងការត្រួតពិនិត្យ និងអនុម័តច្បាប់នានា៕
