ក្រុមការងារជំរុញការវិនិយោគក្នុងខេត្តព្រះសីហនុ និងរដ្ឋបាលខេត្តព្រះសីហនុ បានសហការរៀបចំសិក្ខាសាលាស្តីពី «ការអនុវត្តគោលការណ៍លើកទឹកចិត្តក្រោមវិសាលភាពកម្មវិធីពិសេសជំរុញការវិនិយោគក្នុងខេត្តព្រះសីហនុ» ដែលមានអ្នកចូលរួមជា វិនិយោគិន ធុរជនបរទេស និង ខ្មែរ ដែលជាម្ចាស់គម្រោងទទួលបានការលើកទឹកចិត្ត និង ម្ចាស់គម្រោងដែលកំពុងស្នើការលើកទឹកចិត្ត រួមទាំងថ្នាក់ដឹកនាំ និង មន្ត្រីរាជការពីស្ថាប័នពាក់ព័ន្ធ សរុបប្រមាណ ៣២០ នាក់។
សិក្ខាសាលា ប្រព្រឹត្តិទៅក្រោមអធិបតីភាព លោក ហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី ប្រធានក្រុមការងារជំរុញការវិនិយោគក្នុងខេត្តព្រះសីហនុ និង លោក ម៉ាង ស៊ីណេត អភិបាល ខេត្តព្រះសីហនុ កាលពីថ្ងៃទី ១១ ខែ មិថុនា ឆ្នាំ ២០២៥ នៅរមណីយដ្ឋានឆ្នេរសុខា ខេត្តព្រះសីហនុ។
សិក្ខាសាលានេះ មានគោលបំណងពិនិត្យមើលវឌ្ឍនភាពរបស់ម្ចាស់គម្រោងដែលទទួលការលើកទឹកចិត្តផ្នែកពន្ធ និង ការសម្រួលនីតិវិធី, ស្តាប់បញ្ហាប្រឈម និង ស្វែងរកដំណោះស្រាយជូនវិនិយោគិន ដើម្បីធានាបានថា ម្ចាស់គម្រោង/វិនិយោគិន អាចអនុវត្តគម្រោងរបស់ខ្លួនបានដោយរលូន និង ឆាប់រហ័ស ។
ថ្លែងនាឱកាសនោះ លោក ហ៊ាន សាហ៊ីប បានគូសបញ្ជាក់ថា «កម្មវិធីពិសេសជំរុញការវិនិយោគក្នុងខេត្តព្រះសីហនុឆ្នាំ២០២៤» គឺជាគំនិតផ្ដួចផ្ដើមដ៏ប្រពៃរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា» ។
លោកបានបន្ថែមថា កម្មវិធីពិសេសនេះ មិនត្រឹមតែផ្តល់ការលើកទឹកចិត្តតាមរយៈការអនុគ្រោះពន្ធដារ និង ពន្ធគយប៉ុណ្ណោះទេ ប៉ុន្តែថែមទាំងផ្តល់ការសម្របសម្រួលគ្រប់ជ្រុងជ្រោយ តាមរយៈការសម្រួលនីតិវិធី និង ផ្តល់ការគំាទ្រដោយផ្ទាល់ តាមយៈក្រុមការងារពិសេសរបស់រាជរដ្ឋាភិបាល ដែលមានតំណាងពីគ្រប់ក្រសួងស្ថាប័នពាក់ព័ន្ធ ។
ជាមួយគ្នានោះ លោកក៏បានលើកទឹកចិត្តឱ្យវិនិយោគិន និង អ្នកចូលរួមទាំងអស់ចូលរួមលើកមតិយោបល់ និង អំពីបញ្ហាប្រឈមដែលកំពុងជួបប្រទះ ក៏ដូចជាធ្វើការរាយការណ៍ជាប្រចាំ មកក្រុមការងារជំរុញការវិនិយោគ ដើម្បីក្រុមការងារមានព័ត៌មាននិងធាតុចូលគ្រប់គ្រាន់ដើម្បីកំណត់បញ្ហានិងដោះស្រាយជូន។ លើសពីនេះ ក្រុមការងារនឹងបន្តបំពេញភារកិច្ចរបស់ខ្លួន ក្នុងការផ្តល់សេវាប្រឹក្សាយោបល់, ការពន្យល់ច្បាស់ៗ, ការពិនិត្យ និង សម្រេចជាគោលការណ៍ផ្តល់ការលើកទឹកចិត្ត ការអនុគ្រោះ ការសម្រួលនីតិវិធី និង ការសម្របសម្រួលវិវាទក្រៅប្រព័ន្ធតុលាការ, ការសម្របសម្រួលដោះស្រាយបញ្ហាប្រឈមផ្សេងៗនិងការថែទាំវិនិយោគដោយឥតគិតថ្លៃប្រកបដោយវិជ្ជាជីវៈ និងទំនុកចិត្ត តាមយន្តការ“ច្រកចេញចូលតែមួយ” ដែលមានក្រសួងស្ថាប័នពាក់ព័ន្ធ ផ្តល់នូវការសម្របសម្រួល កិច្ចសហការ និងការគាំទ្រផ្សេងៗ ។
សូមជម្រាបជូនថា គិតចាប់ពីឆ្នាំ ២០២៤ និង ៥ ខែដើមឆ្នាំ ២០២៥ នេះ ក្រុមការងារជំរុញការវិនិយោគក្នុងខេត្តព្រះសីហនុបានធ្វើការប្រជុំចំនួន ១៦ លើក ដើម្បីពិនិត្យ និង អនុម័ត និងបានផ្តល់គោលការណ៍លើកទឹកចិត្តដល់គម្រោងចំនួន ២៩៦ ដែលមានទុនគ្រោងវិនិយោគប្រមាណ ៧ ០០០ លានដុល្លារ និង ប៉ាន់ស្មានអាចបង្កើតការងារប្រមាណជា ៥៣ ០០០ កន្លែង។
នៅក្នុងខែ មិថុនា នេះ ក្រុមការងារនឹងគ្រោងកិច្ចប្រជុំលើកទី ១៧ ដើម្បីពិនិត្យ និងអនុម័តលើគម្រោងចំនួន ៣៥ បន្ថែមទៀត ។ សម្រាប់រយៈពេល ៥ ខែ ដើមឆ្នាំ ២០២៥ មានគម្រោងសរុបចំនួន ៨៦ ដែលមានទំហំទុនគ្រោងវិនិយោគសរុប ៩៩៧,៥ លានដុល្លារអាមេរិកទទួលបានការលើកទឹកចិត្ត ធៀបនឹង ៥ ខែដើមឆ្នាំ ២០២៤ ក្នុងរយៈពេលដូចគ្នា ដែលមានតែ ៤១ គម្រោងប៉ុណ្ណោះដែលទទួលការលើកទឹកចិត្ត ដែលនេះជាសញ្ញាបង្ហាញថាវិនិយោគិនកាន់តែមានទំនុកចិត្តលើក្រុមការងារ និងគោលនយោបាយរបស់រាជរដ្ឋាភិបាល ៕
