លោក វ៉ា វីរៈ នាយកក្រុមហ៊ុន Century 21 Fortuna Investment បានឱ្យដឹងថា ការបងើ្កតក្រុមការងារដោះស្រាយគម្រោងវិនិយោគអគារជាប់គាំងនៅខេត្តព្រះសីហនុ នេះជាយុទ្ធសាស្ត្រមួយរបស់រាជរដ្ឋាភិបាលដើម្បីជួយដោះស្រាយ និងជួយជំរុញទៅលើវិស័យអចលនទ្រព្យដែលបានជួបបញ្ហាអស់រយៈពេលជាច្រើនឆ្នាំ។

លោកបន្តថា« ការដោះស្រាយគម្រោងវិនិយោគជាប់គាំងនៅខេត្តព្រះសីហនុនេះ រាជរដ្ឋាភិបាលចង់ឱ្យមានការដោះស្រាយបានច្រើននៅក្នុងឆ្នាំ២០២៤នេះ ហើយបើការដោះស្រាយគម្រោងវិនិយោគអគារជាប់គាំងនេះបាននៅក្នុងរយៈពេលខ្លីបង្ហាញឱ្យឃើញនូវលទ្ធផលល្អ វានិងជះឥទ្ធិពលមកលើការវិនិយោគ វិស័យទេសចរណ៍ និងវិស័យអចលនទ្រព្យក្នុងព្រះរាជាណាចក្រកម្ពុជានាពេលខាងមុខ»។

ទាក់ទងជាមួយគម្រោងវិនិយោគជាប់គាំងនៅខេត្តព្រះសីហនុ បើយោងតាម លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុថ្មីៗនេះបញ្ជាក់ថា ចូលមកដល់ឆ្នាំ ២០១៦ ការវិនិយោគក្នុងខេត្តព្រះសីហនុមានការកើនឡើងយ៉ាងខ្លាំងនៅសំណង់អគារក្នុងខេត្តព្រះសីហនុ។ តែមកដល់ឆ្នាំ២០១៩ នៅពេលមានការវិវត្តទៅលើស្ថានភាពសង្គម-សេដ្ឋកិច្ច រួមមានការឆ្លងរាលដាលនៃជំងឺកូវីដ-១៩ និង បញ្ហាប្រឈមជាសកលផ្សេៗបានបណ្តាលឱ្យសំណង់អគារជាច្រើន ត្រូវបានផ្អាក ឬបញ្ឈប់ដំណើរការសាងសង់។

លោកបន្តថា អគារត្រូវបានផ្អាកដំណើរការសាងសង់នៅខេត្តព្រះសីហនុមានចំនួន ៣៦២ អាគារដែលត្រូវការទុនវិនិយោគបន្ថែម ប្រមាណ ១ ១៦១លានដុល្លារអាម៉េរិក សម្រាប់បញ្ចប់ការសាងសង់ ខណៈអគារពុំទាន់បានដាក់ដំណើរការប្រើប្រាស់មានចំនួន ១៧៦អគារ ។

យោងតាមរាជរដ្ឋាភិបាលនីតិកាលទី៧នៃរដ្ឋសភា សម្តេចធិបតី ហ៊ុន ម៉ាណែត បានលើកឡើងថា អត្ថប្រយោជន៍ពិសេស របស់រាជរដ្ឋាភិបាល ដែលផ្ដល់នៅក្នុង « គម្រោងវិនិយោគពាក់ព័ន្ធនឹងអគារជាប់គាំង» រួមមាន៖ ⁃ ការលើកលែងពន្ធលើប្រាក់ចំណូល, ប្រាក់រំដោះពន្ធលើប្រាក់ចំណូល និងពន្ធអប្បបរមា រយៈពេល ៣ ឆ្នាំ បន្ថែម ⁃ ការលើកលែងអាករលើតម្លៃបន្ថែម តាមអត្រាសូន្យភាគរយ ចំពោះការសាងសង់ បញ្ចប់ និងការជួសជុលកែលម្អលើអគារដែលជាប់គាំង ⁃ ការលើកលែងពន្ធកាត់ទុក លើការជួលអចលនទ្រព្យ រយៈពេល ៥ ឆ្នាំ ⁃ ការលើកលែងពន្ធអចលនទ្រព្យ និងការលើកលែងទណ្ឌកម្មរដ្ឋបាល ⁃ ការលើកលែងការបង់ថ្លៃសេវាសាធារណៈ និងថ្លៃលើសសន្ទស្សន៍ប្រើប្រាស់ដី ចំពោះ ការស្នើសុំលិខិតអនុញ្ញាតពាក់ព័ន្ធនឹងការសាងសង់ ⁃ ការសម្រួលនីតិវិធី និង បែបបទ នៃការស្នើសុំលិខិតអនុញ្ញាត ពីអាជ្ញាធរមានសមត្ថកិច្ច ពាក់ព័ន្ធនឹងការងារសំណង់ ⁃ ការផ្តល់ការអនុគ្រោះ លើថ្លៃត្រួតពិនិត្យ និងការបញ្ជាក់ផ្សេងៗពាក់ព័ន្ធសំណង់; ការសម្រួលបែបបទ និងនីតិវិធីវិនិយោគ និងធុរកិច្ច រួមទាំងការស្នើសុំអាជ្ញាបណ្ណ វិញ្ញាបនបត្រ និងលិខិតអនុញ្ញាតនានា ⁃ ការរៀបចំគោលការណ៍ និងការសម្របសម្រួលបង្កើតទីផ្សារលក់ឡៃឡុងអចលនទ្រព្យ ព្រមទាំងការផ្តល់សេវាផ្គូផ្គងវិនិយោគិន រួមទាំងការកំណត់តម្លៃយោង (Reference- Price) សម្រាប់អចលនទ្រព្យក្នុងខេត្តព្រះសីហនុ ⁃ និង ការជំរុញការប្រើប្រាស់យន្តការដោះស្រាយវិវាទក្រៅប្រព័ន្ធតុលាការ ស្របតាម បទប្បញ្ញតិច្បាប់ ចំពោះវិវាទដែលពាក់ព័ន្ធនឹងការវិនិយោគ ៕ តាកែវ

The post អ្នកជំនាញ៖ គម្រោងវិនិយោគជាប់គាំងក្នុងខេត្ត ព្រះសីហនុបើដោះចេញវាជះឥទ្ធិពលល្អមកលើវិស័យសំខាន់៣ appeared first on .

លោក វ៉ា វីរៈ នាយកក្រុមហ៊ុន Century 21 Fortuna Investment មានប្រសាសន៍ថា« ខ្ញុំយល់ឃើញថាល្អមានពីរចំណុច៖១)- បានជួយសម្រួលដល់សម្រាប់អ្នកអភិវឌ្ឍន៍ច្រើនក្នុងការកាត់បន្ថយការចំណាយផ្សេងៗ ពិសេសស្ថិតនៅក្នុងស្ថានភាពជួបការលំបាក ហើយការលើកលែងបង់ថ្លៃសេវាសាធារណៈនេះវាជួយលើកទឹកចិត្តពួកគាត់ ដើម្បីឱ្យគាត់មានការគិតគូរឬមួយពិចារណាសាងសង់គម្រោងបន្ថែម។២)-ជួយទៅលើអ្នកដែលចង់ទិញលំនៅឋានសមរម្យ កាត់បន្ថយបានការចំណាយរបស់គាត់។ ប្រជាពលរដ្ឋនៅពេលបានដឹងអំពីការលើកទឹកចិត្តរបស់ក្រសួង អាចធ្វើឱ្យប្រជាពលរដ្ឋមានការចាប់អារម្មណ៍ឬពិចារណាទិញផ្ទះតម្លៃសមរម្យណាមួយនៅពេលខាងមុខ»។

លោកបន្តថា រាជរដ្ឋាភិបាលដែលមានក្រសួងសេដ្ឋកិច្ចនិងហិរញ្ញវត្ថុជាសេនាធិការ គាត់មានគោលនយោបាយរបស់គាត់ពីមុន តែនៅពេលស្ថានភាពសេដ្ឋកិច្ចពិភពលោក ស្ថានភាពសេដ្ឋកិច្ចប្រទេសជាតិមានការផ្លាស់ប្តូរ អ៊ីចឹងគោលនយោបាយរបស់រាជរដ្ឋាភិបាលអាចមានការផ្លាស់ប្តូរខ្លះ ព្រោះពីមុនមិនទាន់មានជំងឺកូវីដ១៩និងសង្គ្រាមរវាងអ៊ុយក្រែនិងរុស្ស៊ីទេ។ បច្ចុប្បន្ននេះក្រៅពីចង់បានប្រាក់ចំណូលយកមកអភិវឌ្ឍន៍ប្រទេសជាតិ រាជរដ្ឋាភិបាលក៏បានគិតគូរទៅលើសុខទុករបស់ប្រជាពលរដ្ឋនិងអ្នកវិនិយោគទទួលបានការលើកទឹកចិត្តទំាងអស់គ្នាតាមរយៈការលើកលែងបង់ថ្លៃសេវាសាធារណៈ ដើម្បីចូលរួមធ្វើឱ្យសេដ្ឋកិច្ចកម្ពុជាប្រសើរឡើងវិញ។

យោងតាមក្រសួងរៀបចំដែនដី នគរូបនីយកម្មនិងសំណង់បានបង្ហាញថា លើកលែងការបង់ថ្លៃសេវាសាធារណៈមានដូជា ១)- ការផ្តល់គោលការណ៍សាងសង់ និងគោលការណ៍អភិវឌ្ឍន៍ថ្មី ការផ្តល់លិខិតអនុញ្ញាតសាងសង់ និងការផ្តល់លិខិតអនុញ្ញាតសាងសង់លើសកម្រិតសន្ទស្សន៍ ប្រើប្រាស់ដីអតិបរមាផ្លូវការ ចំពោះសំណើសុំសាងសង់អគារមន្ទីរពេទ្យឯកជន សាងសង់អគារសាលារៀនឯកជន និងសាងសង់លំនៅឋានតម្លៃសមរម្យ។ ២)- ការចុះបញ្ជីដំបូងលើចំណែកឯកជននៃអគារសហកម្មសិទ្ធិ ចំពោះគម្រោងអភិវឌ្ឍន៍លំនៅឋានតម្លៃសមរម្យ និង៣)-ការផ្តល់វិញ្ញាបនបត្រវាស់វែងលើកដំបូង សម្រាប់អ្នកវាស់វែងដែលជាមន្ត្រីរាជការ៕

អត្ថបទ៖សារេត

The post លោក វ៉ា វីរៈ៖ ការលើកលែងការបង់ថ្លៃសេវាសាធារណៈ​របស់ក្រសួងដែនដីមានចំណុចល្អ២យ៉ាង appeared first on .

លោក វ៉ា វីរៈ នាយកក្រុមហ៊ុន Century 21 Fortuna Investment បានសង្កេតឃើញថា ការទិញលក់ ខុនដូ ផ្ទះនិងដីនៅប៉ុន្មានខែកន្លងទៅនេះ ហាក់មានភាពស្ងាត់ជាងពេលមុនបន្តិចដោយសារសេដ្ឋកិច្ចប្រទេសនៅក្នុងតំបន់និងពិភពលោកមិនសូវជាល្អហើយសង្គ្រាមរវាងរុស្ស៊ីនិងអ៊ុយក្រែនមិនទាន់ឃើញមានសញ្ញាវិជ្ជមានអ្វីគួរឱ្យកត់សម្គាល់ ។

លោកមានប្រសសន៍ថា «ការទិញលក់ទៅលើខុនដូ ទិញផ្ទះ និងទិញដី មានភាពស្ងប់ស្ងាត់នៅរយៈពេល៤ខែកន្លងមកនេះ បើប្រៀបធៀបទៅនិងឆ្នំាមុន។នៅពេលបន្ទាប់យើងមិនទាន់មើលឃើញសញ្ញាណាមួយឱ្យល្អប្រសើរឡើងវិញនៅឡើយទេ ដោយសារស្ថានភាពសេដ្ឋកិច្ចនិងសង្គ្រាមរវាងអ៊ុយក្រែននិងរុស្ស៊ីនេះមិនទាន់មានអ្វីប្រែប្រួលឱ្យច្បាស់លាស់ ការឡើងនូវអត្រាការប្រាក់របស់ធនគារអាមេរិក ក៏ធ្វើឱ្យប៉ះពាល់ទៅដល់ប្រទេសនៅក្នុងតំបន់ក៏ដូចជាប្រទេសកម្ពុជា។ដូចនេះការទម្លាក់ប្រាក់ទៅឱ្យអ្នកត្រូវការទិញអចលនវត្ថុនៅមានការពិបាកនិងរឹតត្បិត អ៊ីចឹងការទិញលក់ហាក់នៅមានកម្រិត»។

បើយោងតាមអ្នកជំនាញខាងលើ នៅពេលការទិញលក់ ខុនដូ ផ្ទះនិងដីហាក់មានភាពស្ងប់ស្ងាត់នៅពេលកន្លងមក វាធ្វើឱ្យប៉ះពាល់តិចតួចនៅក្នុងវិស័យសំណង់និងអចលនទ្រព្យរបស់កម្ពុជា ប៉ុន្តែវាមិនចោទជាបញ្ហានោះទេ។

លោក វ៉ា វីរៈ សង្កត់ធ្ងន់ថា «សម្រាប់អ្នកគ្រប់គ្រងលំហូរសាច់ប្រាក់ អាជីវកម្មរបស់ខ្លួនបានល្អ បើទិញចង់បានប្រាក់ចំណេញខ្លំាងគឺនៅពេលសកម្មភាពពេលនេះហើយ ដោយសារវាសំបូរប្រភេទអចលនទ្រព្យ,មានអចលនទ្រព្យល្អ,តម្លៃល្អ និងការចរចារលើការបង់លុយលើអ្វីៗវាងាយស្រួលឬល្អ។ ចំពោះអ្នកគិតវិជ្ជមាននៅពេលនេះជាឱកាសមាសរបស់គាត់បើយើងមើលទៅលើបទពិសោធន៍ក្នុងវិបត្តិសេដ្ឋកិច្ចឆ្នំា៩៩៧និងឆ្នំា២០០៨ អ៊ីចឹងឥលូវនេះជាឱកាសមាសសម្រាប់អ្នកមានលទ្ធភាពអាចចាប់យកបាន»៕ អត្ថបទ៖សារេត

The post អ្នកជំនាញ៖ ទិញខុនដូ ផ្ទះនិងដីក្នុងពេលទីផ្សារស្ងប់ស្ងាត់ អាចប្រាក់ចំណេញបានច្រើនពេលតម្រូវការងើបឡើងវិញ appeared first on .

លោក វ៉ា វីរៈ អគ្គនាយកក្រុមហ៊ុន Century 21 Fortuna Investment មានប្រសាសន៍ថា«បើតាមខ្ញុំដឹងអ្នកដែលមានដីធ្លីច្រើននៅក្នុងស្រុកកំពុងរងចំាអ្នកវិនិយោគចិនចូលមកកម្ពុជា ព្រោះកាលពីរបីឆ្នំាមុនមិនទាន់ជួបវិបតិ្តជំងឺកូវីដ១៩ គឺមានតែវិនិយោគិនចិនទេដែលដើរតួនាទីសំខាន់ក្នុងការទិញអចលនទ្រព្យនៅក្នុងប្រទេសកម្ពុជាក៏ដូចជានៅតាមបណ្តាប្រទេសផ្សេងទៀតនៅលើពិភពលោក។ការបន្ធូរបន្ថយលើការរឹងបណ្តឹងជំងឺកូវីដ១៩ទៅលើពលរដ្ឋរបស់ចិននេះ វាចំណុចឬជាសញ្ញាមួយបង្ហាញពីចំណុចវិជ្ជមានល្អមួយ ចូលរួមជួយទៅលើសេដ្ឋកិច្ចកម្ពុជាយើងក៏ដូចជួយទៅលើវិស័យសំណង់និងអចលនទ្រព្យកម្ពុជាផងដែរ»។

បើតាមអ្នកជំនាញរូបនេះលើកឡើងថានៅពេលកន្លងមកវិស័យធនគារក្នុងស្រុកបានរឹតបណ្តឹងទៅលើអ្នកដែលខ្ចីប្រាក់យកទៅទិញអចលនទ្រព្យ ប៉ុន្តែបើសិនខ្ចីយកទៅពង្រឹងមុខរបរ ឱ្យមានការរីកចម្រើនតាមរយៈការរំពឹងទុកលើភ្ញៀវទេចរចិនចូលមកកម្ពុជាច្រើនធ្វើឱ្យមុខរបរចាប់ផ្តើមងើបឡើងជាសន្សឹមៗឆ្ពោះទៅមុខ គាត់អាចខ្ចីប្រាក់យកទៅទិញអ្វីៗបាន ធូរស្រាលជាងពេលមុនៗ។

ចំណែកប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា មើលឃើញថានៅឆ្នំា២០២៣នេះទោះបីវិស័យសំណង់និងអចលនទ្រព្យកម្ពុជានៅមានភាពស្រពិចស្រពិលតិចតួចយ៉ាងណាក្តី តែវាមានសញ្ញាល្អជាងឆ្នំា២០២២កន្លងមក។

លោក សន សៀប ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជាមានប្រសាសន៍ថា ការបើកចំហរលើការរឹតបណ្តឹងទៅលើពលរដ្ឋរបស់ចិន ខ្ញុំគិតថាវាជាសញ្ញាល្អមួយសម្រាប់ទីផ្សារអន្តរជាតិ ។គោលនយោបាយរបស់ចិនដែលបន្ធូរបន្ថយលើការរឹតបណ្តឹងជំងឺកូវីដ១៩ បិទនិងបើកកាលពីមុនមិនមានភាពច្បាស់លាស់នោះទេ។ពោលពេលស្ថានភាពធ្ងន់ធ្ងរគេអាចបិទវិញហើយនៅពេលស្ថានភាពធូរស្រាលគេអាចនឹងបើកវិញ។

លោក សន សៀប សង្កត់ធ្ងន់ថា «សម្រាប់ខ្ញុំយល់ឃើញថាមកដល់បច្ចុប្បន្ននេះគឺចិនបានបើកប្រទេសបានទូលំទូលាយវិញហើយ ផ្អែកទៅលើការកត់ត្រាទៅលើអ្នកឆ្លងឬអ្នកដែលស្លាប់ដោយសារជំងឺកូវីដ១៩នេះគេលែងបង្ហាញទិន្នន័យជាសាធារណៈទៀតហើយ គេគិតថាវាជាជំងឺផ្លូវដង្ហើមអាចព្យាបាលជាសះស្បើយ។ខ្ញុំជឿថាវាផ្តល់ភាពអំណោយផលដ៏ល្អមួយសម្រាប់ទីផ្សារអចលនទ្រព្យរបស់យើង»។

យោងតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់បានបង្ហាញថាក្នុងឆ្នំា២០២២នេះទិន្នន័យសំណង់ទូទំាងប្រទេសមានចំនួន ៣.៨២៧គម្រោងដែលមានផ្ទៃក្រឡាសរុបជាង៦លានម៉ែត្រការ៉េ តម្លៃប៉ាន់ស្មានទុនវិនិយោគប្រមាណ ២.៦៣៤លានដុល្លារអាមេរិក បើប្រៀបធៀបនឹងរយៈពេលដូចគ្នាក្នុងឆ្នំា២០២១មានចំនួន៣.៩២៥គម្រោងនិងមានតម្លៃប៉ាន់ស្មានទុនវិនិយោគប្រមាណជាង៥.២១០លានដុល្លារអាមេរិក ពោលថយចុះ៤៩,៤២%។

របាយការណ៍ដដែលបញ្ជាក់ថា«សមត្ថកិច្ចក្រសួងទទួលបានការស្នើសុំ មានចំនួន២០២គម្រោងនិងមានតម្លៃប៉ាន់ស្មានទុនវិនិយោគប្រមាណ២.០៨៧លានដុល្លារអាមេរិក បើប្រៀបធៀបនឹងរយៈពេលដូចគ្នាក្នុងឆ្នំា២០២១មានទុនវិនិយោគប្រមាណ៤.១៥១លានដុល្លារអាមេរិក គឺថយចុះ៤៩,៧១%។ចំណែកសមត្ថកិច្ចរដ្ឋបាលរាជធានី ខេត្តមានចំនួន៣.៦២៥គម្រោង និងមានតម្លៃប៉ាន់ស្មានទុនវិនិយោគ៥៤៧លានដុល្លារអាមេរិកបើប្រៀបធៀបនឹងរយៈពេលដូចគ្នាក្នុងឆ្នំា២០២១មានទុនវិនិយោគប្រមាណ១.០៥៨លានដុល្លារអាមេរិកថយចុះ៤៨,៣២%»៕ អត្ថបទ៖ ឧកញ៉ា សារេត

The post អ្នករកស៊ីវិស័យដីធ្លីនៅក្នុងស្រុកភាគច្រើនកំពុងរងចាំវិនិយោគិនចិនមកកាន់កម្ពុជា appeared first on .