ឱកាសទទួលបានទុនកម្ចីការប្រាក់ទាប និងយន្តការគាំទ្រផ្នែកហិរញ្ញវត្ថុសម្រាប់វិស័យកសិកម្ម ត្រូវបានលើកយកមកជជែកយ៉ាងផុលផុស នៅក្នុងបទបង្ហាញស្តីពី កម្មវិធីហិរញ្ញប្បទាន និងឥណទានសម្រាប់អាជីវកម្មកសិកម្ម នាឱកាសនៃថ្ងៃបើកឆាកនៃវេទិកា និងពិព័រណ៍កសិកម្មកម្ពុជា ដែលបានប្រព្រឹត្តទៅកាលពីព្រឹកថ្ងៃទី២៣ ខែតុលា ឆ្នាំ២០២៦ នេះ។
នៅក្នុងជំនួបដ៏មានសារៈសំខាន់នេះ មានការអញ្ជើញចូលរួមពីវាគ្មិនកិត្តិយសដែលជាអ្នកជំនាញហិរញ្ញវត្ថុឈានមុខ ក្នុងនោះរួមមានលោក ហ៊ូ សិរី តំណាងធនាគារជាតិនៃកម្ពុជា លោក គង់ សីហា តំណាងធនាគារសហគ្រាសធុនតូចនិងមធ្យមកម្ពុជា លោក មិត្ត ប៊ុន តំណាងធនាគារអភិវឌ្ឍន៍ជនបទនិងកសិកម្ម ព្រមទាំងលោកស្រី ពិន ម៉ានីកា តំណាងសាជីវកម្មធានាឥណទានកម្ពុជា។
យុទ្ធសាស្ត្រគន្លឹះៗនៃការតភ្ជាប់ខ្សែច្រវាក់តម្លៃ និងផលិតកម្ម ត្រូវបានលាតត្រដាងឡើងក្នុងគោលបំណងផ្តល់ធាតុចូលដ៏មានតម្លៃដល់ម្ចាស់អាជីវកម្មកសិកម្មទាំងអស់។
