ថ្លែងក្នុងឱកាសអញ្ជើញជាអធិបតីភាពសម្ពោធដាក់ឱ្យប្រើប្រាស់ជាផ្លូវការ ស្តូបអនុស្សាវរីយ៍នយោបាយឈ្នះឈ្នះ នៅក្រុងខេមរភូមិន្ទ ខេត្តកោះកុង នៅព្រឹកថ្ងៃទី៣០ ខែឧសភា ឆ្នាំ២០២៦ ឧបនាយករដ្ឋមន្ត្រី ទៀ សីហា បានលើកឡើងថា ការរៀបចំច្បាប់ស្ដីពីកាតព្វកិច្ចយោធា ត្រូវការការស្រាវជ្រាវបន្ថែមជាច្រើន ដើម្បីកំណត់ឱ្យច្បាស់នូវលក្ខខណ្ឌសម្រាប់ដំណើរការចុះឈ្មោះ អំឡុងពេលហ្វឹកហាត់ និងក្រោយពេលហ្វឹកហាត់ត្រូវបានបញ្ចប់។

លោកបន្តថា បន្ទាប់ពីប្រកាសដាក់ឱ្យដំណើរការច្បាប់នេះឡើងវិញ មានយុវជនប្រមាណ ១ម៉ឺននាក់ហើយ​បានចុះឈ្មោះ។ លោក បានថ្លែងបញ្ជាក់ដូច្នេះថា៖ «មិនថាកូនអ្នកធំ កូនអ្នកមាន កូនកសិករ គឺមានសិទ្ធិចូលទាំងអស់គ្នា។ ហើយបច្ចុប្បន្ននេះ អ្នកដែលដាក់ពាក្យមកសុទ្ធតែកូនថ្នាក់ដឹកនាំ»។

លោក ទៀ សីហា បានបញ្ជាក់ថា ការដាក់ឱ្យអនុវត្តច្បាប់នេះ ដើម្បីបើកឱកាសដល់យុវជនចូលរួមជាមួយរាជរដ្ឋាភិបាល ក្នុងការការពារបូរណភាពទឹកដី ករណីប្រទេសមានភាពអាសន្ននៅពេលណាមួយ។

សូមជម្រាបជូនថា ច្បាប់ស្ដីពីកាតព្វកិច្ចយោធា ត្រូវបានចុះហត្ថលេខាដាក់ឱ្យប្រើប្រាស់ជាផ្លូវការនៅថ្ងៃទី២៥ ខែឧសភា ឆ្នាំ២០២៦ ដោយសម្តេចតេជោ ហ៊ុន សែន ប្រមុខរដ្ឋស្តីទី។ ការបំពេញកាតព្វកិច្ចយោធាមានរយៈពេលកំណត់ ២៤ខែ គិតពីថ្ងៃចូលបំពេញកាតព្វកិច្ច ហើយអាចបន្តបានមិនឱ្យលើសពី ៦ខែ ក្នុងករណីចាំបាច់។ យោធិនដែលបានបញ្ចប់កាតព្វកិច្ចយោធា ត្រូវស្ថិតក្នុងបញ្ជីយោធិនបម្រុងរហូតដល់អាយុ ៤៥ឆ្នាំ៕

The post រដ្ឋមន្រ្ដីក្រសួងការពារជាតិ៖ មានយុវជនប្រមាណ ១ម៉ឺននាក់​ហើយ បានចុះឈ្មោះហាត់ទាហាន ភាគច្រើនជាកូនថ្នាក់ដឹកនាំ appeared first on .

នាឱកាសនោះ សម្តេចតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានអញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានាជុំវិញខេត្តកំពង់ឆ្នាំងសរុបចំនួន៩៦៦នាក់ ដែលពិធីនេះបានប្រារព្ធឡើងនៅសាលាខេត្តកំពង់ឆ្នាំង។ 

ថ្លែងក្នុងពេលនោះដែរ សម្តេចតេជោ ហ៊ុន ​សែន បានឱ្យដឹងថា សម្តេចបានប្រកាសត្រៀមបញ្ជូនចៅៗរបស់សម្តេចដែលគ្រប់អាយុបំពេញកាតព្វកិច្ចកងទ័ពអនុវត្តច្បាប់«កាតព្វកិច្ចយោធា»។ ការអនុវត្តច្បាប់កាតព្វកិច្ចយោធានេះ គឺធ្វើឡើងដោយស្មើភាពគ្នា ហើយចៅៗរបស់សម្តេចបានត្រៀមអនុវត្តដោយគ្មានការលើកលែងនោះទេ។ សម្តេចតេជោថា ច្បាប់កាតព្វកិច្ចយោធានេះគឺមានវិសាលភាពអនុវត្តលើប្រជាពលរដ្ឋខ្មែរគ្រប់រូបចាប់ពីអាយុ១៨ ឆ្នាំ ដល់២៥ឆ្នាំ ត្រូវតែបំពេញកាតព្វកិច្ចយោធាលើកលែងតែស្ត្រី គឺផ្អែកទៅតាមការស្ម័គ្រចិត្ត។

ជាមួយគ្នានេះ សម្តេចតេជោ ក៏បានរំឭកដល់មន្រ្តីទាំងអស់ត្រូវបន្តរក្សានូវស្ថិរភាពជាតិ និងយកចិត្តទុកដាក់រក្សាសន្តិសុខសណ្ដាប់ធ្នាប់សង្គម ដោយបន្តអនុវត្តគោលនយោបាយភូមិ ឃុំ មានសុវត្ថិភាព រួមមាន ការបង្ក្រាបនូវបទល្មើសផ្សេងៗ ដូចជា ចោរឆក់ ចោរប្លន់ ការជួញដូរគ្រឿងញៀន។ សម្តេចតេជោបានបន្តរំឭកដល់អាជ្ញាធរឱ្យបន្តយកចិត្តទុកដាក់លើគ្រួសារយុទ្ធជនជួរមុខ យុទ្ធពលីពិការ និងគ្រួសារអតីតយុទ្ធជន។ សម្តេចបន្តថា ក្នុងនាមជាអ្នកធ្លាប់ប្រឡូកជីវិតជាយុទ្ធជនលើសមរភូមិមួយរូបដែរនោះ សម្តេចបានយល់ច្បាស់ពីការលំបាកទាំងឡាយរបស់យុទ្ធជនក្នុងកិច្ចការពារជាតិ និងទឹកដី។ 

ឆ្លៀតឱកាសនោះ សម្ដេចតេជោក៏បានក្រើនរំឭកដល់មន្ត្រីទាំងអស់ ចៀសវាងភាពអសកម្ម ឬការគៀបសង្កត់ណាមួយ និងត្រូវចាំថា «មន្ត្រីមិនមែនជាចៅហ្វាយរបស់ប្រជាជននោះទេ គឺជាអ្នកបម្រើដ៏ស្មោះត្រង់របស់ប្រជាជន»។ ម្យ៉ាងវិញទៀតចៀសវាងប្ដីសក្ដិ៣ ប្រពន្ធសក្ដិ៤ កូនសក្ដិ៥ ដែលអាចនាំរឿងបង្កបញ្ហាប៉ះពាល់ទឹកចិត្តប្រជាពលរដ្ឋមូលដ្ឋាន៕ អត្ថបទ៖ហ្សាលីន

The post សម្តេចតេជោ ត្រៀមបញ្ជូនចៅៗដែលគ្រប់អាយុបំពេញកាតព្វកិច្ចកងទ័ពអនុវត្តច្បាប់ «កាតព្វកិច្ចយោធា» appeared first on .

តាមរយៈវីដេអូខ្លី ចេញផ្សាយដោយរដ្ឋសភាកម្ពុជា ឯកឧត្តម សួស យ៉ារ៉ា បានអះអាងច្បាស់ៗថា នឹងបញ្ជូនកូនប្រុសរបស់ខ្លួន ឱ្យទៅទទួលការហ្វឹកហ្វឺនយោធា ដើម្បីលុបបំបាត់មន្ទិលសង្ស័យ និងបង្ហាញពីតម្លាភាពក្នុងការអនុវត្តច្បាប់រវាងកូនអ្នកមាន កូនអ្នកធំ និងកូនប្រជាពលរដ្ឋទូទៅ។

ឯកឧត្តមបានសង្កត់ធ្ងន់ថា៖ «ច្បាប់កាតព្វកិច្ចយោធានេះ មិនមែនជាការចាប់បង្ខំនោះទេ ប៉ុន្តែវាគឺជាកាតព្វកិច្ចសម្រាប់ពលរដ្ឋគ្រប់រូប ដែលបណ្ដាប្រទេសនានានៅលើសកលលោកបាននិងកំពុងអនុវត្ត ដើម្បីបុព្វហេតុការពារជាតិមាតុភូមិ»។

សូមបញ្ជាក់ថា សេចក្តីព្រាងច្បាប់ស្តីពី កាតព្វកិច្ចយោធា មាន ៨ជំពូក និង ២០មាត្រា ត្រូវបានរៀបចំឡើង ក្នុងគោលបំណង ដើម្បីអនុវត្ត មាត្រា៤៩ថ្មី នៃរដ្ឋធម្មនុញ្ញកម្ពុជា ។សេចក្តីព្រាងច្បាប់ស្តីពីកាតព្វកិច្ចយោធា ត្រូវបានស្នើឡើងដោយរាជរដ្ឋាភិបាលកម្ពុជា បន្ទាប់ពីការអនុម័តពីកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២៣ ខែមេសា ឆ្នាំ២០២៦ មុននឹងបញ្ជូនមកកាន់សភា។

សេចក្តីព្រាងច្បាប់នេះ រៀបចំឡើងក្នុងគោលបំណងរួមចំណែកកសាងប្រទេសជាតិ និងការពារមាតុភូមិ ដែលជាកាតព្វកិច្ចចាំបាច់ និងកិត្តិយសរបស់ប្រជាពលរដ្ឋខ្មែរ ហើយក៏ជាមូលដ្ឋានគ្រឹះនៃប្រភពកសាងកម្លាំងសម្រាប់វិស័យការពារជាតិ និងការអភិវឌ្ឍកាយសម្បទា ការបណ្តុះស្មារតីស្នេហាជាតិ ការអប់រំផ្នត់គំនិត និងវិន័យ ដែលជាតម្រូវការរបស់ប្រទេសជាតិផងដែរ៕

The post តំណាងរាស្ត្រមណ្ឌលខេត្តកំពង់ធំ ប្រកាសបញ្ជូនកូនប្រុស ឱ្យចូលអនុវត្តកាតព្វកិច្ចយោធាមុនគេ ដើម្បីបង្ហាញពីតម្លាភាពនៃច្បាប់ appeared first on .

យ៉ាងណាមិញ ខាងក្រោមនេះ គឺជាប្រទេសក្នុងតំបន់អាស៊ីអាគ្នេយ៍មួយចំនួន ដែលបានអនុវត្តច្បាប់កាតព្វកិច្ចយោធារបស់ខ្លួន៖

វៀតណាម

វៀតណាមបានរក្សាបាននូវប្រព័ន្ធចូលបម្រើកងទ័ពដែលមានអាយុកាលយូរបំផុតមួយនៅក្នុងតំបន់។ ការចូលបម្រើកងទ័ព គឺជាកាតព្វកិច្ចសម្រាប់បុរសសម្រាប់រយៈពេលកំណត់មួយ ដែលជាធម្មតាមានរយៈពេលចាប់ពី ១៨ ទៅ ២៤ខែ ដោយអាស្រ័យទៅលើសាខាយោធា។ គោលនយោបាយនេះ គឺបានគូសបញ្ជាក់ពីការសង្កត់ធ្ងន់របស់ប្រទេស លើការការពារជាតិ និងកាតព្វកិច្ចស៊ីវិល។

ថៃ

ការចូលបម្រើកងទ័ពរបស់ប្រទេសថៃគឺមានលក្ខណៈប្លែកពីគេ ដែលវាពាក់ព័ន្ធនឹងប្រព័ន្ធឆ្នោត។ រាល់បុរសថៃទាំងអស់ដែលមានអាយុ ២១ឆ្នាំ ត្រូវបានតម្រូវឱ្យរាយការណ៍សម្រាប់ការជ្រើសរើសចូលបម្រើកងទ័ព។ អ្នកខ្លះត្រូវបានលើកលែង ខណៈពេលដែលអ្នកខ្លះទៀតត្រូវបានជ្រើសរើសដោយផ្អែកលើការចាប់ឆ្នោតក្រហម ឬខ្មៅ។ ដំណើរការនេះបានក្លាយជាប្រធានបទនៃការជជែកវែកញែកជាសាធារណៈជាយូរមកហើយ។

សិង្ហបុរី

សិង្ហបុរីអនុវត្តប្រព័ន្ធចូលបម្រើកងទ័ពដែលមានរចនាសម្ព័ន្ធច្រើនបំផុតមួយនៅអាស៊ីអាគ្នេយ៍។ ពលរដ្ឋប្រុស និងអ្នករស់នៅអចិន្ត្រៃយ៍ទាំងអស់ត្រូវតែបំពេញកាតព្វកិច្ចបម្រើជាតិរយៈពេលពីរឆ្នាំ នៅពេលឈានដល់អាយុ ១៨ឆ្នាំ។ នេះរួមបញ្ចូលទាំងការបម្រើក្នុងជួរកងទ័ព ប៉ូលីស ឬកងកម្លាំងការពារជនស៊ីវិល បន្ទាប់មកដោយកាតព្វកិច្ចបម្រុងជាច្រើនឆ្នាំ។

មីយ៉ាន់ម៉ា

នៅដើមឆ្នាំ២០២៤ មីយ៉ាន់ម៉ាបានធ្វើឱ្យច្បាប់ចូលបម្រើកងទ័ពដែលអសកម្មយូរអង្វែងហើយរបស់ខ្លួន សកម្មឡើងវិញ ក្នុងអំឡុងពេលជម្លោះផ្ទៃក្នុងដែលកំពុងបន្ត។ ច្បាប់នេះតម្រូវឱ្យបុរសដែលមានអាយុពី ១៨-៣៥ឆ្នាំ និងស្ត្រីដែលមានអាយុពី ១៨-២៧ ឆ្នាំចូលបម្រើកងទ័ព។ តែទោះជាយ៉ាងណាក៏ដោយ គោលនយោបាយនេះ បានបង្កើនការព្រួយបារម្ភពីអ្នកសង្កេតការណ៍សិទ្ធិមនុស្សដោយសារតែអស្ថិរភាពនយោបាយរបស់ប្រទេស។

កម្ពុជា

កម្ពុជា ទើបតែសម្រេចអនុម័ត សេចក្តីព្រាងច្បាប់ស្តីពី កាតព្វកិច្ចយោធា នៅក្នុងកិច្ចប្រជុំវិសាមញ្ញមួយរបស់រដ្ឋសភា កាលពីថ្ងៃទី១២ ខែឧសភាកន្លងទៅនេះ។ សេចក្តីព្រាងច្បាប់នេះ បានកំណត់ចំពោះពលរដ្ឋខែ្មរគ្រប់រូបដែលមានអាយុចាប់ពី ១៨ឆ្នាំ ដល់២៥ ឆ្នាំ ត្រូវតែបំពេញកាតព្វកិច្ចយោធា។ ហើយចំពោះស្ត្រីវិញ ត្រូវផ្អែកតាមគោលការណ៍ស្ម័គ្រចិត្ត។

គួរជម្រាបផងដែរថា កាលពីឆ្នាំ២០០៦ កម្ពុជាធ្លាប់មានច្បាប់ស្ដីពីកាតព្វកិច្ចយោធារួចហើយ ប៉ុន្តែពុំទាន់គ្របដណ្តប់គ្រប់ជ្រុងជ្រោយ សម្រាប់ស្ថានភាពបច្ចុប្បន្ននោះឡើយ​៕​

The post ប្រទេសនៅក្នុងតំបន់អាស៊ីអាគ្នេយ៍ណាខ្លះមានច្បាប់កាតព្វកិច្ចចូលបម្រើយោធា? appeared first on .

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានអញ្ជើញជាអធិបតី បន្តសម័យប្រជុំរដ្ឋសភា លើកទី៥ នីតិកាលទី៧ នៅវិមានរដ្ឋសភា រាជធានីភ្នំពេញ ដែលមានសមាជិកសមាជិកាចំនួន ១១៤ រូបចូលរួម នាព្រឹកថ្ងៃទី១២ ខែឧសភា ឆ្នាំ២០២៦។

សម័យប្រជុំវិសាមញ្ញ នីតិកាលទី៧ ដើម្បីពិភាក្សា និងអនុម័ត តាមរបៀបវារៈចំនួន០២៖

១-ពិភាក្សា និងអនុម័តសេចក្តីព្រាងច្បាប់ស្តីពី កាតព្វកិច្ចយោធា។

២-ពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់ រាជរដ្ឋាភិបាលនៃព្រះរាជាណាចក្រកម្ពុជាឱ្យក្រុមហ៊ុនអគ្គិសនីវៀតណាមនៃសាធារណរដ្ឋសង្គមនិយម វៀតណាម សម្រាប់ការធានាលើការទិញថាមពលអគ្គិសនីពីប្រទេសវៀតណាម។

សេចក្តីព្រាងច្បាប់ស្តីពី កាតព្វកិច្ចយោធា មាន ៨ជំពូក និង ២០មាត្រា ត្រូវបានរៀបចំឡើង ក្នុងគោលបំណង ដើម្បីអនុវត្ត មាត្រា៤៩ថ្មី នៃរដ្ឋធម្មនុញ្ញកម្ពុជា ។សេចក្តីព្រាងច្បាប់ស្តីពីកាតព្វកិច្ចយោធា ត្រូវបានស្នើឡើងដោយរាជរដ្ឋាភិបាលកម្ពុជា បន្ទាប់ពីការអនុម័តពីកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី២៣ ខែមេសា ឆ្នាំ២០២៦ មុននឹងបញ្ជូនមកកាន់សភា។

សេចក្តីព្រាងច្បាប់នេះ រៀបចំឡើងក្នុងគោលបំណង ដើម្បីអនុវត្តមាត្រា៤៩ថ្មី នៃរដ្ឋធម្មនុញ្ញកម្ពុជា ដោយកំណត់អំពីវិធាននៃការអនុវត្តកាតព្វកិច្ចយោធា ដើម្បីរួមចំណែកកសាងប្រទេសជាតិ និងការពារមាតុភូមិ ដែលជាកាតព្វកិច្ចចាំបាច់ និងកិត្តិយសរបស់ប្រជាពលរដ្ឋខ្មែរ ហើយក៏ជាមូលដ្ឋានគ្រឹះនៃប្រភពកសាងកម្លាំងសម្រាប់វិស័យការពារជាតិ និងការអភិវឌ្ឍកាយសម្បទា ការបណ្តុះស្មារតីស្នេហាជាតិ ការអប់រំផ្នត់គំនិត និងវិន័យ ដែលជាតម្រូវការរបស់ប្រទេសជាតិផងដែរ៕

រូបភាព៖ ក្រសួងព័ត៌មាន

The post រដ្ឋសភា សម្រេចអនុម័តលើសេចក្តីព្រាងច្បាប់ស្តីពី «កាតព្វកិច្ចយោធា» ក្នុងសំឡេងគាំទ្រ ១១៤ លើ ១១៤ សំឡេង appeared first on .