លោក Antonio Guterres អគ្គលេខាធិការអង្គការសហប្រជាជាតិ UN នឹងអញ្ជើញមកទស្សនកិច្ចនៅប្រទេសកម្ពុជា រយៈពេល ៣ថ្ងៃ គឺចាប់ពីថ្ងៃទី១១ដល់ថ្ងៃទី១៣ ខែវិច្ឆិកា ឆ្នាំ២០២២នេះ ដើម្បីចូលរួមកិច្ចប្រជុំកំពូល អាស៊ានលើកទី៤០-៤១ និងកិច្ចប្រជុំពាក់ព័ន្ធដទៃទៀត ដែលកម្ពុជាធ្វើជាម្ចាស់ផ្ទះ។
សេចក្តីជូនដំណឹងរបស់ការិយាល័យអ្នកសម្របសម្រួលអង្គការសហប្រជាជាតិប្រចាំនៅកម្ពុជា នៅរសៀលថ្ងៃព្រហស្បតិ៍នេះបានឲ្យដឹងថា អគ្គលេខាធិការអង្គការសហប្រជាជាតិ (UNSG)និងគណៈប្រតិភូនឹងចូលរួមក្នុងកិច្ចប្រជុំអាស៊ាន និងអង្គការសហប្រជាជាតិលើកទី១២ និងព្រឹត្តិការណ៍ពាក់ព័ន្ធនានានៅទីក្រុងភ្នំពេញ ក្នុងដំណើរទស្សនកិច្ចនេះ លោកអគ្គលេខាធិការ ក៏នឹងធ្វើទស្សនកិច្ចទៅកាន់សារមន្ទីរឧក្រិដ្ឋកម្មប្រល័យពូជសាសន៍ទួលស្លែងផងដែរ។
ទន្ទឹមនឹងនោះលោកអគ្គលេខាធិការអង្គការសហប្រជាជាតិ Antonio Guterres នឹងថ្លែងសន្ទរកថា ដែលធ្វើឡើងនៅបរិវេណសារមន្ទីរផ្ទាល់៕
