កម្មវិធីនេះធ្វើឡើងក្រោមប្រធានបទ យុទ្ធសាស្ត្រអភិវឌ្ឍន៍ភាគខាងលិច និងរង្វង់សេដ្ឋកិច្ចឆឹងទូ-ឆុងឈីង ដើម្បីផ្គូផ្គងភាពជាដៃគូ ការតភ្ជាប់សកល និងការពង្រឹងឥទ្ធិពលឧស្សាហកម្ម ផ្តោតលើវិស័យសំខាន់ៗ រួមមាន៖ យានយន្តភ្ជាប់បច្ចេកវិទ្យាឆ្លាតវៃ, គ្រឿងបង្គុំយានយន្ត, ការកែច្នៃផលិតផលកសិកម្ម, ភស្តុភារកម្មទំនើប, សុខាភិបាល, និងថាមពលបៃតង។

ក្នុងវេទិកានោះ លោកហ៊ាង សុទ្ធាយុត្តិ អគ្គលេខាធិការរង អគ្គលេខាធិការដ្ឋាននៃ ក.អ.ក. បានស្វាគមន៍ ដោយបានបង្ហាញពីសក្តានុពលរបស់កម្ពុជា ក្នុងការបង្កបរិយាកាសដ៏រស់រវើកជាមួយកិច្ចសម្រួលវិនិយោគ ដោយលោកបានគូសរំលេចពីការបង្កបរិយាកាសវិនិយោគអំណោយផល។

លោកថា បរិយាកាសវិនិយោគអំណោយផលនៅកម្ពុជា តាមរយៈការអនុញ្ញាតឱ្យវិនិយោគិនបរទេសទទួលបានការកាន់កាប់សិទ្ធិវិនិយោគ ១០០% អនុញ្ញាតឱ្យមានលំហូរប្រាក់ដោយសេរី ការពារពីការធ្វើជាតូបនីយកម្ម និងគ្មានការរើសអើងចំពោះវិនិយោគិនបរទេស។ ជាងនេះទៅទៀត គម្រោងវិនិយោគមានលក្ខណៈសម្បត្តិគ្រប់គ្រាន់ (QIP) ទទួលបានការលើកលែងពន្ធលើប្រាក់ចំណេញរហូតដល់ ៩ឆ្នាំ ការលើកលែងពន្ធគយ ពន្ធអាករពិសេស និងអាករលើតម្លៃបន្ថែមជាបន្ធុករដ្ឋ សម្រាប់សកម្មភាពវិនិយោគដែលភ្ជាប់ការស្រាវជ្រាវ-អភិវឌ្ឍន៍ ការអភិវឌ្ឍធនធានមនុស្ស និងឧស្សាហកម្មគាំទ្រ ជាដើម។ល។

ជាមួយគ្នានេះ លោកថា កម្ពុជាបានធ្វើទំនើបកម្ម និងសាមញ្ញកម្មការផ្តល់សេវាសាធារណៈជាមួយនឹងការដាក់ឱ្យដំណើរការប្រព័ន្ធគ្រប់គ្រងគម្រោងវិនិយោគកម្ពុជា cdcIPM ដោយបានប្រែក្លាយនីតិវិធីចុះបញ្ជីវិនិយោគបែបប្រពៃណីលើក្រដាស ទៅជាឌីជីថលពីចម្ងាយ ទូទាត់តាមឌីជីថល កាត់បន្ថយការជួបផ្ទាល់ និងការចំណាយមិនចាំបាច់នានា។

ក្រៅពីការទាក់ទាញវិនិយោគ និងសម្រួលនីតិវិធីនានា លោកថា កម្ពុជាក៏បានយកចិត្តទុកដាក់លើការពិគ្រោះយោបល់ និងការដោះស្រាយបញ្ហាប្រឈមជូនវិស័យឯកជន ជាមួយយន្តការនៃកិច្ចសន្ទនាត្រង់ទៅត្រង់មក រួមមានជាអាទិ៍ វេទិការដ្ឋាភិបាល-ផ្នែកឯកជន (G-PSF) កិច្ចសន្ទនារវាងរដ្ឋនិងវិស័យឯកជន (PPSD) ដោយមានការសហការជាមួយសភាពាណិជ្ជកម្មអន្តរជាតិ និងស្ថាប័នពាក់ព័ន្ធផ្សេងៗ។តាមរយៈទិន្នន័យនៃចំនួនវិនិយោគពីបរទេសនៅកម្ពុជា លោកថា បានបង្ហាញឱ្យឃើញថាការវិនិយោគពីប្រទេសចិនមានចំនួនខ្ពស់ និងនៅតែបន្តកើនឡើង។ តួលេខនេះបានបង្ហាញពីទំនុកចិត្តដ៏មុតមាំរបស់វិនិយោគិនចិន មកលើបរិយាកាសវិនិយោគ និងរាជរដ្ឋាភិបាលកម្ពុជា។

តាមរយៈវេទិកាខាងលើ ប្រតិភូក៏បានធ្វើការអញ្ជើញសហគ្រិន អ្នកផ្គត់ផ្គង់ និងវិនិយោគិនចិនទាំងអស់ ពិចារណាលើការជ្រើសរើសកម្ពុជា ជាគោលដៅបន្ទាប់សម្រាប់ការវិនិយោគរបស់ខ្លួន ដើម្បីទាញយកប្រយោជន៍ពីការតភ្ជាប់ទៅទីផ្សារក្នុងតំបន់អាស៊ាន ដែលមានប្រជាជនជាង ៦០០លាននាក់ និងទៅកាន់សកលលោក។

គួរឱ្យកត់សម្គាល់ដែរថា នៅក្នុងវេទិកាផ្គូផ្គងនេះក៏មានក្រុមហ៊ុនសហគ្រាសមួយចំនួន បានចូលមកសាកសួរព័ត៌មាន និងធ្វើការប្រឹក្សាយោបល់នៅនឹងកន្លែង តាមបណ្តាតុរបស់ក្រុមការងារគណៈប្រតិភូរបស់កម្ពុជាផងដែរ៕អតហថបទ៖ហ្សាលីន

The post ប្រតិភូ CDC លើកកម្ពស់បរិយាកាសវិនិយោគនៅកម្ពុជា តាមរយៈកម្មវិធីពិព័រណ៍អន្តរជាតិនៅប្រទេសចិន appeared first on .

យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា ចុះថ្ងៃទី២០ ខែឧសភា ឆ្នាំ២០២៦ បានឱ្យដឹងថា ក្នុងចំណោមគម្រោងវិនិយោគទាំង ៤២នេះ មានគម្រោង វិនិយោគចំនួន ២៣គម្រោង (ក្រៅតំបន់សេដ្ឋកិច្ចពិសេសចំនួន ១៣គម្រោង, ក្នុងតំបន់សេដ្ឋកិច្ចពិសេស ចំនួន ១០គម្រោង) ត្រូវបានចុះបញ្ជីដោយ ក.អ.ក. ក្នុងទំហំទុនវិនិយោគប្រមាណ ១៥៨លានដុល្លារអាម៉េរិក និងអាចបង្កើតការងារបានប្រមាណ១៨ពាន់កន្លែង។

ក្រុមប្រឹក្សាអភិវឌ្ឍន៍កម្ពុជា បានបន្ថែមថា គម្រោងវិនិយោគដែលមានភាពលេចធ្លោប្រចាំខែមេសា ឆ្នាំ២០២៦  គឺ គម្រោងវិនិយោគបង្កើតកសិដ្ឋានដាំដំណាំឈើហូបផ្លែ និងសាងសង់រោងចក្រកែច្នៃ, គម្រោងវិនិយោគបង្កើតរោងចក្រផលិត និងកែច្នៃប្រេងសម្រាប់សម្បកកង់យានយន្ត និងប្រេង សម្រាប់ផលិតផលកែច្នៃជ័រកៅស៊ូ៕

The post ក្នុងខែមេសា! កម្ពុជាបានចុះបញ្ជីគម្រោងវិនិយោគ៤២ ក្នុងទំហំទុនវិនិយោគសរុបប្រមាណ ២២២លានដុល្លារ appeared first on .

ក្រុមប្រឹក្សាអភិវឌ្ឍន៍កម្ពុជា នៅថ្ងៃទី១០ ខែតុលា ឆ្នាំ២០២៥ បានប្រកាសចូលរួមអបអរសាទរដល់ប្រជាពលរដ្ឋស្រុកពញាក្រែក ខេត្តត្បូងឃ្មុំ ដែលទទួលបានគម្រោងវិនិយោគបង្កើតរោងចក្រកែច្នៃជ័រកៅស៊ូ ក្នុងទំហំទុនវិនិយោគប្រមាណ ៦,៩លានដុល្លារអាម៉េរិក និងអាចបង្កើតការងារបានចំនួន ១៧៥កន្លែង។

ក្រុមប្រឹក្សាអភិវឌ្ឍន៍កម្ពុជា បន្ថែមថា ដោយយោងតាមច្បាប់ស្តីពីវិនិយោគនៃព្រះរាជាណាចក្រកម្ពុជា ក្រុមប្រឹក្សាអភិវឌ្ឍន៍កម្ពុជា “ក.អ.ក.” បានសម្រេចចេញវិញ្ញាបនបត្រចុះបញ្ជីគម្រោងវិនិយោគបង្កើត រោងចក្រកែច្នៃជ័រកៅស៊ូ ដែលមានទីតាំងស្ថិតនៅភូមិឡ ឃុំកោងកាង ស្រុកពញាក្រែក ខេត្តត្បូងឃ្មុំ ជាគម្រោងវិនិយោគមានលក្ខណៈសម្បត្តិគ្រប់គ្រាន់។ គម្រោងរោងចក្រនេះដែរ គឺបោះទុនវិនិយោគដោយ ក្រុមហ៊ុន DE YONG INVESTMENT CO., LTD.។

សូមរម្លឹកថា រយៈពេល៩ខែនៃ ឆ្នាំ២០២៥ CDC បានសម្រេចុះបញ្ជីគម្រោងវិនិយោគថ្មីចំនួន ៥៤៦គម្រោង ក្រោមទុនវិនិយោគជិត ៨ពាន់លានដុល្លារ និងអាចបង្កើតការងារបានប្រមាណ ៣៧ពាន់កន្លែង។ នេះបើយោងតាមសេចក្តីប្រកាសព័ត៌មាន របស់ CDC កាលថ្ងៃទី២ ខែតុលា ឆ្នាំ២០២៥៕

អត្ថបទ៖ហ្សាលីន

The post ខេត្តត្បូងឃ្មុំ ទទួលបានគម្រោងវិនិយោគរោងចក្រកែច្នៃជ័រកៅស៊ូ ក្នុងតម្លៃជិត ៧លានដុល្លារអាម៉េរិក appeared first on .

ការពិភាក្សានេះធ្វើឡើងនៅក្នុងឱកាសដែលលោកស៊ុន ចាន់ថុល អនុញ្ញាតជូនគណៈប្រតិភូក្រុមហ៊ុន HUAWEI Cambodia Co., LTD. ដឹកនាំដោយ លោក TAO Guangyao ប្រធានក្រុមហ៊ុន HUAWEI ប្រចាំពហុប្រទេសនៅក្នុងតំបន់អាស៊ីអាគ្នេយ៍ និងជានាយកប្រតិបត្តិក្រុមហ៊ុន HUAWEI Cambodia Co., LTD. ចូលជួបសម្តែងការគួរសម និងពិភាក្សាការងារ នៅព្រឹកថ្ងៃទី១៧ ខែកក្កដា ឆ្នាំ២០២៥។

ជាកិច្ចចាប់ផ្តើម លោក TAO ក្នុងនាមក្រុមហ៊ុន Huawei បានសម្តែងនូវអំណរគុណយ៉ាងជ្រាលជ្រៅដល់ ក.អ.ក. ចំពោះការគាំទ្រកន្លងមក ដែលបានដើរតួនាទីយ៉ាងសំខាន់ក្នុងការជំរុញបរិយាកាសអំណោយផលសម្រាប់ការរីកលូតលាស់របស់ក្រុមហ៊ុន Huawei នៅក្នុងព្រះរាជាណាចក្រកម្ពុជាផ្ទាល់។ បន្ថែមពីនេះ លោកនាយកប្រតិបត្តិ បានជម្រាបជូនអំពីរបាយការណ៍សង្ខេបជុំវិញវឌ្ឍនភាពរបស់ Huawei Group និង Huawei Cambodia ដោយផ្តោតលើលទ្ធផលការងារឆ្នាំ ២០២៤ និងបច្ចុប្បន្នភាពនៃស្ថានភាពអាជីវកម្មរបស់ក្រុមហ៊ុនខ្លួន។

នៅក្នុងជំនួបនេះ ឧបនាយករដ្ឋមន្ត្រី ស៊ុន ចាន់ថុល បានរំលេចអំពីគំនិតផ្តូចផ្តើមដ៏ខ្ពង់ខ្ពស់របស់ សម្តេចធិបតីនាយករដ្ឋមន្ត្រី ក្នុងការបង្កើតឱ្យមាននូវសួនឧស្សាហម្មបច្ចេកវិទ្យាឌីជីថល​​នៅកម្ពុជា ដែលជាគំនិតផ្តួចផ្តើមក្នុងការជំរុញបរិយាកាសវិនិយោគនៅកម្ពុជា ពាក់ព័ន្ធនឹងឧស្សាហកម្មឌីជីថល និងបច្ចេកវិទ្យាទំនើបជាន់ខ្ពស់ឱ្យកាន់តែមានភាពរស់រវើក។

ជាមួយគ្នានេះ លោកឧបនាយករដ្ឋមន្ត្រី និងលោកនាយកប្រតិបត្តិក្រុមហ៊ុន HUAWEI Cambodia ក៏បានធ្វើការពិភាក្សាជុំវិញការចាប់យកឌីជីថលូបនីយកម្ម ក្នុងការធ្វើបរមភាវូបនីយកម្មដំណើរប្រតិបត្តិការនៅក្នុងស្ថាប័នរដ្ឋ និងផ្នែកឯកជន សំដៅជំរុញនវានុវត្តន៍ឌីជីថលនៅកម្ពុជាឱ្យកាន់តែមានភាពរីកចម្រើន ប្រកបប្រសិទ្ធភាពនិងស័ក្តិសិទ្ធភាពខ្ពស់ ដើម្បីជាការចូលរួមបង្កើនល្បឿនការអភិវឌ្ឍសង្គម និងសេដ្ឋកិច្ចឌីជីថលនៅកម្ពុជា ឱ្យស្របទៅតាមយុទ្ធសាស្រ្តបញ្ចកោណ-ដំណាក់កាលទី១ របស់រាជរដ្ឋាភិបាល នីតិកាលទី៧ ដោយផ្ដោតលើអាទិភាពគន្លឹះចំណុចទី១ និងទី៥ គឺមនុស្ស និងបច្ចេកវិទ្យា ក៏ដូចជា ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ឆ្នាំ២០២១-២០៣៥ ផងដែរ៕

The post ឧបនាយករដ្ឋមន្ត្រី ស៊ុន ចាន់ថុល និងក្រុមហ៊ុន HUAWEI Cambodia ប្រជុំពិភាក្សាក្នុងការចាប់យកឌីជីថលូបនីយកម្ម ធ្វើបរមភាវូបនីយកម្មដំណើរប្រតិបត្តិការនៅក្នុងស្ថាប័នរដ្ឋ និងផ្នែកឯកជន appeared first on .

នាឱកាសនោះ លោកឧបនាយករដ្ឋមន្ត្រី ស៊ុន ចាន់ថុល បានកោតសរសើដល់មន្រ្តីរាជការ និងមន្ត្រីជាប់កិច្ចសន្យា CDC ទាំងអស់ ដែលបាននិងកំពុងខិតខំប្រឹងប្រែងបំពេញកិច្ចការងារ និងមានស្នាដៃល្អក្នុងការបំពេញការងារកន្លងមក។ លោកបានបន្ថែមថា ការលើកទឹកចិត្តនាពេលនេះ គឺពិតជាស័ក្តិសមបំផុត ដែលមន្ត្រីយើងបានយកអស់នូវកម្លាំងកាយចិត្ត និងស្មារតីគ្រប់បែបយ៉ាង ក្នុងបេសកកម្មបម្រើជាតិ ឆ្លើយតបការផ្តល់សេវាតាមមុខជំនាញរបស់ខ្លួន ប្រកបដោយវិជ្ជាជីវ:។

លោក ក៏បានគោរពថ្លែងអំណរគុណសម្តេចធិបតី ដែលបានសម្រេចផ្តល់មេដាយការងារមន្ត្រីរាជការ និងមន្ត្រីជាប់កិច្ចសន្យា ដែលនេះគឺជាការគិតគូរយកចិត្តទុកដាក់ដ៏ខ្ពស់បំផុតដល់ពួកគាត់ ក៏ដូចជាការផ្តល់នូវកម្លាំងចិត្ត និងជំរុញប្រសិទ្ធភាពការបំពេញការងារបម្រើប្រជាជាតិកាន់តែសកម្មថែមមួយកម្រិតទៀត។

ជាមួយគ្នានេះ លោក ក៏បានស្នើឱ្យគណៈកម្មាការវាយតម្លៃការងារ នៃ CDC ពិនិត្យលទ្ធភាពក្នុងការរៀបចំឱ្យមានការលើកទឹកចិត្តជាប្រចាំ តាមរយៈការផ្តល់ជាបណ្ណសរសើរជូនដល់មន្ត្រីឆ្នើមដែលមានស្នាដៃល្អក្នុងការបំពេញការងារប្រចាំខែ និងប្រចាំឆ្នាំនៅក្នុងក្រុមប្រឹក្សាអភិវឌ្ឍន៍កម្ពុជាផងដែរ។

សូមជម្រាប់ថា ការផ្តល់គ្រឿងឥស្សរិយយសការងារនាឱកាសនេះ គឺត្រូវបានរៀបចំឡើងស្របទៅតាមសេចក្តីណែនាំដ៏ខ្ពង់ខ្ពស់របស់ សម្តេចធិបតី នាយករដ្ឋមន្ត្រីកម្ពុជា ដែលបានលើកឡើងក្នុងឱកាសសម្តេចអញ្ជើញបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងមុខងារសាធារណៈ កាលពីថ្ងៃទី២០ ខែមីនា ឆ្នាំ២០២៥ កន្លងទៅ។តាមរយៈអនុក្រឹត្យលេខ ៣៤១ អនក្រ.តត ចុះថ្ងៃទី២៥ ខែមេសា ឆ្នាំ២០២៥ ស្តីពីការជូនមេដាយការងារ បានបង្ហាញឱ្យឃើញថា មន្ត្រីរាជការ និងមន្ត្រីជាប់កិច្ចសន្យានៃ ក.អ.ក. ដែលត្រូវឡើងទទួលគ្រឿងឥស្សរិយយស “មេដាយសំរឹទ្ធការងារ” សរុបមានចំនួន ៥៩រូប ក្នុងនោះ មន្រ្តីនារីមានចំនួន ២១រូប៕ អត្ថបទ៖ ហ្សាលីន

The post ឧបនាយករដ្ឋមន្ត្រី ស៊ុន ចាន់ថុល ប្រគល់គ្រឿងឥស្សរិយយសការងារជូនមន្ត្រីរាជការជិត ៦០រូប appeared first on .

វេទិកាសេដ្ឋកិច្ចឌីជីថលនេះ បានរៀបចំឡើង ក្រោមប្រធានបទ “ឱកាសថ្មីក្នុងការចាប់ផ្តើមកិច្ចសហប្រតិបត្តិការដ៏មានសក្តានុពល” ដោយរដ្ឋបាលទិន្នន័យជាតិ នៃសាធារណរដ្ឋប្រជាមានិតចិន (National Data Administration of China)។ គោលបំណងនៃការរៀបចំវេទិកានេះធ្វើឡើង គឺដើម្បីឱ្យតំណាងក្រសួង-ស្ថាប័នមកពីប្រទេសជាសមាជិក សមាជិកអង្កេតការណ៍ និងដៃគូសន្ទនាពាក់ព័ន្ធ ចូលរួមទស្សនកិច្ចសិក្សាបច្ចេកវិទ្យាទំនើបថ្មីៗ និងពិគ្រោះយោបល់ជុំវិញបទពិសោធន៍ និងកិច្ចសហប្រតិបត្តិការ លើអន្តរកម្មតភ្ជាប់ហេដ្ឋារចនាសម្ព័ន្ធ វិភាគសំយោគ និងចែករំលែកទិន្នន័យ ការប្រើប្រាស់បញ្ញាសិប្បនិម្មិត បច្ចេកវិទ្យាសម្រាប់ទីក្រុងឆ្លាតវៃ និងកម្មវិធីបច្ចេកវិទ្យានវានុវត្តផ្សេងៗទៀត។

ប្រធានបទសំខាន់ដែលបានលើកឡើងក្នុងវេទិកានេះរួមមាន៖ ១. ប្រព័ន្ធស្ថាប័នគោលសម្រាប់គ្រប់គ្រងធាតុទិន្នន័យ (Data Elements),២. នវានុវត្តន៍នៃកិច្ចសហប្រតិបត្តិការក្នុងវិស័យហេដ្ឋារចនាសម្ព័ន្ធទិន្នន័យ ,៣. បរិវត្តកម្មឌីជីថលសម្រាប់ទីក្រុង និងឧស្សាហកម្ម,៤. ការអភិវឌ្ឍ និងអភិបាលកិច្ចបញ្ញាសិប្បនិម្មិត,៥. បទពិសោធនៃការអភិវឌ្ឍសេដ្ឋកិច្ចឌីជីថលនៅប្រទេសចិន។

ក្នុងឱកាសនោះ លោកអគ្គលេខាធិការរង បានឡើងថ្លែងសុន្ទរកថាក្នុងនាមកម្ពុជា នៅលើប្រធានបទកិច្ចសហប្រតិបត្តិការសេដ្ឋកិច្ចឌីជីថល។ លោកអគ្គលេខាធិការរង បានរម្លឹកអំពីវេទិកាខ្សែក្រវ៉ាត់ និងផ្លូវ ដឹកនាំដោយ ឯកឧត្តមប្រធានាធិបតីចិន កាលពីឆ្នាំ២០២៣ ដោយក្នុងនោះសម្តេចមហាបវរធីបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសង្កត់ធ្ងន់ថា “សេដ្ឋកិច្ចឌីជីថលជាប្រភពនៃកំណើនថ្មី ដ៏មានសក្តានុពល“ ដែលឆ្លុះបញ្ចាំងអំពីការតាំងចិត្តខ្ពស់ក្នុងការលើកកម្ពស់ការធ្វើឌីជីថលូបនីយកម្ម ឆ្ពោះទៅពន្លឿនការអភិវឌ្ឍក្នុងស្រុក និងការធ្វើសមាហរណកម្មក្នុងតំបន់។

លោកអគ្គលេខាធិការរង បានជម្រាបជូនដោយសង្ខេបអំពីសមិទ្ធផល និងកិច្ចខិតខំប្រឹងប្រែងកំពុងបន្ត របស់រាជរដ្ឋាភិបាលកម្ពុជា លេីការជំរុញការធ្វើទំនើបកម្មស្ថាប័ន និងការវិនិយោគលេីការកសាងហេដ្ឋារចនាសម្ព័ន្ធឌីជីថល ព្រមទាំងការកំណត់ចក្ខុវិស័យ ទិសដៅ និងផែនការសកម្មភាពដ៏រឹងមាំរបស់កម្ពុជា តាមរយៈយុទ្ធសាស្ត្របញ្ចកោណ-ដំណាក់កាលទីមួយ ក្របខណ្ឌគោលនយោបាយសេដ្ឋកិច្ច និងសង្គមឌីជីថល២០២១-២០៣៥ ។

លោក ហ៊ាង សុទ្ធាយុត្តិ ក៏បានគូសរំលេច នូវការរៀបចំដាក់ឱ្យដំណើការប្រព័ន្ធបច្ចេកវិទ្យាឌីជីថលសំខាន់ៗរបស់កម្ពុជា រួមមាន ប្រព័ន្ធគ្រប់គ្រងគម្រោងវិនិយោគកម្ពុជា cdcIPM និងថ្នាលផ្លាស់ប្តូរទិន្នន័យកម្ពុជា CamDX ជាដើម។

ក្រៅពីវេទិកាពិភាក្សា គណៈប្រតិភូកម្ពុជាក៏បានធ្វើទស្សនកិច្ចសិក្សាទៅកាន់រោងចក្រសហគ្រាសឧហ្សាហកម្មបច្ចេកវិទ្យាឌីជីថលមួយចំនួនដែលមានជំនាញក្នុងការបង្កើតគ្រឿងយន្ត និងកម្មវិធីបច្ចេកវិទ្យាផ្តោតលើការបញ្ជូលនូវបញ្ញាសិប្បនិម្មិត ក្នុងការគ្រប់គ្រង និងឆ្លើយតបទៅនឹងដំណឹងការផលិតកម្មស្វ័យប្រវត្តិប្រកបដោយភាពឆ្លាតវៃផងដែរ៕

The post កម្ពុជាបានក្លាយជាដៃគូសន្ទនានៃវេទិកាសេដ្ឋកិច្ចឌីជីថលរយៈពេលជាង១០ឆ្នាំ appeared first on .

ការស្នើនេះ បានធ្វើឡើងនៅក្នុងកិច្ចប្រជុំក្រុមការងារសហប្រតិបត្តិការកម្ពុជា-ខេត្តយូណាន លើកទី១ កាលពីថ្ងៃទី២៣ ខែធ្នូ ឆ្នាំ២០២៤ នាសាធារណរដ្ឋប្រជាមានិតចិន។

នាឱកាសនោះ លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា កក្ពុជា-ចិន បានខិតខំប្រឹងប្រែងកសាងសហគមន៍វាសនារួមកម្ពុជា-ចិនប្រកបដោយភាពស៊ីជម្រៅ ពង្រឹងក្របខ័ណ្ឌកិច្ចសហប្រតិបត្តិការត្បូងពេជ្រ  និងបង្កើតឱ្យមានវឌ្ឍនភាពវិជ្ជមានក្នុងការកសាងរបៀងឧស្សាហកម្ម និងបច្ចេកវិទ្យា ក៏ដូចជារបៀងមច្ឆា និងអង្ករ។

ឆ្លៀតនឱកាសនោះដែរ លោក ក៏បានលើកទឹកចិត្តសហគ្រាសមកខេត្តយូណានឱ្យមកបណ្តាក់ទុនវិនិយោគបន្ថែមទៀតនៅកម្ពុជាដើម្បីផលិតវត្ថុធាតុដើម, ផលិតផលពាក់កណ្តាលសម្រេច និងផលិតផលសម្រេចសម្រាប់ផ្គត់ផ្គង់ទីផ្សារក្នុងស្រុក និងក្នុងតំបន់ផងដែរ។          

បើតាមក្រុមប្រឹក្សាអភិវឌ្ឍន៍កម្ពុជា ផ្តើមចេញពីក្របខ័ណ្ឌនៃកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ និងកិច្ចសហប្រតិបត្តិការត្បូងពេជ្រ រំហូរវិនិយោគផ្ទាល់ពីប្រទេសចិនមកបណ្តាក់ទុនលើទឹកដីកម្ពុជាតែងតែឈរនៅលំដាប់កំពូលជានិច្ចក្នុងរយៈពេល១ទសវត្សរ៍កន្លងមកនេះ។ ជាក់ស្តែង ក្នុងរយៈពេល១១ខែ នៃឆ្នាំ២០២៤ គម្រោងវិនិយោគចិននៅកម្ពុជាបានឈរនៅលំដាប់លេខរៀងទី១ ក្រោមទុនវិនិយោគសរុបប្រមាណ៣,២១ពាន់លានដុល្លារអាម៉េរិក៕ អត្ថបទ៖ ហ្សាលីន

The post CDC ស្នើសហគ្រាសចិនមកបោះទុនវិនិយោគលើការផលិតវត្ថុធាតុដើមនៅកម្ពុជា appeared first on .

កិច្ចប្រជុំនេះ បានធ្វើឡើងកាលថ្ងៃ ទី១៨ ខែធ្នូ ឆ្នាំ២០២៤ ក្រោមអធិបតីដោយ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា។កិច្ចប្រជុំនេះដែរ ក៏មានការចូលរួមពី លោកស្រី Bridget Collier ឯកអគ្គរដ្ឋទូតរងអូស្រា្តលីប្រចាំកម្ពុជា និងសហការី តំណាងកម្មវិធីភាពជាដៃគូកម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) ព្រមទាំងថ្នាក់ដឹកនាំ និងមន្ត្រីជំនាញសរុបប្រមាណ ៤០រូប។

កិច្ចប្រជុំខាងលើនេះ ត្រូវបានរៀបចំឡើងក្នុងគោលបំណងដើម្បីពិភាក្សា និងសម្រេចជ្រើសរើសវិស័យអាទិភាពចម្បង សម្រាប់ការរៀបចំយុទ្ធសាស្រ្តជំរុញវិនិយោគ ក្រោមជំនួយបច្ចេកទេសរបស់អូស្រ្តាលី តាមរយៈកម្មវិធី CAPRED។ យុទ្ធសាស្ត្រជំរុញវិនិយោគ នឹងដាក់ចេញសកម្មភាពជាក់លាក់ដែលអាចអនុវត្តបាន ដោយផ្តោតជាចម្បងលើការកំណត់វិស័យអាទិភាព, ការគាំទ្រនិងកិច្ចសម្រួលដល់វិនិយោគិន, ព្រមទាំងការកំណត់គុណតម្លៃច្បាស់លាស់ក្នុងវិស័យអាទិភាពដែលបានកំណត់ ដើម្បីជំរុញទាក់ទាញវិនិយោគ និងទាញយកជាអតិបរមានូវកាលានុវត្តភាពពីនិន្នាការដែលបាននិងកំពុងលេចឡើងទាំងក្នុងតំបន់ និងសកល។

នាឱកាសនោះ លោក ស៊ុន ចាន់ថុល លោកក៏បានផ្ដល់នូវអនុសាសន៍ដល់កម្មវិធី CAPRED ឱ្យផ្តល់អាទិភាពស្វែងរកព័ត៌មានអំពីក្រុមហ៊ុនសក្ដានុពលដែលមានបំណងចង់ផ្លាស់ប្ដូរមូលដ្ឋានផលិតកម្មមកកាន់តំបន់អាស៊ាន ព្រមទាំងសិក្សាស៊ីជម្រៅលើយុទ្ធសាស្រ្តគាំទ្រដល់វិស័យកសិ-ឧស្សាហកម្មកម្ពុជា, និងសាកល្បងសិក្សាសមិទ្ធិលទ្ធភាពក្នុងការកំណត់យកវិស័យភស្ដុភារកម្ម ជាវិស័យអាទិភាពមួយបន្ថែមទៀតសម្រាប់យុទ្ធសាស្ត្រជំរុញវិនិយោគរយៈពេល៣ឆ្នាំផងដែរ។

ជាមួយគ្នានេះ លោកស្រីឯកអគ្គរដ្ឋទូតរងអូស្រ្តាលី  ក៏មានក្តីសង្ឃឹមថា យុទ្ធសាស្រ្តវិនិយោគរយៈពេល៣ឆ្នាំ នឹងក្លាយឯកសារផ្ទៃក្នុងយ៉ាងសំខាន់សម្រាប់ក្រុមប្រឹក្សាអភិវឌ្ឍន៍កម្ពុជា អាចតម្រង់ទិសការទាក់ទាញវិនិយោគដែលមានគុណភាព និងតម្លៃបន្ថែមខ្ពស់សម្រាប់កម្ពុជា៕ អត្ថបទ៖ ហ្សាលីន

The post កម្ពុជា-អូស្រ្តាលី បើកកិច្ចពិភាក្សារៀបចំយុទ្ធសាស្ត្រ ជំរុញការវិនិយោគលើវិស័យអាទិភាព appeared first on .

នេះបើយោងតាមជំនួបពិភាក្សាការងាររវាងលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយ លោក Liang Songshou ប្រធានសហព័ន្ធសិក្សាស្រាវជ្រាវសេដ្ឋកិច្ចឧស្សាហកម្មតំបន់ឆ្នេរ Guangdong-Hong Kong-Macao និងជាប្រធានវិទ្យាស្ថានសិក្សាស្រាវជ្រាវឧស្សាហកម្ម Guangdong Huarong កាលពីរសៀលថ្ងៃ ទី១៨ ខែធ្នូ ឆ្នាំ២០២៤។

នាឱកាសនោះ លោក ស៊ុន ចាន់ថុល បានលើកឡើងថា កម្ពុជា បាននិងកំពុងបន្តផ្សព្វផ្សាយកាលានុវត្តភាពវិនិយោគជូនវិនិយោគិនដែលមានបំណងបណ្ដាក់ទុនវិនិយោគនៅកម្ពុជា សំដៅជំរុញការធ្វើពិពិធកម្មសេដ្ឋកិច្ច និងបង្កើតការងារជូនប្រជាពលរដ្ឋខ្មែរ។

គួរបញ្ចាក់ដែរថា តាមរយៈជំនួបនាឱកាសនេះ គណៈប្រតិភូនៃសហព័ន្ធសិក្សាស្រាវជ្រាវសេដ្ឋកិច្ចឧស្សាហកម្មតំបន់ឆ្នេរ Guangdong-Hong Kong-Macao បានស្វែងយល់កាន់តែច្បាស់បន្ថែមទៀតអំពីបរិយាកាសវិនិយោគនៅកម្ពុជា ពិសេសពាក់ព័ន្ធនឹងការលើកទឹកចិត្តរបស់រាជរដ្ឋាភិបាលស្របតាមច្បាប់ និងបទដ្ឋានគតិយុត្តិពាក់ព័ន្ធ លើវិស័យសក្ដានុពលនានា ដែលក្រុមហ៊ុនជាបុត្រសម្ព័ន្ធរបស់សហព័ន្ធកំពុងចាប់អារម្មណ៍វិនិយោគនាពេលខាងមុខផងដែរ៕​អត្ថបទ៖ ហ្សាលីន

The post សហព័ន្ធស្រាវជ្រាវសេដ្ឋកិច្ចឧស្សាហកម្មតំបន់ឆ្នេរមកពីចិន មកស្វែងយល់ពីបរិយាកាសវិនិយោគនៅកម្ពុជា appeared first on .

ការបង្ហាញបែបនេះ នៅក្នុងជំនួបពិភាក្សាការងារ រវាងលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយក្រុមហ៊ុនទាំង២នេះ គឺក្រុមហ៊ុន Amru Rice ដឹកនាំដោយនាយកប្រតិបត្តិក្រុមហ៊ុន ឧកញ៉ា សុង សារ៉ន និងក្រុមហ៊ុន Stabil Nutrition LLC ដឹកនាំដោយលោកប្រធានក្រុមហ៊ុន Michael A. Tarrasch កាលថ្ងៃទី៩ ខែធ្នូ ឆ្នាំ២០២៤។

ជំនួបពិភាក្សាការងារនាឱកាសនេះ ត្រូវបានរៀបចំឡើងក្រោយក្រុមហ៊ុន Amru Rice និងក្រុមហ៊ុន Stabil Nutrition LLC បានចុះអនុស្សារណៈនៃការយោគយល់គ្នាកាលពីខែកញ្ញា ឆ្នាំ២០២៤ ក្រោមអធិបតីភាពលោក ឧបនាយករដ្ឋមន្ត្រី ពោលគឺអំឡុងដំណើរទស្សនកិច្ចទាក់ទាញ និងជំរុញវិនិយោគរបស់សហរដ្ឋអាម៉េរិកកាលពីខែកញ្ញា ឆ្នាំ២០២៤កន្លងទៅ។

ឆ្លៀតក្នុងឱកាសនេះ ក្រុមហ៊ុនទាំង២ បានរាយការណ៍ជូនលោក ឧបនាយករដ្ឋមន្រ្តីអំពីផែនការវិនិយោគរបស់ក្រុមហ៊ុនខ្លួននៅកម្ពុជាផងដែរ។ ក្រុមហ៊ុនទាំង២ បានអះអាងថា ដំណើរទស្សនកិច្ចរបស់ក្រុមហ៊ុនឯកជនរបស់សហរដ្ឋអាម៉េរិកមកកម្ពុជានាឱកាសនេះ បានបង្ហាញអំពីការបោះជំហានថ្មីយ៉ាងមោះមុតលើការផលិត និងកែច្នៃផលិតផលកន្ទក់សរីរាង្គរបស់ប្រទេសកម្ពុជាឱ្យស្របតាមស្តង់ដារគុណភាព និងលក្ខណៈបច្ចេកទេស ព្រមទាំងបទប្បញ្ញត្តិនានា ដើម្បីនាំចូលទៅកាន់ទីផ្សារសហរដ្ឋអាម៉េរិក។

នាឱកាសនេះដែរ លោកឧបនាយករដ្ឋមន្ត្រី ស៊ុន ចាន់ថុល បានជម្រាបអំពីកិច្ចសម្រួលវិនិយោគរបស់ក្រុមប្រឹក្សាអភិវឌ្ឍន៍កម្ពុជា និងចក្ខុវិស័យរបស់រាជរដ្ឋាភិបាលកម្ពុជាក្នុងការគាំទ្រធុរកិច្ច តាមរយៈការលើកទឹកចិត្ត និងការលើកលែងពន្ធនានាចំពោះកិច្ចវិនិយោគ។

យ៉ាងណាមិញ តាមរយៈជំនួបខាងលើ ស៊ុន ចាន់ថុល ក៏បានលើកទឹកចិត្តឱ្យក្រុមហ៊ុនទាំង២ ទទួលបានភាគជោគជ័យក្នុងកិច្ចការវិនិយោគរបស់ខ្លួនលើការកែច្នៃនិងនាំចេញកន្ទក់ពីកម្ពុជា៕ អត្ថបទ៖ ហ្សាលីន

The post ក្រុមហ៊ុនធំៗចំនួន២ សហការគ្នាវិនិយោគលើការកែច្នៃកន្ទក់សរីរាង្គ ដើម្បីនាំចេញទៅកាន់ទីផ្សារអាមេរិក appeared first on .