លោកស្រី ខៀវ សស៊ីលៀប

កូនប្រុសពៅម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់បរិញ្ញាបត្រ ពីប្រទេសអង់គ្លេស

ឧកញ៉ាដែនដី — Thu, 18 Jul 2024 04:55:16 +0000

លោក ផន មុតច័ន្ទឧត្តម ហៅ Erich ដែលជាកូនប្រុសពៅរបស់លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស បានទទួលសញ្ញាបត្រថ្នាក់បរិញ្ញាបត្រវិទ្យាសាស្ត្រ ផ្នែកទីផ្សារពាណិជ្ជកម្ម (Business with Marketing) ពីសាកលវិទ្យាល័យ City University of London នៅទីក្រុងឡុងដ៍ ប្រទេសអង់គ្លេស។

លោកស្រី ខៀវ សស៊ីលៀប បានបង្ហោះសារអបអរសាទរកូនប្រុសពៅ នៅទំព័រហ្វេសប៊ុក កាលពីថ្ងៃទី១៧ ខែកក្កដា ជាភាសាអង់គ្លេស ដែលមានន័យជាភាសាខ្មែរយ៉ាងដូច្នេះថា៖ “Erich ជាទីស្រឡាញ់របស់ម៉ាក់! មិនមានពាក្យអ្វីគ្រប់គ្រាន់ដើម្បីពិពណ៌នាពីអ្វីដែលយើងទាំងអស់គ្នាមានមោទនភាពចំពោះកូននោះទេ។ សូមឈរនៅទីខ្ពស់ ទោះបីជាអ្នកធ្លាក់ចុះ ហើយនៅពេលអ្នកភ័យខ្លាចខ្លាំង សូមបន្តសម្លឹងទៅខាងមុខ និងមើលទៅខាងស្តាំក្បែរអ្នក យើងទាំងអស់គ្នានឹងតែងតែនៅទីនោះជាមួយកូន។ កុំភ្លេចថា កូនក្លាហានជាងអ្វីដែលកូនមានជំនឿ ខ្លាំងជាងអ្វីដែលកូនមានអារម្មណ៍ និងមានក្តីស្រឡាញ់លើសពីអ្វីដែលកូនធ្លាប់ដឹង។ ម៉ាក់ប៉ា និងបងប្រុស ស្រឡាញ់កូនខ្លាំងបំផុត”។

សាកលវិទ្យាល័យ City University of London ជាប្រភេទសាកលវិទ្យាល័យបែបស្រាវជ្រាវសាធារណៈ ដែលបានបង្កើតឡើង តាំងពីឆ្នាំ១៨៩៤។ City University of London ធ្លាប់បានជាប់ឈ្មោះជាសាកលវិទ្យាល័យបែបស្រាវជ្រាវល្អបំផុត លំដាប់ទី៥ ក្នុងចំណោមសាកលវិទ្យាល័យចំនួន ១៦៨ ក្នុងប្រទេសអង់គ្លេស កាលឆ្នាំ២០១៩។

សូមជម្រាបថា លោក ផន មុតច័ន្ទឧត្តម ហៅ Erich ជាកូនប្រុសរបស់លោកឧត្តមសេនីយ៍ទោ ម៉ឹង ពន្លក អគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ និងលោកស្រី ខៀវ សស៊ីលៀប ហើយត្រូវជាប្អូនប្រុសរបស់លោក ផន មុតសុក្រឆពណ្ណ ហៅ Richie ដែលទើបបានទទួលសញ្ញាបត្រថ្នាក់អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល ពីសាកលវិទ្យាល័យ King’s College London នៅទីក្រុងឡុងដ៍ ប្រទេសអង់គ្លេស កាលខែមករា ឆ្នាំ២០២៤ ផងដែរ៕

The post កូនប្រុសពៅម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់បរិញ្ញាបត្រ ពីប្រទេសអង់គ្លេស appeared first on .

កូនប្រុសម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់អនុបណ្ឌិត ពីប្រទេសអង់គ្លេស

ឧកញ៉ាដែនដី — Fri, 19 Jan 2024 02:16:57 +0000

លោក ផន មុតសុក្រឆពណ្ណ ហៅ Richie ដែលជាកូនប្រុសរបស់លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស បានទទួលសញ្ញាបត្រថ្នាក់អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល (International Businesses and Global Management) ពីសាកលវិទ្យាល័យ King’s College London នៅទីក្រុងឡុងដ៍ ប្រទេសអង់គ្លេស។

លោកស្រី ខៀវ សស៊ីលៀប បានបង្ហោះសារអបអរសាទរកូនប្រុស នៅទំព័រហ្វេសប៊ុក កាលពីថ្ងៃទី១៨ ខែមករា ឆ្នាំ២០២៤ ជាភាសាអង់គ្លេស ដែលមានន័យជាភាសាខ្មែរយ៉ាងដូច្នេះថា៖ “កូនបានផ្តល់ហេតុផលជាច្រើន ដើម្បីឱ្យម៉ាក់មានមោទនភាពយ៉ាងខ្លាំង ដែលមានកូនជាកូនម៉ាក់។ រឿងដែលមានមោទនភាពបំផុតរបស់ម៉ាក់ គឺការប្រាប់ដល់អ្នករាល់គ្នាថា អ្នកគឺជាកូនប្រុសរបស់ម៉ាក់។ សូមអបអរសាទរ សម្រាប់សមិទ្ធផលដ៏ពិសេសនេះ, អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល នៅ King College។ កូនបានខិតខំប្រឹងប្រែងខ្លាំងណាស់។ ម៉ាក់និងប៉ា នឹងបន្តញញឹមមើលកូនដើរឆ្លងកាត់ជំហានជាបន្តបន្ទាប់ក្នុងជីវិតរបស់កូន។ ប៉ាម៉ាក់ស្រលាញ់កូនជារៀងរហូត”។

សាកលវិទ្យាល័យ King’s College London ជាសាកលវិទ្យាល័យដ៏ចំណាស់មួយរបស់ប្រទេសអង់គ្លេស ដែលបានបង្កើតឡើងតាំងពីឆ្នាំ១៨២៩។ King’s College London បានជាប់ឈ្មោះជាសាកលវិទ្យាល័យបែបស្រាវជ្រាវល្អបំផុត លំដាប់ទី៦ ក្នុងប្រទេសអង់គ្លេស កាលឆ្នាំ២០២១ និងចំណាត់ថ្នាក់សាកលវិទ្យាល័យល្អបំផុត លេខរៀងទី៣៥ នៅលើពិភពលោក ក្នុងឆ្នាំ២០២៣។ សាកលវិទ្យាល័យនេះ បានបណ្តុះបណ្តាលនិស្សិតប្រមាណជាង ២៥ម៉ឺននាក់ នៅជុំវិញពិភពលោក។

គួររំឭកថា លោក ផន មុតសុក្រឆពណ្ណ កូនប្រុសរបស់លោកឧត្តមសេនីយ៍ទោ ម៉ឹង ពន្លក អគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ និងលោកស្រី ខៀវ សស៊ីលៀប បានរៀបអាពាហ៍ពិពាហ៍ដ៏ធំជាមួយកញ្ញា តាំង ប៉ោហ្គិច ហៅ Jade កាលពីថ្ងៃទី០១ ខែតុលា ឆ្នាំ២០២៣។ ពិធីមង្គលអាពាហ៍ពិពាហ៍ត្រកូលអភិជននាពេលនោះ មានការអញ្ជើញចូលរួមដ៏ខ្ពង់ខ្ពស់ ពីប្រមុខថ្នាក់ដឹកនាំកំពូលៗរបស់រាជរដ្ឋាភិបាល និងអ្នកឧកញ៉ា គិត ម៉េង អ្នកឧកញ៉ា ភាព ហៀក អ្នកឧកញ៉ា លាង ម៉េង អ្នកឧកញ៉ា សំ អាង អ្នកឧកញ៉ា ហ៊ុន តូ រួមទាំងអ្នកឧកញ៉ា ឧកញ៉ា និងអ្នកមុខអ្នកការលើវិស័យជំនួញផ្សេងៗជាច្រើនរូបទៀតផងដែរ៕

The post កូនប្រុសម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់អនុបណ្ឌិត ពីប្រទេសអង់គ្លេស appeared first on .

មកស្គាល់ CEO ក្រុមហ៊ុន ហនុមាន ត្រូវជាពូបង្កើតកូនកំលោះ Richie

ឧកញ៉ាដែនដី — Thu, 05 Oct 2023 02:13:02 +0000

ពិធីមង្គលអាពាហ៍ពិពាហ៍ត្រកូលអភិជន កូនប្រុសម្ចាស់ក្រុមហ៊ុន ហនុមាន ប៊ែវើរីជីស កាលពីថ្ងៃទី០១ ខែតុលា ឆ្នាំ២០២៣ បានធ្វើឱ្យផ្ទុះការចាប់អារម្មណ៍យ៉ាងខ្លាំងលើបណ្តាញសង្គមនៅកម្ពុជា រហូតដល់បណ្តាប្រទេសជិតខាង។ ជាមួយគ្នានោះដែរ លោក ខៀវ តូតូ ដែលត្រូវជាពូបង្កើតរបស់កូនកំលោះឯណោះវិញ ក៏បានធ្វើឱ្យបណ្តាសាធារណជនចាប់អារម្មណ៍មិនស្ទើរនោះដែរ។

លោក ខៀវ តូតូ (Khieu Toto) ត្រូវបានគេដឹងថាជា នាយកប្រតិបត្តិក្រុមហ៊ុន ហនុមាន ប៊ែវើរីជីស ត្រូវជាពូបង្កើតរបស់កូនកំលោះ ផន មុតសុក្រឆពណ្ណ ហៅ Richie ដែលបានរៀបអាពាហ៍ពិពាហ៍ជាមួយកញ្ញា តាំង ប៉ោហ្គិច ហៅ Jade ហើយលោកត្រូវជាប្អូនបង្កើតរបស់លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស។ លោក ខៀវ តូតូ បានបញ្ចប់ការសិក្សាជាន់ខ្ពស់ មកពីសាកលវិទ្យាល័យដ៏ល្បីរបស់សហរដ្ឋអាមេរិក University of Washington Foster School of Business ហើយបច្ចុប្បន្នលោកក៏មានតួនាទីជា នាយកផ្នែកវិនិយោគ នៃក្រុមហ៊ុន អ័រគីដេ ឌីវែឡុបម៉ិន។

ក្រុមហ៊ុន ហនុមាន ប៊ែវើរីជីស ឯ.ក ត្រូវបានបង្កើតឡើងដោយកូនខ្មែរ និងបានសម្ពោធជាផ្លូវការ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត កាលពីថ្ងៃទី២២ ខែតុលា ឆ្នាំ២០២២។ បច្ចុប្បន្នក្រុមហ៊ុន កំពុងផលិតលក់នូវស្រាបៀរ និងភេសជ្ជៈជាច្រើនទូទាំងប្រទេស និងនៅក្រៅប្រទេសដូចជា នៅប្រទេសថៃ ផងដែរ៕

@chesda788 Khieu Toto ពូបង្កេីតរបស់កូនកំលោះ និង ត្រូវជា CEO ហនុមាន ខ្ពស់សង្ហានៅ single មានចំណាប់អរម្មណ៍ សូមទាក់ទងមកខ្ញុំបាទ #richiejadethewedding ♬ Nika x នំបុ័ង – Metro Remix

The post មកស្គាល់ CEO ក្រុមហ៊ុន ហនុមាន ត្រូវជាពូបង្កើតកូនកំលោះ Richie appeared first on .

សេដ្ឋីនីល្បីៗ កំពុងរកស៊ីក្នុងឧស្សាហកម្មផលិតចំណីអាហារ និងភេសជ្ជៈនៅកម្ពុជា

ឧកញ៉ាកោះក្របី — Tue, 13 Sep 2022 06:50:46 +0000

វិស័យឧស្សាហកម្មផលិតចំណីអាហារ និងភេសជ្ជៈជាផ្នែកមួយដ៏សំខាន់សម្រាប់គាំទ្រដល់រៀងកាយ និងសុខភាព ហើយតម្រូវការកំពុងមានការកើនឡើងកាន់តែច្រើនថែមទៀត។ បច្ចុប្បន្នសម្រាប់កម្ពុជា ឧស្សាហកម្មផលិតចំណីអាហារ និងភេសជ្ជៈ កំពុងទទួលជោគជ័យនៅលើទីផ្សារ រហូតមានការនាំចេញទៅក្រៅប្រទេសទៀតផង ដែលជាការវិនិយោគពីក្រុមហ៊ុនខ្នាតយក្សធំៗនៅក្នុងស្រុក។ ជុំវិញនឹងការវិនិយោគលើវិស័យចំណីអាហារ និងភេសជ្ជៈនេះដែរ បើនិយាយនៅក្នុងន័យសេដ្ឋកិច្ច វាបានចូលរួមចំណែកច្រើនក្នុងការជួយផ្ដល់ការងារ និងបង់ពន្ធជាច្រើនចូលរដ្ឋ។

សារព័ត៌មានឧកញ៉ាញូស៍ សូមបង្ហាញបញ្ជីឈ្មោះមហាសេដ្ឋី កំពុងក្តោបក្តាប់ជំនួញក្នុងវិស័យផលិតចំណីអាហារ និងភេសជ្ជៈល្បីៗនៅស្រុក ហើយសុទ្ធតែកាន់កាប់ភាគហ៊ុនដោយខ្មែរ ១០០% ផងដែរ។

១/ អ្នកឧកញ៉ា ភាព ហៀក ស្ថាបនិកក្រុមហ៊ុន ជីប ម៉ុង គ្រុប

លោកស្រីបានវិនិយោគលើរោងចក្រផលិតភេសជ្ជៈ និងស្រាបៀរ ដ៏ល្បីល្បាញប្រចាំប្រទេសជាង១០ឆ្នាំមកហើយ គឺ ក្រុមហ៊ុនផលិតស្រាបៀរកម្ពុជា Khmer Brewery ដែលគ្រប់គ្រងដោយវិនិយោគិនខ្មែរ 100% ។ ក្រុមហ៊ុន ខ្មែរ ប៊ែវើរីជីស កំពុងផលិតភេសជ្ជៈ និងស្រាបៀរ កម្ពុជា, Barrley Black Extra Stout, ស្រាបៀរ Kudo, ភេសជ្ជៈប៉ូវកម្លាំង Wurkz, Ize Cola, Ize Lemon, Ize Fruit Punch និងទឹកបរិសុទ្ធកម្ពុជា។

២/ ឧកញ៉ា កែវ មុំ អគ្គនាយិកាក្រុមហ៊ុនផលិតនំស្រួយ លី លី

លោកស្រី ត្រួសត្រាយផ្លូវឱ្យក្រុមហ៊ុន លីលី ផលិតនំស្រួយ ឈានមុខគេផ្នែកគុណភាពនិងអនាម័យនៅក្នុងប្រទេសហើយក៏ជាក្រុមហ៊ុនផលិតនំស្រួយដំបូងគេរបស់ប្រទេសកម្ពុជា ដែលនាំចេញទៅកាន់ទីផ្សារអន្តរជាតិ ដូចជា៖ សហរដ្ឋអាមេរិក, មីយ៉ាន់ម៉ា, វៀតណាម, កូរ៉េខាងត្បូង, និងកាណាដា ។ ក្រុមហ៊ុននំស្រួយលីលី បង្កើតឡើងក្នុងឆ្នាំ ២០០២ ដែលមានឧកញ៉ា កែវ មុំ ជាស្ថាបនិក ហើយដើមទុនដើម្បីចាប់ផ្ដើមអាជីវកម្មនេះ គឺកើតចេញពីការលក់ផ្ទះរបស់លោកស្រីដោយសារតែសន្សំចិត្តជឿជាក់លើអាជីវកម្មមួយនេះថានឹងអាចទទួលបាននូវភាពជោគជ័យ។

៣/ អ្នកឧកញ៉ា ឈុន លាង អគ្គនាយិកាក្រុមហ៊ុន វឌ្ឍនៈ គ្រុប

កាលពីខែតុលា ឆ្នាំ២០២១ កន្លងទៅ លោកស្រីសម្រេចបោះទុនវិនិយោគប្រមាណ ១៤០លានដុល្លារអាមេរិកលើរោងចក្រផលិតស្រាបៀរដ៏ធំមួយ របស់ក្រុមហ៊ុន វឌ្ឍនៈ ដែល មានឈ្មោះថា រោងចក្រស្រាបៀរ Vattanac Brewery ស្ថិតសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។ រោងចក្រស្រាបៀរនេះ បានផលិតភេសជ្ជៈ ដូចជា ស្រាបៀរ វឌ្ឍនៈ និងស្រាបៀរ គ្រុដ ជាដើម។

៤/ លោកស្រី ខៀវ សស៊ីលៀប អគ្គនាយិកាក្រុមហ៊ុនផលិតស្រាបៀរ ហនុមាន

លោកស្រី បានបង្កើតរោងចក្រស្រាបៀរ Hanuman Beverages កាលពីខែតុលា ឆ្នាំ២០២១ ដែលប្រើទុនវិនិយោគជាង ១៦០លានដុល្លារអាមេរិក ដែលមានទីតាំងស្ថិតនៅភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល។ រោងក្រនេះ បានបង្កើតការងារជូនប្រជាពលរដ្ឋប្រមាណជាង ១ពាន់៦រយកន្លែងផងដែរ៕

The post សេដ្ឋីនីល្បីៗ កំពុងរកស៊ីក្នុងឧស្សាហកម្មផលិតចំណីអាហារ និងភេសជ្ជៈនៅកម្ពុជា appeared first on .

លោកស្រី ខៀវ សស៊ីលៀប៖ សម្លឹងឃើញឱកាសនៅមាន, ជឿជាក់អតិថិជនកំពុងរង់ចាំគាំទ្រនូវផលិតផលខ្មែរ ទើបផលិតស្រាបៀរហនុមាន

ឧកញ៉ាកោះក្របី — Thu, 01 Sep 2022 05:28:00 +0000

ក្រុមហ៊ុនផលិតស្រាបៀរ ហនុមាន ប្រកាសចូលរួមជាមួយរដ្ឋាភិបាល ក្នុងការអនុវត្តការតម្លើងឧបករណ៍វ៉ាស់ចំណុះស្រាបៀរ និងពង្រឹងនូវតម្លាភាពការប្រកួតប្រជែងដោយស្មើភាពគ្នាក្នុងវិស័យភេសជ្ជៈនៅកម្ពុជា។

លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស នៅក្នុងសន្និសិទសារព័ត៌មាននាពេលថ្មីៗនេះ បានលើកឡើងថា៖ «ក្រុមហ៊ុន ហនុមាន ប៊ែវើរីជីស ស្ម័គ្រចិត្ត និងចូលរួមយ៉ាងសកម្ម ជាមួយអគ្គនាយកដ្ឋានពន្ធដារ ក្នុងការអនុវត្ត ការតម្លើងឧបករណ៍វាស់ចំណុះ ស្រាបៀរ និងភេសជ្ជៈគ្មានជាតិសុរា ក៏ដូចជាការចូលរួមពង្រឹងនូវតម្លាភាព និងការប្រកួតប្រជែងដោយស្មើភាពក្នុងវិស័យភេសជ្ជៈនៅកម្ពុជា»។

លោកស្រីថ្លែងថា៖ «សម្រាប់ការឈានចូលទីផ្សារក្នុងកាលៈទេសៈដែលកំពុងមានការប្រកួតប្រជែងខ្លាំង មិនមែនជារឿងងាយស្រួលនោះទ។ យ៉ាងណាមិញលោកស្រីសម្លឹងឃើញឱកាសនៅមាន ដោយយល់ពីតម្រូវការទីផ្សារច្បាស់លាស់ និងជឿជាក់ថាអតិថិជនកំពុងរង់ចាំគាំទ្រនូវផលិតផលខ្មែរ ដែលមានគុណភាពពិតប្រាកដ ជាផលិតផលដែលធ្វើឲ្យទាំងអស់គ្នាមានមោទនភាពក្នុងការណែនាំដល់មនុស្សបន្ត»។

លោកស្រីបន្ថែមថា ការដែលបង្កើតក្រុមហ៊ុន ហនុមាននេះឡើង គឺលោកស្រីបានគិតគូរយ៉ាងលំអិត និងច្បាស់លាស់ ក្នុងគោលដៅរួមចំណែកជាមួយរាជរដ្ឋាភិបាលក្នុងការពង្រីកវិស័យឧស្សហកម្មនៅកម្ពុជា ជាពិសេសគឺបង្កើនការផលិតក្នុងស្រុកឲ្យកាន់តែរីកចំរើន ក៏ដូចជាគោលបំណងចំបងរបស់លោកស្រីគឺចង់ចូលរួមចំណែកក្នុងការបង្កើតការងារដល់កូនខ្មែរឲ្យកាន់ច្រើន។

ការដាក់ឲ្យដំណើរការឧបករណ៍វាស់ចំណុះស្រាបៀរ នៅគ្រប់ខ្សែសង្វាក់ផលិតកម្ម នេះគឺជាការចាប់ផ្តើមអនុវត្តរបស់ក្រុមហ៊ុនក្នុងស្រុកថ្មីមួយទៀត តាមសេចក្ដីណែនាំរបស់អគ្គនាយកដ្ឋានពន្ធដារ។

យ៉ាងណា សម្រាប់លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកជាអគ្គនាយកដ្ឋានពន្ធដារ គូសបញ្ជាក់ថា ការបំពេញកាតព្វកិច្ចនេះ បានឆ្លុះបញ្ចាំងអំពី អភិបាលកិច្ចសាជីវកម្ម ដ៏ល្អប្រសើររបស់ក្រុមហ៊ុនផ្ទាល់ និងជាគំរូល្អ សម្រាប់សហគ្រាសដ៍ទៃទៀត ក្នុងវិស័យផលិតស្រាបៀរ និងភេជ្ជៈ គ្មានជាតិសុរា នៅក្នុងព្រះរាជាណាចក្រកម្ពុជា។

លោក គង់ វិបុល បានបញ្ជាក់បន្ថែមថា ការចូលរួមសហការអនុវត្តយន្តការនេះ មិនត្រឹមតែបានឆ្លុះបញ្ចាំង អំពីអភិបាលកិច្ចសាជីវកម្ម (Corporate Governance) ដ៏ល្អប្រសើររបស់ក្រុមហ៊ុនផ្ទាល់ និងជាគំរូល្អ សម្រាប់សហគ្រាសដ៍ទៃទៀត ក្នុងវិស័យដូចគ្នានេះ ក៍ដូចសហគ្រាសទូទៅ និងជាការរួមចំណែក មិនអាចខ្វះបាន ពីវិស័យឯកជន ដែលជាដៃគូដ៏សំខាន់របស់រដ្ឋ និងជាកម្លាំងចលករសម្រាប់ការអភិវឌ្ឍ និងរីកលូតលាស់ នៃ សេដ្ឋកិច្ចកម្ពុជា។

សូមជម្រាបជូនថា ក្រុមហ៊ុន ហនុមាន ប៊ែវើរីជីស ឯ.ក ត្រូវបង្កើតឡើងដោយកូនខ្មែរសុទ្ធសាធ ជាមួយទុនវិនិយោគរហូតដល់ ១៦០ លានដុល្លារ ដែលមានសមត្ថភាពផលិតរហូតដល់ប្រមាណ ៣០លានកេស ក្នុងមួយឆ្នាំ ហើយក៏អាចផ្តល់ឱកាសការងារប្រមាណជាង ១.៦០០កន្លែងផងដែរ៕

The post លោកស្រី ខៀវ សស៊ីលៀប៖ សម្លឹងឃើញឱកាសនៅមាន, ជឿជាក់អតិថិជនកំពុងរង់ចាំគាំទ្រនូវផលិតផលខ្មែរ ទើបផលិតស្រាបៀរហនុមាន appeared first on .

លោកស្រី ខៀវ សស៊ីលៀប បោះទុន ១៦០ លានដុល្លារ វិនិយោគលើរោងចក្រផលិតស្រាបៀរ ហនុមាន

ឧកញ៉ាកោះក្របី — Fri, 05 Nov 2021 02:11:39 +0000

ថ្មីៗនេះ រោងចក្រផលិតស្រាបៀរ ហនុមាន ត្រូវបានប្រកាសដាក់ឲ្យលក់នៅលើទីផ្សារ ជាមួយនឹងយុទ្ធសាស្រ្តទីផ្សារផ្សព្វផ្សាយខ្លាំងមែនទែនទៅនៅតាមស្ថានីយ៍ទូរទស្សន៍ និងប្រព័ន្ធបច្ចេកវិទ្យាឌីជីថល។

ក្រុមហ៊ុន ហនុមាន ប៊ែវើរីជីស ឯ.ក ត្រូវបង្កើតឡើងដោយកូនខ្មែរសុទ្ធសាធ ជាមួយការបោះវិនិយោគទុនរហូតដល់ ១៦០ លានដុល្លារ ដោយមានច្ចេកវិទ្យាទំនើបចុងក្រោយពីអឺរ៉ុប ស្របទៅតាមបទដ្ឋានស្តង់ដារលំដាប់ពិភពលោក ព្រមទាំងមានសមត្ថភាពផលិតរហូតដល់ប្រមាណ ៣០លានកេស ក្នុងមួយឆ្នាំ ពោលគឺនឹងផ្តល់ឱកាសការងារប្រមាណជាង ១.៦០០កន្លែង។

បន្ថែមលើនេះ ក្រុមហ៊ុន មានការប្តេជ្ញាចិត្តដ៏មោះមុត ក្នុងការរួមចំណែកអភិវឌ្ឍសេដ្ឋកិច្ចនៃកម្ពុជា ខណៈទិសដៅរបស់រាជរដ្ឋាភិបាលបាននឹងកំពុងជំរុញដល់ការបង្កើនវិស័យឧស្សាហកម្មផលិតក្នុងស្រុក ដែលមានទីតាំងស្ថិតនៅ ផ្លូវជាតិលេខ ៤ ភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល។

នាយកប្រតិបត្តិក្រុមហ៊ុន ហនុមាន ប៊ែវើរីជីស លោក Chas GESCHKE បានឲ្យដឹងថា៖ «បន្ទាប់ពីការសាងសង់អស់រយៈពេលជាងពីរឆ្នាំ យើងបានឆ្លងកាត់នូវឧបសគ្គជាច្រើន ក្នុងស្ថានភាពការរីករាលដាលនៃជំងឺ កូវីដ-១៩ ដែលបានជះឥទ្ធិពលដល់ល្បឿននៃការសាងសង់របស់យើង។ យ៉ាងណាមិញក្រុមហ៊ុនបានខិតខំស្វែងរក ដំណោះស្រាយក្នុងការជំរុញដំណាក់កាលនីមួយៗបន្តទៅមុខជានិច្ច»។

លោក Chas GESCHKE

លោកថា នៅទីបំផុតយើងសម្រេច បាននូវគោលដៅដំបូងរបស់ក្រុមហ៊ុន ហើយយើងពិតជាមោទកភាពក្នុងការទទួលបានជោគជ័យ នៃការផលិតនូវផលិតផលដំបូងរបស់យើង គឺស្រាបៀរហនុមាន-Hanuman Premium Lager ព្រមទាំងបានចែកចាយលើទីផ្សារកាលពីថ្មីៗនេះ។

ជាមួយគ្នានេះដែល លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាលក្រុមហ៊ុន ហនុមាន ប៊ែវើរីជីស មានប្រសាសន៍ថា៖ «ផលិតផលដំបូងរបស់យើង ទទួលបានការគាំទ្រពេញចិត្ត និងកោតសរសើរមិនដាច់ពីមាត់ ពីសំណាក់បងប្អូនប្រជាជនកម្ពុជា និងភ្ញៀវអន្តរជាតិ អំពីរសជាតិដ៏ឆ្ងាញ់ គុណភាពល្អ និងមានរូបរាងគួរឲ្យទាក់ទាញ ដែលនេះជាសមិទ្ធផលផ្លែផ្កាដ៏វិសេសវិសាលដំបូងសម្រាប់ក្រុមហ៊ុន»។

លោកស្រី ខៀវ សស៊ីលៀប

បើតាមលោកស្រី ក្រុមហ៊ុនមានចក្ខុវិស័យវែងឆ្ងាយប្រកបដោយវិសាលភាព ដែលផ្តោតសំខាន់លើ ឧត្តមភាព នៃគុណតម្លៃ ក្នុងការផ្តល់បរិយាកាសការងារល្អដល់បុគ្គលិក ស្ថិរភាពលើគុណភាពផលិតផល ក៏ដូចជាការគាំទ្រលើយុទ្ធសាស្រ្តល្អៗ ដើម្បីនិរន្តរភាពដល់ការពង្រីកអាជីវកម្មជាចម្បង ជាពិសេសគឺជំរុញបន្ថែមលើការកសាងគុណភាពម៉ាកសញ្ញាកូនខ្មែរទៅកាន់សកលលោក៕

The post លោកស្រី ខៀវ សស៊ីលៀប បោះទុន ១៦០ លានដុល្លារ វិនិយោគលើរោងចក្រផលិតស្រាបៀរ ហនុមាន appeared first on .