សមាគមស្វាយចន្ទីកម្ពុជា បានឱ្យដឹងថា ពិធីចុះកិច្ចសន្យាអំពី ផលិតកម្មកសិកម្មតាមកិច្ចសន្យាទិញ-លក់ គ្រាប់ស្វាយចន្ទីពូជ M23 ចំនួន ១០៥០ តោនរវាងក្រុមហ៊ុន អូឡាំ និងសហគមន៍កសិកម្ម ចំនួន ៦ ក្នុងនោះមាន៖ សហគមន៍ទំនើបប្រាសាទសំបូររុងរឿង សហគមន៍កសិកម្មភ្នំសន្ទុក សហគមន៍កសិកម្មក្រយាសាមគ្គី សហគមន៍កសិកម្មងនជោគជ័យសេរីសាមគ្គី សហគមន៍កសិកម្មសន្ទុកសាមគ្គី សហគមន៍កសិកម្មទីពោសាមគ្គី។

គួរឱ្យដឹងថា សហគមន៍៣ ក្នុងចំណោម៦នេះ បានជួបគ្នាដំបូងជាមួយក្រុមហ៊ុន អូឡាំ ក្នុងជំនួបធុរកិច្ចនាខែសីហា ២០២៥ កន្លងទៅ ដែលជាគំនិតផ្តួចផ្តើមនិងរៀបចំដោយ សមាគមស្វាយចន្ទីកម្ពុជា។ ជំនួបធុរកិច្ចនេះ ជាឧបករណ៍ដ៏មានឥទ្ធិពល សម្រាប់ការជួញដូរគ្រាប់ចន្ទី ដែលកន្លងមកក្រុមហ៊ុន Khmer Agro Cashew ក៏បានចុះកិច្ចសន្យាទិញលក់គ្រាប់ឆៅពីសហគមន៍ចំនូន៦ នៅខេត្តក្រចេះតាមយន្តការនេះផងដែរ។

គួរជម្រាបផងដែរថា យោងតាមទិន្នន័យក្រសួងកសិកម្ម រុក្ខាប្រមាញ់ និងនេសាទ កម្ពុជាដាំដុះស្វាយចន្ទីពូជក្នុងស្រុក M23 (​អឹម២៣) រហូតទៅ ៧៩% ។ ពូជអឹម២៣ ត្រូវបានទទួលស្គាល់គុណភាពជាលក្ខណៈអន្តរជាតិ។ ពូជអឹម២៣នេះ សមាគមស្វាយចន្ទីកម្ពុជា ក៏បានអះអាងថាមិនមែនពូជយកពីប្រទេសអ្នកនោះទេ៕

The post ក្រុមហ៊ុនមួយ ទិញគ្រាប់ស្វាយចន្ទីពូជ M23 ជាង១ពាន់តោន ពីសហគមន៍កសិកម្មចំនួន៦ នៅខេត្តកំពង់ធំ appeared first on .

ក្នុងដំណើរចុះពិនិត្យវឌ្ឍនភាពការដ្ឋានសាងសង់ទីតាំងប្រមូលទិញ និងកែច្នៃគ្រាប់ស្វាយចន្ទី និងដំឡូងមី ក្នុងខេត្តកំពង់ធំ និងកំពង់ចាម របស់ លោក កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) កាលពីថ្ងៃទី២៥ ខែកុម្ភៈ ឆ្នាំ២០២៦ បានឱ្យដឹងថា សហគ្រាសចំនួន២ទីតាំងនោះ រួមមាន៖

១. សហគ្រាសកែច្នៃស្វាយចន្ទី CSNC Agriculture Co., Ltd ស្ថិតនៅភូមិស្នោ ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ដែលជាចំណុចយុទ្ធសាស្ត្រក្នុងការប្រមូលទិញ និងកែច្នៃគ្រាប់ស្វាយចន្ទីឱ្យមានគុណភាពខ្ពស់។

២. ឃ្លាំងប្រមូលទិញរបស់លោក ងួន វណ្ណៈ ស្ថិតនៅភូមិថ្នល់បែកលិច ឃុំស្វាយទាប ស្រុកចំការលើ ខេត្តកំពង់ចាម ដែលជាទីតាំងដ៏សំខាន់សម្រាប់ប្រមូលទិញ និងស្តុកទុកគ្រាប់ស្វាយចន្ទី និងដំឡូងមី ពីបងប្អូនកសិករក្នុងតំបន់។

លោក កៅ ថាច បានឱ្យដឹងថា គោលបំណងនៃបេសកកម្មចុះពិនិត្យរបស់លោកនេះ គឺដើម្បីជំរុញការអភិវឌ្ឍខ្សែច្រវាក់តម្លៃកសិកម្មឱ្យកាន់តែរឹងមាំ ជាពិសេសធានាឱ្យបាននូវសមត្ថភាពស្តុកទុក និងការកែច្នៃកសិផលក្នុងស្រុក ដើម្បីលើកកម្ពស់ជីវភាពកសិករ និងឆ្លើយតបទៅនឹងតម្រូវការទីផ្សារ។

ជាមួយគ្នានេះក៏បង្ហាញពីការយកចិត្តទុកដាក់ខ្ពស់របស់ធនាគារ ARDB ក្នុងការគាំទ្រផ្នែកហិរញ្ញប្បទាន និងបច្ចេកទេស ដល់តួអង្គពាក់ព័ន្ធក្នុងវិស័យកសិកម្ម ដើម្បីប្រែក្លាយកម្ពុជាឱ្យទៅជា “អធិរាជស្វាយចន្ទី” និងពង្រឹងសន្តិសុខស្បៀងក្នុងតំបន់ឱ្យកាន់តែប្រសើរឡើងផងដែរ៕

The post ទីតាំងប្រមូលទិញ ស្តុកទុក និងកែច្នៃកសិផលសំខាន់ៗចំនួន០២ ក្នុងខេត្តកំពង់ធំ និងខេត្តកំពង់ចាម នឹងក្លាយជាចលករក្នុងការអភិវឌ្ឍវិស័យកសិឧស្សាហកម្ម appeared first on .

លោកស្រី ចម និម្មល បានបន្តថា កិច្ចប្រជុំនេះ ត្រូវបានរៀបចំឡើងក្នុងគោលបំណងដើម្បីពិនិត្យ និងសម្រេចលើសេចក្តីព្រាងរបាយការណ៍វាយតម្លៃពាក់អាណត្តិនៃការអនុវត្តគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ ព្រមទាំងពិភាក្សាស្វែងរកយន្តការជំរុញការអនុវត្តគោលនយោបាយជាតិនេះឱ្យកាន់តែមានប្រសិទ្ធភាព។

ជាលទ្ធផល លោកស្រីរដ្ឋមន្ត្រី បានវាយតម្លៃខ្ពស់ចំពោះលទ្ធផលនៃតាមដាន និងវាយតម្លៃការអនុវត្តគោលនយោបាយជាតិនេះ និងកិច្ចសហប្រតិបត្តិការយ៉ាងល្អប្រសើរពីអន្តរក្រសួង ស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍នៅក្នុងវិស័យស្វាយចន្ទី និងបានកត់សម្គាល់ពីសមិទ្ធផលល្អប្រសើរនៃការអនុវត្តគោលនយោបាយជាតិក្នុងរយៈពេល ២ឆ្នាំកន្លះកន្លងមកនេះ។
 
លើសពីនេះ កិច្ចប្រជុំគណៈកម្មការនេះ ក៏បានពិនិត្យ និងពិភាក្សាលើបញ្ហាប្រឈមលើវិស័យនេះ និងបានពិនិត្យស្វែងរកដំណោះស្រាយសមស្រប ដើម្បីបង្កើនប្រសិទ្ធិភាពនៃការអនុវត្តគោលនយោបាយជាតិនេះ និងជំរុញអភិវឌ្ឍន៍វិស័យស្វាយចន្ទីកម្ពុជាថែមទៀតផងដែរ។

សូមជម្រាបដែរថា ពេញមួយឆ្នាំ២០២៥ ពោលគិតចាប់ពីខែមករា រហូតដល់ខែធ្នូ ឆ្នាំ២០២៥  កម្ពុជា នាំចេញគ្រាប់ស្វាយចន្ទីឆៅបានជាង១ លានតោន កើនឡើង ២៧ % បើធៀបនឹងឆ្នាំ២០២៤ កន្លងទៅ។ នេះបើយោងតាមការបញ្ជាក់ ពីសមាគមគ្រាប់ស្វាយចន្ទីកម្ពុជា កាលពីពេលថ្មីនេះ។
 
ប្រភពដដែលបន្តថា កម្ពុជា បានទទួលចំណូល១,៥ពាន់លានដុល្លារពីការនាំចេញគ្រាប់ស្វាយចន្ទីឆៅនៅឆ្នាំ២០២៥ ខណៈទំហំទឹកប្រាក់ដែលកម្ពុជាអាចនាំចេញគ្រាប់ស្វាយចន្ទីនេះ គឺមានការកើនឡើងប្រមាណជា ៣០ ភាគរយ បើធៀបនឹងឆ្នាំមុន៕ អត្ថបទ៖ ហ្សាលីន

The post អន្តរក្រសួង ជំរុញការអនុវត្តគោលនយោបាយជាតិស្ដីពីស្វាយចន្ទីកម្ពុជា ឱ្យកាន់តែមានប្រសិទ្ធភាព appeared first on .

សមាគមគ្រាប់ស្វាយចន្ទីកម្ពុជា បានបន្តថា កម្ពុជា បានទទួលចំណូល១,៥ពាន់លានដុល្លារពីការនាំចេញគ្រាប់ស្វាយចន្ទីឆៅនៅឆ្នាំ២០២៥ ខណៈទំហំទឹកប្រាក់ដែលកម្ពុជាអាចនាំចេញគ្រាប់ស្វាយចន្ទីនេះ គឺមានការកើនឡើងប្រមាណជា ៣០ ភាគរយ បើធៀបនឹងឆ្នាំមុន។ ប្រភពដដែលបានអះអាងថា បរិមាណគ្រាប់ស្វាយចន្ទីឆៅដែលកម្ពុជានាំចេញនេះ គឺមានប្រមាណជា ១ លានតោនកើនឡើង ២៧ ភាគរយ ធៀបនឹងឆ្នាំ២០២៤ ផងដែរ។

តម្លៃគ្រាប់ស្វាយចន្ទីកម្ពុជា បានលក់ចេញកាលពីខែមីនា ដល់ខែមេសា គឺមួយតោនត្រឹមតែពី ១.២៥០ ទៅ១.៣៥០ដុល្លារប៉ុណ្ណោះ ប៉ុន្តែកាលពីនៅក្នុងខែតុលាតម្លៃដែលកសិករអាចលក់បានគឺវាឡើងដល់ទៅមួយតោនមានតម្លៃប្រហែល២.000ដុល្លារ ហើយទីផ្យារនាំចេញឆៅគឺទៅវៀតណាម ខណៈដែលកែច្នៃហើយគឺមាននាំចេញទៅជប៉ុនសហភាពអឺរ៉ុបជាដើម។នេះបើតាមការបញ្ជាក់បន្ថែមពី សមាគមគ្រាប់ស្វាយចន្ទីកម្ពុជា។

សូមរម្លឹកដែរថា ក្នុងឆ្នាំ២០២៤កន្លងទៅ កម្ពុជាផលិតបានគ្រាប់ស្វាយចន្ទីសរុប ៨៥ម៉ឺនតោន កើនឡើង២៦% ដែលធ្វើឱ្យកម្ពុជាជាប់ចំណាត់ថ្នាក់លេខ២ ជាប្រទេសដែលផលិតស្វាយចន្ទីបានច្រើនជាងគេនៅក្នុងសកលលោក៕ អត្ថបទ៖ហ្សាលីន

The post ឆ្នាំ២០២៥៖ កម្ពុជា នាំចេញគ្រាប់ស្វាយចន្ទីឆៅបានជាង១ លានតោន កើនឡើង ២៧ % appeared first on .

សមាគមស្វាយចន្ទីកម្ពុជា បានលើកឡើងថា រោងចក្រពីរនឹងដំណើរការនៅកំពង់ធំនិងមួយទៀតនៅកំពង់ចាមនៅឆ្នាំ២០២៦ ដោយរោងចក្រខ្មែរមួយសាងសង់រួចរាល់ កំពុងដំឡើងម៉ាស៊ីន មានសមត្ថភាពកែច្នៃគ្រាប់ចន្ទីឆៅ៤០តោនក្នុងមួយថ្ងៃ (១វេន) អាចដំណើរការខែឧសភា ២០២៦ ហើយរោងចក្រខ្មែរមួយទៀតកំពុងសាងសង់ មានខសមត្ថភាពកែច្នៃ ៥០តោនក្នុងមួយថ្ងៃ អាចដំណើរការចុងឆ្នាំ២០២៦ ខាងមុខ។

ជាមួយគ្នានេះ ក៏មានរោងចក្រខ្មែរមួយនៅចម្ការលើ ខេត្តកំពង់ចាម បានសាងសង់រួច ដំឡើងម៉ាស៊ីនរួច ដែលមានសមត្ថភាព៥០តោន(គ្រាប់ស្វាយចន្ទីឆៅ) ក្នុងមួយថ្ងៃ។

ទន្ទឹមនឹងនេះដែរ សមាគមស្វាយចន្ទីក៏បានបញ្ជាក់ថា មានរោងចក្រ៥ កំពុងរងចាំសួនកសិឧស្សាហកម្មស្វាយចន្ទីកំពង់ធំ ដើម្បីទទួលការលើកទឹកចិត្តផ្សេងៗពីរដ្ឋជាពិសេស QIP+ មានការបញ្ជាទិញគ្រាប់កែច្នៃមកពីអារ៉ាប់ដូចជា កាតា បារ៉ែន ឌូបៃ និង ចិន  តៃវ៉ាន់ និងអេស្ប៉ាញ។ លើសពីនេះ ការបញ្ជាទិញគ្រាប់ឆៅមកពីឥណ្ឌា ចិន វៀតណាម សមាគមស្វាយចន្ទីកម្ពុជាបានភ្ជាប់ទំនាក់ទំនងការបញ្ជារទិញទាំងនោះជាមួយរោងចក្រនិងក្រុមហ៊ុនជាសមាជិករួចរាល់ដែរ។

សូមបញ្ជាក់ថា ស្របពេលដែលកម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» ហើយក៏ជាប្រទេសផលិតស្វាយចន្ទីធំផងដែរនោះ កម្ពុជាក៏គ្រោងបង្កើតសួន​ឧស្សាហកម្មស្វាយចន្ទី ដែលផ្តោតសំខាន់លើការកែច្នៃគ្រាប់ស្វាយចន្ទី​ ដោយមានផ្ទៃដីទំហំជិត៦០០ហិកតា មានចម្ងាយពីទីរួមខេត្តកំពង់ធំ ជិត​១៣​គីឡូម៉ែត្រ។

លោក អួន ស៊ីឡុត ប្រធានសមាគមស្វាយចន្ទីកម្ពុជា ធ្លាប់បានបញ្ជាក់ថា «ខណៈពេលសួនកសិឧស្សាហកម្មនេះកើតឡើង ក្រុមហ៊ុនដែលបើករោងចក្រនៅតំបន់នេះអាចទទួលបានដូចជា ការអនុគ្រោះពន្ធដា និងពន្ធគយ, មានហេដ្ឋរចនាសម្ព័ន្ធជាស្រេចដែលគាំទ្រដោយរដ្ឋ, មានសិទ្ធិជាម្ចាស់នៅលើដីជួលពីរដ្ឋ​ដោយមិនចាំបាច់មានភាគទុននិកពីកម្ពុជា, ទទួលបានការជួលដីពីរដ្ឋក្នុងតម្លៃសមរម្យ​។ល។, និងមានការអនុគ្រោះជាច្រើនទៀត។

ដូចនេះច្បាស់ណាស់សួនកសិឧស្សាហកម្មស្វាយចន្តីនេះ អាចទាក់ទាញវិនិយោគបន្ថែម និងពិតជាជួយជម្រុញវិស័យកែច្នៃស្វាយចន្ទី បានយ៉ាងច្រើន បង្កើនប្រាក់ចំណូលចូលចរន្តសេដ្ឋកិច្ចជាតិ បង្កើតការងារ​និងផ្តល់តម្លៃបន្ថែមដល់កសិករ ផ្តល់ស្ថេរភាពតម្លៃកសិផល»។

គួរបញ្ជាក់ថា ខេត្តកំពង់ធំ មានផ្ទៃដីដាំដុះស្វាយចន្ទីប្រមាណ ១៥ម៉ឺនហិកតា។ ក្នុងនោះ ផ្ទៃដី​ប្រមូល​ផលជាង ១៤ម៉ឺនហិកតា និងទទួលបានទិន្នផលជាមធ្យម ១,៥ ក្នុង១ឆ្នាំ និងបរិមាណផលជាង ២២ម៉ឺនតោន ស្មើនឹង​ប្រមាណ ៣០ភាគរយ ក្នុងក្របខណ្ឌទូទាំងប្រទេស៕

The post រោងចក្រកែច្នៃស្វាយចន្ទីចំនួន៥ កំពុងរងចាំសួនកសិឧស្សាហកម្មស្វាយចន្ទីកំពង់ធំ ដើម្បីទទួលការលើកទឹកចិត្តផ្សេងៗពីរដ្ឋជាពិសេស appeared first on .

នៅក្នុងវេទិកាពាណិជ្ជកម្មស្វាយចន្ទីនិងម្រេច ស្តីពីការបើកច្រកទីផ្សារទៅកាន់សហភាពអឺរ៉ុប កាលថ្ងៃទី២៣ ខែតុលា លោកស្រី ចម និម្មល រដ្ឋមន្ត្រីក្រសួងពាណិជ្ជកម្មបានលើកឡើងថា យោងតាមទិន្ន័យរបស់អគ្គនាយកដ្ឋានគយ និងរដ្ឋាករ នៅឆ្នាំ២០២៤ កម្ពុជាបាននាំចេញស្វាយចន្ទី និងម្រេចកម្ពុជាមានទឹកប្រាក់៥៣៩លានដុល្លារ។ ដោយឡែកគិតត្រឹម៩ខែឆ្នាំ២០២៥នេះ ការនាំចេញស្វាយចន្ទីនិងម្រេចបានកើនឡើងដល់៨២៩លានដុល្លារ ។ ក្នុងនោះសម្រាប់ស្វាយចន្ទីនៅ៩ខែ ដើមឆ្នាំ២០២៥ កម្ពុជារកចំណូលបាន៨០១លានដុល្លារ កើនឡើងជាង៦០% បើប្រៀបធៀបនិងរយៈពេលដូចគ្នាឆ្នាំ២០២៤។

លោកស្រីបន្តទៀតថា ប្រទេសដែលតម្រូវការនាំចូលគ្រាប់ស្វាយចន្ទីស្រស់ពីកម្ពុជាមានចំនួនច្រើនជាងគេ មានវៀតណាម,អារ៉ាប់ប៊ីអេមីរ៉ាត់រួម, ស្វីស, ចិន និងម៉ាឡេស៊ី។ ដោយឡែកប្រទេសនាំចូលគ្រាប់ស្វាយចន្ទីកែច្នៃរបស់កម្ពុជាច្រើនជាងគេមាន អារ៉ាប់ប៊ី អេមីរ៉ាត់រួម ប៊ែលហ្សិច ប្រ៊ុយណេ ស្វីស និងប្រទេសអាល្លឺម៉ង់។ ចំពោះម្រេចទីផ្សារគោលដៅសំខាន់របស់កម្ពុជាមានប្រទេសវៀតណាម អង់គ្លេសនិងបណ្តាប្រទេសនៅក្នុងសហភាពអឺរ៉ុប ដូចជាអល្លឺម៉ង់, បារាំង សាធារណរដ្ឋឆែក ប៊ែលហ្សិច រុស្ស៊ី រួមនិងបណ្តាលប្រទេសផ្សេងទៀតនៅលើពិភពលោក។

ទាក់ទងនិងដំណាំសក្តានុពលទាំងពីរប្រភេទខាងលើ បើតាមលោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងឆ្នាំ២០២៥នេះ តាមការប៉ាន់ស្មានរបស់ក្រសួងកសិកម្ម កម្ពុជាមានដំណាំស្វាយចន្ទីមានប្រមាណ៦០ម៉ឺនហិកតា មានបរិមាណផលប្រមាណ១លានតោន, ដំណាំម្រេចមានផ្ទៃដីដាំដុះប្រមាណជាង៧ពាន់ហិកតា មានបរិមាណផលជាង២លានតោន។

លោកបន្តថា ទោះបីជាដំណាំទាំងពីរប្រភេទមានការរីកចម្រើនយ៉ាងណាក្តី ដំណាំទាំងនេះនៅមានបញ្ហាប្រឈមមួយចំនួនដូចជា កសិករមួយចំនួនមិនទាន់បានយល់ច្បាស់ពីបច្ចេកទេស ការថែទាំ ការគ្រប់គ្រងសមាសភាពចង្រៃ ការប្រើប្រាស់ថ្នាំកសិកម្មមិនទាន់មានប្រសិទ្ធភាពជាដើម។

ក្រសួងកសិកម្ម រុក្ខាប្រមាញ់ និងនេសាទ បាននិងកំពុងបន្តអនុវត្តយុទ្ធសាស្ត្រ និងកម្មវិធីជាច្រើនដើម្បីគាំទ្រលើវិស័យនេះ៖ ១)ជំរុញការប្រើប្រាស់បច្ចេកទេសកសិកម្មល្អដើម្បីធានាឱ្យផលិតផលឱ្យកាន់តែមានគុណភាពខ្ពស់ស្របតាមស្តង់ដារអនាម័យ និងភូតគាមអនាម័យទៅតាមលក្ខខណ្ឌតម្រូវរបស់ទីផ្សារអន្តរជាតិ ជាពិសេសសហភាពអឺរ៉ុប និង ២)គាំទ្រការបង្កើតសហគមន៍កសិកម្មទំនើបដើម្បីជួយកសិករឱ្យមានភាពងាយស្រួលក្នុងការប្រមូលផល ការចរចារតម្លៃ និងអនុវត្តស្តង់ដាររួមគ្នា។ ការបើកច្រកទីផ្សារទៅកាន់សហភាពអឺរ៉ុបគឺជាទីផ្សារដ៏ធំមួយ មានតម្រូវការខ្ពស់ផលិតផលកសិកម្មដែលមានគុណភាព និងមាននិរន្តរភាព។ ទីផ្សារសហភាពអឺរ៉ុបមិនត្រឹមតែបង្កើនតម្លៃបន្ថែមនិងប្រាក់ចំណូលជូនកសិករ និងអ្នកកែច្នៃប៉ុណ្ណោះទេ ប៉ុន្តែជាការទទួលស្គាល់ជាផ្លូវការនូវគុណភាព របស់កសិផលរកម្ពុជានៅលើឆាកអន្តរជាតិផងដែរ៕

The post កម្ពុជាប្រមូលចំណូលពីការនាំចេញស្វាយចន្ទី និងម្រេចបានប្រមាណ៨២៩លានដុល្លារ appeared first on .

លោកបានថ្លែងបែបននេះនៅក្នុងឱកាសដឹកនាំក្រុមការងារជំនាញ ពិនិត្យផលិតកម្មដំណាំស្វាយចន្ទី និងដំណាំដំឡូងមី និងជួបសំណេះសំណាលជាមួយប្រជាកសិករ នៅឃុំស្វាយទាប ស្រុកចំការលើ ខេត្តកំពង់ចាម កាលពីថ្ងៃទី៧ ខែតុលា​ ឆ្នាំ២០២៥។

នាឱកាសជួបសំណេះសំណាលនោះ លោក តូច ប៊ុនហួរ បានលើកឡើងពីដំណាំស្វាយចន្ទីថាជាដំណាំឧស្សាហកម្មមួយប្រភេទ ដែលមានសក្កានុពលដ៏សំខាន់មួយ សម្រាប់ទីផ្សារក្នុងស្រុក និងក្រៅប្រទេស ដូច្នេះប្រជាកសិករគួរពិចារណាការធ្វើពិពិធកម្មពីការដាំដំណាំដំឡូងមី មកដាំស្វាយចន្ទីវិញ ដែលមិនព្រួយបារម្ភពីការរកទីផ្សារ និងចៀសវាងពីហានីភ័យនានាជាដើម។

ជាមួយគ្នានោះ លោកក៏បានផ្តល់ការណែនាំដល់មន្រ្តីកសិកម្មឃុំទាំងអស់ ដែលមានតួនាទីសំខាន់ នៅក្នុងឃុំមូលដ្ឋានរបស់ខ្លួននីមួយៗ ស្វះស្វែងក្នុងការជួយសម្របសម្រួលរកទីផ្សារ ផ្តល់ព័ត៌មានជូនប្រជាកសិករ ដើម្បីជំរុញអភិវឌ្ឍន៍ផលិតកម្មដំណាំស្វាយចន្ទី ជាពិសេសជួយលើកកម្ពស់ដល់ប្រជាកសិករអ្នកដាំដុះ អ្នកកែច្នៃ ក្នុងការធានានូវនិរន្តរភាព នៃទីផ្សារស្វាយចន្ទី សម្រាប់ផ្គត់ផ្គង់ក្នុងស្រុក និងនាំចេញទៅកាន់ទីផ្សារអន្តរជាតិ។

សូមបញ្ជាក់ថា កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក។

កម្ពុជាគឺជាប្រទេសផលិតគ្រាប់ស្វាយចន្ទីធំជាងគេទី២ របស់ពិភពលោក ប្រមាណ១៧% នៃចំណែកផលិតកម្មពិភពលោក​ បន្ទាប់ពីកូតឌីវ័រ ប្រមាណ២៤% នៃចំណែកផលិតកម្មពិភពលោកក្នុងឆ្នាំ២០២៤។ ខេត្តកំពង់ធំនឹងក្លាយជា សួនឧស្សាហកម្មស្វាយចន្ទី ខណៈការបង្កើតសួនឧស្សាហកម្មបែបនេះ គឺដើម្បីប្រមូលផ្ដុំរោងចក្រកែច្នៃតូច-ធំគ្រប់ប្រភេទ ដោយមានការគាំទ្រផ្នែកហេដ្ឋារចនាសម្ព័ន្ធផ្សេងៗពីរដ្ឋ៕

The post លោក តូច ប៊ុនហួរ៖ កសិករគួរពិចារណាការធ្វើពិពិធកម្មពីការដាំដំណាំដំឡូងមី មកដាំស្វាយចន្ទីវិញ ដែលមិនព្រួយបារម្ភពីការរកទីផ្សារ appeared first on .

ថ្លែងប្រាប់អ្នកសារព័ត៌មាន លោក ឃឹម ហ្វីណង់ បានឱ្យដឹងថា ឥណ្ឌាចង់ពិនិត្យមើលលទ្ធភាពពាក់ព័ន្ធនឹងការនាំចេញអង្ករ កម្ពុជាកំពុងសិក្សាពីលទ្ធភាពនៃការនាំចេញស្វាយចន្ទីនិងការនាំចេញអង្ករ គ្រឿងទេសមួយចំនួនទៀតដូចជាម្សៅល្មៀតជាដើម។

លោកបន្តថា នេះជាឱកាសប៉ុន្តែក្នុងចំណោមឱកាសដែលយើងពិនិត្យមើលទាំងអស់ ឱកាសធំជាងគេពាក់ព័ន្ធស្វាយចន្ទី ដោយសារឥណ្ឌាជាប្រទេសផលិតស្វាយចន្ទីច្រើនជាងគេមួយនៅលើពិភពលោក ហើយឥណ្ឌាក៏ជាអ្នកនាំចូលស្វាយចន្ទីធំជាងគេនៅលើពិភពលោកផងដែរ។ បច្ចុប្បន្ននេះឥណ្ឌានាំចូលស្វាយចន្ទីជាច្រើនពីប្រទេសអាហ្វ្រិក ដូច្នេះលទ្ធភាពធំណាស់សម្រាប់ប្រទេសកម្ពុជាដែលយើងមានស្វាយចន្ទីប្រហែលជា១លានតោនក្នុងមួយឆ្នាំ។

លោកបន្ថែមថា កន្លងមកទីផ្សាររបស់យើងមានច្រើន ហើយយើងមិនទាន់មានច្រើនពីប្រទេសឥណ្ឌាទេ ដោយសារឥណ្ឌានាំចូលច្រើន។ លោកថា បើការងារនេះអាចធ្វើទៅបានវានឹងផ្តល់ជាប្រយោជន៍សម្រាប់កសិកររបស់យើងជាពិសេសអ្នកមានចំការស្វាយចន្ទី។

លោក ឃឹម ហ្វីណង់ បានគូសបញ្ជាក់ថា អ្វីដែលយើងធ្វើមិនទាន់បានល្អនៅឡើយគឺយើងមិនទាន់បានកែច្នៃមុនធ្វើការនាំចេញ ដែលធ្វើឱ្យសេដ្ឋកិច្ចជាតិមិនអាចទទួលបានតម្លៃបន្ថែមច្រើន។ តែទោះបីជាយ៉ាងណា រាជរដ្ឋាភិបាលជាពិសេសសម្តេចធិបតីបានជំរុញការកែច្នៃស្វាយចន្ទីតាមរយៈការគម្រោងដាក់ឱ្យមាននូវកសិឧស្សាហកម្មស្វាយចន្ទី ដោយយកខេត្តកំពង់ធំប្រែឱ្យក្លាយជាសួនឧស្សាហកម្មស្វាយចន្ទីដំធំចំណុចកណ្តាលរបស់កម្ពុជា ដែលអាចឱ្យកម្ពុជាឈានទៅប្រែក្លាយជាប្រទេសអធិរាជស្វាយចន្ទីនាពេលខាងមុខ៕

The post ឥណ្ឌាចង់នាំចេញគ្រាប់ស្វាយចន្ទីពីប្រទេសកម្ពុជាទៅកាន់ប្រទេសខ្លួន ស្របពេលដែលឥណ្ឌាមានតម្រូវការនាំចូលគ្រាប់ស្វាយចន្ទីក្នុងបរិមាណធំ appeared first on .

នៅក្នុងជំនួបនោះ លោក តូច ប៊ុនហួរ បានសម្តែងការស្វាគមន៍ដល់គណៈប្រតិភូឥណ្ឌា ដែលមានបំណងពង្រឹងកិច្ចសហប្រតិបត្តិការទ្វេភាគី និងស្វែងរកឱកាសវិនិយោគផលិតផលសក្តានុពលកម្ពុជា ជាក់ស្តែងការចាប់អារម្មណ៍ និងចង់បង្កើនការនាំចូលគ្រាប់ស្វាយចន្ទីស្រស់ ទៅកាន់ទីផ្សារឥណ្ឌា៖ ពង្រឹងពង្រីកការវិនិយោគលើដំណាំស្វាយចន្ទី ការកែច្នៃ និងការនាំចេញ ដោយបង្កើតរោងចក្រ សម្រាប់កែច្នៃគ្រាប់ស្វាយចន្ទីនៅខេត្តកំពង់ធំ និងពង្រីកការវិនិយោគលើវិស័យកសិកម្មដែលមានសក្តានុពល ដើម្បីបង្កើនកសិ-ពាណិជ្ជកម្មឱ្យកាន់តែមានទំហំកើនឡើងថែមទៀត រវាងប្រទេសទាំងពីរ។

លោកបានបញ្ជាក់ជូនគណ:ប្រតិភូធុរកិច្ចថា ប្រទេសកម្ពុជាបើកទូលាយស្វាគមន៍ដល់អ្នកវិនិយោគទាំងឡាយណា ដែលមានបំណងចង់បង្កើតរោងចក្រកែច្នៃគ្រាប់ស្វាយចន្ទី និងនាំចេញទៅកាន់ទីផ្សារអន្តរជាតិ។ កម្ពុជា ជាប្រទេសផលិតគ្រាប់ស្វាយច្រើន ដែលមានប្រភេទពូជល្អ គុណភាពខ្ពស់ នឹងរសជាតិឆ្ងាញ់ ដូចជាប្រភេទពូជ៖ M23 M10 H09 និង IM4។

គួរបញ្ជាក់ថា បន្ទាប់ពីកិច្ចពិភាក្សាខាងលើ គណៈប្រតិភូឥណ្ឌា នឹងបន្តជួបជាមួយវិស័យឯកជនកម្ពុជា និងធ្វើទស្សនកិច្ចឆ្ពោះទៅខេត្តកំពង់ធំ ដែលជាតំបន់សក្តានុពលស្វាយចន្ទី សំដៅបង្កើនការវិនិយោគលើកែថ្នៃគ្រាប់ស្វាយចន្ទីកម្ពុជា មិនត្រឹមតែប៉ុណ្ណោះជំរុញការពង្រឹងនិងពង្រីកកិច្ចសហប្រតិបត្តិរវាងប្រទេសទាំងពីរ។

កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក។

កម្ពុជាគឺជាប្រទេសផលិតគ្រាប់ស្វាយចន្ទីធំជាងគេទី២ របស់ពិភពលោក ប្រមាណ១៧% នៃចំណែកផលិតកម្មពិភពលោក​ បន្ទាប់ពីកូតឌីវ័រ ប្រមាណ២៤% នៃចំណែកផលិតកម្មពិភពលោកក្នុងឆ្នាំ២០២៤៕

The post ឥណ្ឌា មានបំណងចង់បង្កើនការនាំចូលគ្រាប់ស្វាយចន្ទីស្រស់កម្ពុជាទៅកាន់ទីផ្សាររបស់ខ្លួន appeared first on .

លោក សុខ សារ៉ង អ្នកជំនាញការខាងម៉ាកសម្គាល់ភូមិសាស្ត្រទំនិញ(GI)បានឱ្យដឹងថា “ស្វាយចន្ទីកំពង់ធំយើងគ្រោងចុះបញ្ជីឱ្យបានយ៉ាងយូរអាចនៅដើមឆ្នាំ២០២៦។ ការចុះបញ្ជីស្វាយចន្ទីកំពង់ធំនេះ យើងរំពឹងថាវានឹងជួយពង្រីកទីផ្សារបានបន្ថែមទៅលើផ្សារដែលយើងមានស្រាប់ទាំងនៅក្នុងស្រុកនិងក្រៅប្រទេស ហើយតម្លៃនឹងកើនឡើងជាងមុន”។

លោក អួន ស៊ីឡុត ប្រធានសមាគមស្វាយចន្ទីកម្ពុជា ចាត់ទុកស្វាយចន្ទីកំពង់ធំនេះបាននិងកំពុងបោះជំហ៊ានថ្មីមួយទៀតទៅរកការទទួលបានឋានៈជាផលិតផលម៉ាកសម្គាល់ភូមិសាស្ត្រទំនិញ (GI)នៅពេលខាងមុខ។

លោក អួន ស៊ីឡុត មានប្រសាសន៍ថា “ស្វាយចន្ទីកំពង់ធំទទួលបានឋានៈជាផលិតផលម៉ាកសម្គាល់ភូមិសាស្ត្រទំនិញ អាចមានអត្ថប្រយោជន៍ច្រើន សម្រាប់ឧស្សាហកម្មស្វាយចន្ទី។ ដូចជាបង្កើនតម្លៃទីផ្សារផលិតផល,បង្កើនសក្តានុពលនៃការនាំចេញ និងរក្សាចំណេះដឹងប្រពៃណី។ លើសពីនេះវាបានចូលរួមចំណែកអភិវឌ្ឍន៍ជនបទដោយការពាផលិតផលក្នុងស្រុកនិងផ្តល់អំណាចដល់អ្នកផលិតតាមរយៈម៉ាកសមូហភាពមួយនេះ”។

លោកបន្តថា ជាមួយនិងគំនិតផ្តួចផ្តើមថ្មីនេះ កម្ពុជាបន្តកិច្ចខិតខំប្រឹងប្រែងបន្ថែមទៀតដើម្បីលើកកម្ពស់ផលិតផល GI ដែលជាមធ្យោបាយមួយសម្រាប់កសាងមោទនភាពជាតិ ធានាបាននូវស្តង់ដារគុណភាព និងជំរុញការប្រកួតប្រជែងនៅក្នុងទីផ្សារពិភពលោក។

បើយោងតាមអ្នកជំនាញម៉ាកសម្គាល់ភូមិសាស្ត្រទំនិញខាងលើ គូសបញ្ជាក់ថា ម៉ាកសម្គាល់ភូមិសាស្ត្រទំនិញដែលបានចុះបញ្ជីរួចមាន៖(១)-ម្រេចកំពត បានចុះបញ្ជីនៅថ្ងៃទី០២ ខែមេសា ឆ្នាំ២០១០,(២)-ស្ករត្នោតកំពង់ស្ពឺបានចុះបញ្ជីនៅថ្ងៃទី០២ ខែមេសាឆ្នាំ២០១០,(៣)-ក្រូចថ្លែងកោះទ្រង់បានចុះបញ្ជីនៅថ្ងៃទី១៥ ខែមិថុនាឆ្នាំ២០១៨,(៤)-ទឹកឃ្មុំព្រៃមណ្ឌលគិរី បានចុះបញ្ជីនៅថ្ងៃទី១០ ខែធ្នូ ឆ្នាំ២០២០,(៥)-អំបិលកំពតកែបបានចុះបញ្ជីនៅថ្ងៃទី២៤ ខែមេសាឆ្នាំ២០២៣,(៦)-ទឹកត្រីកំពតកែបបានចុះបញ្ជីនៅថ្ងៃទី២៤ ខែមេសាឆ្នាំ២០២៣,(៧)-បង្កងតាកែវ បានចុះបញ្ជីនៅថ្ងៃទី២៤ ខែមេសា ឆ្នាំ២០២៣,និង(៨)-ប្រហុកសៀម រាប ចុះបញ្ជីនៅថ្ងៃទី១៨ ខែមេសា ឆ្នាំ២០២៥៕

The post ស្វាយចន្ទីកំពង់ធំកំពុងបោះជំហ៊ានឆ្ពោះទៅរកផលិតផលម៉ាក “GI” appeared first on .