រដ្ឋបាលគយប្រទេសចិន កាលពីថ្ងៃទី២៧ ខែសីហា ឆ្នាំ២០២២នេះ បង្ហាញបញ្ជីឈ្មោះក្រុមហ៊ុនដែលបានចុះបញ្ជីក្នុងការនាំចេញពោតគ្រាប់នៅកម្ពុជាទៅកាន់ប្រទេសចិន និងបញ្ជាក់អំពីការបញ្ចប់នីតិវិធីទាំងស្រុងសម្រាប់ការនាំចេញពោតគ្រាប់ និងត្រូវបានអនុញ្ញាតឱ្យនាំចេញទៅកាន់ប្រទេសចិនជាផ្លូវការ។ នេះបើតាមស្ថានទូតចិនប្រចាំនៅកម្ពុជា នៅថ្ងៃចន្ទ ទី២៩ ខែសីហាម្សិលមិញ។
អនុញ្ញាតជាផ្លូវការនេះធ្វើឡើងក្រសួងកសិកម្ម កាលពីចុងខែកក្កដា ឆ្នាំ២០២២នេះ បានអះអាងថាបានចុះបញ្ជីឈ្មោះក្រុមហ៊ុននាំចេញគ្រាប់ពោតទៅកាន់ប្រទេសចិន និងបានធ្វើការត្រួតពិនិត្យស្តីពីលក្ខខណ្ឌតម្រូវភូតគាមអនាម័យសម្រាប់ការនាំចេញគ្រាប់ពោតកម្ពុជាទៅកាន់ប្រទេសចិនតាមរយៈអគ្គរដ្ឋបាលគយចិនរួចរាល់ហើយ។
ផ្អែកតាមស្ថិតិក្រសួងពាណិជ្ជកម្ម កាលពីថ្ងៃទី១៩ ខែកក្កដា ឆ្នាំ២០២២ បានបញ្ជាក់ថា បច្ចុប្បន្នផ្ទៃដីដាំដុះពោតក្រហមមានចំនួនប្រមាណជាង ១៤ម៉ឺន ហិកតា និងមានទីផ្សារនាំចេញទៅក្រៅប្រទេស ដូចជាប្រទេស ថៃ វៀតណាម កូរ៉េ និងបង់ក្លាដេស ដោយនាំចេញទៅតាមច្រករបៀងទៅប្រទេសជិតខាង។
គួររម្លឹកថា ការនាំចេញពោតក្រហមក្នុងឆ្នាំ២០២១កន្លងទៅ មានបរិមាណជិត ៧០ ម៉ឺនតោន ថយចុះជិត ៥ ភាគរយធៀបនឹងរយៈពេលដូចគ្នាឆ្នាំ ២០២០ ដែលមានជាង ៧៣ ម៉ឺនតោន។ ប៉ុន្តែបើគិតជាទំហំទឹកប្រាក់នាំចេញវិញ គឺមានចំនួនជិត ៥៣ លានដុល្លារ កើនឡើងជាង ៨ ភាគរយ។ នេះបើតាមរបាយការណ៍ពីក្រសួងកសិកម្ម៕
