លោកបណ្ឌិត ឈឹម សារ៉េត ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ដំឡើងឋានៈស្មើ ទេសរដ្ឋមន្ត្រី បន្ថែមលើមុខងារបច្ចុប្បន្ន កាលពីថ្ងៃទី០៣ ខែកុម្ភៈ ឆ្នាំ២០២៣។
លោកបណ្ឌិត ឈឹម សារ៉េត បច្ចុប្បន្នមានតួនាទីជាប្រតិភូរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានលទ្ធកម្មសាធារណៈ នៃក្រសួងសេដ្ឋកិច្ច និងហិរញ្ញវត្ថុ។ សូមជម្រាបថា លោក ឈឹម សារ៉េត ត្រូវបានប្រមុខរដ្ឋស្តីទី លោក សាយ ឈុំ ចេញព្រះរាជក្រឹត្យ ដំឡើងឋានៈស្មើរដ្ឋមន្ត្រី រួមជាមួយទីប្រឹក្សាផ្ទាល់សម្តេចតេជោ ហ៊ុន សែន ចំនួន ៨នាក់ផ្សេងទៀត កាលពីថ្ងៃទី០៤ ខែតុលា ឆ្នាំ២០១៧។
ក្រៅពីការងារក្នុងក្របខ័ណ្ឌមន្ត្រីជាន់ខ្ពស់ នៃរាជរដ្ឋាភិបាលកម្ពុជា លោកបណ្ឌិត ឈឹម សារ៉េត ក៏មានតួនាទីមួយចំនួននៅជួរគណៈបក្សផងដែរ ដោយលោកជា ប្រធានក្រុមការងារថ្នាក់កណ្តាលចុះជួយមូលដ្ឋានឃុំកំពង់ចំលង និងឃុំបាក់ដាវ ព្រមទាំងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកខ្សាច់កណ្តាល ខេត្តកណ្តាល៕
