កម្ពុជាទទួលឥណទានសម្បទានពីរដ្ឋាភិបាលអាល្លឺម៉ង់ ប្រមាណជិត ១០៦ លានដុល្លារ នារយៈកាល ៣ ឆ្នាំចុងក្រោយនេះ តាមរយៈធនាគារអភិវឌ្ឍន៍អាល្លឺម៉ង់ (Kfw)។
ក្នុងជំនួបជាមួយលោក Christlan Berger ឯកអគ្គរដ្ឋទូតអាលឺ្លម៉ង់ប្រចាំនៅកម្ពុជាកាលពីពេលថ្មីៗនេះ លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានថ្លែងអំណរគុណដល់រដ្ឋាភិបាលអាល្លឺម៉ង់ ដែលបានរួមចំណែកចូលរួមអភិវឌ្ឍន៍សេដ្ឋកិច្ចសង្គមកម្ពុជា។
លោក អូន ព័ន្ធមុនីរ័ត្ន បញ្ជាក់ថា រយៈកាល ៣ ឆ្នាំ កម្ពុជាបានទទួលជំនួយអភិវឌ្ឍពីរដ្ឋាភិបាលអាល្លឺម៉ង់ជាបន្តបន្ទាប់។ ឥណទានសម្បទានដែលកម្ពុជាទទួលបានពីរដ្ឋាភិបាលសាធារណរដ្ឋសហព័ន្ធអាល្លឺម៉ង់ លើកទី ១ ក្នុងឆ្នាំ២០១៩ ប្រមាណជិត ៣២ លានដុល្លារ ក្នុងការគាំទ្រអនុវត្តគម្រោងប្រសិទ្ធភាពថាមពលសម្រាប់ការផ្គត់ផ្គង់អគ្គិសនីជនបទ។ លើកទី២ ក្នុងឆ្នាំ ២០២០ ប្រមាណ ជិត ៣២លានដុល្លារដូចគ្នា សម្រាប់ហិរញ្ញប្បទានដល់កម្មវិធីអភិវឌ្ឍន៍ហេដ្ឋារចនាសម្ព័ន្ធជនបទកម្ពុជា។
ដោយឡែកថ្មីៗនេះ ក៏បានចុះហត្ថលេខាលើកិច្ចព្រមព្រៀងសន្យាផ្តល់ឥណទានសម្បទានថ្មីមួយទៀត ដែលមានទឹកប្រាក់ប្រមាណ ៣២ លានដុល្លារ សម្រាប់គម្រោងប្រសិទ្ធភាពថាមពលផ្គត់ផ្គង់អគ្គិសនីជនបទ ២ ដែលជាការបំពេញបន្ថែមទៅដល់កិច្ចខិតខំប្រឹងប្រែងនិងការផ្តល់កិច្ចសហប្រតិបត្តិការល្អប្រសើរជាបន្តបន្ទាប់របស់រាជរដ្ឋាភិបាលកម្ពុជា ក្នុងការបង្កើននិងគាំទ្រឲ្យបានទូលំទូលាយនូវប្រសិទ្ធភាពថាមពល និងការផ្គត់ផ្គង់ថាមពលនៅតាមទីជនបទក្នុងប្រទេស៕
អត្ថបទ៖ ស្រីណាត
