ផ្សារទំនើប អ៊ីអនម៉ល មានជ័យ (អ៊ីអន៣) ដែលជាផ្សារទំនើបមានផ្ទៃដីធំជាងគេបំផុតនៅក្នុងប្រទេសកម្ពុជា បានប្រកាសបើកដំណើរការសាកល្បងជាផ្លូវការហើយ កាលពីថ្ងៃព្រហស្បតិ៍ ទី១៥ ខែធ្នូ ឆ្នាំ២០២២ ម្សិលមិញនេះ ដោយក្នុងនោះក៏មានចំណុចពិសេសមួយ គឺកន្លែងដើរលើផ្ទាំងកញ្ចក់ ធ្វើឱ្យភ្ញៀវទទួលបានអារម្មណ៍ប្លែក ខុសពីផ្សារទំនើបអ៊ីអនមុនៗ។
ផ្សារទំនើប អ៊ីអនម៉ល មានជ័យ មានហាងល្បីៗសរុបប្រមាណ ២៥០ហាង ដែលធ្វើឱ្យអតិថិជនកាន់តែមានជម្រើសសម្បូរបែប ជាមួយនឹងផលិតផលប្រណិតៗគុណភាពខ្ពស់។ ផ្សារទំនើបមួយនេះ ក៏មានសួនកម្សាន្ត (Komsan Park) នៅជាន់ទី២ និងជាន់ទី៣ ដែលមានសកម្មភាពលេងជាច្រើនសម្រាប់គ្រប់វ័យ។ លើសពីនេះ ផ្សារទំនើប អ៊ីអនម៉ល មានជ័យ មានកន្លែងដើរលើផ្ទាំងកញ្ចក់ ដែលអ្នកដើរកាត់តំបន់នេះ នឹងអាចមើលឃើញធ្លុះទៅខាងក្រោម ហើយអ្នកនៅជាន់ក្រោម ក៏អាចមើលឃើញអ្នកដើរនៅខាងលើផងដែរ។
សូមជម្រាបជូនថា ផ្សារទំនើប អ៊ីអនម៉ល មានជ័យ ជាផ្សារទំនើប ដែលមានផ្ទៃដីធំជាងគេនៅប្រទេសកម្ពុជា គឺលើសពី ១៧ ហិកតា។ ផ្សារទំនើប ដែលមានតម្លៃ ២៨៩,៦លានដុល្លារអាមេរិកមួយនេះ មានទីតាំងស្ថិតនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ)។ នេះជាសមិទ្ធផលដ៏ធំទី៣ របស់ផ្សារទំនើបអ៊ីអន ម៉ល បន្ទាប់ពីការបើកផ្សារទំនើបអ៊ីអន ម៉ល ភ្នំពេញ (អ៊ីអន១) នៅឆ្នាំ២០១៤ និងផ្សារទំនើបអ៊ីអន ម៉ល សែនសុខ (អ៊ីអន២) នៅឆ្នាំ២០១៨។ សម្រាប់ផ្សារទំនើបអ៊ីអន៣ ឆ្នាំ២០២២នេះ គឺជាការចាប់បញ្ចូលគ្នារវាងការកម្សាន្ត ការទិញទំនិញ ព្រមទាំងការចែករំលែកចំណេះដឹងអំពីសង្គមបរិស្ថាន សិល្បៈ និងបច្ចេកវិទ្យា៕
