តាមអង្កេតចន្លោះជំរឿនប្រជាជននៅព្រះរាជាណាចក្រកម្ពុជាឆ្នាំ២០២៤ បានបង្ហាញថាចំនួននៃអគារ លំនៅដ្ឋាននៅប្រទេសកម្ពុជា បានកើនឡើងពី ៣.១៨១.៣៧២ នៅឆ្នាំ ២០១៩ ទៅ ៣.៧៣៥.៦៥៩ ឆ្នាំ២០២៤។
របាយការណ៍នេះ បានបង្ហាញថា នៅទូទាំងប្រទេសកម្ពុជាមាន ៨៦,៨ ភាគរយនៃអគារជាលំនៅដ្ឋានសម្រាប់ស្នាក់នៅ។ សមាមាត្រនៅតំបន់ទីប្រជុំជន និងជនបទ មានចំនួន ៨៤,៣ ភាគរយ និង ៨៨,៨ ភាគរយ។ ប្រភេទអគារ ដែលជាលំនៅដ្ឋានផង និងប្រើប្រាស់សម្រាប់គោលបំណងផ្សេងទៀតមានសមាមាត្រ ខ្ពស់នៅតំបន់ទីប្រជុំជនជាងជនបទ។
នៅឆ្នាំ២០២៤ ប្រមាណ ៩១,៦ ភាគរយនៃអគារលំនៅដ្ឋាន ជាអគារ មានលក្ខណៈអចិន្ត្រៃយ៍ ប្រមាណ ៨,០ ភាគរយ នៃអគារលំនៅដ្ឋាន ជាសំណង់មានលក្ខណៈពាក់កណ្តាលអចិន្ត្រៃយ៍ និង ០,៤ ភាគរយ ជារចនាសម្ព័ន្ធមានលក្ខណៈបណ្តោះអាសន្ន ដែលអគារមានលក្ខណៈអចិន្ត្រៃយ៍ និងពាក់កណ្តាលអចិន្ត្រៃយ៍ មានការកើនឡើងបើធៀបនឹងឆ្នាំ២០១៩ មាន ៩១,១ ភាគរយ និង ៧,៤ ភាគរយ លើកលែងតែសំណង់លក្ខណៈបណ្តោះអាសន្នមានការថយចុះ ១,៦ ភាគរយ។
សូមបញ្ជាក់ដែរថា គិតត្រឹមដើមខែឧសភា ឆ្នាំ២០២៤ កម្ពុជាមានប្រជាជនសរុបចំនួន ១៧.២៨០.៥៤៣នាក់។ ចំនួនប្រជាជនប្រុស មាន ៨.៤៩០.៤១៩ នាក់ ស្មើនឹង ៤៩,១ ភាគរយ ខណៈដែលចំនួនប្រជាជនជាស្រីមាន ៨.៧៩០.១២៥ នាក់ ស្មើនឹង ៥០,៩ ភាគរយនៃចំនួនប្រជាជនសរុប ។ នេះបង្ហាញថាចំនួនប្រជាជនកម្ពុជាបានកើនឡើង ១,៧លាន ក្នុងរយៈពេល ៥ឆ្នាំ រវាងឆ្នាំ២០១៩ និង ២០២៤។ ជាមួយគ្នានេះ អត្រាកំណើនប្រចាំឆ្នាំមាន ២,១ ភាគរយ ខ្ពស់ជាងឆ្នាំ២០១៩ ដែលមាន ១,៤ ភាគរយ៕
