លើកឡើងលើបណ្តាញសង្គមហ្វេសប៊ុក នាថ្ងៃទី៥ ខែវិច្ឆិការ ឆ្នាំ២០២៥នេះ លោក យ៉ង សាំងកុមារ បានបញ្ជាក់ថា ជាមួយប្រជាជនប្រមាណ ១៧ លាននាក់ កម្ពុជាផលិតស្រូវបាន ១៤,៧ លានតោន ដែលជាបរិមាណខ្ពស់បំផុតក្នុងតំបន់បើគិតពីបរិមាណផលិតសម្រាប់ប្រជាជនម្នាក់ ដែលបង្ហាញពីសមត្ថភាពនិងការខិតខំប្រឹងប្រែងរបស់កសិករខ្មែរនិងស្ថាប័នពាក់ព័ន្ធ។ គិតចាប់ពីឆ្នាំ ២០២០ ដល់ ២០២៥ ការផលិតស្រូវកើនពីប្រមាណ ១១ លានតោនឡើងដល់ជិត ១៥ លានតោន កើនជិត ៤ លានតោន ហើយលើសពីតម្រូវការក្នុងស្រុកប្រមាណ ៧ លានតោន។

ជាមួយគ្នានេះ លោកបានគូសបញ្ជាក់ថា ត្រឹមខែតុលា ឆ្នាំ ២០២៥ យើងបានរួមគ្នាដោះស្រាយការប្រមូលផលនិងទីផ្សារបានប្រមាណ ៨ លានតោន ហើយនៅសល់ជាង ៦ លានតោនទៀត ត្រូវបន្តដោះស្រាយក្នុងខែ វិច្ឆិកា និងធ្នូ។ ក្នុងខែវិច្ឆិកាប៉ុណ្ណោះ ត្រូវប្រមូលផលស្រូវប្រមាណ ៤,៥ លានតោន ឬជាមធ្យមប្រមាណ ១៥ ម៉ឺនតោនក្នុងមួយថ្ងៃ។

បើតាមលោក យ៉ង សាំងកុមារ ក្នុងឆ្នាំនេះ រាជរដ្ឋាភិបាលបានបញ្ចេញ ហិរញ្ញប្បទានពិសេស ២ លើករួចហើយដោយសរុប ៥០ លានដុល្លារ ដើម្បីជួយគាំទ្រការប្រមូលទិញស្រូវពីកសិករ និងកំពុងរៀបចំបញ្ចេញបន្តទៀត ដើម្បីបង្កើនទុនរបស់រោងម៉ាស៊ីន។

ទន្ទឹមនឹងនេះ មានរោងម៉ាស៊ីនចុះសហការជាមួយក្រសួងកសិកម្មចំនួន ២៩ កំពុងសកម្មក្នុងការទិញស្រូវជាង ៦០ ម៉ឺនតោន សម្រាប់រដូវនេះ ដែលក្នុងនោះមានស្រូវ ផ្ការំដួលជាង ៤០ ម៉ឺនតោន ដោយតម្លៃទិញនៅវាលស្រែមិនទាប ១០០០ រៀលក្នុងមួយគីឡូក្រាម សម្រាប់ស្រូវគុណភាពល្អ។

គូសបញ្ជាក់ដែរថា កម្ពុជាបានបន្តដំណើរទៅមុខ ដោយស្មារតីសហការរបស់រដ្ឋាភិបាល អាជីវករស្រូវអង្ករ កសិករ និងប្រជារដ្ឋខ្មែរ ដើម្បីបង្កើនប្រាក់ចំណេញជូនកសិករនិងធានាការលូតលាស់ប្រកបដោយចីរភាពសម្រាប់វិស័យស្រូវអង្ករជាតិ។ នេះបើតាមគូសបញ្ជាក់បន្ថែមពីលោក យ៉ង សាំងកុមារ។

The post លោក យ៉ង សាំងកុមារ៖ ការផលិតស្រូវកើនពីប្រមាណ ១១ លានតោន ឡើងដល់ជិត ១៥ លានតោន appeared first on .

តាមរយៈសំណេរលើបណ្តាញសង្គមផ្លូវការនាព្រឹកថ្ងៃទី២៥ ខែសីហា ឆ្នាំ២០២៥ លោក យ៉ង សាំងកុមារ បានឱ្យដឹងថា បច្ចុប្បន្ន មានរោងម៉ាស៊ីនខ្នាតធំចំនួន១៩ បានចូលរួមសហការដើម្បីជួយដោះស្រាយបញ្ហាអត់ទីផ្សារ និងបញ្ហាតម្លៃ។ ក្រសួងកសិកម្ម បានសហការជាមួយ ធនាគារអភិវឌ្ឍន៍ជនបទ និងកសិកម្ម (ARDB) ផ្តល់ឥណទានពិសេសរបស់រាជរដ្ឋាភិបាលដល់រោងម៉ាស៊ីនទាំងនេះ ដើម្បីបង្កើនការទិញស្រូវឲ្យបានទាន់ពេលវេលា និងឆ្លើយតបតាមគោលដៅកំណត់ ជាមួយនឹងការជួយសហការសម្របសម្រួលនៅតាមវាលពីមន្រ្តីកសិកម្មឃុំ ខេត្តនិងថ្នាក់ជាតិ។

លោកបញ្ជាក់ថា ក្នុងឆ្នាំនេះយើងផលិតស្រូវលើសតម្រូវការក្នុងស្រុកជាង ៦ លានតោនសម្រាប់ការនាំចេញជាអង្ករនិងស្រូវទៅកាន់ទីផ្សារអន្តរជាតិដែលពោរពេញទៅដោយការប្រកួតប្រជែងតម្លៃនិងគុណភាព ជាពិសេសជាមួយឥណ្ឌា ថៃ និងវៀតណាមដែលគ្រប់គ្រងទីផ្សារពិភពលោក៧០ភាគរយ។ជាមធ្យមនៅខែសីហានេះការប្រមូលផលស្រូវនៅកម្ពុជាប្រមាណ ៤០០០០ តោនក្នុងមួយថ្ងៃ។

បើតាមលោករដ្ឋលេខាធិការក្រសួងកសិកម្ម រាជរដ្ឋាភិបាលមិនទុកឲ្យកសិករអត់ទីផ្សារ និងសម្របសម្រួលឲ្យទាំងភាគីកសិករនិងរោងម៉ាស៊ីនទទួលបានតម្លៃសមរម្យដើម្បីរក្សានូវសមត្ថភាពប្រកួតប្រជែង ជីវភាពកសិករ និង និរន្តរភាពវិស័យស្រូវអង្កររបស់ជាតិ។

តាមរបាយការណ៍អគ្គនាយកដ្ឋានកសិកម្មបានបង្ហាញថា រយៈពេល៧ខែឆ្នាំ២០២៥ ការប៉ាន់ស្មានតម្លៃគិតជាទឹកប្រាក់ ដែលកម្ពុជាទទួលបានពីការនាំចេញផលិតផលដំណាំមានជាង៣ ១៨៣ លានដុល្លារ ក្នុងនោះតម្លៃពីការនាំចេញស្រូវមានជាង៧៧៨ លានដុល្លារ និងតម្លៃពីការនាំចេញអង្ករមានជាង ៣៣៩ លានដុល្លារ៕

The post លោក យ៉ង សាំងកុមារ៖ ក្នុងឆ្នាំនេះកម្ពុជាផលិតស្រូវលើសតម្រូវក្នុងស្រុកជាង ៦ លានតោនសម្រាប់ការនាំចេញ appeared first on .

ជាមួយគ្នានេះ លោកឯកអគ្គរដ្ឋទូត បានបង្ហាញការជឿជាក់ថាទុរេនខ្មែរឆ្ងាញ់កាន់តែច្រើននឹងត្រូវនាំចេញទៅកាន់ប្រទេសចិននាពេលអនាគតផងដែរ។

យោងតាមសារលើទំព័រហ្វេសប៊ុកផ្លូវការរបស់លោក វ៉ាង វិនពីន កាលពីថ្ងៃទី១០ ខែឧសភា ឆ្នាំ២០២៥ បានឱ្យដឹងយ៉ាងដូច្នេះថា៖ «ខ្ញុំរីករាយដែលបានមកលេងចម្ការទុរេនកំពត និងភ្លក្សទុរេនអៅខាក់ ដែលជាទុរេនឆ្ងាញ់ជាងគេលើពិភពលោក។ សូមអរគុណដល់សមាគមសហគ្រិនវ័យក្មេងកម្ពុជា (YEAC) សម្រាប់ការទទួលស្វាគមន៍យ៉ាងកក់ក្តៅ។ ជឿជាក់ថាទុរេនខ្មែរឆ្ងាញ់កាន់តែច្រើននឹងត្រូវនាំចេញទៅកាន់ប្រទេសចិននាពេលអនាគត»។

បើតាមលោក យ៉ង សាំងកុមារ រដ្ឋលេខធិការក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា តំបន់ដាំទុរេនច្រើននៅកម្ពុជាមានចំនួនជាង ១០០ ឃុំនៃខេត្តចំនួន ១៣។ មន្រ្តីកសិកម្មឃុំទាំង ១០៧ ឃុំកំពុងធ្វើបច្ចុប្បន្នភាពផលិតកម្មទុរេនដោយស្រង់ស្ថិតិគ្រួសារដាំទុរេន ទំហំផ្ទៃដី ចំនួនដើមទុរេន និងពូជកសិករនិយមដាំទៅតាមតំបន់នីមួយៗ និងរៀបចំផែនការកសាងសហគមន៍ទុរេននៅគ្រប់តំបន់ ដើម្បីការពារអត្តសញ្ញាណទុរេនតំបន់នីមួយៗ និងជួយជំរុញទីផ្សារទុរេនមកពីតំបន់នីមួយៗដូចជាទុរេនមេមត់ ទុរេនសំឡូត ទុរេនកំពត ទុរេនវាលវែង ទុរេនស្រែអំបិល ទុរេនស្ទឹងត្រង់ ទុរេនកំពង់សិលា ទុរេនប៊ូស្រា ទុរេនស្ទឹងត្រែង ទុរេនរតនគីរី ទុរេនព្រះវិហារ។ល។

លោកបន្តថា ក្នុងចំណោមស្រុកទាំងអស់ ស្រុកមេមត់ ស្រុកសំឡូត ស្រុកទឹកឈូរ ស្រុកស្ទឹងត្រង់ ស្រុកឈូក ស្រុកកំពង់សិលា និងស្រុកស្រែអំបិល អាចជាស្រុកឈានមុខគេខាងផលិតកម្មទុរេន៕

The post ឯកអគ្គរដ្ឋទូតចិន ជឿជាក់ថាទុរេនខ្មែរឆ្ងាញ់កាន់តែច្រើននឹងត្រូវនាំចេញទៅកាន់ប្រទេសចិននាពេលអនាគត appeared first on .

លើទំព័រហ្វេសប៊ុកផ្លូវការរបស់លោក យ៉ង សាំងកុមារ កាលពីថ្ងៃទី១៨ ខែធ្នូ ឆ្នាំ២០២៤​ លោកថា ផលិតកម្មនិងទីផ្សារស្រូវអង្ករកម្ពុជាឆ្នាំ ២០២៤ ត្រូវបានដោះស្រាយបានជាង ៩០ ភាគរយ នៅសល់តែស្រូវចុងរដូវជាង ៥ភាគរយទៀតនោះទេ។បើសរុបនៅឆ្នាំ ២០២៤ កម្ពុជាប្រមូលផលស្រូវប្រមាណ ១៣ លានតោន លើសឆ្នាំមុនប្រមាណកន្លះលានតោន និងលើសកាលពី៥ឆ្នាំមុនប្រមាណ ៣ លានតោន។ ជាទូទៅ កម្ពុជាផលិតស្រូវលើសពីតំរូវការក្នុងស្រុកប្រមាណ ៥០ ភាគរយ ឬប្រមាណ ៦លានតោន។

លោកបន្តថា នេះជាជោគជ័យដ៏ធំមួយផ្នែកផលិតកម្មស្រូវក្នុងការធានាបាននូវសន្តិសុខស្បៀងជូនជាតិនិងចូលរួមចំណែកដល់សេដ្ឋកិច្ចជាតិ តាមរយៈការនាំចេញស្រូវអង្ករក្នុងបរិមាណជាមធ្យម ៦ លានតោនស្រូវមួយឆ្នាំ (គណនាជាស្រូវ)។

បើតាមមន្រ្តីជាន់ខ្ពស់កសិកម្មរូបនេះ គិតមកដល់ដើមខែធ្នូ ២០២៤ នេះ នៅទូទាំងប្រទេសយើងប្រមូលផលសរុបបានជាង ១២ លានតោនឬស្មើនឹងជាង ៩០ ភាគរយ នៃបរិមាណផលត្រូវប្រមូលសរុប។ ជាទូទៅកសិករទទួលបានតម្លៃសមរម្យជាពិសេសស្រូវផ្ការំដួល សុម៉ាលី សែនក្រអូប និងស្រង៉ែ ដែលជាពពួកស្រូវមានតំរូវការខ្ពស់សម្រាប់ការនាំចេញ ដែលតម្លៃស្រូវផ្ការំដួលនៅតាមវាលជាមធ្យមចន្លោះពី ១២៥០ ទៅ ១៣០០ រៀលមួយគីឡូ។

សូមបញ្ជាក់ថា បច្ចុប្បន្នប្រជាកសិករកំពុងប្រមូលផលស្រូវចុងរដូវ (Late season rice) ដែលជាប្រភេទស្រូវធ្ងន់ដែលនៅសល់ប្រមាណកន្លះលានតោនទៀត ឬប្រមាណ ៥ភាគរយ នៃផលសរុបប្រចាំឆ្នាំ ២០២៤។

ចំពោះស្រូវធ្ងន់មានតំរូវការទីផ្សារក្នុងស្រុក តែមិនសូវមានតំរូវការនាំចេញទេ ដោយសារភាគច្រើនស្រូវនេះបាយមិនសូវទន់ គ្រាប់រាងខ្លី  តែចំពោះទីផ្សារអង្ករកម្ពុជានៅក្រៅប្រទេសគេនិយមអង្ករគ្រាប់វែង មានគុណភាពក្រអូប និងបាយទន់។

តែទោះជាយ៉ាងណាក៏ដោយ ក៏ក្រសួងកសិកម្ម សហព័ន្ធស្រួវអង្ករ និងធនាគារ ARDB បន្តយកចិត្តទុកដាក់ជួយដោះស្រាយបញ្ហាទីផ្សារនិងតម្លៃស្រូវធ្ងន់ឬស្រូវចុងរដូវជូនកសិករយើងដោយសហការជាមួយរោងម៉ាស៊ីនធំៗចំនួន ១៤ និងរោងម៉ាស៊ីនដែលកិនស្រូវលក់ក្នុងស្រុកផ្សេងទៀតក្នុងការប្រមូលទិញស្រូវធ្ងន់ក្នុងតម្លៃនៅរោងម៉ាស៊ីនចាប់ពី ៩០០ រៀលក្នុងមួយគីឡូ៕(នេះជាការបញ្ជាក់បន្ថែមរបស់លោក យ៉ង សាំងកុមារ)

The post ឆ្នាំ ២០២៤ កម្ពុជាប្រមូលផលស្រូវប្រមាណ ១៣ លានតោន លើសឆ្នាំមុនប្រមាណកន្លះលានតោន appeared first on .

លើកឡើងលើទំព័រហ្វេសប៊ុកផ្ទាល់ខ្លួននៅថ្ងៃទី១១ ខែកញ្ញា ឆ្នាំ២០២៤នេះ លោក យ៉ង សាំងកុមារ បានបញ្ជាក់ថា ទីផ្សារនិងតម្លៃស្រូវនាពេលបច្ចុប្បន្ននេះ ស្រូវសែនក្រអូបដែលជាស្រូវរបស់ខ្មែរមានតម្លៃល្អ (ជាមធ្យម ១៤០០ រៀលក្នុងមួយគីឡូ) គឺខ្ពស់ជាងឆ្នាំកន្លងមក ហើយមានតម្រូវការច្រើនសម្រាប់ការកែច្នៃជាអង្ករនាំចេញដោយរោងម៉ាស៊ីនក្នុងស្រុក។ស្រូវស្រងែ ជាមធ្យម ១ ២៨០ រៀលក្នុងមួយគីឡូ) ដែលជាពូជស្រូវក្នុងស្រុកក៏មានតម្លៃខ្ពស់ដែរបើធៀបទៅឆ្នាំកន្លងមក តែតម្រូវការនៅតិចជាងសែនក្រអូប។

ចំណែកតម្លៃស្រូវ OM5451 ( ជាមធ្យម ៩៥០ រៀលមួយគីឡូ) មានការថយចុះបើធៀបទៅនឹង ២០២៣ តែនៅខ្ពស់ជាងឆ្នាំ ២០២០ , ២០២១ (ធ្លាប់ធ្លាក់ដល់ជាមធ្យម ៧៧០ រៀលមួយគីឡូ) និង ២០២២ ហើយតម្រូវការក្នុងស្រុកតិចជាងស្រូវសែនក្រអូប និងស្រងែ។ភាគច្រើនស្រូវនេះនាំទៅវៀតណាម។

ជាមួយគ្នានោះ លោក យ៉ង សាំងកុមារ ក៏បានលើកទឹកចិត្តឱ្យកសិករផលិតស្រូវពូជសែនក្រអូប ដើម្បីឆ្លើយតបតម្រូវការទីផ្សារក្នុងស្រុក មានទីផ្សារ និងតម្លៃមានស្ថេរភាពល្អ។

លោកបន្តថា ម្យាងវិញទៀត ការចងក្រងគ្នាជាសហគមន៍កសិកម្មទំនើបនឹងបង្ករភាពងាយស្រួលដល់ក្រសួងកសិកម្មជួយដោះស្រាយបញ្ហាទីផ្សារនិងរក្សាស្ថេរភាពថ្លៃស្រូវជូនកសិករ។

គួរបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ ក៏បានជំរុញឱ្យប្រជាកសិករ ឱ្យងាកមកដាំពូជស្រូវសែនក្រអូប០១ផងដែរ ដោយសារពូជនេះ ផ្ដល់ទិន្នផលខ្ពស់ និងមានតម្លៃខ្ពស់នៅលើទីផ្សារជាតិ និងអន្តរជាតិ។ លើសពីនេះ វាជាពូជស្រូវស្រាល មិនប្រកាន់រដូវ និងអាចដាំដុះបាន ២-៣ដងក្នុងមួយឆ្នាំ ជាពិសេស រោងម៉ាស៊ីនកិនស្រូវ និងសហព័ន្ធស្រូវអង្ករ បានប្ដេជ្ញាចិត្តលើកកម្ពស់ពូជស្រូវនេះ នៅលើទីផ្សារទាំងជាតិ និងអន្ដរជាតិ ដោយទទួលទិញពីប្រជាកសិករ ក្នុងតម្លៃខ្ពស់ជាងពូជផ្សេងៗ៕

The post លោក យ៉ង សាំងកុមារ៖ ស្រូវសែនក្រអូបមានតម្រូវការច្រើនសម្រាប់ការកែច្នៃជាអង្ករនាំចេញដោយរោងម៉ាស៊ីនក្នុងស្រុក appeared first on .

លោករដ្ឋលេខាធិការបានមានប្រសាសន៍ថា៖« នេះជាមោទនភាពជាតិមួយរបស់ប្រជាជននិងប្រទេសកម្ពុជា។»។
ឯកឧត្តមរដ្ឋលេខាធិការបានឱ្យដឹងថា៖ផលិតកម្មស្រូវបានកើនឡើងខ្លាំងក្នុងរយៈពេលជាង ១០ ឆ្នាំចុងក្រោយនេះតាមរយៈការបង្កើនទិន្នផល និងកំណើនផ្ទៃដីដាំដុះបាន២ទៅ៣ដង។

លោក យ៉ង សាំងកុមារ បានបញ្ជាក់ផងដែរថា នៅឆ្នាំ១៩៧៩ កម្ពុជាផលិតស្រូវបាន ៥៦៥ ០០០ តោន ឬជាងកន្លះលានតោន កើនឡើងដល់ ២,៥ លានតោននៅឆ្នាំ១៩៩០។នៅឆ្នាំ ២០២០ ផលិតកម្មស្រូវកើនលើស១០ លានតោន គឺស្មើនឹង ១០,៨៨លានតោន។

លោកបានបន្តថា ជាទូទៅកម្ពុជានៅមានសក្តានុពលបង្កើនផលិតកម្មស្រូវបានច្រើនថែមទៀតតាមរយៈការបង្កើនទិន្នផលស្រូវវស្សា និងបង្កើនផ្ទៃដីដាំដុះបាន២ ដង។តែជាគោលដៅយុទ្ធសាស្រ្តយើងផ្តោតលើការកាត់បន្ថយថ្លៃដើម បង្កើនការផលិតស្រូវដែលមានគុណភាពខ្ពស់ និង បង្កើនការសហការគ្នារវាងកសិករតាមគោលការណ៍សហគមន៍កសិកម្មទំនើបដើម្បីផ្តល់ឱកាសឲ្យកសិករបង្កើនប្រាក់ចំណេញពីការធ្វើស្រែ។

សូមបញ្ជាក់ថា រយៈពេល៦ខែ ឆ្នាំ២០២៤ ប្រទេសកម្ពុជា បាននាំចេញស្រូវចំនួន ២,៥២៨,០១១តោនស្រូវសើម ដោយគិតជាទឹកប្រាក់បានប៉ាន់ប្រមាណជាង ៧២៧.៣៦ លានដុល្លារសហរដ្ឋអាមេរិក ដែលក្នុងនោះ ៧៥% បាននាំចេញដោយឆ្លងកាត់ការស្នើសុំការបញ្ជាក់ឯកសារនាំចេញ ពីអាជ្ញាធរមានសមត្ថកិច្ច៕នេះបើតាមសហព័ន្ធស្រូវអង្ករកម្ពុជា

The post កម្ពុជាផលិតស្រូវជាង១២លានតោនក្នុង១ឆ្នាំ ជាប់លេខរៀងទី៩លើពិភពលោកជាប្រទេសសំខាន់ធានាសន្តិសុខស្បៀង appeared first on .

តើគម្រោងជីកព្រែកហ្វូណនតេជោ ដែលជាគម្រោងប្រវត្តិសាស្រ្តនៅកម្ពុជានេះ នឹងនាំមកនូវផលប្រយោជន៍អ្វីខ្លះដល់វិស័យកសិកម្ម និងសង្គមជាតិកម្ពុជាទាំងមូល?

លោក យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងតាមរយៈបណ្តាញតេលេក្រាមផ្លូវការនៅថ្ងៃទី៥ សីហាថា លោកបានចាត់ទុកការផ្តួចផ្តើមគម្រោងកសាងព្រែកជីកហ្វូណនតេជោ ជាស្នាដៃប្រវត្តិសាស្រ្តថ្មីមួយទៀតរបស់សម្តេចតេជោ ដែលជាការកសាងប្រព័ន្ធដឹកជញ្ជូនផ្លូវទឹកដ៏ធំមួយរបស់ជាតិផ្សារភ្ជាប់ជាមួយប្រព័ន្ធដឹកជញ្ជូនផ្លូវសមុទ្រអន្តរជាតិឱ្យក្លាយជាសរសៃឈាមរស់រវើក និងជាកម្លាំងចលករនៃកំណើនសេដ្ឋកិច្ចជាតិរួមទាំងវិស័យកសិកម្មផង និងធានាបានអធិបតេយ្យជាតិក្នុងវិស័យដឹកជញ្ជូននិងពាណិជ្ជកម្មអន្តរជាតិផង។

លោកបន្តថា សម្រាប់វិស័យកសិកម្ម ព្រែកជីកហ្វូណនតេជោនឹងជំរុញផលិតភាពកសិកម្មនៅតំបន់ភាគខាងត្បូង និងតំបន់និរតីនៃប្រទេសកម្ពុជា ព្រមទាំងនាំមកនូវភាពរីកចម្រើននៃការធ្វើពាណិជ្ជកម្មកសិកម្មនៅទូទាំងប្រទេស ដែលជាកម្លាំងចលករនៃការរីកចម្រើនសេដ្ឋកិច្ចរបស់កម្ពុជា រួមមាន៖
១, តំបន់កសិកម្មសំខាន់ៗរបស់កម្ពុជា ស្ថិតនៅជាប់តាមប្រព័ន្ធទន្លេមេគង្គ ទន្លេសាប និងទន្លេបាសាក់ដែលងាយស្រួលប្រមូលផ្តុំសម្រាប់ការដឹកជញ្ជូន។
២, កម្ពុជាកំពុងបង្កើនការផលិតកសិផលសម្រាប់នាំចេញ ជាពិសេសស្រូវអង្ករ ដំឡូងមី ស្វាយចន្ទី កៅស៊ូ និងស្វាយ។ល។ដែលត្រូវការប្រព័ន្ធដឹកជញ្ជូនដែលអាចដឹកបានបរិមាណច្រើន ក្នុងពេលតែមួយ និងចំណាយទាប ដែលជាកត្តាអំណោយផលដល់ការពង្រីកទីផ្សារ។
៣, ការដឹកជញ្ជូនទៅកំពង់ផែសមុទ្ររបស់កម្ពុជាផ្ទាល់នាំមកនូវការកាត់បន្ថយពេលវេលា ភាពស្មុគស្មាញនៃនីតិវិធីប្រទេសគេ និងការចំណាយបន្ថែមនានា។
៤, ព្រែកជីកហ្វូណននឹងបង្កើនសមត្ថភាពស្រោចស្រពបន្ថែម ហើយបង្កលក្ខខណ្ឌអំណោយផលដល់វិស័យកសិកម្ម វារីវប្បកម្ម និងការចិញ្ចឹមសត្វ។ល។
៥, ក្រៅពីនេះព្រែកជីកហ្វូណនតេជោនឹងជួយកាត់បន្ថយបញ្ហាទឹកជំនន់ និងគ្រោះរាំងស្ងួត ដែលធ្វើឱ្យវិស័យកសិកម្ម កាន់តែមានភាពធន់។

លោក យ៉ង សាំងកុមារ បានគូសបញ្ជាក់បន្ថែមថា ភាពងាយស្រួលក្នុងការដឹកជញ្ជូននិងចំណាយតិចលើការដឹកជញ្ជូនតាមរយៈគម្រោងព្រែកជីកហ្វូណនតេជោដែលភ្ជាប់ជាមួយប្រព័ន្ធដឹកជញ្ជូនផ្លូវទឹកកម្ពុជាទាំងមូលនឹងបង្កើនសមត្ថភាពប្រកួតប្រជែងក្នុងការនាំចេញកសិផល និងជួយឱ្យមានកំណើននៃការនាំចេញកសិផលផ្ទាល់ទៅប្រទេសនានាលើពិភពលោក។ កំណើននៃផលិតកម្ម និងប្រាក់ចំណូលពីការនាំចេញកសិផលនឹងជួយជំរុញនូវភាពរីកចម្រើនផ្នែកសេដ្ឋកិច្ច ការងារ និងប្រាក់ចំណូលសម្រាប់ប្រជាកសិករ និងសង្គមជាតិទាំងមូល។

លើសនេះព្រែកជីកហ្វូណននឹងនាំមកនូវភាពរីកចម្រើនបន្ថែមនៃវិស័យទេសចរណ៍ កាត់បន្ថយសម្ពាធចរាចរណ៍ផ្លូវគោក និងជួយដល់បរិស្ថានដោយការដឹកជញ្ជូនផ្លូវទឹកបញ្ចេញនូវឧស្ម័ន្ធផ្ទះកញ្ចក់ទាបជាងការដឹកជញ្ជូនតាមផ្លូវគោក។

សូមបញ្ជាក់ថា គម្រោងព្រែកជីកហ្វូណនតេជោ គឺជាគម្រោងប្រវត្តិសាស្រ្តលើកទីមួយ ក្នុងវិស័យដឹកជញ្ជូនផ្លូវទឹករបស់កម្ពុជា ដែលតភ្ជាប់ផ្លូវទឹកពីទន្លេកម្ពុជាទៅសមុទ្រដោយផ្ទាល់។គម្រោងនេះ មានប្រវែង១៨០គីឡូម៉ែត្រ ទទឹងខាងលើ ១០០ម៉ែត្រ ទទឹងខាងក្រោម ៨០ម៉ែត្រ និងជម្រៅ ៥,៤ម៉ែត្រ ចាប់ផ្តើមពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ស្រុកកោះធំ និងបន្តរហូតដល់សមុទ្រខេត្តកែប ។

គម្រោងនេះ ឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុប ១.៦លាននាក់ រស់នៅអមសងខាងផ្លូវទឹកនេះ។គម្រោងនេះ នឹងត្រូវចំណាយទុនប្រមាណ១៧០០លានដុល្លារ និងចំណាយពេលសាងសង់ រយៈពេល៤ឆ្នាំ៕

The post តើព្រែកជីកហ្វូណនតេជោនាំមកនូវផលប្រយោជន៍អ្វីខ្លះដល់វិស័យកសិកម្ម និងសង្គមជាតិកម្ពុជាទាំងមូល? appeared first on .

លោក យ៉ង សំាង កុមារ រដ្ឋលេខាធិការក្រសួង កសិកម្មរុក្ខាប្រមាញ់ និងនេសាទ មានប្រសាសន៍ថា «ការបណ្តុះបណ្តាលតម្រង់ទិសដល់ដល់មន្ត្រីកសិកម្មឃុំ២៥០នាក់នឹងបញ្ចប់នៅថ្ងៃទី១៦ខែកុម្ភៈឆ្នំា២០២៤ ហើយដល់ថ្ងៃទី១៩គាត់នឹងចុះទៅធ្វើការនៅតាមឃុំគោលដៅដែលបានជ្រើសរើស ហើយនៅក្នុងពេលនោះនឹងមានការណែនាំតាមខេត្ត តាមរយៈមន្ទីរកសិកម្មនៅខេត្ត ស្រុក ឃុំ ហើយបន្ទាប់មកនឹងមានការប្រជុំនៅតាមភូមិ ក្នុងគោលបំណងធ្វើយ៉ាងម៉េចឱ្យអ្នកពាក់ព័ន្ធទំាងអស់រួមទំាងកសិករបានដឹងអំពីវត្តមានរបស់ មន្ត្រីកសិកម្ម យល់ពីតួនាទី នឹងការទទួលខុសត្រូវរបស់មន្ត្រីកសិកម្ម ហើយចូលរួមជាមួយគាត់ដើម្បីអនុវត្តការងារឱ្យទទួលបានជោគជ័យ»។

លោកថា បេសកម្មរបស់មន្ត្រីកសិកម្មឃុំចំនួន២៥០នាក់នេះ គឺគាំទ្រដល់កសិករដើម្បីបង្កើននូវប្រាក់ចំណូលពីការប្រកបមុខរបរធ្វើកសិកម្ម។ ក្នុងន័យបង្កើនការផលិត គ្រប់គ្រងថ្លៃដើមនិងធ្វើយ៉ាងម៉េចឱ្យកសិករមានទីផ្សារអាចលក់កសិផលរបស់គាត់បានតម្លៃសមរម្យ។ជារួមធ្វើយ៉ាងណាឱ្យប្រាក់ចំណូលរបស់ប្រជាកសិករកើនឡើង ហើយធានាបាននៅសន្តិសុខស្បៀងសម្រាប់គ្រួសារកសិករ ក៏ដូចជាសង្គមជាតិទំាងមូល។

លោកសង្កត់ធ្ងន់ថា «យើងរំពឹងថា ចំនួនប្រជាកសិករដែលនៅបន្តប្រកបការងារកសិកម្មនឹងទទួលបានជោគជ័យ។ ភាពជោគជ័យនេះបង្ហាញតាមរយៈប្រាក់ចំណូលយកមកទ្រទ្រង់សេដ្ឋកិច្ចគ្រួសារ ការកើនឡើងនៃផលិតកម្ម ចូលរួមចំណែករក្សាដល់សន្តិសុខស្បៀងសម្រាប់ប្រទេសនិងសេដ្ឋកិច្ចជាតិទំាងមូល»។

ពាក់ព័ន្ធនឹងមន្ត្រីកសិកម្មឃុំសង្កាត់នេះ ឆ្នំា២០២៣រាជរដ្ឋាភិបាលជ្រើសរើស២៥០នាក់ ឆ្នំា២០២៤ជ្រើសរសើ៨០០នាក់និងឆ្នំា២០២៥ជ្រើសរើស៥៥០នាក់ សរុប១៦០០នាក់សម្រាប់ដាក់ពង្រាយនៅទូទំាងប្រទេស៕
តាកែវ

The post មន្ត្រីកសិកម្មឃុំ២៥០នាក់នឹងបញ្ជូនទៅបម្រើការងារនៅថ្ងៃទី១៩កុម្ភៈបន្ទាប់ពីទទួលការបណ្តុះបណ្តាលតម្រង់ទិស៤ថ្ងៃ appeared first on .

លោកបណ្ឌិត យ៉ង សំាងកុមារ រដ្ឋលេខាធិការក្រសួងកសិកម្មរុក្ខាប្រមាញ់និងនេសាទបានឱ្យដឹងថា ខ្ញុំបានចូលរួមជាមួយរាជរដ្ឋាភិបាលនៅខែធ្នូ២០២២ក្នុងបេសកកម្មចូលរួមអភិវឌ្ឍន៍កសិកម្មកម្ពុជាដោយចាប់ផ្តើមពីវិស័យស្រូវអង្ករ និងមានផែនការចូលរួមធ្វើការគាំទ្រកសិករឱ្យបាន១លានគ្រួសារនៅទូទាំងប្រទេសដើម្បីលើកស្ទួយផលិតកម្មកសិកម្មនិងប្រាក់ចំណូល។

យោងតាមបណ្តាញទំនាក់ទំនងសង្គមផ្លូវការរបស់លោក បណ្ឌិត យ៉ង សំាងកុមារ បានឱ្យដឹងថា សម្រាប់រាជរដ្ឋាភិបាលអាណត្តិថ្មីនេះខ្ញុំត្រូវធ្វើការជ្រើសរើសរវាងតំណែងរដ្ឋមន្ត្រីប្រតិភូអមនាយករដ្ឋមន្ត្រីឬរដ្ឋលេខាធិការ។ពេលនេះខ្ញុំបានសម្រេចចិត្តជ្រើសរើសយកតំណែងជារដ្ឋលេខាធិការក្រសួងកសិកម្មរុក្ខាប្រមាញ់និងនេសាទដើម្បីចូលរួមប្រឡូកផ្ទាល់ក្នុងការអនុវត្តគោលនយោបាយអាទិភាពរបស់រាជរដ្ឋាភិបាល គឺអាទិភាពទី៥ និងទី៦ដែលជាកម្មវិធីគោលនយោបាយកសិកម្ម។១- ការដាក់ចេញនូវយន្តការសម្របសម្រួលនិងកម្មវិធីហិរញ្ញប្បទានសំដៅលើកស្ទួយផលិតកម្ម រកទីផ្សារ និងរក្សាលំនឹងថ្លៃកសិផលសំខាន់ៗក្នុងកំរិតសមរម្យនិង២-ការដាក់ពង្រាយមន្រ្តីបច្ចេកទេសកសិកម្មទៅគ្រប់ឃុំសង្កាត់ដែលមានសកម្មភាពកសិកម្មនៅទូទាំងប្រទេសនិងការរៀបចំឱ្យមានសមាគមកសិករនៅតាមជនបទ។

លោកបណ្ឌិត សង្កត់ធ្ងន់ថា«យើងមានផែនការដាក់ពង្រាយមន្រ្តីជំនាញកសិកម្មចំនួន១៦០០ នាក់នៅទូទាំងប្រទេសដើម្បីធ្វើការជាមួយកសិករជាង១លានគ្រួសារ។ខ្ញុំនឹងខិតខំចូលរួមជាមួយឯកឧត្តមរដ្ឋមន្រ្តីលោក ឌិត ទីណា និងថ្នាក់ដឹកនាំក្រសួងទាំងអស់ក្នងការដឹកនាំអនុវត្តន៍កម្មវិធីគោលនយោបាយទាំង២ខាងលើនេះឱ្យបានជោគជ័យដើម្បីវិស័យកសិកម្ម ជីវភាពកសិករ និងសន្តិសុខស្បៀងសម្រាប់សង្គមជាតិយើងទាំងមូល»៕

អត្ថបទ៖សារេត

The post បណ្ឌិត យ៉ង សំាងកុមារ ជ្រើសយកតំណែងដែលមានឱកាសចូលរួមគាំទ្រកសិករ១លានគ្រួសារដើម្បីលើកស្ទួយផលិតផលកសិកម្មនិងប្រាក់ចំណូល appeared first on .