គណៈប្រតិភូកម្ពុជា បានបន្តធ្វើដំណើរទស្សនកិច្ចអាកាសយានដ្ឋានអន្តរជាតិស៊ីដនី (SYD) របស់អូស្ត្រាលី ដែលវិនិយោគដោយក្រុមហ៊ុន Global Infrastructure Partners ដើម្បីដឹងពីដំណើរការអាកាសយានដ្ឋាន និងជំរុញការវិនិយោគបន្ថែមទៀត។
ទស្សនកិច្ចទៅកាន់អាកាសយានដ្ឋានអន្តរជាតិស៊ីដនីរបស់អូស្រ្តាលី បានធ្វើឡើងកាលថ្ងៃទី២៦ ខែសីហា ឆ្នាំ២០២៥ ដឹកនាំលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ដើម្បីស្វែងយល់ពីការអភិវឌ្ឍ និងគ្រប់គ្រងអាកាសយានដ្ឋានអន្តរជាតិស៊ីដនី (SYD) ដែលជាគម្រោងវិនិយោគមួយរបស់ក្រុមហ៊ុន Global Infrastructure Partners (GIP)។
លោក ស៊ុន ចាន់ថុល បានឱ្យដឹងថា ក្រុមហ៊ុន GIP គឺជាក្រុមហ៊ុនវិនិយោគផ្នែកហេដ្ឋារចនាសម្ព័ន្ធឯករាជ្យឈានមុខគេមួយនៅលើពិភពលោក ខណៈក្រុមហ៊ុននេះមានឯកទេសក្នុងការវិនិយោគ កាន់កាប់ និងប្រតិបត្តិការទ្រព្យសកម្ម ហេដ្ឋារចនាសម្ព័ន្ធដ៏ធំ និងប្រទាក់ក្រឡានៅក្នុងវិស័យផ្សេងៗ។
លោកបន្តថា បច្ចុប្បន្ន GIP ផ្តោតការវិនិយោគលើប្រភេទទ្រព្យសកម្មហេដ្ឋារចនាសម្ព័ន្ធសំខាន់ៗដូចជា៖ ១. ថាមពល រួមមាន ថាមពលកកើតឡើងវិញ, ការផលិត និងចែកចាយថាមពល, ហេដ្ឋារចនាសម្ព័ន្ធឧស្ម័ន និងប្រេង ២. វិស័យដឹកជញ្ជូន រួមមាន អាកាសយានដ្ឋាន, កំពង់ផែ, ផ្លូវដែក, និងហេដ្ឋារចនាសម្ព័ន្ធដឹកជញ្ជូនផ្សេងទៀត ៣. ហេដ្ឋារចនាសម្ព័ន្ធឌីជីថល រួមមាន មជ្ឈមណ្ឌលទិន្នន័យ, បណ្តាញខ្សែកាប Fiber Optic និងបង្គោលអង់តែនទូរស័ព្ទ, និង ៤. ការគ្រប់គ្រងកាកសំណល់ និងហេដ្ឋារចនាសម្ព័ន្ធទឹក។
ជាមួយគ្នានេះ លោកឧបនាយករដ្ឋមន្ត្រី ក៏បានផ្តល់ការណែនាំឱ្យក្រុមហ៊ុន GIP សម្លឹងមើលកាលានុវត្តភាពវិនិយោគនៅកម្ពុជា ជាពិសេសចូលរួមអនុវត្តគម្រោងក្រោមផែនការមេអភិវឌ្ឍន៍ឡូជីស្ទិក។
សូមជម្រាបថា អាកាសយានដ្ឋានអន្តរជាតិស៊ីដនី គឺជាអាកាសយានដ្ឋានដែល មានភាពមមាញឹកមួយនៅក្នុងប្រទេសអូស្ត្រាលី និងជាច្រកអន្តរជាតិដ៏សំខាន់មួយ ដែលបាននិងកំពុងដើរតួនាទីយ៉ាងសំខាន់ក្នុងការតភ្ជាប់ទីក្រុងស៊ីដនីទៅកាន់ពិភពលោកទាំងមូល។ បច្ចុប្បន្នអាកាសយានដ្ឋាននេះត្រូវបានកាន់កាប់ដោយសម្ព័ន្ធវិនិយោគមួយឈ្មោះថា Sydney Aviation Alliance (SAA) ដោយមានក្រុមហ៊ុន Sydney Airport Corporation Limited (SACL) ជាប្រតិបត្តិករអាកាសយានដ្ឋាន ក្នុងអាកាសយានដ្ឋាន៕ អត្ថបទ៖ហ្សាលីន
