លោករដ្ឋមន្រ្តី បានបញ្ជាក់ថា មានកត្តាចំនួន ៧ ដែលអំណោយផល និងទាក់ទាញចំណាប់អារម្មណ៍អ្នកវិនិយោគឱ្យមកវិនិយោគនៅកម្ពុជា ក្នុងនោះ រួមមាន៖

១. សន្តិភាព ស្ថេរភាពនយោបាយ

២. ច្បាប់នៃការវិនិយោគ និងបរិយាកាសនៃការវិនិយោគមានអំណោយផល

៣. រាជរដ្ឋាភិបាលជំរុញការវិនិយោគ

៤. ការផ្សារភ្ជាប់នៃហេដ្ឋារចនាសម្ព័ន្ធ មានដូចជាទឹក ភ្លើង ព្រលានយន្តហោះ ផ្លូវដឹកជញ្ជូនកាន់តែមានភាពប្រសើរឡើង

៥. ប្រព័ន្ធហិរញ្ញវត្ថុមានស្ថេរភាពទាំងប្រាក់រៀល និងដំណើរការរបស់ប្រព័ន្ធធនាគារ និងប្រព័ន្ធទាំងមូល

៦. ការបង់ពន្ធមានភាពអនុគ្រោះ និងធូរស្រាលជាង បើធៀបនឹងប្រទេសដទៃទៀត

៧. អ្នកវិនិយោគដែលមិនមានសញ្ជាតិកម្ពុជា អាចធ្វើការជួលរយៈពេលវែង

លោករដ្ឋមន្រ្តី បានគូសបញ្ជាក់ថា ចំណុចទាំងអស់នេះហើយដែលធ្វើឱ្យកម្ពុជា ជាកន្លែងដ៏ល្អសម្រាប់អ្នកវិនិយោគអាមេរិក។

លោក ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ក្រុមប្រឹក្សាអភិវឌ្ឍន៍កម្ពុជា ក៏ធ្លាប់បានលើកឡើងផងដែរថា អ្នកវិនិយោគគួរតែពិចារណាដាក់ទុនមកវិនិយោគនៅប្រទេសកម្ពុជា ព្រោះកម្ពុជាមានស្ថេរភាព ទាំងសេដ្ឋកិច្ច ម៉ាក្រូសេដ្ឋកិច្ច ស្ថេរភាពនយោបាយ។ ក្រៅពីសុខសន្តិភាព ស្ថេរភាពនិយោបាយ កម្ពុជាមានពលករ កម្មការី មានភាពវ័យក្មេង៦០% ដែលមានអាយុក្រោម៣៥ឆ្នាំ បើធ្រៀបធៀបប្រទេសទាំងអស់នៅតំបន់អាស៊ាន គឺកម្ពុជាក្មេងជាងគេ។

លើសពីនេះ បច្ច័យវិជ្ជមាននានាជាហេតុនាំឱ្យកម្ពុជា គឺជាទីតាំងដែលគួរពិចារណាក្នុងការមកដាក់ទុនវិនិយោគ និងមុខសញ្ញាវិនិយោគជាអាទិភាពរបស់កម្ពុជា ដែលមានរបត់ផ្លាស់ប្តូរស្របតាមនិន្នាការជាសកល។ក្នុងនោះ គម្រោងវិនិយោគមានកំណើន បង្ហាញឱ្យឃើញពីប្រសិទ្ធភាពនៃច្បាប់ស្តីពីការវិនិយោគ ក៏ដូចជាគោលនយោបាយនានារបស់រាជរដ្ឋាភិបាល ក្នុងថែទាំគាំទ្រកិច្ចការវិនិយោគនៅកម្ពុជា និងបានបង្ហាញពីការយកចិត្តដាក់ខ្ពស់របស់រាជរដ្ឋាភិបាលចំពោះវិស័យឯកជន ដោយបានចាត់ទុកវិស័យនេះជាម៉ាស៊ីនដ៏សំខាន់ក្នុងការជំរុញកំណើនសេដ្ឋកិច្ចជាតិ។

សូមបញ្ជាក់ដែរថា ២ខែ ដើមឆ្នាំ ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ១១២គម្រោង ក្នុងទុនវិនិយោគ ប្រមាណ ១ប៊ីលានដុល្លារអាម៉េរិក ដោយអាចបង្កើតការងារបានចំនួនជាង ៧ម៉ឺនកន្លែង។ ២ខែ ឆ្នាំនេះ ចំនួនគម្រោងវិនិយោគមានការកើនឡើងរហូតដល់ទៅ៤៣គម្រោង បើប្រៀបធៀបនឹងរយៈពេលដូចគ្នាក្នុងឆ្នាំ២០២៤៕

The post លោក សាយ សំអាល់៖ កត្តាចំនួន ៧ ដែលអំណោយផល និងទាក់ទាញអ្នកវិនិយោគឱ្យមកវិនិយោគនៅកម្ពុជា appeared first on .

ក្នុងសេចក្តីសម្រេចលេខ ២១៣ សសរ របស់រាជរដ្ឋាភិបាល ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រី​ក្រសួងរៀបចំដែនដី នគរូបនីយកម្ម និងសំណង់ និង​ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋ​មន្ត្រី​ក្រសួងមហាផ្ទៃ ត្រូវ​បាន​តែងតាំង​ជា សហប្រធាន ព្រមទាំង​មាន​ឥស្សរជន និង​​ថ្នាក់ដឹកនាំ​ចំនួន​ ២៣រូប​ទៀត​ ជា​អនុប្រធាន សមាជិក សមាជិកា អគ្គលេខាធិការ និង​ជា​អគ្គលេខាធិការរង។

សូមជម្រាបថា គណៈកម្មាធិការរៀបចំដែនដី និងនគរូបនីយកម្មថ្នាក់ជាតិ ត្រូវ​បាន​បង្កើតឡើង​ក្នុង​គោលបំណង​រៀបចំ​ប្លង់គោលប្រើប្រាស់ដី និងផែនការប្រើប្រាស់ដី​ថ្នាក់ជាតិ សំដៅធានា ដែនដីនៅ​ទូទាំង​ព្រះរាជាណាចក្រកម្ពុជា ត្រូវបាន​គ្រប់គ្រង ប្រើប្រាស់ ការពារ និង​អភិវឌ្ឍ​តាម​រយៈការ​ធ្វើ​សមាហរណកម្ម​នូវ​ផែនការ​​យុទ្ធសាស្ត្រ​រៀបចំដែនដី និង​ការ​ធ្វើ​ឱ្យ​រលូន​នូវ​វិធាន និង​ឧបករណ៍​ចាំបាច់នានា តាម​វិស័យ​ប្រកប​ដោយ​ភាពសុខុដុមរមនា​នៅ​តាម​តំបន់​ភូមិសាស្ត្រ​នីមួយៗ៕

The post សម្តេចធិបតី ហ៊ុន ម៉ាណែត តែងតាំង ឯកឧត្តម សាយ សំអាល់ និងឯកឧត្តម ស សុខា ជាសហប្រធានគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ appeared first on .

លោក សាយ សំអាល់ បានលើកឡើងថា៖ អ្នកជំនាញក្នុងវិស័យឧស្សាហកម្មជាង ១ម៉ឺននាក់ ត្រូវបានរំពឹងថានឹងទទួលបានផលប្រយោជន៍ពីព្រឹត្តិការណ៍ពិព័រណ៍សំណង់ដ៏ធំបំផុតរបស់កម្ពុជា  CAMBUILD 2024 និងទទួលបានឱកាសដើម្បីស្វែងយល់ បង្កើនចំណេះដឹង និងបទពិសោធន៍ក្នុងឧស្សាហកម្មសំណង់ជាមួយនិងបច្ចេកវិទ្យាចុងក្រោយបង្អស់។

ព្រឹត្តិការណ៍ពិព័រណ៍ខេមបៀល២០២៤ ត្រូវបានចាត់ទុកជាសក្ខីភាពនៃភាពរីកចម្រើនឡើងវិញនៃឧស្សាហកម្មសំណង់របស់កម្ពុជា គួរឱ្យកត់សម្គាល់។ ព្រឹត្តិការណ៍មួយនេះ រំលេចចេញ និងផ្តោតសំខាន់លើការច្នៃប្រឌិត និងឱកាសកសាងទំនាក់ទំនងនៅក្នុងវិស័យដែលបានបើកបង្ហាញការដាក់តាំងជាផ្លូវការ ចាប់ពីថ្ងៃទី១១ ដល់ថ្ងៃទី១៣ ខែកញ្ញា ឆ្នាំ២០២៤ នៅមជ្ឈមណ្ឌលពិព័រណ៍ និងសន្និបាតកោះពេជ្រ (DIECC) ។

ការតាំងពិព័រណ៍អន្តរជាតិមួយនេះ នឹងនាំមកនូវអ្នកផ្គត់ផ្គង់នៅក្នុងឧស្សាហកម្ម អ្នកវិនិយោគិន និងអ្នកប្រឹក្សាយោបល់ជាមួយគំនិតច្នៃប្រឌិតជាច្រើនរួមគ្នា ដើម្បីញ៉ាំងឱ្យវេទិកានេះកាន់តែទូលំទូលាយប្រកបដោយកិច្ចសហប្រត្តិបត្តិការយ៉ាងទូលំទូលាយ និងការរីក ចម្រើន។

លើសពីនេះ ក៏បានបង្ហាញអំពីទិដ្ឋភាពឧស្សាហកម្មសំណង់របស់កម្ពុជា ស្របតាមគោលដៅនៃការកសាងហេដ្ឋារចនាសម្ព័ន្ធប្រកបដោយមហិច្ឆតា ស្របតាមការកើនឡើងនៃលំហូរវិនិយោគបរទេស និងជាកាតាលីករសម្របសម្រួលការតភ្ជាប់ដ៏សំខាន់ក្នុងចំណោមភាគីពាក់ព័ន្ធសំខាន់ៗ ដើម្បីបង្ហាញពីវឌ្ឍនភាពចុងក្រោយបង្អស់ដែលជំរុញឱ្យឧស្សាហកម្មនេះបន្តឆ្ពោះទៅមុខ។

អ្នកស្រី Alice Lem នាយកផ្នែកអភិវឌ្ឍន៍អាជីវកម្ម ប្រចាំប្រទេសម៉ាឡេស៊ី និងកម្ពុជា នៃក្រុមហ៊ុន Informa Markets មានប្រសាសន៍ថា “CAMBUILD 2024 ជាព្រឹត្តិការណ៍បង្ហាញថេរវេលាផ្លាស់ប្តូរមួយសម្រាប់ឧស្សាហកម្មសំណង់របស់កម្ពុជាជាមួយនិងការដោះដូរកិច្ចសន្ទនា និងការផ្គូរផ្គង់កិច្ចសហប្រតិបត្តិការប្រកបដោយអត្ថន័យ។

សារៈសំខាន់នៃការតាំងពិព័រណ៍នេះត្រូវបានគូសបញ្ជាក់ដោយការគាំទ្រពី ក្រសួងពាណិជ្ជកម្ម ក្រសួងដែនដីនគរូបនីយកម្ម និងសំណង់ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សមាគមអ្នកវិនិយោគ អ្នកសាងសង់និងស្ថាបត្យករកម្ពុជា គណៈវិស្វករកម្ពុជា សមាគមអ្នកផ្គត់ផ្គង់ទឹកស្អាតកម្ពុជា និង បណ្ឌិតសភាវិស្វកម្ម និងបច្ចេកវិទ្យាអាស៊ាន។

បន្ថែមលើសពីនេះ សមាគមអ្នកវិនិយោគ អ្នកសាងសង់និងស្ថាបត្យករកម្ពុជា គណៈវិស្វករកម្ពុជា សមាគមអ្នកផ្គត់ផ្គង់ទឹកស្អាតកម្ពុជា និងបណ្ឌិតសភាវិស្វកម្ម និងបច្ចេកវិទ្យាអាស៊ានក៏មានការគាំទ្រផងដែរ ដោយបញ្ជាក់បន្ថែមថា ខេមបៀល CAMBUILD ជាព្រឹត្តិការណ៍សម្រាប់ឧស្សាហកម្មសំណង់ឈានមុខគេនៅកម្ពុជា។

សូមបញ្ជាក់ថា ក្រុមហ៊ុនដាក់តាំងមានទាំងក្នុងស្រុកនិងអន្តរជាតិ បាននាំមកនូវ ផលិតផល និងម៉ាកល្បីៗជាង ៣០០ សម្រាប់បង្ហាញនៅក្នុងព្រិត្តិការណ៍នេះ រួមមាន ប្រទេសសិង្ហបុរី ចិន ម៉ាឡេស៊ី កូរ៉េ ឥណ្ឌា តៃវ៉ាន់ ថៃ វៀតណាម ជាមួយ    បច្ចេកវិទ្យា និងសេវាកម្មទំនើបបំផុតរបស់ពួកគេ។ វត្តមានព្រឹត្តិការណ៍អន្តរជាតិនេះផ្តល់ឱ្យអ្នកចូលរួមនូវឱកាសពិសេសមួយដើម្បីស្វែងយល់ពីការវិវត្តន៍ល្អបំផុតជាសកលនិងការច្នៃប្រឌិតថ្មីៗដើម្បីអោយកម្ពុជាអាចវិវត្តទាន់    សមាហរកម្មបច្ចុប្បន្ននិងអនាគត៕

The post លោក សាយ សំអាល់៖ ពិព័រណ៍សំណង់បង្ហាញនូវសក្តានុពលរបស់កម្ពុជា ដើម្បីទាក់ទាញអ្នកជំនាញក្នុងឧស្សាហកម្ម និងអ្នកវិនិយោគ appeared first on .

ថ្លែង​ក្នុង​ពិធី​ប្រកាស​ដាក់ឱ្យ​ប្រើប្រាស់​ជាផ្លូវការ​សេវាសាធារណៈ​តាមប្រព័ន្ធឌីជីថល របស់ក្រសួងរៀបចំដែនដី កាលពី​ថ្ងៃទី៩ ខែមេសា ឆ្នាំ២០២៤ ខណៈ​ដែល​ អ្នកឧកញ៉ា លី ហួរ ​​ក៏​បាន​អញ្ជើញ​ចូលរួម​ក្នុងពិធី​នោះ​ដែរ លោក​ឧបនាយករដ្ឋមន្ត្រី សាយ សំអាល់ បាន​លើកឡើង​ដូច្នេះ​ថា៖ “ពាក្យជនបទ មានន័យថាមិនមែននៅទីក្រុងនោះទេ។ ជនបទបច្ចុប្បន្ន មានហេដ្ឋារចនាសម្ព័ន្ធ​គាំទ្រ​ជា​ច្រើន​ដូចជា​ ផ្លូវ ទឹក ភ្លើង មន្ទីរពេទ្យ និងសាលារៀន ទៅដល់​ស្ទើរ​​តែ​ទាំងអស់​ហើយ​ ដូច្នេះនេះ​ហៅថា​ជា​បុរីជនបទ​ ទោះបីមិនដូចបុរីរបស់ អ្នកឧកញ៉ា លី ហួរ ប៉ុន្តែជាបុរីជនបទមួយដែល​ប្រជាពលរដ្ឋ​មានលំនៅឋាន​សមរម្យ មានការងារធ្វើ និង​មានប្រាក់ចំណូល​អាច​ផ្គត់ផ្គង់​គ្រួសារបាន”។

គួរបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្ត្រី ក៏​ធ្លាប់​បាន​លើកឡើង​​ផង​ដែរ​ថា ក្រសួងរៀបចំដែនដី មាន​ផែនការ​មួយហៅថា បុរីជនបទ។ កន្លង​មក​ សម្តេច​ធ្លាប់តែលឺបុរី១០០ខ្នង បុរីទន្លេ​បាសាក់ ជាដើម ប៉ុន្តែ​បន្តិចទៀត​នឹង​មានបុរីជនបទ ដែលសហការគ្នា​​ជាមួយ​ស្ថាប័នពាក់ព័ន្ធ​ រួមទាំង​ក្រសួងអភិវឌ្ឍន៍ជនបទ ព្រោះ​បុរីជនបទ​សំដៅរៀបចំភូមិឃុំ​​ឱ្យសមរម្យ​​សម្រាប់​ប្រជាពលរដ្ឋ​រស់នៅទាំង​ជីវភាព និងកិត្តិយស​ឱ្យសមរម្យ​​ រួមទាំងលទ្ធភាព​ដែល​រដ្ឋ​​​អាចធ្វើ​ទៅ​បាន​ដូចជា ការកសាងផ្លូវ កសាង​ប្រព័ន្ធ​ទឹកស្អាត សាងសង់​សាលារៀន និងមន្ទីរពេទ្យ។ សម្តេច​ បញ្ជាក់​ថា​ផែនការ​នេះ​ ក្រសួងរៀបចំ​បាន​ខ្លះ​ហើយ ដូច្នេះ​នឹង​ត្រូវ​​បន្ត​ធ្វើ​ទៅ​​ទៀត ហើយ​អ្វី​ទាំងអស់​នេះ​គឺជាអ្វី​ដែល​ធ្វើ​ផ្ទាល់​ជូន​ប្រជាពលរដ្ឋ​តែ​ម្តង។

សូមទស្សនារូបភាពគម្រោងផែនការបុរីជនបទដូចខាងក្រោម៖

The post លោក សាយ សំអាល់៖ ទោះមិនដូចបុរី របស់អ្នកឧកញ៉ា លី ហួរ តែបុរីជនបទ មានលក្ខណៈពិសេសមិនធម្មតា appeared first on .

កម្មវិធីនេះ​ត្រូវបានរៀបចំឡើង​ដើម្បី​​​ប្រកាស​ដាក់ឱ្យ​ប្រើប្រាស់​ជាផ្លូវការ​សេវាសាធារណៈ​តាមប្រព័ន្ធឌីជីថល របស់ក្រសួង​រៀបចំដែនដី ចំនួន ២ គឺ៖ ១)ការស្នើសុំសេវាព័ត៌មានសុរិយោដីតាមប្រព័ន្ធអេឡិចត្រូនិក និង ២)ការស្នើសុំសេវាសំណង់​តាម​ប្រព័ន្ធអេឡិចត្រូនិក ក្នុងទិសដៅបង្កើន​គុណភាព និងពង្រីកវិសាលភាព​សេវាសាធារណៈ​ឱ្យ​កាន់តែ​រហ័ស ប្រសិទ្ធភាព និងតម្លាភាព ដោយផ្អែកលើ​មូលដ្ឋានទិន្នន័យ និងការ​ធ្វើបរិវត្តកម្មឌីជីថល។ ទទឹមនេះដែរ ក្រសួងរៀបចំដែនដី បានកសាង​នូវ​ប្រព័ន្ធ​ឌីជីថល​សំខាន់ៗ​ដូចខាងក្រោម៖

១) ការស្នើសុំសេវាសាធារណៈអនឡាញ
២) ចរន្តការរដ្ឋបាលក្រសួងតាមប្រព័ន្ធអេឡិចត្រូនិក
៣) កសាងបណ្ណាល័យឯកសារគតិយុត្តអេឡិចត្រូនិក
៤) ការចុះបញ្ជីដីធ្លីតាមប្រព័ន្ធអេឡិចត្រូនិក
៥) ការរៀបចំថ្នាល់ មជ្ឈមណ្ឌលប្រជាជន (People Center) ដែលជាថ្នាល​ប្រមូលផ្តុំទិន្នន័យ​គ្រប់ប្រភេទ សម្រាប់​ផ្តល់​សេវាដល់ប្រជាពលរដ្ឋកម្ពុជាទូទាំងប្រទេស។

ពិធីខាងលើនេះ ក៏មានការអញ្ជើញចូលរួមពី អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា, លោក រ័ត្ន សោភ័ណ ប្រធានសមាគមធនាគារនៅកម្ពុជា, លោកស្រី ឌិត នីតា ប្រធានសមាគមមីក្រូហិរញ្ញវត្ថុកម្ពុជា, ឧកញ៉ា វ៉ាន់ ឆាស៍ជួន អនុប្រធាន កាណាឌីយ៉ា គ្រុប, ឧកញ៉ា តាន់ មុនីវណ្ណ អនុប្រធានសភាពាណិជ្ជកម្មកម្ពុជា រួមទាំងថ្នាក់ដឹកនាំ មន្ត្រីរាជការក្រសួង អន្តរក្រសួង វិស័យឯកជន និងភ្ញៀវកិត្តិយសសរុបជាង ១០០០នាក់។

សូមជម្រាបថា តាមប្រសាសន៍លោកឧបនាយករដ្ឋមន្ត្រី សាយ សំអាល់ បានបញ្ជាក់ថា កម្មវិធីប្រកាសសេវាធារណៈ​ឌីជីថល​នេះ​ គឺជាផ្នែកដ៏សំខាន់មួយ នៃចក្ខុវិស័យរបស់លោក ដែលមានពាក្យស្លោក «សេវាគាប់ចិត្ត»។ ដើម្បីអាច​ផ្តល់​សេវាគាប់ចិត្ត​ជូនដល់ប្រជាពលរដ្ឋ​បាន លោកមានគន្លឹះអាទិភាពការងារ​សំខាន់៣ រួមមាន៖ ១)ចុះបញ្ជីឱ្យរួចរាល់​ទូទាំង​ប្រទេស, ២)ដោះស្រាយវិវាទឱ្យបានបញ្ចប់ ដើម្បីឱ្យមានបរិយាកាសគ្មានវិវាទដីធ្លី និង ៣)ការផ្តល់សេវាទំនើបសម្បូរ​បែប៕

The post អ្នកឧកញ៉ា លោក-លោកស្រី ប្រធានសមាគមមួយចំនួន ចូលរួមកម្មវិធីប្រកាសសេវាធារណៈឌីជីថល​របស់ក្រសួងរៀបចំដែនដី appeared first on .

ក្នុងកិច្ចប្រជុំអន្តរក្រសួងស្តីពីការរៀបចំហេដ្ឋារចនាសម្ព័ន្ធក្នុងរាជធានីភ្នំពេញ កាលថ្ងៃទី១៣ ខែកុម្ភៈ​​ លោក សាយ សំអាល់ រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានលើកឡើងថា ការសិក្សាលើការងាររៀបចំហេដ្ឋារចនាសម្ព័ន្ធក្នុងរាជធានីភ្នំពេញនេះ គឺធ្វើឡើងក្នុងគោលបំណងដើម្បីកែប្រែមុខមាត់រាជធានីឱ្យកាន់តែមានភាពស្រស់បំព្រង លើកកម្ពស់ផាសុកភាពក្នុងការរស់នៅ។

លោកថា  គម្រោងនេះ ក៏ជាការសិក្សាដែលផ្តោតលើការបង្កភាពងាយស្រួលក្នុងការប្រកបរបរចិញ្ចឹមជីវិត និងទាក់ទាញការវិនិយោគ ពោលគឺធ្វើឱ្យគុណភាពជីវិត និងបែបបទនៃការរស់នៅរបស់ប្រជាពលរដ្ឋក្នុងរាជធានី កាន់តែមានភាពប្រសើរឡើងពីមួយកម្រិត ទៅមួយកម្រិត ស្របទៅតាមចក្ខុវិស័យកម្ពុជាឆ្នាំ២០៥០ របស់រាជរដ្ឋាភិបាល ដែលមានបំណងប្រែក្លាយកម្ពុជា ឱ្យទៅជាប្រទេសមានចំណូលខ្ពស់។ លោកបន្ថែមថា៖ «ប្រសិនបើគម្រោងរៀបចំហេដ្ឋារចនាសម្ព័ន្ធទាំងអស់នេះ សម្រេចទៅបានតាមផែនការដែលគ្រោងទុក នោះរំពឹងថានឹងធ្វើឱ្យប្រជាពលរដ្ឋក្នុងរាជធានីភ្នំពេញ មានមោទកភាពប្រាប់ទៅកាន់ពិភពលោកថា យើងខ្ញុំជាអ្នករស់នៅទីក្រុងភ្នំពេញ រាជធានីដ៏ស្រស់បំព្រង នៃព្រះរាជាណាចក្រកម្ពុជា»។

ទន្ទឹមនឹងនេះលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ក៏បានបង្ហាញនូវឆន្ទៈ និងគោលជំហរយ៉ាងមុតមាំ ក្នុងការចូលរួមពួតដៃជាមួយក្រសួងរៀបចំដែនដី ទាំងក្នុងទិដ្ឋភាពបច្ចេកទេស និងស្មារតី ដើម្បីរុញច្រានគម្រោងការងារនេះឱ្យលេចរូបរាងឡើង សំដៅធ្វើឱ្យភ្នំពេញ ក្លាយជារាជធានីដែលមានភាពទាក់ទាញ និងប្រកបដោយមោទកភាពជាតិ ផងដែរ។

សូមរម្លឹកដែរថា បើតាមក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា «ក្នុងឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មី ចំនួន២៤៧ និងគម្រោងពង្រីកផលិតកម្មចំនួន២១ ហើយក្នុងនោះគម្រោងវិនិយោគចំនួន៧១ ត្រូវបានបណ្តាក់ទុនវិនិយោគ នៅក្នុងតំបន់សេដ្ឋកិច្ចពិសេស។ គម្រោងទាំងនេះ មានទុនវិនិយោគសរុបប្រមាណជិត ៤.៩ពាន់លានដុល្លារអាមេរិក និងអាចបង្កើតការងារបានប្រមាណ ៣០៧,០០០កន្លែង»។

ប្រសិនបើពិនិត្យមើលរបាយការណ៍នៃគម្រោងវិនិយោគ ក្នុងឆ្នាំ២០២៣នោះ គម្រោងវិនិយោគភាគច្រើន មានទីតាំងស្ថិតក្នុងខេត្តកំពង់ស្ពឺ ហើយគម្រោងវិនិយោគមួយចំនួនទៀត បានប្រមូលផ្តុំនៅរាជធានីភ្នំពេញ និងខេត្តជុំវិញរាជធានីភ្នំពេញ គឺខេត្តកណ្តាល និងខេត្តតាកែវ និងនៅតាមបណ្តាខេត្ត ដែលមានការអភិវឌ្ឍតំបន់សេដ្ឋកិច្ចពិសេស គឺខេត្តស្វាយរៀង និងខេត្តព្រះសីហនុ។នេះបើតាមការបញ្ជាក់បន្ថែមពី ក្រុមប្រឹក្សាអភិវឌ្ឍន៍កម្ពុជា៕ អត្ថបទ៖ រង្សី

The post រដ្ឋាភិបាលបង្ហាញជំហរកែប្រែមុខមាត់រាជធានីភ្នំពេញឱ្យមានភាពស្រស់បំព្រង លើកកម្ពស់ផាសុកភាពក្នុងការរស់នៅ appeared first on .

ក្នុងពិធីទទួលជួបសម្តែងការគួរសម និងពិភាក្សាការងារជាមួយលោកស្រី Eda Kraja នាយកប្រចាំប្រទេសកម្ពុជា និងឡាវ នៃការិយាល័យអង្គការសហប្រជាជាតិសម្រាប់សេវាកម្មគម្រោង (UNOPS) នាព្រឹកថ្ងៃទី១២ ខែកុម្ភៈ ​​នៅ​ទីស្តីការក្រសួង ដើម្បីឈ្វេងយល់ និងសិក្សាឱ្យបានស៊ីជម្រៅអំពីគោលនយោបាយអាទិភាពរបស់ក្រសួង និងធ្វើកិច្ចសហការជាមួយគ្នា​ក្នុង​ការអនុវត្តគម្រោងប្រកបដោយប្រសិទ្ធភាព លោក សាយ សំអាល់ បាន​លើកឡើង​ថា ក្រសួងត្រូវការថវិកាប្រមាណ ១០០ លានដុល្លារអាមេរិក ដើម្បីបង្ហើយការចុះបញ្ជីដីធ្លីទូទាំងប្រទេស ហើយតាមផែនការគឺគ្រោងនឹងបញ្ចប់ក្នុងរយៈពេល ២ ឆ្នាំខាងមុខ។

បន្ថែមពីនេះ នារសៀល​ថ្ងៃ​ដដែល លោកឧបនាយករដ្ឋមន្ត្រី ក៏បាន​ទទួល​ជួប​ពិភាក្សាការងារជាមួយ លោក​ Igor Driesmans ឯកអគ្គ​រដ្ឋទូតនៃស្ថានប្រតិភូសហភាពអឺរ៉ុបប្រចាំព្រះរាជាណាចក្រកម្ពុជា។ ក្នុងជំនួប​នេះ លោករដ្ឋមន្ត្រីក្រសួងរៀបចំដែនដី ​​បាន​ស្នើសហភាពអឺរ៉ុប​ពិនិត្យលទ្ធភាពធ្វើកិច្ចសហប្រតិបត្តិការលើការងារចុះបញ្ជីដីធ្លីទូទាំងប្រទេស ​ហើយ​លោក​បាន​ឱ្យ​ដឹង​ផងដែរថា កន្លង​មក​រដ្ឋាភិបាលជប៉ុន បានផ្តល់ជំនួយសម្ភារៈសម្រាប់ការចុះបញ្ជីដីធ្លី ហើយក្រសួងសេដ្ឋកិច្ច និងហិរញ្ញវត្ថុ កំពុង​ស្វែង​រកថវិកាប្រមាណជាង ១០០ លានដុល្លារអាមេរិក ដើម្បីចុះបញ្ជីដីធ្លី ៥ លានក្បាលដីទៀតទូទាំងប្រទេសឱ្យបានចប់សព្វគ្រប់។

សូម​ជម្រាប​ថា ការងារអាទិភាពមួយ​របស់ក្រសួង នៅ​អាណត្តិថ្មី​នេះ​ គឺការចុះបញ្ជីដីធ្លីជូនប្រជាពលរដ្ឋ ដើម្បីរួមចំណែកកាត់បន្ថយវិវាទដីធ្លី និងឈានទៅបង្កើតបរិយាកាសគ្មានវិវាទនៅទូទាំងប្រទេស ដើម្បីផ្តល់សុវត្ថិភាពក្នុងការកាន់កាប់ដីធ្លីស្របច្បាប់ និងធ្វើឱ្យ​ជីវភាព​រស់នៅរបស់ប្រជាពលរដ្ឋកាន់តែប្រសើរឡើង ព្រមទាំងជំរុញកំណើនសេដ្ឋកិច្ចជាតិបន្ថែមទៀត៕ ​

The post ក្រសួងកំពុងស្វែងរកថវិកាជាង ១០០លានដុល្លារ ដើម្បីបញ្ចប់ការចុះបញ្ជីដីធ្លីទូទាំងប្រទេស ក្នុងរយៈពេល២ឆ្នាំខាងមុខ appeared first on .

កិច្ចប្រជុំពិភាក្សានេះបានឯកភាពលើទស្សនទានរួមនៃការគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា ប្រែក្លាយជាក្បាលម៉ាស៊ីនសេដ្ឋកិច្ចជំរុញកំណើនសេដ្ឋកិច្ចកម្ពុជា ដើម្បីអោយសក្តិសមជាតារារះនាទិសនារតី និងជាសមាជិកក្លឹបឆ្នេរសមុទ្រដែលស្អាតបំផុតលើសាកលលោក ព្រមទាំងការពិគ្រោះយោបល់លើការរៀបចំបញ្ចប់គម្រោងអភិវឌ្ឍន៍ឆ្នេរខ្សាច់កម្សាន្តសាធារណៈប្រណិតកម្រិតខ្ពស់ប្រវែង ២៧០០ម៉ែត្រនៅខេត្តកែប។

ជាមួយគ្នានេះ លោក សាយ សំអាល់ ក៏បានដឹកនាំការពិគ្រោះយោបល់លើផែនការអភិវឌ្ឍន៍ផ្លូវជិះកង់ប្របមាត់សមុទ្រដោយតភ្ជាប់ខេត្តទាំងបួននៃតំបន់ឆ្នេរសមុទ្រកម្ពុជា ដែលជាផលិតផលទេសចរណ៍ដ៏ទាក់ទាញសម្រាប់តំបន់ឆ្នេរសមុទ្រកម្ពុជា។

លោកឧបនាយករដ្ឋមន្ដ្រី សាយ សំអាល់ បានលើកឡើងថា តំបន់ឆ្នេរជាប៉ូលសេដ្ឋកិច្ចដ៏ធំសម្រាប់កម្ពុជា ដោយអាចផ្ដល់ចំណូលជូនជាតិបានប្រមាណ ២ ០០០ លានដុល្លារក្នុងមួយឆ្នាំ។

លោកបន្តថា គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា គឺជាយន្តការរួមសម្រាប់សម្របសម្រួលជាមួយក្រសួង រដ្ឋបាលថ្នាក់ក្រោមជាតិ និងភាគីពាក់ព័ន្ធ ដូច្នេះទាំងអស់គ្នា ត្រូវគិតជារួមថាក្នុងចំងាយផ្លូវឆ្នេរពីខេត្តកែបដល់ខេត្តកោះកុង តំបន់ណាជាប៉ូលសេដ្ឋកិច្ច ជាឆ្នេររួម ជាឆ្នេរដាច់ដោយដុំ តើគួរអភិវឌ្ឍបែបណា ស្របតាមសក្តានុពលនៃតំបន់នីមួយៗ ដើម្បីឱ្យប្រជាពលរដ្ឋ ឬអ្នកទេសចរបានលំហែកម្សាន្ត និងធ្វើលំហាត់ប្រាណដើម្បីសុខភាព៕

The post លោក សាយ សំអាល់៖ តំបន់ឆ្នេរជាប៉ូលសេដ្ឋកិច្ចដ៏ធំសម្រាប់កម្ពុជាដែលរកចំណូលចូលជាតិបាន ២ពាន់លានដុល្លារក្នុងមួយឆ្នាំ appeared first on .

ក្នុងពិធីសំណេះសំណាលជាមួយកម្មករនិយោជិតប្រមាណជិត ២ម៉ឺននាក់ នៅតាមបណ្តារោងចក្រ សហគសហគ្រាស ក្នុងស្រុកកណ្តាលស្ទឹង និងក្រុងតាខ្មៅ ខេត្តកណ្តាល នៅព្រឹកថ្ងៃទី០២ ខែវិច្ឆិកានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី មានប្រសាសន៍ថា សម្ដេចបានពិភាក្សាជាមួយរដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ចំពោះសំណើរបស់សមាគមអចលនទ្រព្យពាក់ព័ន្ធនឹងចំណុចមួយចំនួន។ សម្តេចបញ្ជាក់ថា តាមពិតមានគោលនយោបាយមួយ ដែលយើងចំហ តែអត់សូវមានអ្នកប្រើ ប្រហែលជាអត់ទាន់សូវដឹង ចឹងយើងនឹងផ្សព្វផ្សាយឲ្យប្រើ ព្រោះដើម្បីផលប្រយោជន៍ទាំងអស់។

សូមជម្រាបថា ដើម្បីដោះស្រាយបញ្ហាប្រឈមនានាក្នុងវិស័យសំណង់ និងអចលនទ្រព្យ សមាគមអ្នកអភិវឌ្ឍន៍លំនៅឋានកម្ពុជា និងក្រសួងរៀបចំដែនដី នគរូបនីយកម្ម និងសំណង់ បានរៀបចំកិច្ចប្រជុំបន្ទាន់ នាថ្ងៃទី២៣ ខែតុលាកន្លងទៅ ក្រោមវត្តមានឧបនាយករដ្ឋមន្រ្តី សាយ សំអាល់ និងអ្នកឧកញ៉ា លី ហួរ ប្រធានសមាគម។

បើតាមសមាគមអ្នកអភិវឌ្ឍន៍លំនៅឋានកម្ពុជា កិច្ចប្រជុំនេះបានពិភាក្សាលើខ្លឹមសារប្រធានបទសំខាន់ៗចំនួន ៣ ទី១.ពិភាក្សាលើស្ថានភាពវិស័យសំណង់រួមនៅកម្ពុជា ដែលកំពុងជួបបញ្ហាប្រឈមបច្ចុប្បន្ន។ ២.ពិភាក្សាលើស្ថានភាពហិរញ្ញវត្ថុ ដើម្បីរកហិរញ្ញប្បទានជួយគាំទ្រ និងទ្រទ្រង់ដល់វិស័យសំណង់នៅកម្ពុជា។ និងទី៣.ពិភាក្សាលើទិដ្ឋភាពច្បាប់ដើម្បីអនុញ្ញាតឲ្យជនបរទេសមានសិទ្ធិស្របច្បាប់ក្នុងការទិញលំនៅឋាន និងដីនៅក្នុងគម្រោងបុរី។

ក្នុងកិច្ចប្រជុំបន្ទាន់នោះ ឧបនាយករដ្ឋមន្រ្តី សាយ សំអាល់ ក៏បានលើកបន្ថែមថា ក្រសួងក៏បានរៀបចំសំណើ និងគោលនយោបាយមួយចំនួនបន្ថែមទៀតដើម្បីដាក់ស្នើជូនទៅប្រមុខរាជរដ្ឋាភិបាល ក្នុងការជួយគាំទ្រដល់វិស័យសំណង់៕

The post លទ្ធផលសំណើដោះស្រាយបញ្ហាប្រឈមក្នុងវិស័យអចលនទ្រព្យ នឹងប្រកាសនៅថ្ងៃ១៣វិច្ឆិកា appeared first on .

ថ្មីៗកន្លងទៅនេះ លោក សាយ សំអាល់ ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា បើកកិច្ចប្រជុំបន្ទាន់ «ពិភាក្សាអំពីស្ថានភាពវិស័យសំណង់នៅកម្ពុជា» ដោយភាគីទាំងពីរជជែកលើទិដ្ឋភាពច្បាប់ដើម្បីអនុញ្ញាតឲ្យជនបរទេសមានសិទ្ធិស្របច្បាប់ក្នុងការទិញលំនៅឋាន និងដីនៅក្នុងគម្រោងបុរី។

ក្នុងកិច្ចប្រជុំនេះ ឧបនាយករដ្ឋមន្រ្តី សាយ សំអាល់ បានប្រាប់អ្នកឧកញ៉ា លី ហួរ ថា ក្រសួងរៀបចំដែនដីបានរៀបចំសំណើ និងគោលនយោបាយមួយចំនួនបន្ថែមទៀត ដើម្បីដាក់ស្នើជូនទៅប្រមុខរាជរដ្ឋាភិបាល ក្នុងការជួយគាំទ្រដល់វិស័យសំណង់។

រាជរដ្ឋាភិបាលកម្ពុជា កន្លងទៅក៏បង្កើតច្បាប់ស្ដីពីការផ្ដល់សិទ្ធិកម្មសិទ្ធិ លើចំណែកឯកជននៃអគារសហកម្មសិទ្ធិ (ខុនដូ) ដល់ជនបរទេស ចុះថ្ងៃទី២៤ ខែឧសភា ឆ្នាំ២០១០ ដែលផ្ដល់លក្ខខណ្ឌពិសេស ដល់ជនបរទេសទាំងឡាយ ក្នុងការទទួលបានសិទ្ធិ ក្លាយជាកម្មសិទ្ធិករស្របច្បាប់ លើចំណែកឯកជននៃអគារសហកម្មសិទ្ធិ។ ច្បាប់នេះ ក៏មានគោលបំណងបង្កលក្ខណៈងាយស្រួលដល់ជនបរទេស ក្នុងការមកវិនិយោគទុននៅប្រទេសកម្ពុជា ក៏ដូចជាជួយគាំទ្រដល់ការរីកដុះដាល នៃវិស័យអចលនទ្រព្យ និងវិស័យសំណង់នៅក្នុងប្រទេសផងដែរ។

សូមជម្រាបជូនថា បណ្តាប្រទេសមួយចំនួននៅអាស៊ីដែលជនបរទេសអាចទិញ និងធ្វើជាម្ចាស់កម្មសិទ្ធិដីធ្លីបានមានដូចជា៖ ប្រទេសម៉ាឡេស៊ី, ជប៉ុន, កូរ៉េ, តៃវ៉ាន់ និងសឹង្ហបុរីជាដើម៕

The post កម្ពុជា កំពុងពិភាក្សាទិដ្ឋភាពច្បាប់ឱ្យជនបរទេសមានសិទ្ធិទិញដីធ្លីក្នុងបុរី និងលំនៅឋានស្របច្បាប់បាន appeared first on .