ដើម្បីលើកកម្ពស់ជីវភាព និងការរស់នៅរបស់មន្ត្រីរាជការ កងកម្លាំងប្រដាប់អាវុធគ្រប់ភេទ រដ្ឋាភិបាលបានខិតខំប្រឹងប្រែងយកចិត្តដាក់យ៉ាងខ្លាំង សម្រាប់ដំឡើងប្រាក់បៀវត្សរ៍ដើម្បីជំរុញប្រសិទ្ធភាពក្នុងការបំពេញការងារ។
គិតត្រឹមឆ្នាំ២០២១ នេះ រាជរដ្ឋាភិបាលបានរៀបចំប្រាក់ចំណូលជូនមន្ត្រីរាជការ និងកងកម្លាំងប្រដាប់អាវុធ ឱ្យទទួលបានប្រាក់បៀវត្សអប្បបរមាកើនដល់កម្រិតជាង១លាន១៧ម៉ឺនរៀល ហើយការបើកបៀវត្សបានអនុវត្តទាន់ពេលវេលាគឺបើក២ដងក្នុងមួយខែតាមប្រព័ន្ធធនាគារ។
ក្រៅពីការដំឡើងប្រាក់បៀវត្សដល់មន្រ្តីរាជការ កងកម្លាំងប្រដាប់អាវុធ ក្នុងឱកាសបុណ្យទានធំៗរាជរដ្ឋាភិបាលកម្ពុជា តែងតែផ្ដល់ប្រាក់ឧបត្ថម្ភបន្ថែមជារៀងរាល់ឆ្នាំ។ តួយ៉ាងក្នុងឱកាសពិធីចូលឆ្នាំថ្មីនេះរដ្ឋាភិបាលក៏បានចេញអនុក្រឹត្យផ្ដល់ប្រាក់ឧបត្ថម្ភម្នាក់ៗចំនួន៥ម៉ឺនរៀលជនដល់មន្រ្តីរាជការ សម្រាប់ថ្ងៃឈប់សម្រាកចូលឆ្នាំថ្មីប្រពៃណីជាតិនេះផងដែរ។
ផលិតផលក្នុងស្រុកសរុប (ផ.ស.ស.) របស់ពលរដ្ឋជាមធ្យមក្នុងម្នាក់កើនឡើងពី១ ៦៨៣ដុល្លារអាម៉េរិក ក្នុងឆ្នាំ២០២០ ដល់ប្រមាណ១ ៧៣០ដុល្លារអាម៉េរិក ក្នុងឆ្នាំ២០២១។ ឆ្នាំ២០២១ សេដ្ឋកិច្ចកម្ពុជាមានកំណើនប្រមាណ ២,៤% ហើយសម្រាប់ឆ្នាំ២០២២នេះ តាមការប៉ាន់ស្មានអាចមានកំណើនក្នុងអត្រា ៤,៨%។
កម្ពុជាបានអនុវត្តគោលនយោបាយម៉ាក្រូសេដ្ឋកិច្ចប្រកបដោយភាពប្រុងប្រយ័ត្ន និងធ្វើឱ្យសេដ្ឋកិច្ច មានស្ថិរភាព ហើយបានជំរុញនិងលើកកម្ពស់ការធ្វើពិពិធកម្មសេដ្ឋកិច្ច ភាពប្រកួតប្រជែង ព្រមទាំងការផលិត និងការប្រើប្រាស់ក្នុងស្រុក។ ទំហំពាណិជ្ជកម្មអន្តរជាតិមានប្រមាណជាង ៤៥ ៥៧៦ លានដុល្លារអាម៉េរិក ក្នុងនោះការនាំចេញមានប្រមាណជាង ១៧ ៦៨២លានដុល្លារអាម៉េរិក៕
