ឧកញ៉ា ឆាយ ស៊ីវលីន ប្រធានសមាគមទេសចរណ៍កម្ពុជាមើលឃើញថា សម្រាប់វិស័យទេសចរណ៍កម្ពុជានៅឆ្នាំ២០២៤គឺយើងរំពឹងថានឹងទទួលបានអត្ថប្រយោជន៍តាមរយៈវត្តមាននាវាទេសចរ Westerdam ដែលបានចូលមកកម្ពុជាកន្លងទៅថ្មីៗនេះ  ហើយមានសារព័ត៌មានជាតិនិងអន្តរជាតិជាច្រើនបានផ្សព្វផ្សាយពីនាវាWesterdam ។

បើតាមប្រធានសមាគមទេសចរណ៍កម្ពុជារំពឹងថា តាមរយៈការផ្សព្វផ្សាយទំាងនៅលើបណ្តាញទំនាក់ទំនិងសង្គម និងស្ថាប័នជាតិអន្តរជាតិពីវត្តមាននាវា Westerdam ក៏ដូចជាផ្សព្វផ្សាយពីប្រទេសកម្ពុជានៅពេលកន្លងមកនេះ និងធ្វើឱ្យប្រទេសកម្ពុជាទទួលបានការទាក់ទាញភ្ញៀវបន្ថែមទៀត ហើយភ្ញៀវទេសចរបរទេស និងជ្រើសរើសកម្ពុជា ជាគោលដៅទេសចរណ៍របស់ពួកគេ ដោយគិតថាកម្ពុជាជាប្រទេសដែលស្អាត ហើយមានការទទួលរាក់ទាក់ទៅដល់ភ្ញៀវទេសចរគ្រប់ជាតិសាស្ត្រ។

លោក ធឿន វុឌ្ឍី មគ្គុទេសក៍ទេសចរណ៍ប្រចំាខេត្តសៀមរាប បានឱ្យដឹងថា«ផ្អែកទៅលើនាវា Westerdam ខ្ញុំមានសេក្តីរំពឹងថា ពួកគាត់នឹងនំាផ្សព្វផ្សាយពីកម្ពុជាពីមនុស្សម្នាក់ទៅមនុស្សម្នាក់ ដែលផ្តល់នូវផលចំណេញសម្រាប់កម្ពុជា ហើយគាត់និងព្យាយាមមកលេងនៅកម្ពុជាបានកាន់តែច្រើនជាឆ្នាំ២០២៣។ដូចនេះ សកម្មភាពរបស់នាវា Westerdam និងជំរុញភ្ញៀវទេសចរបរទេសមកកម្ពុជាកាន់តែច្រើន»។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មើលឃើញនាវាWesterdam ចូលមកកម្ពុជាកាលពីចុងឆ្នាំ២០២៣កន្លងមកនេះគឺ ជាការនាំសារមួយដ៏ល្អសម្រាប់ទេសចរណ៍កម្ពុជា បន្ទាប់ពីនាវា Westerdam ទទួលបានការអនុញ្ញាតពីរាជរដ្ឋាភិបាលចូលចតនៅកម្ពុជា ស្របពេលពិភពលោកប្រឈមនិងជំងឺកូវីដ១៩។លើសពីនេះព្រឹត្តិការណ៍របស់នាវា Westerdam ចូលមកកាន់កម្ពុជាថ្មីៗនេះវាជាសញ្ញាមួយក្នុងការទាក់ទាញភ្ញៀវទេសចរបរទេសផងដែរឱ្យចូលមកទស្សនាកម្ពុជា ស្របពេលដែលព្រលានយន្តហោះអន្តរជាតិសៀមរាប អង្គរបានដាក់ឱ្យដំណើរការ។

អ្នកឧកញ៉ា លឹម ហេង មានប្រសាសន៍ថា «សម្រាប់វិស័យទេសចរណ៍កម្ពុជា អាចទាក់ទាញភ្ញៀវទេសចរបានពីប្រទេសជាមិត្ត ពិសេសភ្ញៀវទេសចរជនជាតិចិន តាមរយៈសម្តេចធិបតី ហ៊ុន ម៉ាណែត ទៅទស្សនៈកិច្ចនទៅទីក្រុងប៉េកំាង  ដោយថ្នាក់ដឹកនាំនៃប្រទេសទំាងពីរបានតម្លើងទំនាក់ទំនងពីមិត្តដែកថែប ទៅជាមិត្តត្បូងពេជ្រ។លើសពីនេះនៅមានកិច្ចព្រមព្រៀងមួយផ្សេងទៀត ទាក់ទងនិងការផ្លាស់ប្តូររវាងប្រជាជននិងប្រជាជន។ដូច្នេះខ្ញុំជឿថានៅឆ្នាំ២០២៤នេះនិងចាប់ផ្តើមអនុវត្ត បន្ទាប់ពីក្រោយចូលឆ្នំាចិនខាងមុខនេះនឹងមានភ្ញៀវទេសចរជនជាតិចិន និងអ្នកវិនិយោគចូលមកកម្ពុជាច្រើន»៕ តាកែវ

The post ឆ្នាំ២០២៤កម្ពុជារំពឹងថាទទួលបានការចាប់អារម្មណ៍ពីភ្ញៀវទេសចរបរទេសកើនឡើងច្រើន តាមរយៈWesterdam appeared first on .

លោក ហូ វណ្ឌី ប្រធានក្រុមប្រឹក្សានៃសមាគមទេសចរណ៍កម្ពុជា បានឱ្យដឹងថា ក្នុងអំឡុងពេលមានវិបត្តិជំងឺកូវីដ១៩ មិនមែនមានតែប្រទេសកម្ពុជានោះទេ ប្រទេសផ្សេងទៀតក៏មានក្តីបារម្ភខ្លំាងក្លាដូចគ្នាទាក់ទងសង្គមនិងសង្គម។ប៉ុន្តែនៅពេលព្រឹត្តិការណ៍វិបត្តិជំងឺកូវីដ១៩សាបរលាបបាត់ទៅបណ្តាប្រទេសនៅជុំវិញកម្ពុជាសម្រាប់វិស័យទេសចរណ៍ គេមមាញឹក្នុងការទទួលយកភ្ញៀវទេសចរដ៏ច្រើនតាមរយៈអ្នកប្រើប្រាស់បណ្តាញទំនាក់ទំនងសង្គមបានបង្ហោះរូបភាពភ្ញៀវទេសចរចូលទៅលេងនៅប្រទេសថៃ វៀតណាម និងសឹង្ហបុរីជាដើម។ប៉ុន្តែងាកមកខាងកម្ពុជាវិញព្រឹត្តិការណ៍នេះវាខុសប្លែកគ្នា។ក្នុងវិស័ទេសចរណ៍របស់កម្ពុជាស្ថិតនៅក្នុងដំណាក់កាលចាប់ផ្តើមទទួលបានភ្ញៀវទេសចរមានសន្ទុះយឺត បើប្រៀបធៀបនិងបណ្តាប្រទេសជិតខាង។

ដើម្បីទាក់ទាញភ្ញៀវទេសចរ លោក ហូ វណ្ឌី លើកឡើងថា មានកត្តាមួយចំនួនដែលត្រូវជំរុញឱ្យកម្ពុជាមានការផ្លាស់ប្តូរ ទាមទារឱ្យយើងជជែកគ្នាទៅសម្រាប់វិស័យសាធារណៈនិងវិស័យឯកជន។ការដោះស្រាយនេះយើងមិនមែននិយាយអំពីការទូតទេគឺយើងនិយាយអំពីការពិតដើម្បីឱ្យវិស័យទេសចរណ៍មួយនេះបានដើរទៅលឿនប្រកបដោយភាពរលូន។

លោកសង្កត់ធ្ងន់ថា«បើយើងនិយាយអំពីការទូតយើងពិបាកនិងដោះស្រាយបញ្ចប់បញ្ហាណាស់ ព្រោះការងារមួយចំនួនយើងត្រូវប្រើរយៈពេលខ្លី បើយើងនិយាយអំពីការទូតទោះមួយជីវិតក៏យើងដោះស្រាយមិនចេញដែរ។ប៉ុន្តែបើយើងនិយាយអំពីការពិត ហើយរួមគ្នាដោះស្រាយទើបធ្វើឱ្យវិស័យមួយនេះទទួលបានភ្ញៀវទេសចរចូលមកទស្សនាកម្ពុជាច្រើនឬប្រហាក់ប្រហែលនិងប្រទេសជិតខាង»។

លោក ធឿន វុឌ្ឍី មគ្គទេសក៍ ទេសចរណ៍ប្រចំាខេត្តសៀមរាប យល់ឃើញថា«បើសិនជាយើងព្យាយាមធ្វើរបាយការណ៍បង្ហាញអំពីវឌ្ឍនភាពនៃវិស័យទេសចរណ៍ក្រោមការដឹកនំារបស់រាជរដ្ឋាភិបាល តែបើសិនយើងប្តូរពីការប្រឹងកែលម្អរបាយការណ៍ មកជួបជជែកជាមួយអ្នកកំពុងតែប្រកបអាជីវកម្មផ្ទាល់ រស់នៅផ្ទាល់ជាមួយទេសចរប្រហែលឆាប់រកដំណោះស្រាយឃើញ»។

សម្រាប់វិស័យទេសចរណ៍កម្ពុជា លោក ធឿន វុឌ្ឍី សង្កត់ធ្ងន់ថា«បច្ចុប្បន្ននេះយើងគិតថាវិស័យទេសចរណ៍កម្ពុជាកំពុងតែចាប់ផ្តើមទាក់ទាញភ្ញៀវទេសចរទៅចុះ។បើកាលណាទាក់ទាញទាល់តែយើងឃើញមានភ្ញៀវបានកក់កន្លែងមកមុនមានច្រើន តែមកដល់ពេលនេះវានៅមានចំនួនតិចតួចនៅឡើយ។មានន័យថាវាកំពុងស្ថិតក្នុងដំណាក់ការមួយយើងកំពុងដំណើរការផ្សព្វផ្សាយនិងរៀបចំឡើងវិញ»។

បើតាមមគ្គទេសក៏ ទេសចរណ៍ខាងលើរូបនេះ គិតត្រឹមតែរយៈពេល៩ខែឆ្នំា២០២៣នេះថៃអាចរកប្រាក់ចំណូលរាប់ពាន់លានដុល្លារអាមេរិកពីវិស័យទេសចរណ៍។ តែសម្រាប់យើងកាលណាខេត្តសៀមរាបស្ងប់ស្ងាត់ភ្ញៀវទេសចរហើយ ច្បាស់ណាស់កន្លែងផ្សេងទៀតក៏ស្ងាត់ដែរ ព្រោះគោលដៅទេសចរណ៍សំខាន់មកកាន់កម្ពុជាគឺខេត្តសៀមរាប។

ដើម្បីទាក់ទាញភ្ញៀវទេសចរ លោក ហូ វណ្ឌី ទី (១)ភាពប្រទាក់ក្រឡាគ្នាគឺជាសរសរស្តម្ភមួយសំខាន់ណាស់សម្រាប់ទេសចរណ៍កម្ពុជាហើយនៅក្នុងនោះការលើកលែងទិដ្ឋការទៅដល់ភ្ញៀវទេសចរគោលនិងទេសចរបន្ទាប់បន្សំ។(២)ការលើកទឹកចិត្តដល់ការវិនិយោគ យើងឃើញហើយបន្ទាប់វិបត្តិជំងឺកូវីដ១៩សាបរលាបបាត់ទៅ អ្នកផ្គត់ផ្គង់នៅក្នុងវិស័យទេសចរឬអ្នកអាជីពទេសចរណ៍បានបាត់បង់ច្រើនទំាងធនធានមនុស្សនិងធនធានថវិកា។ដូចនេះអ្នកណាជាអ្នកជួយទំនុកបម្រុងនេះគឺ មានតែវិស័យសាធារណៈទេអាជួយដល់វិស័យនេះបាន។ (៣)ប្រព័ន្ធហេដ្ឋារចនាសម្ព័ន្ធនៅមានកម្រិត ហើយការផ្គត់ផ្គង់អាកាសចរណ៍នៅក្នុងស្រុកត្រូវការថែមទៀត ព្រោះការធ្វើដំណើរតាមរថយន្តត្រូវប្រើរយៈពេលយូរទម្រំាដល់គោលដៅ។

លើសពីនេះសូមឱ្យស្ថាប័នគ្រប់ជំនាញរឹតបន្តឹងទៅលើឥរិយាបទ ក្រមសីលធម៌របស់មន្ត្រីជំនាញ។យើងត្រូវដឹងថាភ្ញៀវទេចរចូលមកកម្ពុជាគឺជាមនុស្សដែលមានលាភ ផ្តល់ប្រយោជន៍ដល់យើងទំាងអស់គ្នា កុំគិតថាភ្ញៀវទេសចចូលមកគឺជាសាច់ជ្រូកត្រូវកាប់គេ វាមិនមែនអីចឹងទេ។ការលើកលែងអ្វីមួយ វាអាចផ្តល់ផលប្រយោជន៍អ្វីមួយទៅដល់ប្រជាពលរដ្ឋ។ឧទារហ៍ការលើកលែងទិដ្ឋកា។ ប៉ុន្តែភ្ញៀវចូលមកកម្ពុជាគាត់សម្បាយចិត្ត ហើយការសប្បាយចិត្តរបស់ភ្ញៀវទេរសចរនេះ អាចធ្វើឱ្យគាត់ចាយវាយលើសពីតម្លៃទិដ្ឋការ៕អត្ថបទ៖សារេត

The post អ្នកជំនាញ៖ ការដោះស្រាយក្នុងវិស័យទេសចណ៍មិនមែននិយាយអំពីការទូតគឺនិយាយការពិត appeared first on .

លោក ធឿន វុឌ្ឍី មគ្គទេសក៍ ទេសចរណ៍ប្រចំាខេត្តសៀមរាបបានឱ្យដឹងថា ប្រទេសកម្ពុជាមានសក្តានុពលទេសចរណ៍ខ្លំាង ប៉ុន្តែអ្វីដែលធ្វើឱ្យកម្ពុជាមិនទាន់អាចស្រូបទាញទេសចរបរទេសបានច្រើនវាពាក់ព័ន្ធនិងកត្តាផ្សេងៗច្រើន ក្នុងនោះមានដូចជាកត្តាធនធានមនុស្ស សេវាកម្ម ព្រមទំាងទីតាំងដែលត្រូវទទួលភ្ញៀវទេសចរ។

ទាក់ទងនិងនិងកត្តាខាងលើ លោក ធឿន វុឌ្ឍី បានសង្កត់ធ្ងន់ថា«កត្តាធនធានមនុស្សជាទូទៅបើកកន្លែងទទួលភ្ញៀវទេសចរគឺបើកទៅតាមទម្លាប់ ឬបើកទៅតាមការធ្វើតៗគ្នា ដោយពុំសូវបានចូលសាលាបណ្តុះបណ្តាលឱ្យមានចំណេះដឹងត្រូវ គ្រប់គ្រាន់ដែលជាហេតុនៅមានចន្លោះខ្វះខាតច្រើន។ កត្តាផ្នែកសេវាកម្មរបស់យើងនៅមានកម្រិត សម្រាប់អ្នកប្រកបអាជីវកម្មនៅក្នុងវិស័យទេសចរណ៍ មួយចំនួនមានការកេងបន្លំជាមួយភ្ញៀវ ដោយពុំមានភាពស្មោះត្រង់ លក់ឬផ្តល់សេវាថ្លៃមិនសមជាមួយសេវាកម្មជាដើម។ចំណែកទីតំាងដូចគ្នា ថ្វីត្បិតយើងមានសណ្ឋាគារច្រើន ប៉ុន្តែមានតែនៅក្រុងភ្នំពេញ សៀមរាបនិងកំពង់សោមខ្លះៗ តែនៅតាមបណ្តាខេត្តផ្សេងៗទៀតគឺនៅខ្វះសណ្ឋាគារច្រើន»។

បើតាមមគ្គទេសក៍ ទេសចរណ៍រូបនេះបច្ចុប្បន្ននេះក្នុងវិស័យទេសចរណ៍កម្ពុជាខ្វះខាតច្រើនជាងគេនោះ គឺកត្តាធនធានមនុស្ស ហើយនៅថ្ងៃខាងមុខបើសិនជាកម្ពុជាមានគ្រប់ទំាង៣កត្តានេះ រួមផ្សំជាមួយគោលនយោបាយរបស់រាជរដ្ឋាល នោះនឹងធ្វើឱ្យកម្ពុជាទាក់ទាញភ្ញៀវទេសចរបរទេសមកលេងកម្សាន្តកាន់តែច្រើននិងជួយឱ្យសេដ្ឋកិច្ចកម្ពុជាកើនឡើងខ្លំាងតាមរយៈវិស័យទេសចរណ៍។

យោងតាមអគ្គនាយកដ្ឋានគ្រប់គ្រងឧស្សាហកម្មទេសចរណ៍ថ្មីៗនេះបានបើកកិច្ចប្រជុំ ត្រួតពិនិត្យការងារគម្រោងសាងសង់សាលាវិជ្ជាជីវៈទេសចរណ៍នៅរាជធានីភ្នំពេញនិងខេត្តព្រះសីហនុ។ទាក់ទងនិងគម្រោងនេះ លោក ធឿន វុឌ្ឍី មានប្រសាសន៍ថា «ខ្ញុំគំាំទ្រ និងសប្បាយចិត្ត ហើយសង្ឃឹមថាថ្ងៃអនាគតទៅ អ្នកបម្រើសេវានៅក្នុងវិស័យទេសចរណ៍ បានឆ្លងកាត់វគ្គបណ្តុះបណ្តាលរៀនសូត្របានត្រឹមត្រូវ និងនាំនូវការពេញចិត្តទៅកាន់ភ្ញៀវ ហើយភ្ញៀវនឹងនាំនៅព័ត៌មានល្អៗពីស្រុកយើងទៅកាន់ប្រទេសពួកគាត់ ហើយអនាគតទៅនឹងនាំភ្ញៀវមកកាន់កម្ពុជាមានកាន់តែច្រើន»។

លោកលើកឡើងថា កម្ពុជាមានកន្លែងល្អៗ ប៉ុន្តែអត់សូវចេះរៀបចំវាឱ្យមានតម្លៃ មិនសូវចេះផ្សព្វផ្សាយម៉ូដរបស់ខ្លួនឱ្យគេបានស្គាល់។តែទោះជាយ៉ាងនេះក្តីការបើកសាលាបណ្តុះបណ្តាលវិជ្ជាជីវៈទេសចរណ៍នេះវាគឺជាជំហ៊ានល្អ បីទោះជាមិនទាន់បានដំណើរការភ្លាមៗ តែវាបាននិងកំពុងដើរនៅលើផ្លូវត្រូវ ជំរុញឧស្សាហកម្មគ្មានផ្សែងនេះឱ្យកាន់តែខ្លំាងក្លា។

លោក ធឿន វុឌ្ឍី បានដាក់ក្តីសង្ឃឹមថា «នៅថ្ងៃខាងមុខ បើសិនកម្ពុជាមានដូចកត្តាដែលបានលើកឡើងខាងលើ រួមនិងគោលនយោបាយបន្ថែមរបស់រាជរដ្ឋាភិបាលក្នុងការជួយសម្រួលវីហ្សាផ្សេងផ្សេងទៀត ក្នុងន័យលើកទឹកចិត្តឱ្យភ្ញៀវបរទេសមកលេងកម្សាន្តនៅកម្ពុជាកាន់តែច្រើននោះ វាមិនយូរទេកម្ពុជានឹងមានសេដ្ឋកិច្ចកើនឡើងខ្លំាង ហើយតាមរយៈវិស័យទេសចរណ៍នេះ ខ្ញុំគិតថាប្រាក់ចំណូលដែលបានចាក់បញ្ចូលកញ្ចប់ថវិកាជាតិបើមិនឈរនៅក្នុងលំដាប់ទី១ក៏ទី២ដែរ។ ប្រទេសជិតខាងកម្ពុជា គេមិនសូវជាមានអ្វីឱ្យអស្ចារ្យជាងកម្ពុជា ប៉ុន្តែគេបានរៀបចំមានការទាក់ទាញភ្ញៀវបានច្រើន អីចឹងថវិកាឬប្រាក់ចំណូលដែលបានពីវិស័យទេសចរណ៍គឺមានច្រើន ។យើងសង្ឃឹមថាកម្ពុជាក៏និងអាចទទួលបានប្រាក់ចំណូលច្រើនបែបនេះដែរនៅថ្ងៃខាងមុខ»៕ អត្ថបទ៖សារេត

The post កម្ពុជាមិនទាន់ស្រូបទាញភ្ញៀវទេសចរបរទេសបានច្រើនដោយសារខ្វះកត្តាសំខាន់៣ appeared first on .

លោក ធឿន វុឌ្ឍី មគ្គុទេសក៍ ទេសចរណ៍ប្រចំាខេត្តសៀមរាបម្នាក់បានឱ្យដឹងថា ក្នុងនាមជាអ្នកប្រកបអាជីវកម្មក្នុងវិស័យទេសចរណ៍ យើងចង់បានការហោះហើរត្រង់មកកាន់ទឹកដីខេត្តសៀមរាប ដោយហេតុផលថាកាលពីមុនមកយើងពឹងផ្អែកទៅលើប្រទេសជិតខាង អីចឹងការរៀបចំកញ្ចប់ទេសចរ មុនមកដល់ស្រុកយើងភ្ញៀវទេសចរត្រូវចុះដើរលេងនៅស្រុកគេសិន។

លោក ធឿន វុឌ្ឍី មានប្រសាសន៍ថា «អ្វីដែលយើងសប្បាយចិត្តគឺភ្ញៀវចុះនៅសៀមរាបផ្ទាល់ យើងអាចរៀបចំកញ្ចប់ទេរសចរផ្ទាល់បាន ហើយយើងប្រើពេលវេលាវែង មានន័យថាលុយចូលមកស្រុកយើងវាបានច្រើន។យើងជឿជាក់ថានឹងមានការហោះហើរត្រង់នៅយន្តហោះដឹកអ្នកទេសចរមកកាន់ខេត្តសៀម បើទោះបីមិនទទួលបាន១០០% យ៉ាងហោចណាស់យើងបានខ្លះ ហើយការទទួលបានចំណែកខ្លះៗនេះវាជាផលចំណេញសម្រាប់កម្ពុជា»។

បើតាមលោក ធឿន វុឌ្ឍី ភ្ញៀវទេសចរបរទេសខ្លះគេធ្លាប់បានទៅលេងនៅប្រទេសជិតខាងកម្ពុជាបានច្រើនហើយតែគេមកលេងនៅកម្ពុជាតែមានរយៈពេលខ្លី ដូចនេះនៅថ្ងៃក្រោយសង្ឃឹមថាទេសចរទំាងនោះនិងទិញសំបុត្រយន្តហោះដែលហោះហើរត្រង់មកកម្ពុជាតែម្តង ដើម្បីចំណាយពេលដើរកម្សាន្តនៅខ្មែរឱ្យបានយូរ។

លោកស្រី ឆាយ ស៊ីលីន ប្រធានសមាគមទេសចរណ៍កម្ពុជា លើកឡើងថា ការប្រកាសបើកអាកាសយានដ្ឋានថ្មីនៅពាក់កណ្តាលខែតុលាដ៏ឆាប់ខាងមុខនេះ បានធ្វើអោយអ្នកពាក់ពន្ធ័វិស័យទេសចរណ៍មានការភ្ញាក់ផ្អើល ទើបយើងរៀបចំទស្សនៈកិច្ចលក្ខណៈបច្ចេកទេសនេះឡើង ដើម្បីបកស្រាយនូវរាល់ចម្ងល់ និងក្តីបារម្មណ៍របស់ប្រតិបត្តិករទេសចរណ៍យើង។

យោងតាមបណ្តាញទំនាក់ទំនងសង្គមផ្លូវការរបស់លោកស្រី ឆាយ ស៊ីវលីន បានបញ្ជាក់ថា«អាកាសយានដ្ឋានថ្មីនេះ នឹងក្លាយជាទ្រព្យដ៏សំខាន់មួយ សំរាប់អនាគតនៃវិស័យទេសចរណ៍យើង សូមចូលរួមបង្កើនទំនុកចិត្តដល់ភ្ញៀវទេសចរទាំងអស់គ្នាតាមរយៈការប្រើប្រាស់ចំណេះ ជំនាញ និងក្រមសីលធម៏នៃវិជ្ជាជីវៈ ដើម្បីប្រកួតប្រជែងក្នុងការទាក់ទាញភ្ញៀវនៅក្នុងតំបន់»៕ អត្ថបទ៖សារេត

The post អ្នកផ្តល់សេវាកម្មក្នុងវិស័យទេសចរណ៍រំពឹងទទួលបានជើងយន្តហោះផ្ទាល់ដឹកភ្ញៀវត្រង់មកកាន់ព្រលានយន្តហោះសៀមរាបអង្គរ appeared first on .

លោក ធឿន វុឌ្ឍី អ្នកជំនាញខាងផ្នែកវប្បធម៌ប្រចាំនៅខេត្តសៀមរាបបានឱ្យដឹងថា ការដើរព្រៃនេះគាត់បានផ្សារភ្ជាប់ខ្លួនគាត់ទៅនិងធម្មជាតិ ទុកពេលវេលាសម្រាប់ខ្លួនឯង មានន័យថាកាត់ផ្តាច់ខ្លួនឯងចេញពីបច្ចេកវិទ្យាដោយសារម្នាក់ៗរវល់ពេកជាមួយនិងកំព្យួរទ័រនិងទូរស័ព្ទដៃ អីចឹងយើងធ្វើកម្មវិធីដើរព្រៃនៅតំបន់អង្គរនេះជួយឱ្យគាត់បានសម្រាកលំហែរខួរក្បាលនិងការគិត។ពិសេសជាងនេះទៅទៀតគាត់បានស្តាប់និងអនុវត្តនៅមេរៀនយុគៈ សមាធិដែលជាមេរៀនមួយយ៉ាងសំខាន់ក្នុងការជួយសម្រួលដល់ផ្លូវចិត្តរបស់ពួកគាត់។

លោក ធឿន វុឌ្ឍី បញ្ជាក់ថា«ថ្វីត្បិតយើងចូលរួមដើរព្រៃនៅតំបន់អង្គរតែមួយព្រឹកប៉ុន្តែយើងទទួលបានចំណេះដឹងធំទូលាយដែលអាចឱ្យយើងយកទៅអនុវត្តប្រចាំថ្ងៃ ។លើសពីនេះគាត់បានសា្តប់អ្នកជំនាញវប្បធម៌រៀបរាប់ពីភាពអស្ចារ្យនៃអាណាចក្រខ្មែរដែលយើងឈរនៅលើទឹកដីអង្គរ ថាខ្មែរយើងពីដើមមានភាពរុងរឿងកម្រិតណា ហើយយើងអាចឆ្លុះបញ្ចំាងនិងរៀនសូត្រពីគំរូវីរៈភាពរបស់មហាក្សត្រខ្មែរដែលបានដឹកនាំប្រទេសប្រកបដោយភាពខ្លាំងក្លាហើយថា តើមហាក្សត្រខ្មែរគាត់ប្រើគោលការណ៍អ្វីខ្លះ? អីចឹងពេលយើងស្តាប់យើងនឹងបានមេរៀនសម្រាប់ជីវិតយើងផងដែរ»។

លោកលើកឡើងថា ជាទូទៅពលរដ្ឋខ្មែរភាគច្រើនអត់យល់ឬអត់បានដឹងពីភាពអស្ចារ្យរបស់ដូនតាខ្លួនឯងតែនៅពេលយើងធ្វើការអត្ថាធិបាយប្រាប់គាត់ទៅ ពួកគាត់មានភាពរំភើប រំជួលចិត្តមិននឹកស្ថានថាដូនតាខ្មែរខ្លាំងដល់ម្តឹងនោះទេ ដែលកាលពីមុនៗគាត់មកកម្សាន្តនៅអង្គរមានលក្ខណៈធម្មតាៗ ថតរូបគ្រប់គ្រាន់ហើយត្រឡប់ទៅវិញ។តែនៅពេលគាត់បានស្តាប់ហើយទើបគាត់បានយល់ថាការចូលរួមពិតជាមានតម្លៃបានយល់ពីភាពអស្ចារ្យរបស់ខ្មែរពីដើម។

លោក ធឿន វុឌ្ឍី អ្នកជំនាញខាងវប្បធម៌បន្តថា« អ្នកចូលរួមដើរព្រៃនៅតំបន់អង្ករកន្លងទៅ ភាគច្រើនជាអ្នកធ្វើធុរកិច្ចនៅក្នុងស្រុក ហើយនៅកម្មវិធីដើរព្រៃលើកទី៥នេះរំពឹងថានិងទទួលបានអ្នកធ្វើធុរកិច្ចក្នុងស្រុកច្រើនថែមទៀតនិងអ្នកទេសចរបរទេសមួយចំនួនផ្សេងទៀតផងដែរ»។

លោក វ៉ាត់ សាវឿង ប្រធានសភាយុវពាណិជ្ជករអន្តរជាតិកម្ពុជា ខេត្តសៀមរាប និងជាសហស្ថាបនិកក្រុមហ៊ុនទេសចរណ៍ មរតក អៅដរ ខេត្តសៀមរាបបានឱ្យដឹងថា «វនយាត្រាលើកទី៥» ជាកម្មវិធីសំខាន់ប្រចាំ២០២៣ ហើយធ្វើឡើងមានគោលបំណងសំខាន់ៗ ចំនួន៤៖១)-ផ្សារភ្ជាប់ខ្លួនយើងជាមួយនឹងធម្មជាតិឡើងវិញ តាមរយៈការយល់ដឹងពីសារៈសំខាន់នៃព្រៃឈើនិងជីវិត។២)-អនុវត្តយោគៈ និងបដិបត្តិសមាធិដើម្បីបង្កើនថាមពលផ្លូវកាយនិងផ្លូវចិត្តក្នុងព្រៃនៃទីក្រុងអង្គរបុរាណ។៣)-កម្ចាត់ភាពតប់ប្រមល់ ជំងឺស្ត្រេស ជំងឺបាក់ទឹកចិត្តនិងថប់បារម្ភ តាមរយៈការផ្សារភ្ជាប់ជាមួយធម្មជាតិនិង៤)-លើកកម្ពស់ និងចូលរួមផ្សព្វផ្សាយពីសារៈសំខាន់នៃការដើរព្រៃ ព្រមទាំងសិក្សាឈ្វេងយល់វប្បធម៌ប្រវត្តិសាស្ត្រ អង្គរនៃចក្រភពខ្មែរដ៏រុងរឿងនាអតីតកាល។

បើតាមប្រធានសភាយុវពាណិជ្ជករអន្តរជាតិកម្ពុជាខេត្តសៀមរាប  កម្មវិធីនេះ នឹងមានការចូលរួមពីថ្នាក់ដឹកនាំខេត្ត ថ្នាក់ដឹកនាំអាជ្ញាធរជាតិអប្សរាថ្នាក់ដឹកនាំជាតិ នៃ ចេ ស៊ី អាយ កម្ពុជា ថ្នាក់ដឹកនាំនិងសមាជិក ចេ ស៊ី អាយ កម្ពុជា សៀមរាប ស្ថាប័នពាក់ព័ន្ធ។ ជាពិសេស អ្នកចូលរួមនឹងបានជួបជាមួយអ្នកជំនាញផ្នែកយោគៈ ,សមាធិ ព្រមទាំងអ្នកជំនាញ ផ្នែកវប្បធម៌ ប្រវត្តិសាស្ត្រ លើទឹកដីអង្គរដ៏អស្ចារ្យ។

អ្នកចូលរួមកំណត់ចំនួនត្រឹមតែ២០០នាក់ប៉ុណ្ណោះសម្រាប់តម្លៃនៃការចូលរួមគឺចុះឈ្មោះជាក្រុមចាប់ពី១០នាក់ឡើងទៅនឹងទទួលបានតម្លៃពិសេស ២៥ ដុល្លារក្នុងមួយនាក់ ចុះឈ្មោះមុនគេ បង់ថ្លៃ ៣០ ដុល្លារ ចុះឈ្មោះធម្មតា ត្រូវបង់ថ្លៃ ៣៥ ដុល្លារ ជាមួយគ្នានេះ សភាយុវពាណិជ្ជករអន្តរជាតិកម្ពុជា ខេត្តសៀមរាប នឹងផ្តល់ជូនអាហារពេលព្រឹកនិងថ្ងៃត្រង់ព្រមទាំងភេសជ្ជៈរួមជាមួយនឹងរថយន្តដឹកជញ្ជូនពីសួនច្បារព្រះរាជដំណាក់ក្រុងសៀមរាប ទៅកាន់ទីតាំងរមណីយដ្ឋានអង្គរ៕ អត្ថបទ៖សារេត

The post ការដើរព្រៃនៅតំបន់អង្គរជួយឱ្យអ្នកធ្វើធុរកិច្ចក្នុងស្រុកដឹងកាន់តែច្បាស់ពីវីរៈភាពនៃមហាក្សត្រខ្មែរពីមុនៗ appeared first on .

លោក ធឿន វុឌ្ឍី មគ្គុទេ បានឱ្យដឹងថា វិធានការបន្ថែម សម្រាប់បន្តគ្រប់គ្រងផលប៉ះពាល់ និងគាំទ្រការងើបឡើងវិញនៃវិស័យទេសចរណ៍នៅព្រះរាជាណាចក្រកម្ពុជានេះ ជាការលើកទឹកចិត្តបន្ថែមដោយសារតែអ្នកប្រកបអាជីវកម្មនៅក្នុងវិស័យទេសចរណ៍ ពេលខ្លះពួកគាត់បានរៀបចំដំណើរការឡើងវិញ អ្នកខ្លះមិនទាន់បានរៀបចំខ្លួន ហើយអ្នកខ្លះទៀតនៅរងចំាមើលភ្ញៀវចូលមកកម្ពុជា។ រាជរដ្ឋាភិបាលបានលើកលែង៣ខែបន្ថែមនេះជាការផ្តល់ឱកាសមួយដ៏ល្អសម្រាប់អ្នកដែលមិនទាន់បានរៀបចំអាជីវកម្មរបស់ខ្លួនឡើងវិញឱ្យពួកគាត់បានរៀបចំដើម្បីទទួលភ្ញៀវទេសចរដែលនឹងចូលមកទស្សនាកម្ពុជានៅពេលខាងមុខជាបន្តបន្ទាប់។

លោក ធឿ នវុឌ្ឍី មានប្រសាសន៍ថា«ជារួមខ្ញុំគិតថាវាជាឱកាសមួយដ៏ល្អ។ ជាក់ស្តែងរូបខ្ញុំនិងមិត្តភក្រ្ត័មគ្គុទេសទេសចរដទៃទៀតកាលពីជំងឺកូវីដ១៩រីករាលដាល យើងបានដាច់ឬផុតកំណត់អាជ្ញាប័ណ្ណអស់ហើយ ដែលទាមទារត្រូវបន្តតែបើមិនបន្តអាជ្ញាប័ណឡើងវិញ អាចត្រូវរងការពិន័យប្រាក់២លានរៀល។ ប៉ុន្តែក្រោយកូវីដ១៩ក្រសួងទេសចរណ៍ក៏ដូចជារាជរដ្ឋាភិបាលក៏បានលើកលែងឱ្យបន្តអាជ្ញាប័ណធ្វើអាជីវកម្មឡើងវិញ។ដូចនេះការលើកលែងរបស់រាជរដ្ឋាភិបាល៣ខែបន្តនេះខ្ញុំយល់ថាវាស្រដៀងគ្នាដែរ វាជាការលើកទឹកចិត្តដល់ផ្ទះសំណាក់ សណ្ឋាគារនិងភ្នាក់ងារទេសចរផ្សេងៗ គាត់មានពេលវេលាវែងគួរសមក្នុងការរៀបចំអ្វីៗដែលត្រៀមដំណើរការឡើងវិញ»។

លោកសង្កត់ធ្ងន់ថា«ការលើកលែង៣ខែបន្ថែមនេះ ខ្ញុំគិតថាវាមិនទាន់គ្រាប់គ្រាន់ទេ។ ប៉ុន្តែវាជាឱកាសមួយសមស្របសម្រាប់អ្នកដែលបានគិតគូរច្បាស់លាស់។តែសម្រាប់អ្នកដែលនៅរងចំាមើលហើយមើលទៀតសម្រាប់ពេលវេលា៣ខែនេះវាមិនទាន់គ្រប់ទេសម្រាប់ពួកគាត់។សម្រាប់ខ្ញុំផ្ទាល់ ដែលជាអ្នករស់នៅទីនេះយល់ថាយ៉ាងហោចណាស់ត្រូវការពេលវេលាកន្លះឆ្នាំឬ៦ខែទៀតទើបសមសម្រប»។

សេចក្ដីប្រកាសព័ត៌មានរបស់រាជរដ្ឋាភិបាលកម្ពុជា អំពីវិធានការបន្ថែម សម្រាប់បន្តគ្រប់គ្រងផលប៉ះពាល់ និងគាំទ្រការងើបឡើងវិញនៃវិស័យទេសចរណ៍នៅកម្ពុជា នាពេលថ្មីៗនេះ បានឱ្យដឹងថា កំណើននៃភ្ញៀវទេសចរអន្តរជាតិអាចនឹងនៅបន្តមានភាពយឺតយ៉ាវក្នុងរយៈពេលខ្លីទៅមធ្យមខាងមុខ ដោយសារភាពមិនប្រាកដប្រជានៃស្ថានភាពសេដ្ឋកិច្ចសកល ដែលបន្តចោទជាសម្ពាធដល់វិស័យទេសចរណ៍ក្នុងគោលដៅមួយចំនួន ដែលតែងតែអាស្រ័យលើភ្ញៀវទេសចរអន្តរជាតិ ។

បើតាមសេចក្តីណែនាំរបស់រាជរដ្ឋាភិបាលកម្ពុជាដដែលបានគូសបញ្ជាក់ថា ដោយពិនិត្យលើស្ថានភាពសង្គម-សេដ្ឋកិច្ច និងពាណិជ្ជកម្មទាំងក្នុងក្របខណ្ឌសកលលោក, តំបន់ និងក្នុងប្រទេស, រាជរដ្ឋាភិបាលសម្រេចដាក់ចេញនូវវិធានការបន្ថែមសម្រាប់បន្តគ្រប់គ្រងផលប៉ះពាល់ និងគាំទ្រការងើបឡើងវិញនៃវិស័យទេសចរណ៍ក្នុងកាលៈទេសៈប្រកបដោយភាពមិនប្រាកដប្រជានេះ ។ ក្នុងន័យនេះ ក្រោមកិច្ចសហការយ៉ាងទូលំទូលាយជាមួយវិស័យឯកជន និងក្រសួង ស្ថាប័នពាក់ព័ន្ធ រាជរដ្ឋាភិបាលសម្រេចដាក់ចេញនូវវិធានការបន្ថែមជូនវិស័យទេសចរណ៍ ៖១)-បន្តលើកលែងការបង់ពន្ធប្រចាំខែគ្រប់ប្រភេទ លើកលែងតែអាករលើតម្លៃបន្ថែម ចំពោះសណ្ឋាគារ, ផ្ទះសំណាក់, និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គ-នាយកដ្ឋានពន្ធដារ និងមានសកម្មភាពអាជីវកម្ម នៅខេត្តសៀមរាប សម្រាប់រយៈពេល ៣ ខែ គឺពីខែ មករា ដល់ខែ មីនា ឆ្នាំ ២០២៣ ។ អាជីវកម្មទាំងអស់នេះនៅតែមានកាតព្វកិច្ចដាក់លិខិតប្រកាសពន្ធអាករ និងប្រើប្រាស់ប្រព័ន្ធអនឡាញសម្រាប់ការគ្រប់គ្រងអាករលើតម្លៃបន្ថែម (E-VAT) ជារៀងរាល់ខែ ក្នុងអំឡុងពេលនេះ ។ ២)-បន្តផ្ដល់ការសម្របសម្រួលតាមរយៈការបង្កកតួលេខបំណុលត្រឹមចុងឆ្នាំ២០១៩ និងមិនគិតការពិន័យសម្រាប់ឆ្នាំ២០២៣ សម្រាប់វិស័យទេសចរណ៍ និង៣)- បន្តជំរុញអាជីវកម្មក្នុងវិស័យទេសចរណ៍ រៀបចំកម្មវិធីអភិវឌ្ឍន៍ជំនាញជូនដល់បុគ្គលិករបស់ខ្លួន ដោយខ្លួនឯង និងមានលទ្ធភាពស្នើសុំការគាំទ្រហិរញ្ញប្បទាន ពីសំណាក់គម្រោងមូលនិធិអភិវឌ្ឍន៍ជំនាញ (SDF) តាមការចាំបាច់ ។

ក្រសួង ស្ថាប័នពាក់ព័ន្ធទាំងអស់ ត្រូវអនុវត្តនូវសេចក្ដីណែនាំនេះ ទៅតាមសមត្ថកិច្ចរបស់ខ្លួន ឱ្យមានប្រសិទ្ធភាពខ្ពស់បំផុត ។រាជរដ្ឋាភិបាលនឹងបន្តតាមដានយ៉ាងខ្ជាប់ខ្ជួននូវស្ថានភាពនៃវិបត្តិនៃជំងឺកូវីដ-១៩ ជាពិសេសការប្រែប្រួលនិន្នាការតំបន់ និង សកលលើសង្គម-សេដ្ឋកិច្ច និងត្រៀមដាក់ចេញនូវវិធានការបន្ថែមទៀត សំដៅស្តារ និង ជំរុញកំណើនសេដ្ឋកិច្ចជាតិឡើងវិញ ប្រកបដោយភាពធន់, ចីរភាព និងបរិយាបន្ន ក្រោមក្របខណ្ឌយុទ្ធសាស្រ្ត និងកម្មវិធីស្តារ និងជំរុញកំណើនសេដ្ឋកិច្ចក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣ ៕ អត្ថបទ៖សារេត

The post មគ្គុទេសទេសចរក្នុងខេត្តសៀមរាប ចង់បានការលើកទឹកចិត្តពីរាជរដ្ឋាភិបាលច្រើនជាង៣ខែដើម្បីរៀបចំខ្លួនទទួលភ្ញៀវទេសចរឡើងវិញ appeared first on .