សេចក្តីជូនដំណឹង របស់ក្រសួងសាធារណការ និងដឹកជញ្ជូន កាលពីថ្ងៃទី១៤ ខែធ្នូ ឆ្នាំ២០២៥ បានឱ្យដឹងថា ដើម្បីសម្រួលបន្ទុកចំណាយ និងការធ្វើដំណើរប្រកប ដោយសុវត្ថិភាព ងាយស្រួល និងរហ័ស ក្រសួងបានសម្របសម្រួលជាមួយក្រុមហ៊ុនផ្លូវល្បឿនលឿន ភ្នំពេញ-ក្រុងព្រះសីហនុ ដោយក្នុងន័យមនុស្សធម៌ ក្រុមហ៊ុនបានឯកភាពមិនយកកម្រៃសេវាចំពោះរថយន្ត ដឹកជញ្ជូនគ្រឿងឧបភោគបរិភោគ និងសម្ភារប្រើប្រាស់ចាំបាច់សម្រាប់ឧបត្ថម្ភតាមតំបន់ភៀសសឹកនានា។

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានលើកឡើងថា ការលើកលែងកម្រៃសេវានេះជាការជួយសម្រួលដល់ការដឹកជញ្ជូនគ្រឿងឧបភោគបរិភោគ សម្រាប់ជនភៀសសឹកនៅខេត្តកោះកុង។

ទន្ទឹមនេះ ដើម្បីជួយសម្រួលដល់ការដឹកជញ្ជូនទាំងអស់នេះ ក្រសួង ស្ថាប័នរដ្ឋ និងឯកជន អង្គការមហាជន និងសប្បុរសជនទូទៅធ្វើការទំនាក់ទំនងមកក្រសួងសាធារណការ និងដឹកជញ្ជូន តាមរយៈលេខទូរស័ព្ទ ០១២ ៩៧២ ០២៧ ដើម្បីក្រសួងសម្របសម្រួលជាមួយក្រុមហ៊ុនផ្លូវល្បឿនលឿន។

ការលើកលែងកម្រៃសេវាប្រើប្រាស់ផ្លូវល្បឿនលឿននេះ អនុវត្តចាប់ពីថ្ងៃជូនដំណឹងនេះតទៅ។

The post រថយន្តដឹកជញ្ជូនគ្រឿងឧបភោគបរិភោគ សម្ភារប្រើប្រាស់តាមផ្លូវល្បឿនលឿនភ្នំពេញ-ក្រុងព្រះសីហនុ ដើម្បីផ្តល់ជូនពលរដ្ឋភៀសសឹកនៅខេត្តកោះកុង ត្រូវបានលើកលែងកម្រៃសេវា appeared first on .

យោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន កាលថ្ងៃទី១៣ ខែវិច្ឆិកា ឆ្នាំ២០២៤  បានឱ្យដឹងថា ដើម្បីចូលរួមអបអរសាទរនៅក្នុងឱកាសនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ នឹងបញ្ចុះតម្លៃ ២០% សម្រាប់ យានយន្តគ្រប់ប្រភេទដែលធ្វើដំណើរតាមផ្លូវល្បឿនលឿនភ្នំពេញ-ក្រុងព្រះសីហនុ រយៈពេល ៣ថ្ងៃ គិតចាប់ពី ថ្ងៃទី១៤-១៥-១៦ ខែវិច្ឆិកា ឆ្នាំ២០២៤។

ទន្ទឹមនឹងនេះ ចំពោះយានយន្តដឹកទំនិញធុនធ្ងន់ដែលមានទម្ងន់ផ្ទុកលើសពី១០តោនឡើងទៅ ការបញ្ចុះតម្លៃត្រូវបានរក្សាដដែលទៅតាមម៉ោងកំណត់ដូចខាងក្រោម៖ចាប់ពីម៉ោង ៨:០០នាទី ដល់ម៉ោង ២០:០០នាទី ទទួលបានការបញ្ចុះតម្លៃ ៤០% ចាប់ពីម៉ោង ២០:០០នាទី ដល់ ម៉ោង ៨:០០នាទី បញ្ចុះតម្លៃ ៦០% ដើម្បីរក្សាអាយុជីវិត និងកាត់បន្ថយគ្រោះថ្នាក់ចរាចរណ៍ឱ្យបានជាអតិបរមា។

បន្ថែមពីនេះ ក្រសួងសាធារណការ និងដឹកជញ្ជូន ក៏សូមយកឱកាសនេះសំណូមពរដល់សាធារណជន និង អ្នកប្រើប្រាស់ផ្លូវទាំងអស់ អ្នកប្រើប្រាសផ្លូវទាំង សូមបើកបរដោយការប្រុងប្រយ័ត្នខ្ពស់ និងចូលរួមគោរពច្បាប់ចរាចរណ៍ទាំងអស់គ្នាផងដែរ៕

The post ផ្លូវល្បឿនលឿនភ្នំពេញ-ក្រុងព្រះសីហនុ ប្រកាសបញ្ចុះតម្លៃ ២០ % សម្រាប់យានយន្តគ្រប់ប្រភេទ ក្នុងឱកាសបុណ្យអុំទូក appeared first on .

ក្រសួងសាធារណការ និងដឹកជញ្ជូន បានឱ្យដឹងថា ពិធីបុណ្យចូលឆ្នាំថ្មី ប្រពៃណីជាតិ ទើបតែកន្លងផុតទៅថ្មីៗនេះ ជាឱកាសដ៏ល្អសម្រាប់បងប្អូនប្រជាពលរដ្ឋបានធ្វើដំណើរត្រឡប់ទៅគេហដ្ឋាន ក៏ដូចជាទៅកម្សាន្តនៅតាមទីរមណីយដ្ឋាននានា ក្នុងនោះដែរផ្លូវល្បឿនលឿនភ្នំពេញ-ក្រុងព្រះសីហនុ មានចរាចរណ៍យ៉ាងមមាញឹក។

ក្រសួងសាធារណការបន្តថា ក្នុងឱកាសពិធីបុណ្យចូលឆ្នាំថ្មីនេះ គិតចាប់ពីថ្ងៃទី១៣ ដល់១៦ ខែមេសា មានយានយន្តសរុបចំនួន ៧០ ៨៨៣ គ្រឿង បានធ្វើដំណើរលើផ្លូវល្បឿនលឿន។ដោយនៅថ្ងៃទី១៣ មេសា ត្រូវជាថ្ងៃទីមួយ មានចំនួន ១៥ ៨៥៨ គ្រឿង។ចំណែកនៅថ្ងៃទី១៤ មេសា មានចំនួន ១៧ ០៦៤ គ្រឿង ថ្ងៃទី១៥ មេសា មានចំនួន ១៩ ០៤៨ គ្រឿង និងនៅថ្ងៃទី១៦ មេសា មានចំនួន ១៨ ៩១៣ គ្រឿង៕

The post យានយន្តជាង៧ម៉ឺនគ្រឿង បានធ្វើដំណើរលើផ្លូវល្បឿនលឿនភ្នំពេញ-ក្រុងព្រះសីហនុ ក្នុងពិធីបុណ្យចូលឆ្នាំខ្មែរ appeared first on .

ក្រសួងសាធារណការ បានឱ្យដឹងថា ផ្លូវល្បឿនលឿនភ្នំពេញក្រុងព្រះសីហនុ បានដើរតួនាទីយ៉ាងសំខាន់ក្នុងការនាំយកនូវបទពិសោធន៍នៃការធ្វើដំណើរថ្មី ចំណេញពេលវេលា កាត់បន្ថយគ្រោះថ្នាក់និងការកកស្ទះចរាចរណ៍ ព្រមទាំងលើកកម្ពស់ប្រសិទ្ធភាពនៃការធ្វើដំណើរជូន ដល់បងប្អូនប្រជាពលរដ្ឋ។ ពិសេស ផ្លូវមួយខ្សែនេះ បានចូលរួមសម្រួលដល់ការ ដឹកជញ្ជូនទំនិញរវាង ប៉ូលសេដ្ឋកិច្ចភ្នំពេញ និងប៉ូលសេដ្ឋកិច្ចក្រុងព្រះសីហនុ ដែលជំរុញឱ្យសេដ្ឋកិច្ចជាតិឱ្យមានការរីកចម្រើន។

បើតាមក្រសួងសាធារណការ ជាក់ស្តែង«ក្នុងរយៈពេល ១ឆ្នាំនេះ មានយានយន្តសរុបប្រមាណ ៤ ៦៧៩ ២២២ គ្រឿង បានធ្វើដំណើរនៅលើផ្លូវល្បឿនលឿនភ្នំពេញ-ក្រុងព្រះសីហនុ»។

គួររម្លឹកថា ផ្លូវល្បឿនលឿនភ្នំពេញ-ក្រុងព្រះសីហនុ មានប្រវែងសរុប ១៨៧,០៥គីឡូម៉ែត្រ ដែលសម្ពោធកាល ថ្ងៃទី០៩ ខែវិច្ឆិកា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់របស់ សម្តេចតេជោ ហ៊ុន សែន អតីតនាយករដ្ឋមន្ត្រី និង លោក លី ខឺឈាង (Li Keqiang) អតីតនាយករដ្ឋមន្ត្រី នៃសាធារណរដ្ឋប្រជាមានិតចិន អមដោយវត្តមានថ្នាក់ដឹកនាំជាន់ខ្ពស់នៃប្រទេសទាំងពីរ។

ផ្លូវល្បឿនលឿននេះ ត្រូវបានធ្វើពិធីអបអរសាទរខួប ១ឆ្នាំ នៅរសៀលថ្ងៃទី០៧ ខែវិច្ឆិកា ឆ្នាំ២០២៣ នៅស្ថានីយបង់ប្រាក់ទី១ “ភ្នំពេញ” ក្រោមអធិបតីភាព លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា តំណាងដ៏ខ្ពង់ខ្ពស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា៕

The post រយៈពេល១ឆ្នាំ មានយានយន្តប្រមាណជាង៤លានគ្រឿង បានធ្វើដំណើរលើផ្លូវល្បឿនលឿនភ្នំពេញ-ក្រុងព្រះសីហនុ appeared first on .

ឧកញ៉ា ម៉ុង ឬទ្ធី បានឲ្យដឹងថា តាមការគ្រោងទុកឆ្នាំនេះមានផែនការដាំកូនត្នោតចំនួន ៥ ០០០ដើម ហើយថ្ងៃនេះធ្វើការដាំកូនត្នោតចំនួន ១ ០០០ដើម នៅតាមបណ្តោយផ្លូវល្បឿនលឿនពីរាជធានីភ្នំពេញ ខេត្តព្រះសីហនុ។ លោកឧកញ៉ាបន្តថា​ ការដាំកូនត្នោតនេះ គឺដាំក្នុងចន្លោះពីដើមមួយទៅដើមមួយមានចម្ងាយ ៥ម៉ែត្រ ដើម្បីឱ្យដើមត្នោតលូតលាស់ធំធាត់បានលឿន ខណៈបច្ចុប្បន្នមានថ្នាលបណ្តុះកូនត្នោតដែលគ្រោងនឹងបណ្តុះកូនត្នោតឱ្យបានចំនួន ១៤ ០០០ដើម សម្រាប់ធ្វើការដាំដុះនៅពេលខាងមុខ ប្រសិនបើការដាំដុះបានល្អ នឹងមានគម្រោងបណ្តុះបន្ថែមទៀត។

លោកឧកញ៉ាបញ្ជាក់ថា ដោយសារបច្ចុប្បន្ននៅក្នុងកសិដ្ឋានរបស់យើងមានដំណាំកសិឧស្សាហកម្ម និងដំណាំហូបផ្លែជាច្រើនមុខមានដូចជា ដូងប្រេង កៅស៊ូ ក្រៅពីនោះមានដាំដំណាំហូបផ្លែមានដូចជាដូងក្រអូប សៅម៉ាវ ធុរ៉េន ស្វាយ និងដំណាំជាច្រើនប្រភេទផ្សេងទៀត។

លោក គួច ចំរើន អភិបាលខេត្តព្រះសីហនុ ដែលបានចូលរួមកាន់ចបកាប់ដីដាំកូនក្នោតផងដែរនោះ បានអរគុណឧកញ៉ា ម៉ុង ឬទ្ធី ដែលបានរៀបចំធ្វើការបណ្តុះកូនត្នោត និងរៀបចំកម្មវិធីដាំកូនត្នោតនៅលើទឹកដីឃុំជើងគោ ស្រុកព្រៃនប់ ស្របនឹងផ្លូវល្បឿនលឿន ដើម្បីបង្កើនសោភ័ណភាព បរិស្ថានបន្ថែមទៀតសម្រាប់បំរើឱ្យវិស័យទេសចរណ៍ ពិសេសអ្នកធ្វើដំណើរតាមផ្លូវល្បឿនលឿនពីរាជធានីភ្នំពេញមកកាន់ខេត្តព្រះសីហនុ ហើយដើមត្នោតនេះ ក៏ជាសមិទ្ធផលថ្មីមួយបន្ថែមទៀតនៅលើទឹកដី នៃខេត្តព្រះសីហនុ សម្រាប់កូនចៅរបស់យើងជំនាន់ក្រោយផងដែរ។

ទន្ទឹមនោះលោកអភិបាលខេត្ត ក៏បានធ្វើការអំពាវនាវឱ្យយុវជន សិស្សានុសិស្ស និងបងប្អូនប្រជាពលរដ្ឋចូលរួមថែរក្សា ការពារដើមត្នោតរបស់យើងឱ្យបានល្អ ព្រោះនេះជាសម្បត្តិរបស់យើងទាំងអស់គ្នា មិនមែនជារបស់ឧកញ៉ា ម៉ុង ឬទ្ធី ឬជារបស់លោកនោះទេ វាគឺជារបស់យើងទាំងអស់គ្នាដែលរួមគ្នាការពារ ថែរក្សាឱ្យបានគង់វង្ស។

លោក គួច ចំរើន លើកឡើងបន្ថែមថា ដើមត្នោតក៏ជាកេរ្តិ៍ដំណែលរបស់ដូនតារបស់យើងដែលបានបន្សល់ទុកសម្រាប់កូនក្មួយជំនាន់ក្រោយ ព្រោះដើមត្នោតវាមានផលប្រយោជន៍ ជាច្រើនយ៉ាងណាស់ សម្រាប់ឱ្យប្រជាពលរដ្ឋយកមកធ្វើការកែច្នៃប្រើប្រាស់មានដូចជា ស្លឹកយកទៅប្រកផ្ទះ ផ្កាកៀបចេញជាស្ករ ចំណែកផ្លែខ្ចីហូប ផ្លែទុំអាចយកទៅធ្វើជានំ និងដើមរបស់វាអាចច្រៀកធ្វើជាសម្ភារៈ ឬគ្រឿងសង្ហារឹមផ្សេងៗជាច្រើនមុខផ្សេងទៀតទៅ តាមតម្រូវការទីផ្សារនាពេលបច្ចុប្បន្នផងដែរ៕

The post ឧកញ៉ា ម៉ុង ឬទ្ធី កាន់ចបកាប់ដីដឹកនាំដាំកូនត្នោត ១ពាន់ដើមតាមបណ្តោយផ្លូវល្បឿនលឿន appeared first on .

នៅក្នុងលិខិតអបអរសាទរ សម្តេចធិបតីមានប្រសាសន៍ថា ក្រោយពីបានបើកឱ្យប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ អស់រយៈពេល ១ឆ្នាំកន្លងមក យើងសង្កេតឃើញថា ផ្លូវល្បឿនលឿននេះ ទទួលបានការកោតសរសើរ និងការពេញចិត្តពីសំណាក់បងប្អូនប្រជាពលរដ្ឋនៅទូទាំងប្រទេស ដែលធ្លាប់បានធ្វើដំណើរឆ្លងកាត់ផ្លូវល្បឿនលឿននេះឆ្ពោះទៅខេត្តព្រះសីហនុ ឬតំបន់ផ្សេងៗទៀត ប្រកបដោយភាពសប្បាយរីករាយ ដូច្នេះ ផ្លូវល្បឿនលឿននេះ បាននិងកំពុងដើរតួនាទីយ៉ាងសំខាន់ក្នុងការលើកកម្ពស់ ប្រសិទ្ធភាពនៃការធ្វើដំណើររបស់បងប្អូនប្រជាពលរដ្ឋ ដោយបានជួយបញ្ចៀសការកកស្ទះចរាចរណ៍ និងកាត់បន្ថយពេលវេលាធ្វើដំណើរមកត្រឹមតែប្រមាណ ២ម៉ោងប៉ុណ្ណោះ ដែលយើងអាចធ្វើដំណើរទៅមក រវាងភ្នំពេញ និងខេត្តព្រះសីហនុវិលល្ងាច ដោយងាយស្រួល និងសុវត្ថិភាព។

លើសពីនេះ សម្តេចបន្តថា ផ្លូវល្បឿនលឿននេះ មិនត្រឹមតែផ្ដល់ភាពងាយស្រួល និងកាត់បន្ថយពេលវេលាច្រើនក្នុងការធ្វើដំណើរប៉ុណ្ណោះទេ ប៉ុន្តែវាពិតជាបានក្លាយជាសរសៃឈាមសេដ្ឋកិច្ចថ្មីមួយ សម្រាប់បម្រើឱ្យវិស័យដឹកជញ្ជូន និងការតភ្ជាប់ផងដែរ ជាពិសេសនឹងជំរុញឱ្យខេត្តព្រះសីហនុកាន់តែមានការអភិវឌ្ឍរីកចម្រើនបន្ថែមទៀត ឆ្លើយតបជាមួយនឹងចក្ខុវិស័យរបស់រាជរដ្ឋាភិបាលក្នុងការប្រែក្លាយខេត្តនេះឱ្យទៅជាតំបន់សេដ្ឋកិច្ចពិសេសគំរូពហុបំណង។

ម្យ៉ាងវិញទៀត បើគិតក្នុងក្របខ័ណ្ឌយុទ្ធសាស្ត្រនៃការតភ្ជាប់ផ្លូវល្បឿនលឿននេះគឺជាខ្សែផ្លូវដែលតភ្ជាប់ ប៉ូលសេដ្ឋកិច្ចទី១ រាជធានីភ្នំពេញទៅប៉ូលសេដ្ឋកិច្ចទី២ ខេត្តព្រះសីហនុ ដែលរាជរដ្ឋាភិបាលបានដាក់ចេញនូវ គោលដៅអភិវឌ្ឍន៍ច្បាស់លាស់ ដោយចាត់ទុកខេត្តព្រះសីហនុ និងបណ្តាខេត្តដែលស្ថិតក្នុងប៉ូលសេដ្ឋកិច្ចទី២ ជាគោលដៅតំបន់ឧស្សាហកម្ម សក្តានុពលទេសចរណ៍ ឆ្នេរសមុទ្រធម្មជាតិ កសិឧស្សាហកម្ម ពាណិជ្ជកម្ម និងការដឹកជញ្ជូនទំនិញឆ្លងកាត់តាមផ្លូវគោក ផ្លូវសមុទ្រ និងកំពង់ផែ។

ក្នុងលិខិតដដែលបានបញ្ចាក់ថា ផ្លូវល្បឿនលឿនភ្នំពេញ-ក្រុងព្រះសីហនុនេះ គឺជាគម្រោងដ៍មានសារៈសំខាន់មួយស្ថិតក្រោមគំនិតផ្ដួច ផ្ដើមខ្សែក្រវាត់ និងផ្លូវ (Belt and Road Initiative) ដែលបានដាក់ចេញដោយឯកឧត្តម ស៊ី ជិនពីង ប្រធានាធិបតីនៃសាធារណរដ្ឋប្រជាមានិតចិន។ការវិនិយោគរបស់ក្រុមហ៊ុនលើការកសាងផ្លូវល្បឿនលឿននេះ បានបង្ហាញអំពីអត្ថប្រយោជន៍ជាក់ស្តែង ដែលកម្ពុជាទទួលបានពីគំនិតផ្តួចផ្តើម “ខ្សែក្រវាត់ និងផ្លូវ និងកិច្ចសហប្រតិបត្តិការមិត្តដែកថែបមិនអាចកាត់ថ្លៃបាន រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ដែលបានជួយលើកកម្ពស់ប្រព័ន្ធហេដ្ឋារចនាសម្ព័ន្ធដឹកជញ្ជូន ជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋកម្ពុជា។

ជាមួយគ្នានោះ សម្តេចធិបតី បង្ហាញនូវទំនុកចិត្តថា ក្រុមហ៊ុននឹងបន្តឆន្ទៈយ៉ាងមុតមាំនេះ និងបន្តខិតខំប្រឹងប្រែងបង្កើនប្រសិទ្ធិភាពប្រតិបត្តិការរបស់ខ្លួន ដោយចាប់យកនូវកាលានុវត្តភាពនៃប្រព័ន្ធបច្ចេកវិទ្យាឌីជីថលថ្មីៗដែលស្របនឹងបរិបទសកល មកប្រើប្រាស់ឱ្យបានទូលំទូលាយ សំដៅបង្កើនស័ក្តសិទ្ធភាព និងភាពងាយស្រួលជូនដល់ប្រជាពលរដ្ឋអ្នកប្រើប្រាស់ផ្លូវ និងសំណូមពរដល់ក្រុមហ៊ុនបន្តធ្វើការសាងសង់ផ្លូវល្បឿនលឿនភ្នំពេញ-បាវិត ឱ្យស្របតាមស្តង់ដារបច្ចេកទេស និងបញ្ចប់តាមកាលបរិច្ឆេទកំណត់ផងដែរ៕

The post សម្តេចធិបតី ហ៊ុន ម៉ាណែត៖ ផ្លូវល្បឿនលឿនភ្នំពេញ-ក្រុងព្រះសីហនុ ជាសរសៃឈាមសេដ្ឋកិច្ចថ្មីមួយ សម្រាប់បម្រើឱ្យវិស័យដឹកជញ្ជូន និងការតភ្ជាប់ appeared first on .

ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានសង្កេតឃើញថា មានប្រជាពលរដ្ឋជាច្រើនបានជ្រើសរើសប្រើប្រាស់ផ្លូវល្បឿនលឿនសម្រាប់ការធ្វើដំណើរទៅចូលរួមការបោះឆ្នោតជ្រើសរើសតំណាងរាស្រ្ត នីតិកាលទី៧ ព្រមទាំងការធ្វើដំណើរកំសាន្តនានា ដោយចំនួនចរាចរណ៍នេះបានកើនឡើងយ៉ាងខ្លាំងបើធៀបនឹងថ្ងៃធម្មតា ពោលមានរថយន្តចំនួន ២០៤៩៤ គ្រឿង បានធ្វើដំណើរលើផ្លូវល្បឿនលឿន។

ក្រុមហ៊ុននេះ បញ្ជាក់ថា៖«ការកើនឡើងនៃលំហូរចរាចរណ៍នេះ បានសបញ្ជាក់ឱ្យឃើញពីសុខសន្តិភាព ស្ថេរភាពរបស់ព្រះរាជាណាចក្រកម្ពុជានាពេលបច្ចុប្បន្ន»។

ចំពោះករណីនៃការបន្តកើនឡើងនេះ ក្រុមហ៊ុនខាងលើអះអាងថា ថ្នាក់ដឹកនាំនៃក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានចាត់វិធានការភ្លាមៗនិងបានត្រួតពិនិត្យដោយផ្ទាល់តាមកាមេរ៉ាសុវត្ថិភាព ដើម្បីធានាដល់សុវត្ថិភាពអ្នកដំណើរ ជាពិសេសចាត់ក្រុមការងារចុះជួយសម្រួលចរាចរណ៍នៅតាមច្រកចេញចូលអោយបានឆាប់រហ័សបំផុតផងដែរ។

យ៉ាងណាមិញ ជាមួយកំណើនអ្នកដំណើរនេះដែរ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ក៏បានក្រើនរំលឹកដល់អ្នកបើកបរ និងអ្នករួមដំណើរទាំងអស់ជាថ្មីម្តងទៀតថា ដើម្បីធានាបាននូវសុវត្ថិភាពរបស់លោកអ្នក ក្នុងការប្រើប្រាស់ផ្លូវល្បឿនលឿន សូមមេត្តាបើកបរដោយគោរពច្បាប់ និងផ្លាកសញ្ញាកំណត់ល្បឿន ដែលបានបំពាក់នៅតាមបណ្តោយផ្លូវ និងសូមមេត្តាត្រួតពិនិត្យយានយន្តឱ្យបានល្អិតល្អន់ តាមការណែនាំរបស់ក្រុមហ៊ុន មុនពេលចូលមកប្រើប្រាស់ផ្លូវល្បឿនលឿនជាដើម៕

អត្ថបទ៖ ពិសី

The post ត្រឹមតែ១ថ្ងៃបោះឆ្នោត មានរថយន្តរហូតជាង ២ម៉ឺនគ្រឿង បានធ្វើដំណើរលើផ្លូវល្បឿនលឿន appeared first on .

គិតចាប់ពីខែវិច្ឆិកា ឆ្នាំ២០២២ មកទល់ចុងខែកុម្ភៈ ឆ្នាំ២០២៣ ផ្លូវល្បឿនលឿនដំបូងនេះ អាចរកចំណូលបានសរុបជិត ១១លានដុល្លារសហរដ្ឋអាមេរិក។ នេះបើតាមលោក ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន ក្នុងកិច្ចប្រជុំពិភាក្សាលើវឌ្ឍនភាពការអនុវត្តការងារផ្លូវល្បឿនលឿនភ្នំពេញ-ក្រុងព្រះសីហនុ ជាមួយក្រុមហ៊ុនគ្រប់គ្រងផ្លូវល្បឿនលឿននេះ កាលថ្ងៃទី២៨ ខែកុម្ភៈកន្លង។

ផ្លូវល្បឿនលឿនភ្នំពេញ-ព្រះសីហនុ បានចាប់ផ្តើមបើកឱ្យប្រជាពលរដ្ឋប្រើប្រាស់សាកល្បង ដោយឥតគិតថ្លៃរយៈពេល១ខែ កាលពីថ្ងៃទី​០១​ ខែតុលា​ ឆ្នាំ២០២២កន្លងទៅ ក្រោយមកក្រុមហ៊ុនក៏យកសេវាបង់ប្រាក់ក្នុងការធ្វើដំណើរទៅតាមច្រកចេញ-ចូលចំនួន ៨ទីតាំង និងប្រភេទរថយន្ត។

ផ្លូវល្បឿនលឿនលើកដំបូងបង្អស់នៅកម្ពុជានេះ មានប្រវែង ១៩០គីឡូម៉ែត្រ ដោយចំណាយថវិកាប្រមាណ ២០១៩លានដុល្លារ ដើម្បីសាងសង់។ ផ្លូវ High Way នេះតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ។

យ៉ាងណា ក្រសួងសាធារណការ បានបញ្ជាក់លើបណ្ដាញសង្គមហ្វេសប៊ុកនៅថ្ងៃទី៥ មីនានេះ ក៏សូមអំពាវនាវ​ ដល់បងប្អូនប្រជាពលរដ្ឋគ្រប់រូប មេត្តាអនុវត្ត តាមលក្ខខណ្ឌក្នុងការប្រេីប្រាស់ផ្លូវល្បឿនលឿន​ភ្នំពេញ-ក្រុងព្រះសីហនុ​ និងសូមគោរពច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន កុំបើកបរលើសល្បឿនកំណត់​ កុំបេីកបរបញ្ច្រាសទិសចរាចរណ៍៕

The post ៤ខែ មានរថយន្តចរាចរណ៍លើផ្លូវល្បឿនលឿនភ្នំពេញ-ព្រះសីហនុ ប្រមាណជាង ១លានដង appeared first on .

នាឱកាសនោះ លោក ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន បានឱ្យដឹងថា កិច្ចប្រជុំនេះ ក្នុងគោលបំណង ពិនិត្យពិភាក្សាលើវឌ្ឍនភាពការអនុវត្តការងារ និងបញ្ហាប្រឈមនានាដែលបានជួបប្រទះ សម្រាប់ដំណើរប្រតិបត្តិការកន្លងមក ខណៈលោកក៏បានស្នើឱ្យក្រុមហ៊ុន CPEC ពង្រឹងការឃោសនាអប់រំទាក់ទងនឹងការបើកបរលើផ្លូវល្បឿនលឿន ឱ្យបានកាន់ទូលំទូលាយទៅកាន់សាធារណជន និងសហការជាមួយនគរបាលចរាចរណ៍ប្រចាំការ ក្នុងការអនុវត្តវិធានច្បាប់ឱ្យបានតឹងរឹងចំពោះបទល្មើសចរាចរណ៍ ជាពិសេសលើករណីការបើកបរបញ្ច្រាសទិស។

ជាងនេះទៀត លោកក៏បានជំរុញឱ្យក្រុមហ៊ុន តម្រូវឱ្យមានការគូសឱ្យបានច្បាស់ និងកំណត់ឱ្យបានវែងជាងមុន ដើម្បីងាយស្រួលចំពោះអ្នកបើកបរចូលតាមគន្លងនីមួយៗ បញ្ចៀសការចូលខុសគន្លង ដែលជាហេតុបណ្តាលឱ្យមានការកកស្ទះ។ ជាមួយគ្នានេះដែរ ទាក់ទងនឹងសោភណ្ឌភាព អនាម័យ និងសេវាកម្ម នៅតាមទីតាំងឈប់សម្រាកនានា តម្រូវឱ្យក្រុមហ៊ុនប្រតិបត្តិករយកចិត្តទុកដាក់ឱ្យបានខ្ពស់ថែមទៀត។

គួរបញ្ជាក់ដែរថា បើតាមក្រសួងសារធារណការបានឱ្យដឹងថា ចាប់តាំងពីបើកឱ្យដំណើរការនៅថ្ងៃទី០១ ខែតុលា ឆ្នាំ២០២២ មកដល់ថ្ងៃទី២៨ ខែកុម្ភៈ ឆ្នាំ២០២៣ ចរាចរណ៍សរុបបានឆ្លងកាត់លើផ្លូវល្បឿនលឿនភ្នំពេញ-ក្រុងព្រះសីហនុ មានចំនួន ជិត១,៩លាន ក្នុងនោះ មានប្រមាណ ជាង ១,៤លាន ដែលគិតកម្រៃសេវា ចាប់ពីខែវិច្ឆិកា ឆ្នាំ២០២២ មកទល់ចុងខែកុម្ភៈ ឆ្នាំ២០២៣ និងប្រមូលចំណូលបានសរុប ជិត ១១លានដុល្លារសហរដ្ឋអាមេរិក។

យ៉ាងណាមិញ ក្នុងនាមជាសេនាធិការរបស់រាជរដ្ឋាភិបាល ក្រសួងសាធារណការ ក៏នៅតែបន្តយកចិត្តទុកដាក់ក្នុងកិច្ចសហការជាមួយក្រុមហ៊ុនប្រតិបត្តិករ ដើម្បីលើកកម្ពស់ការផ្តល់សេវាប្រើប្រាស់ផ្លូវល្បឿនលឿនឱ្យកាន់តែមានភាពរលូន ព្រមទាំងដោះស្រាយនូវរាល់បញ្ហាប្រឈមនានាជាបន្តបន្តាប់ ដើម្បីជំរុញឱ្យចំនួនចរាចរណ៍កាន់តែមានការកើនឡើង ក៏ដូចជាលើកកម្ពស់សេដ្ឋកិច្ចជាតិតាមរយៈចំណូលពន្ធផងដែរ៕

The post ផ្លូវល្បឿនលឿនភ្នំពេញ-ក្រុងព្រះសីហនុ រកចំណូលបានជិត ១១លានដុល្លារ គិតត្រឹមចុងខែកុម្ភៈនេះ appeared first on .

ត្រឹមថ្ងៃទី៣០ ខែមករា ឆ្នាំ២០២៣នេះ គឺមានរយៈពេលចំនួន ៤ខែហើយ ដែលក្រុមហ៊ុនដាក់ឲ្យដំណើរការប្រើប្រាស់ផ្លូវល្បឿនលឿនភ្នំពេញ-ព្រះសីហនុ ដោយទទទួលបានការអបអរសាទរ ដើម្បីចំណេញពេលវេលា កាត់បន្ថយគ្រោះថ្នាក់ចរាចរណ៍។ ​ក្រោយ​ការដាក់​ការសាកល្បង​ចរាចរណ៍​ ផ្លូវ​ល្បឿនលឿនដំបូងនេះ​មាន​ភាព​មមាញឹក​ខ្លាំង​ដោយ​ទទួលបាន​ចំនួន​យានយន្ត​ជា​លក្ខណៈ​ទេសចរ​ណ៍​៧០​ភាគរយ​និង​រថយន្ត​ដឹក​ទំនិញ​ ៣០ ​ភាគរយ ​ដោយ​ក្នុង ​១ ​ថ្ងៃ មាន​យានយន្ត​ជិះ​កាត់​រង្វង់​ ១​ ម៉ឺន​គ្រឿង ​និង​ ១​ ម៉ឺន​ ៥ ​ពាន់​គ្រឿង​ រៀង​រាល់ថ្ងៃ​សៅរ៍ ​និង​អាទិត្យ ហើយក្នុងរយៈពេលមួយខែនៃការបើកសាកល្បងដោយឥតគិតថ្លៃផ្លូវល្បឿនលឿនភ្នំពេញ-ក្រុងព្រះសីហនុ មានរថយន្តចំនួនជិត ៤៤ម៉ឺនគ្រឿងបានធ្វើចរាចរណ៍។ នេះបើតាមក្រសួងសាធារណការ និងដឹកជញ្ជូន។

ជាមួយគ្នានេះ ភ្នាក់ងារអ្នកទទួលការបង់ប្រាក់ម្នាក់បានប្រាប់សារព័ត៌មានឧកញ៉ាញូស៍ កាលពីថ្ងៃអាទិត្យ ទី២៩មករាម្សិលមិញថា គិតជាមធ្យមនៅក្នុងទូនីមួយៗ ប្រមូលប្រាក់បានប្រមាណ ១០លានរៀលក្នុងមួយថ្ងៃ ពីការបង់ប្រាក់ប្រើប្រាស់ផ្លូវល្បឿនភ្នំពេញ-ព្រះសីហនុ។ លោកបញ្ជាក់ថា ចំនួន១០លានរៀលក្នុងមួយថ្ងៃនេះ ក៏មានទូនៅតាមច្រកចេញទីតាំងមួយចំនួនប្រមូលប្រាក់បានប្រមាណ ៧លានរៀលប៉ុណ្ណោះ ដោយផ្អែកលើការធ្វើចរាចរណ៍ និងថ្ងៃឈប់សម្រាក ឬពិធីបុណ្យនានា។

លោកបញ្ជាក់បន្ថែមថា គ្រប់រថយន្តធ្វើដំណើរតាមផ្លូវល្បឿនលឿនទាំងអស់ គឺសុទ្ធតែបានបញ្ចុះតម្លៃចំនួន ២០ភាគរយ ចាប់ពីថ្ងៃទី០១ ខែវិច្ឆិកា ឆ្នាំ២០២២ ដល់ថ្ងៃទី៣១ ខែតុលា ឆ្នាំ២០២៣ ហើយចំពោះការបង់ប្រាក់នឹងគិតតាមចម្ងាយជាក់ស្តែង។

សូមជម្រាបថា ផ្លូវល្បឿនលឿនពីភ្នំពេញ-ព្រះសីហនុ មានប្រវែង ១៩០គីឡូម៉ែត្រ ដោយចំណាយថវិកាប្រមាណ ២០១៩លានដុល្លារ ដើម្បីសាងសង់។ ផ្លូវ High Way នេះតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ។ គន្លងផ្លូវមានចំនួន៤ ដែលប្រវែងទទឹង ២៤,៥ ម៉ែត្រ និងមានផ្លូវបំបែកទិស ៧កន្លែង។ ក្រៅពីមានផ្លូវបំបែកទិស ក៏មានកន្លែងឈប់សម្រាកចំនួន ៣កន្លែង, ចំណតរថយន្ត ១កន្លែង, មណ្ឌលប្រតិបត្តិការនិងថែទាំរថយន្ត ៤កន្លែង។ ផ្លូវនេះ ឆ្លងកាត់មានខេត្តកំពង់ស្ពឺប្រវែង ៨០,៨គីឡូម៉ែត្រ, កោះកុងប្រវែង១,៩២គីឡូម៉ែត្រ និងខេត្តព្រះសីហនុប្រវែង ៨៩,៨៩គីឡូម៉ែត្រ៕

The post ទូបង់ប្រាក់ផ្លូវល្បឿនលឿនភ្នំពេញ-ព្រះសីហនុ នីមួយៗជាមធ្យមប្រមូលបានខ្ទង់ ១០លានរៀលក្នុងមួយថ្ងៃ appeared first on .