រោងចក្រចំនួន១១ ថ្មីបន្ថែមទៀតបានបើកនៅកម្ពុជា ក្នុងទុនវិនិយោគសរុបប្រមាណជាង៥០លានដុល្លារ

ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានសម្រេចចេញវិញ្ញាបនបត្រចុះបញ្ជីគម្រោង វិនិយោគដល់រោងចក្រចំនួន១១បន្ថែមទៀត ក្នុងទុនវិនិយោគប្រមាណជាង៥០លានដុល្លារអាមេរិក អាចបង្កើតការងារបាន ១២,៧១០កន្លែង។

បើតាម CDC បានឱ្យដឹងថា ក្នុងគម្រោងទាំង១១នោះ មានគម្រោងក្រៅតំបន់សេដ្ឋកិច្ចពិសេសចំនួន៨ ក្នុងទុន៣៩,៨លានដុល្លារ និងក្នុងតំបន់សេដ្ឋកិច្ចពិសេសមានចំនួន៣ ក្នុងទុនប្រមាណ១២លាន ៦ពាន់ដុល្លារអាមេរិក។
CDC បានឱ្យដឹងទៀតថា គម្រោងវិនិយោគក្រៅតំបន់រួមមាន៖១-“TIENS TEXTILE (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ និងវាយនភណ្ឌក្នុងផ្ទះ នៅខេត្តកំពង់ស្ពឺ ២-“ALL WIN SHOES (CAMBODIA) CO., LTD” គម្រោងបង្កើតរោងចក្រផលិតស្បែកជើង នៅខេត្តកំពង់ស្ពឺ ៣-“PRECISION GARMENT & BAG INDUSTRIES CO., LTD” គម្រោងបង្កើតរោងចក្រផលិតកាបូប កាត់ដេរសម្លៀកបំពាក់ ខ្សែកាត ម៉ាស និងអៀម នៅខេត្តកំពង់ស្ពឺ
៤-“JUNGKWANG EVERGREEN GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ នៅរាជធានីភ្នំពេញ ៥-“FUNDAY GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ នៅខេត្តកណ្តាល ៦-“HANWANGDA BAGS (CAMBODIA) CO., LTD” គម្រោងបង្កើតរោងចក្រផលិតកាបូបគ្រប់ប្រភេទ នៅខេត្តកំពង់ស្ពឺ
៧-“EVERICH OUTDOOR PRODUCTS (CAMBODIA) CO., LTD” គម្រោងបង្កើតរោងចក្រផលិតកាបូបគ្រប់ប្រភេទ នៅខេត្តកំពង់ស្ព

និង៨-“BRIGHT LUCKY ENTERPRISE (CAMBODIA) CO., LTD” គម្រោងបង្កើតរោងចក្រផលិតគ្រឿងបន្សំស្បែកជើង នៅរាជធានីភ្នំពេញ។

ដោយឡែក តាមសំណើសុំវិនិយោគរបស់ក្រុមហ៊ុន គណៈកម្មាធិការតំបន់សេដ្ឋកិច្ចពិសេសកម្ពុជា រួមមាន៖ ១- “ONTIME INDUSTRIAL CO., LTD.” គម្រោងបង្កើតរោងចក្រផលិតគ្រឿងបង្គុំនៃគ្រឿងសង្ហារិមធ្វើពីលោហៈធាតុ ២- “THREE-COLOR STONE STATIONERY (CAMBODIA) CO., LTD.” គម្រោងបង្កើតរោងចក្រផលិតសម្ភារៈការិយាល័យ (ក្រូណូដាក់ឯកសារ) នៅខេត្តព្រះសីហនុ និង៣- “HESTRA (CAMBODIA) CO., LTD.” គម្រោងបង្កើតរោងចក្រផលិតសម្ភារៈកីឡាធ្វើពីស្បែក និងក្រណាត់ នៅរាជធានីភ្នំពេញ ។
គួរឱ្យដឹងថា គិតត្រឹមថ្ងៃទី ០៧ នៃខែមករា ឆ្នាំ២០២៣នេះ ក្រុមប្រឹក្សាអភិវឌ្ឍកម្ពុជា(CDC)បានចេញ វិញ្ញាបត្រដល់ក្រុមហ៊ុន២១ សម្រាប់ការវិនិយោគស្ថិតក្នុងទំហំទឹកប្រាក់ប្រមាណ ជាង១៤៩លានដុល្លារ អាមេរិក៕