កិច្ចសហការនេះ មានវិសាលភាពអនុវត្តចំពោះគ្រឹះស្ថានសិក្សាគ្រប់កម្រិត ចាប់ពីមត្តេយ្យសិក្សារហូតដល់ឧត្តមសិក្សាទូទាំងប្រទេស ក្នុងគោលបំណងលើកកម្ពស់ការយល់ដឹង បណ្តុះទម្លាប់ញែក និងទុកដាក់សំរាមឱ្យបានត្រឹមត្រូវ ដើម្បីកាត់បន្ថយហានិភ័យសុខភាពសាធារណៈ និងឈានទៅសម្រេចបាននូវគោលដៅ «សាលារៀនគ្មានសំណល់ប្លាស្ទិក»។

ដើម្បីគាំទ្រដល់ចលនានេះ លោក អ៊ាង សុផល្លែត បានគូសបញ្ជាក់ថា កន្លងមកក្រសួងបរិស្ថានបានផ្ដល់ធុងសំរាមចំនួន ១៦ ៩៣៥ធុង ដល់សាលារៀនចំនួន ៥ ៦៤៥ ក្នុង ១១ខេត្តរួចហើយ។ តាមរយៈអនុស្សរណៈនេះ ក្រសួងនឹងបន្តផ្ដល់ធុងសំរាមចំនួន ១៧ ១៧៥ធុង បន្ថែមទៀត ដល់សាលារៀនចំនួន ៥ ៧២៥ នៅរាជធានី-ខេត្តចំនួន ១៤ ដែលធ្វើឱ្យចំនួនធុងសំរាមសរុបកើនដល់ ៣៤ ១១០ធុង សម្រាប់ចែកជូនដល់សាលារៀនចំនួន ១១ ៣៧០ នៅទូទាំងប្រទេស ដើម្បីជួយឱ្យគ្រឹះស្ថានសិក្សាមានបរិស្ថានស្អាត និងបរិយាកាសល្អ។

ជាការឆ្លើយតប ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅចំពោះក្រសួងបរិស្ថាន និងបានបញ្ជាក់ពីការប្ដេជ្ញាចិត្តរបស់ក្រសួងអប់រំ ក្នុងការរៀបចំគោលការណ៍ណែនាំ ការបញ្ជ្រាបខ្លឹមសារកាត់បន្ថយប្លាស្ទិក និងការការពារបរិស្ថានទៅក្នុងកម្មវិធីសិក្សាផ្លូវការ ក៏ដូចជាមុខវិជ្ជាបំណិនជីវិតតាមមូលដ្ឋាន និងការសម្របសម្រួលជាមួយគ្រប់អង្គភាពពាក់ព័ន្ធឱ្យអនុវត្តប្រកបដោយប្រសិទ្ធភាព។

ក្រសួងទាំងពីរក៏នឹងសហការវាយតម្លៃ និងផ្ដល់វិញ្ញាបនបត្រលើកទឹកចិត្តរួមគ្នា ដល់គ្រឹះស្ថានសិក្សាណាដែលអនុវត្តបានល្អប្រសើរ។

ទន្ទឹមនឹងនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអំពាវនាវដល់គណៈគ្រប់គ្រង និងលោកគ្រូ-អ្នកគ្រូ ឱ្យធ្វើជាគំរូល្អក្នុងការកាត់បន្ថយការប្រើប្រាស់ថង់ប្លាស្ទិក ចំណែកសិស្ស-និស្សិត ត្រូវរួមគ្នាក្លាយជាកម្លាំងចលករផ្លាស់ប្តូរទម្លាប់ ដោយចាប់ផ្តើមពីការប្រើប្រាស់ដបទឹកផ្ទាល់ខ្លួន ប្រអប់បាយ ឬសម្ភារៈប្រើឡើងវិញបាន និងចូលរួមញែកសំរាមឱ្យបានត្រឹមត្រូវ ព្រមទាំងស្នើដល់អាជ្ញាធរដែនដី និងដៃគូអភិវឌ្ឍន៍ ចូលរួមគាំទ្រដើម្បីឱ្យចលនានេះដំណើរការដោយចីរភាព៕

The post ក្រសួងអប់រំ និងក្រសួងបរិស្ថាន ចាប់ដៃគ្នាជំរុញចលនា «សាលារៀនគ្មានសំណល់ប្លាស្ទិក» ទូទាំងប្រទេស appeared first on .

ទស្សនកិច្ចនេះ មានគោលបំណងស្វែងយល់ពីខ្សែច្រវាក់ផលិតកម្មកែច្នៃចំណីអាហារ និងអាហារូបត្ថម្ភប្រកបដោយស្តង់ដារអនាម័យ សុវត្ថិភាពខ្ពស់ និងការអនុវត្តបច្ចេកវិទ្យា និងនវានុវត្តន៍ក្នុងវិស័យឧស្សាហកម្មកែច្នៃចំណីអាហារ។

ក្នុងឱកាសនោះ លោក Kim Yung il អនុប្រធានក្រុមហ៊ុន Atomy Orot បានសម្តែងការស្វាគមន៍យ៉ាងកក់ក្តៅជូនចំពោះលោកជំទាវបណ្ឌិត និងគណៈប្រតិភូកម្ពុជា ព្រមទាំងបានបង្ហាញពីប្រភេទនៃផលិតផលជាច្រើនដែលក្រុមហ៊ុនបានផលិត ស្របតាមចក្ខុវិស័យ របស់ ក្រុមហ៊ុន Atomy Orot គឺ ការបង្កើតស្តង់ដារអាហារបរិសុទ្ធ និងសុវត្ថិភាពខ្ពស់បំផុត ព្រមទាំងក្លាយជាអ្នកដឹកនាំក្នុងការផលិត និងផ្គត់ផ្គង់ម្ហូបអាហារដែលមានសុវត្ថិភាព គុណភាពខ្ពស់ និងគ្មានសារធាតុគីមីគ្រោះថ្នាក់ ដើម្បីសុខុមាលភាពរបស់អ្នកប្រើប្រាស់ទូទាំងពិភពលោក និងមានបេសសកម្មក្នុងការផ្តល់ជូននូវអាហារពិតពីធម្មជាតិ (Honest Food) ដោយផ្តោតលើការជ្រើសរើសវត្ថុធាតុដើមធម្មជាតិល្អបំផុត មិនប្រើប្រាស់សារធាតុបន្ថែមដែលបង្កគ្រោះថ្នាក់ និងរក្សាតម្លៃជីវជាតិដើមឱ្យនៅគង់វង្ស។

ជាការឆ្លើយតប លោកស្រីរដ្ឋលេខាធិការប្រចាំការក្រសួងអប់រំ បានថ្លែងនូវការកោតសរសើរចំពោះការវិនិយោគលើបច្ចេកវិទ្យាស្វ័យប្រវត្តិកម្មទំនើប ការគ្រប់គ្រងស្តង់ដារគុណភាពយ៉ាងម៉ត់ចត់របស់ Atomy Orot ព្រមទាំងបានថ្លែងអំណរគុណចំពោះក្រុមហ៊ុន Atomy ដែលកន្លងមកតែងតែបានចូលរួមចំណែកយ៉ាងសកម្មក្នុងការងារសង្គម និងការគាំទ្រដល់វិស័យអប់រំនៅកម្ពុជា៕

The post ក្រសួងអប់រំ ដឹកនាំគណៈប្រតិភូទស្សនកិច្ចមជ្ឈមណ្ឌលផលិតកម្ម និងស្រាវជ្រាវចំណីអាហារ Atomy Orot Factory នៅទីក្រុង Gongju សាធារណរដ្ឋកូរ៉េ appeared first on .

ក្រសួងអប់រំ បានឱ្យដឹងថា ​ជំនួបនេះមានគោលបំណងផ្លាស់ប្ដូរបទពិសោធ និងពង្រឹងកិច្ចសហប្រតិបត្តិការទ្វេភាគីក្នុងវិស័យអប់រំ ជាពិសេសលើការលើកកម្ពស់សុខភាពសិក្សា ការកសាងសមត្ថភាពមន្ត្រីអប់រំ និងការប្រើប្រាស់បច្ចេកវិទ្យាឌីជីថល ដើម្បីគាំទ្រដល់ការអភិវឌ្ឍវិស័យអប់រំនៅកម្ពុជា ដែលក្នុងន័យនេះ ភាគីទាំងពីរបានផ្ដោតលើកិច្ចសហប្រតិបត្តិការសំខាន់ៗមួយចំនួនរួមមាន៖

១. ការជំរុញកិច្ចសហប្រតិបត្តិការរវាងសាលារៀន៖ សម្របសម្រួលតាមរយៈមន្ទីរអប់រំខេត្តជុងឆុងណាមដូ (Chungcheongnam-do) ដើម្បីបង្កើតទំនាក់ទំនង និងកិច្ចសហការដោយផ្ទាល់រវាងសាលារៀននៃភាគីទាំងពីរ ក្នុងការលើកកម្ពស់សុខភាពសិក្សានៅកម្ពុជា។

២. ការកសាងសមត្ថភាពធនធានមនុស្ស៖ ជំរុញការបណ្ដុះបណ្ដាលមន្ត្រីជំនាញផ្នែកសុខភាពសិក្សា នាយកសាលា និងគ្រូបង្រៀន តាមរយៈកម្មវិធីទស្សនកិច្ចសិក្សា ការផ្លាស់ប្ដូរបទពិសោធ និងការចែករំលែកជំនាញក្នុងការអប់រំសុខភាព។

៣. ការប្រើប្រាស់បច្ចេកវិទ្យាឌីជីថល៖ ពង្រឹងកិច្ចសហប្រតិបត្តិការក្នុងការប្រើប្រាស់បច្ចេកវិទ្យាឌីជីថល ដើម្បីផ្សព្វផ្សាយចំណេះដឹងអំពីសុខភាព និងអនាម័យដល់សិស្សានុសិស្ស ស្របតាមកិច្ចសហប្រតិបត្តិការដែលសាធារណរដ្ឋកូរ៉េបាននិងកំពុងគាំទ្រកម្ពុជាលើវិស័យបច្ចេកវិទ្យាព័ត៌មាន និងសារគមនាគមន៍ (ICT) និងបច្ចេកវិទ្យាអប់រំ (EdTech)។

​ក្នុងឱកាសនោះ លោកស្រីរដ្ឋលេខាធិការប្រចាំការ បានវាយតម្លៃខ្ពស់ចំពោះសមិទ្ធផល និងបទពិសោធល្អៗក្នុងវិស័យអប់រំរបស់ខេត្តជុងឆុងណាមដូ (Chungcheongnam-do) ដែលជាមេរៀន និងបទពិសោធដ៏មានតម្លៃសម្រាប់កម្ពុជាក្នុងការសិក្សា និងអនុវត្តឱ្យសមស្របតាមបរិបទជាក់ស្ដែង។ ជាមួយគ្នានេះ លោកស្រី បានគូសបញ្ជាក់អំពីសារៈសំខាន់នៃការពង្រឹងទំនាក់ទំនងមិត្តភាព និងកិច្ចសហប្រតិបត្តិការរវាងកម្ពុជា និងសាធារណរដ្ឋកូរ៉េ ដោយបានលើកឡើងថា កាលពីខែឧសភា ឆ្នាំ២០២៤ សម្ដេចធិបតី ហ៊ុន ម៉ាណែត បានអញ្ជើញបំពេញទស្សនកិច្ចផ្លូវការនៅសាធារណរដ្ឋកូរ៉េ តបតាមការអញ្ជើញរបស់លោក Yoon Suk Yeol ប្រធានាធិបតីនៃសាធារណរដ្ឋកូរ៉េ ក្នុងគោលបំណងលើកកម្ពស់ទំនាក់ទំនងទ្វេភាគី ព្រមទាំងពង្រឹងចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំ និងស៊ីជម្រៅថែមទៀត។

​តាងនាមក្រសួងអប់រំ យុវជន និងកីឡា លោកស្រី រដ្ឋលេខាធិការប្រចាំការ បានថ្លែងអំណរគុណចំពោះរដ្ឋាភិបាល និងប្រជាជននៃសាធារណរដ្ឋកូរ៉េ តាមរយៈក្រសួងអប់រំ និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) ដែលបាននិងកំពុងផ្ដល់ការគាំទ្រយ៉ាងសកម្មដល់ការអភិវឌ្ឍធនធានមនុស្ស និងការលើកកម្ពស់គុណភាពអប់រំនៅកម្ពុជា។ ជាមួយគ្នានេះផងដែរ លោកស្រី រដ្ឋលេខាធិការប្រចាំការ ក៏បានថ្លែងអំណរគុណជាថ្មីចំពោះលោកប្រធានមន្ទីរ និងមន្ត្រីពាក់ព័ន្ធចំពោះការទទួលបដិសណ្ឋារកិច្ចយ៉ាងកក់ក្ដៅ ព្រមទាំងបានគោរពអញ្ជើញលោកប្រធានមន្ទីរអប់រំខេត្តជុងឆុងណាមដូ អញ្ជើញបំពេញទស្សនកិច្ចនៅព្រះរាជាណាចក្រកម្ពុជា ជាពិសេសក្នុងឆ្នាំ២០២៧ ដែលជាឆ្នាំនៃការប្រារព្ធខួបលើកទី៣០ នៃចំណងមិត្តភាពកម្ពុជា-សាធារណរដ្ឋកូរ៉េ៕

The post ក្រសួងអប់រំកម្ពុជា និងមន្ទីរអប់រំខេត្តជុងឆុងណាមដូ កូរ៉េ ផ្លាស់ប្ដូរបទពិសោធ និងពង្រឹងកិច្ចសហប្រតិបត្តិការទ្វេភាគីក្នុងវិស័យអប់រំ appeared first on .

ក្នុងឱកាសនៃជំនួបពិភាក្សាការងារ ភាគីទាំងពីរបានផ្លាស់ប្តូរយោបល់ និងបទពិសោធន៍ ដោយផ្តោតលើចំណុចសំខាន់ៗ ៣ រួមមាន៖

១). ការលើកកម្ពស់សុខភាពសិក្សា៖ ស្វែងយល់អំពីប្រព័ន្ធគ្រប់គ្រង និងយន្តការអនុវត្តការងារសុខភាពសិក្សាតាមបែបវិទ្យាសាស្ត្ររបស់សាកលវិទ្យាល័យជាតិគង់ជូ ដើម្បីប្រមូលធាតុចូល និងបទពិសោធន៍ល្អៗសម្រាប់ពិចារណាអនុវត្ត និងកែលម្អការងារសុខភាពសិក្សានៅកម្ពុជា។

២). ការពង្រឹងកិច្ចសហប្រតិបត្តិការទ្វេភាគី៖ ជំរុញកិច្ចសហប្រតិបត្តិការក្នុងការអភិវឌ្ឍធនធានមនុស្ស ការផ្លាស់ប្តូរកម្មវិធីសិក្សា និងការចែករំលែកបទពិសោធន៍រវាងគ្រឹះស្ថានឧត្តមសិក្សានៃប្រទេសទាំងពីរ ដើម្បីរួមចំណែកលើកកម្ពស់គុណភាពអប់រំ និងការអភិវឌ្ឍសមត្ថភាពធនធានមនុស្ស។

៣). ការលើកកម្ពស់ឱកាសអាហារូបករណ៍ និងការផ្លាស់ប្តូរបទពិសោធន៍៖ ជំរុញការបង្កើនឱកាសទទួលបានអាហារូបករណ៍ និងការរៀបចំកម្មវិធីផ្លាស់ប្តូរទស្សនកិច្ចសិក្សាសម្រាប់មន្ត្រីអប់រំ សាស្ត្រាចារ្យ និងនិស្សិតកម្ពុជា ដើម្បីសិក្សាស្វែងយល់ និងទទួលបានបទពិសោធន៍ថ្មីៗនៅសាធារណរដ្ឋកូរ៉េ។

គួរបញ្ជាក់ថា ដំណើរទស្សនកិច្ចនេះ បានបញ្ចប់ទៅប្រកបដោយផ្លែផ្កា និងស្មារតីសហប្រតិបត្តិការជិតស្និទ្ធ ដែលជាសក្ខីភាពថ្មីមួយទៀតក្នុងការពង្រឹងទំនាក់ទំនងភាពជាដៃគូរវាងក្រសួងអប់រំ យុវជន និងកីឡានៃកម្ពុជា ជាមួយស្ថាប័នឧត្តមសិក្សានៃសាធារណរដ្ឋកូរ៉េ សំដៅរួមចំណែកអភិវឌ្ឍគុណភាពអប់រំនៅកម្ពុជាឱ្យកាន់តែប្រសើរឡើង៕

The post កម្ពុជា-កូរ៉េ បានផ្លាស់ប្តូរយោបល់ និងបទពិសោធន៍ ៣ចំណុច លើវិស័យអប់រំ appeared first on .

ក្នុងឱកាសនោះ ឯកឧត្តមឧបនាយករដ្ឋមន្ត្រី បានសង្កត់ធ្ងន់ថា ក្នុងបរិបទដែលបញ្ញាសិប្បនិម្មិត (AI) កំពុងវិវត្តយ៉ាងលឿន គ្រូបង្រៀនត្រូវប្រើប្រាស់គរុកោសល្យទំនើប ដើម្បីបណ្តុះបំណិនសតវត្សរ៍ទី២១ ដល់សិស្សានុសិស្ស រួមមាន៖ ការគិតស៊ីជម្រៅ ការដោះស្រាយបញ្ហា ភាពច្នៃប្រឌិត និងការធ្វើការជាក្រុម ដែលជាបំណិនស្នូលមិនអាចជំនួសបានដោយ AI ឡើយ។ ភាពជោគជ័យនៃការបញ្ចប់ឆ្នាំសិក្សា ២០២៥-២០២៦ កន្លងទៅនេះ បានស្តែងឡើងយ៉ាងច្បាស់តាមរយៈលទ្ធផលល្អប្រសើរនៃការប្រឡងបាក់ឌុប និងលទ្ធផលតេស្តអន្តរជាតិ PISA 2025 ព្រមទាំង SEA-PLM 2024។

ដើម្បីធានានិរន្តរភាពនៃការអភិវឌ្ឍប្រព័ន្ធអប់រំ ឯកឧត្តមបានដាក់ចេញនូវទិសដៅអាទិភាពចំនួន ៥ រួមមាន៖ ១. រក្សានិរន្តរភាពនៃកំណែទម្រង់ (មិនមានដំណោះស្រាយផ្លូវកាត់) ២. ពង្រីកកំណែទម្រង់សាលារៀនទាំងមូល ដែលជួយឱ្យពិន្ទុ PISA ខ្ពស់ ៣. លើកកម្ពស់ស្តង់ដាវិជ្ជាជីវៈគ្រូ និងការប្រើប្រាស់បច្ចេកវិទ្យាក្នុងការបង្រៀន ៤. ដោះស្រាយគម្លាតសិក្សារវាងសាលាក្រុង និងជនបទ ៥. ពង្រឹងភាពជាអ្នកដឹកនាំ និងការចូលរួមពីគ្រប់ភាគីពាក់ព័ន្ធ។

ជាកិច្ចបញ្ចប់ ក្រសួងបានរៀបចំពិធីបំពាក់គ្រឿងឥស្សរិយយសមុនីសារភ័ណ្ឌ ថ្នាក់ ធិបឌិន ជូនបុគ្គលិកអប់រំឆ្នើម ១១រូប ដែលបង្រៀនសិស្សទទួលបានពិន្ទុខ្ពស់ជាងគេទាំង ១១មុខវិជ្ជាក្នុងការប្រឡងបាក់ឌុប ប្រគល់ពានរង្វាន់ «វិទ្យាល័យសិស្សពូកែ» ព្រមទាំងប័ណ្ណសរសើរជូនដល់សាលារៀនគំរូដែលអនុវត្តតេស្តអន្តរជាតិ PISA-2025 បានយ៉ាងល្អប្រសើរ៕

The post គ្រូជាសសរស្តម្ភមិនអាចខ្វះបាន! កម្ពុជាប្រារព្ធទិវាគ្រូបង្រៀន ៥ តុលា លើកកម្ពស់បំណិនសតវត្សរ៍ទី២១ ដែលAI មិនអាចជំនួសបាន appeared first on .

ក្នុងជំនួបពិភាក្សាការងារ រវាង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ជាមួយ គណៈប្រតិភូសាកលវិទ្យាល័យអូតាវ៉ា នៃប្រទេសកាណាដា (University of Ottawa) កាលពីរសៀលថ្ងៃទី១៦ ខែកញ្ញា ឆ្នាំ២០២៦ បានឱ្យដឹងថា សាកលវិទ្យាល័យនេះ មានបំណងក្នុងការកសាងដៃគូសហប្រតិបត្តិការដ៏រឹងមាំ និងប្រកបដោយភាពបត់បែនខ្ពស់ ស្របតាមតម្រូវការអាទិភាពជាក់ស្តែងនៃវិស័យអប់រំនៅកម្ពុជា។

ជាមួយគ្នានេះ ភាគីកាណាដាក៏បានលើកឡើងពីកម្មវិធីសិក្សានវានុវត្តន៍ឌីជីថល (Digital Innovation Learning Program) ដើម្បីបង្កើតកិច្ចសហការជាមួយគ្រឹះស្ថានសិក្សានៅកម្ពុជា ចូលរួមចំណែកពង្រឹងសមត្ថភាពបច្ចេកវិទ្យាដល់សិស្សនិស្សិត និងគ្រូបង្រៀនផងដែរ។

ឧបនាយករដ្ឋមន្រ្តី ហង់ ជួនណារ៉ុន បានគូសបញ្ជាក់ពី អាទិភាពរបស់ក្រសួងអប់រំ គឺការធ្វើកំណែទម្រង់ និងពង្រឹងគុណភាពនៃកម្មវិធីបណ្តុះបណ្តាលគ្រូបង្រៀន (Teacher Training Program) បំពាក់បំប៉នសមត្ថភាពគ្រូបង្រៀន ដើម្បីរៀបចំ និងបណ្តុះបណ្តាលសិស្ស-និស្សិត ឱ្យឆ្លើយតបទៅនឹងតម្រូវការទីផ្សារការងារជាក់ស្តែង ដោយផ្តោតលើការបង្កើនប្រសិទ្ធភាពនៃការបង្រៀនតាមប្រព័ន្ធអនឡាញ (Online Teaching) និងបច្ចេកវិទ្យាឌីជីថល។ លើសពីនេះ ឯកឧត្តមក៏ស្នើឱ្យមានកិច្ចសហការលើការបង្កើតកម្មវិធីសិក្សាអន្តរកាល (Sandwich Program) ជាពិសេសលើជំនាញបញ្ញាសិប្បនិម្មិត (AI) និងវិទ្យាសាស្ត្រកុំព្យូទ័រ ដោយផ្អែកលើបទពិសោធជោគជ័យនៃកម្មវិធីបណ្តុះបណ្តាលនៅបរទេសរវាងកម្ពុជា និងប្រទេសដៃគូនានា។

នៅក្នុងជំនួបនោះ ភាគីទាំងពីរជឿជាក់យ៉ាងមុតមាំថា លទ្ធផលនៃជំនួបពិភាក្សានេះ នឹងក្លាយជាមូលដ្ឋានគ្រឹះយ៉ាងរឹងមាំឈានទៅដល់ “ការចុះអនុស្សរណៈនៃការយោគយល់គ្នា (MoU)” ផ្លូវការនាពេលខាងមុខ ដើម្បីកសាងក្របខ័ណ្ឌកិច្ចសហប្រតិបត្តិការលើវិស័យអប់រំ យូរអង្វែងនិងប្រកបដោយចីរភាព៕

The post សាកលវិទ្យាល័យអូតាវ៉ា មានបំណងកសាងដៃគូសហប្រតិបត្តិការដ៏រឹងមាំ ស្របតាមតម្រូវការអាទិភាពជាក់ស្តែងនៃវិស័យអប់រំនៅកម្ពុជា appeared first on .

តាមការបញ្ជាក់ពីក្រសួង មជ្ឈមណ្ឌលនេះមានទីតាំងស្ថិតនៅជាប់វិទ្យាស្ថានបច្ចេកវិទ្យាកម្ពុជា (សាលាតិចណូ) ដោយផ្តល់ឱកាសដល់និស្សិតនារីឆ្នាំទី១ ដែលកំពុងសិក្សានៅតាមគ្រឹះស្ថានឧត្តមសិក្សាសាធារណៈក្នុងរាជធានីភ្នំពេញ ទាំងនិស្សិតអាហារូបករណ៍ និងនិស្សិតបង់ថ្លៃសិក្សា។

ដើម្បីមានសិទ្ធិចូលរួមក្នុងការជ្រើសរើសនេះ បេក្ខនារីត្រូវជានិស្សិតនារីក្រីក្រ ឬជានិស្សិតនារីដែលមានពិការភាព ដោយតម្រូវឱ្យមានលិខិតបញ្ជាក់ត្រឹមត្រូវពីអាជ្ញាធរឃុំ-សង្កាត់។ ជាមួយគ្នានេះ បេក្ខនារីក៏ត្រូវតែជានិស្សិតនៅលីវ ព្រមទាំងមានវិន័យ និងសីលធម៌ល្អនៅក្នុងការរស់នៅផងដែរ។

ចំពោះនីតិវិធីនៃការដាក់ពាក្យ បេក្ខនារីដែលមានបំណងស្នើសុំស្នាក់នៅ ត្រូវយកពាក្យស្នើសុំទៅដាក់ដោយផ្ទាល់ដៃនៅតាមគ្រឹះស្ថានឧត្តមសិក្សាដែលខ្លួនកំពុងសិក្សា ចាប់ពីថ្ងៃជូនដំណឹងនេះតទៅ រហូតដល់ថ្ងៃទី១០ ខែតុលា ឆ្នាំ២០២៦ ជាកំហិត។

បន្ទាប់ពីដំណើរការពិនិត្យ និងសម្រេចដោយគណៈកម្មការជ្រើសរើសរបស់ក្រសួងអប់រំ យុវជន និងកីឡា រួចរាល់ ការប្រកាសលទ្ធផលផ្លូវការនឹងធ្វើឡើងនៅថ្ងៃទី២៨ ខែតុលា ឆ្នាំ២០២៦ ដោយមានការបិទផ្សាយនៅមជ្ឈមណ្ឌលអន្តេវាសិកនិស្សិតនារីផ្ទាល់ និងបង្ហោះលើគេហទំព័រផ្លូវការរបស់ក្រសួង។ សម្រាប់ព័ត៌មានបន្ថែម បេក្ខនារី និងអាណាព្យាបាលអាចសាកសួរតាមរយៈលេខទូរសព្ទ ០៨៩ ៦៧៧ ៨៨៧ ឬ ០៧៧ ៤៨៦ ៧៨៧៕

The post ក្រសួងអប់រំ ប្រកាសជ្រើសរើសនិស្សិតនារីក្រីក្រ ៩០នាក់ ឱ្យស្នាក់នៅមជ្ឈមណ្ឌលអន្តេវាសិកដ្ឋាន សម្រាប់ឆ្នាំសិក្សា ២០២៦-២០២៧ appeared first on .

ក្រសួងអប់រំ យុវជន និងកីឡា សូមថ្លែងអំណរគុណយ៉ាងជ្រាលជ្រៅ ចំពោះកងកម្លាំងប្រដាប់អាវុធ ដែលបានចូលរួមការពារសុវត្ថិភាព ក្នុងការដឹកជញ្ជូនសន្លឹកកិច្ចការបេក្ខជនពីបណ្ដាខេត្ត មកកាន់រាជធានីភ្នំពេញ។

ហឹបដុំសន្លឹក​កិច្ចការទាំងអស់ របស់បេក្ខជននៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ នឹង​ត្រូវបន្ត​រក្សាទុក​យ៉ាង​ត្រឹមត្រូវ​សុវត្ថិភាពក្នុង​បន្ទប់ចាក់សោ ដោយមានបិតសាឡេ​ និង​ការពារ​នៅលើទ្វារបន្ទប់​​ សម្រាប់ត្រៀមធ្វើការ​បែងបន្ត​​ទៅតាម​មណ្ឌលកំណែ​ទាំង ១០នៅរាជធានីភ្នំពេញ​។

គួរឱ្យដឹងថា ដំណើរការកំណែ នឹងចាប់​ផ្តើមពីថ្ងៃទី១៣ ដល់ថ្ងៃទី១៩ ខែសីហា ឆ្នាំ២០២៦។ តាមការគ្រោងទុក ក្រសួងកំណត់ យកថ្ងៃទី២ ខែកញ្ញា ឆ្នាំ២០២៦ សម្រាប់ប្រកាស លទ្ធផលប្រឡង តាមមណ្ឌលសំណេរនៃរាជធានី-ខេត្តទាំង២៥ នៅទូទាំងប្រទេស៕

The post ហឹបសន្លឹកកិច្ចការទាំងអស់របស់បេក្ខជនតាមមណ្ឌលប្រឡងរាជធានី-ខេត្ត បានដឹកមកដល់វិទ្យាល័យព្រះស៊ីសុវត្ថិហើយ appeared first on .

បេក្ខជនដែលមានបញ្ហាសុខភាព១៨៨នាក់ ក្នុងនោះបោះបង់ការប្រឡងចំនួន៥នាក់ បេក្ខជនប្រឡងដាច់ដោយឡែក៥៤នាក់ បេក្ខជនមានជំងឺគ្រុនឈាមមានចំនួន១២នាក់ និងគ្រោះថ្នាក់ចរាចរណ៍៣នាក់។ ដោយឡែកគណៈមេប្រយោគមានបញ្ហាសុខភាព១៥នាក់។ បេក្ខជនដែលមានបញ្ហាសុខភាពទាំងអស់បានបន្តការប្រឡងក្រោមការយកចិត្តទុកដាក់មើលថែពីក្រុមគ្រូពេទ្យ បន្ទាប់ពីមានអាការៈធូរស្រាល។

ទន្ទឹមនឹងនោះ ក្រសួងអប់រំ យុវជន និងកីឡា ជំរុញលើកទឹកចិត្តឱ្យបេក្ខជនប្រឡងទាំងអស់ត្រូវថែរក្សាសុខភាពឱ្យបានល្អ សម្រាក និងបរិភោគអាហារឱ្យបានគ្រប់គ្រាន់ប្រកបដោយអនាម័យ ដើម្បីទទួលបានលទ្ធផលល្អក្នុងការប្រឡង។

ក្រសួងអប់រំ បានបញ្ជាក់ឱ្យដឹងផងដែរថា ដំណើរការសំណេរនាព្រឹកថ្ងៃទី២នេះ បានប្រព្រឹត្តទៅដោយរលូនល្អ មិនមានបាតុភាពមិនប្រក្រតីណាមួយគួរឲ្យកត់សម្គាល់ឡើយ។ ដំណើរការសំណេរមានសភាពស្ងប់ស្ងាត់ និងរបៀបរៀបរយល្អ ដោយមានការយកចិត្តទុកដាក់ និងទំនួលខុសត្រូវខ្ពស់ពីគណៈមេប្រយោគទូទាំងប្រទេស គណៈអប្បមាទទូទាំងប្រទេស ជំនួយការអប្បមាទទូទាំងប្រទេស ប្រធាន អនុប្រធានមណ្ឌល គណៈកម្មការកណ្ដាល គណៈកម្មការត្រួតពិនិត្យអគារ គណៈកម្មការអនុរក្ស ដោយមានការចូលរួមសហការដោយ សហភាពសហព័ន្ធយុវជនកម្ពុជា អង្គភាពប្រឆាំងអំពើពុករលួយ មន្ត្រីសុខាភិបាល និងអាជ្ញាធរមានសមត្ថកិច្ចពាក់ព័ន្ធ។

សូមជម្រាបថា ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៦ នៅថ្ងៃទី២ ខែកញ្ញា ឆ្នាំ២០២៦ តាមមណ្ឌលសំណេរនៃរាជធានី-ខេត្តទាំង២៥ នៅទូទាំងប្រទេស៕

The post តាមរបាយការណ៍បឋម! ព្រឹកថ្ងៃទី២ នៃការប្រឡងសញ្ញាបត្រមធ្យមសិក្សាទុតិយភូមិ មានបេក្ខជនអវត្តមានជាង១ពាន់នាក់ appeared first on .

សន្និសីទសារព័ត៌មាន ស្តីពី «ដំណើរការរៀបចំប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦» កាលពីថ្ងៃទី៦ ខែសីហា ឆ្នាំ២០២៦ ឧបនាយករដ្ឋមន្ដ្រី ហង់ជួន ណារ៉ុន បានបញ្ជាក់ថា ដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ នឹងប្រព្រឹត្តទៅដោយឈរលើគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន ពោលគឺ «អ្នកចេះ គឺជាប់»។

ឧបនាយករដ្ឋមន្ដ្រី ក៏សូមអំពាវនាវដល់បេក្ខជនទាំងអស់ គោរពបទប្បញ្ញត្តិនៃការប្រឡង ឱ្យបានម៉ឺងម៉ាត់ ជាពិសេស មិនត្រូវលាក់ទុកជាប់នឹងខ្លួន នូវទូរស័ព្ទដៃ នាឡិកាឆ្លាតវៃ វ៉ែនតាឆ្លាតវៃ ឧបករណ៍អេឡិចត្រូនិកគ្រប់ប្រភេទ ឬសំណៅឯកសារផ្សេងៗ ចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។

សូមជម្រាបថា ការប្រឡងបាក់ឌុប ឆ្នាំ២០២៦នេះ មានបេក្ខជនចុះឈ្មោះ ប្រឡងសរុប ១៥១ ២៣៨ នាក់ (ស្រី ៨៤ ៧៣៥ នាក់) ក្នុងនោះ៖ បេក្ខជនថ្នាក់វិទ្យាសាស្ត្រ មានចំនួន ៣៧ ៤៤៥ នាក់ (ស្រី ២២ ១៩៣ នាក់) បេក្ខជនថ្នាក់វិទ្យាសាស្ត្រសង្គម មានចំនួន ១១៣ ៧៩៣ នាក់ (ស្រី ៦២ ៥៤២ នាក់)។

មណ្ឌលសំណេរ មានចំនួនសរុប២៤៤មណ្ឌល ស្មើនឹង ៦ ១០៤ បន្ទប់ ក្នុងនោះ ថ្នាក់វិទ្យាសាស្ត្រ មាន ៦៨ មណ្ឌល ស្មើនឹង ១ ៥២៦ បន្ទប់ និងថ្នាក់វិទ្យាសាស្ត្រសង្គម មាន ១៧៦ មណ្ឌល ស្មើនឹង ៤ ៥៧៨ បន្ទប់។ ចំណែកឯ មណ្ឌលកំណែ មានចំនួន១០មណ្ឌល ស្ថិតនៅរាជធានីភ្នំពេញ៕

The post រដ្ឋគ្រោងចំណាយថវិកាប្រមាណ ៦លានដុល្លារ សម្រាប់រៀបចំការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២៦នេះ appeared first on .