កូនស្រីបង្កើតលោក អ៊ាង សុផល្លែត ទីប្រឹក្សាផ្ទាល់សម្តេចតេជោនាយករដ្ឋមន្ត្រី ហ៊ុន សែន និងរដ្ឋលេខាធិការក្រសួងបរិស្ថាន គឺលោកស្រី អ៊ាង និធិជ្ជនី ដឺណេ ត្រូវបានលោកឧបនាយករដ្ឋមន្រ្តី ជា សុផារ៉ា រដ្ឋមន្ត្រីក្រសួងរៀបចំដែនដី តែងតាំងជាសមាជិកាខុទ្ទកាល័យរដ្ឋមន្រ្តីក្រសួងរៀបចំដែនដីនគរូបនីយកម្ម និងសំណង់។
នៅក្នុងលិខិតចំនួនពីរទំព័រចុះហត្ថលេខាដោយលោក ជា សុផារ៉ា កាលពីថ្ងៃទី៣ ខែមីនា ឆ្នាំ២០២៣នេះ បានសម្រេចកែសម្រួលសមាសភាពខុទ្ទកាល័យរដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ចំនួន៧រូប ក្នុងនោះលោកស្រី អ៊ាង និធិជ្ជនី ដឺណេ ជាសមាជិកាឈរលើលេខរៀងទី៧។
លោកស្រី អ៊ាង និធិជ្ជនី ដឺណេ ជាចៅស្រីបង្កើតរបស់លោកឧបនាយករដ្ឋមន្រ្តី ជា សុផារ៉ា កូនស្រីរបស់លោកស្រី ជា សុផាកន្នី។ លោកស្រី និធិជ្ជនី ដឺណេ ទើបតែចូលរោងជ័យចាប់ដៃគ្នាជាប្តីប្រពន្ធនឹងលោក ប៉ែន សំអាត សុទ្ធចិត្ត ដែលស្គាល់ថាជាកូនប្រុសរបស់លោកស្រី ហាក់ ស្រីទូច និងលោក ប៉ែន សំអាត ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី និងជាអនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គនាយករងគយ និងរដ្ឋាករកម្ពុជា កាលពីថ្ងៃទី៥ ខែធ្នូ ឆ្នាំ២០២២ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ (OCIC) ៕
