អ្នកឧកញ៉ាបានបញ្ជាក់ថា ការប្រឡងធ្លាក់ ឬជាប់ មិនមែនជាគ្រឿងវាស់វែងអំពីសមត្ថភាព ជំនាញ ចំណេះដឹង អត្តចរិត ឬការលូតលាស់នៃជីវិតទៅមុខនោះទេ ហើយក៏គ្មាននរណាម្នាក់អាចកាត់ក្ដីជីវិតរបស់យើងបានដែរ។ ការប្រឡងនេះ គឺជាជំពូកមួយយ៉ាងតូចក្នុងចំណោមរាប់រយជំពូកនៃជីវិតប៉ុណ្ណោះ ហើយជីវិតរបស់សិស្សានុសិស្សគឺទើបតែចាប់ផ្ដើម និងនៅមានផ្លូវដើរវែងឆ្ងាយទៀត។ ដូច្នេះ ពេលធ្លាក់បាក់ឌុប មិនមែនជាពេលត្រូវអស់សង្ឃឹមនោះឡើយ ព្រោះយើងនៅមានជម្រើសច្រើនក្នុងដៃ។

ចំពោះទិសដៅទៅមុខទៀត អ្នកឧកញ៉ាបានផ្ដល់ជម្រើសជាច្រើន។ ប្រសិនបើចង់បានសញ្ញាបត្របាក់ឌុបខ្លាំង សិស្សអាចត្រៀមខ្លួនប្រឡងឡើងវិញនៅឆ្នាំបន្ទាប់ ឬអាចជ្រើសរើសរៀនថ្នាក់បរិញ្ញាបត្ររង ដើម្បីបន្តការសិក្សាទៅមុខទៀត។ លើសពីនេះ សិស្សក៏មិនបាច់ខ្វល់ខ្វាយលើសញ្ញាបត្របាក់ឌុបពេកនោះដែរ ដោយសារបច្ចុប្បន្នមានសាលាបណ្ដុះបណ្ដាលជំនាញជាច្រើន ពីព្រោះទីផ្សារការងារ និងប្រទេសជាតិ ត្រូវការកម្លាំងពលកម្មផ្នែកជំនាញរហូតដល់ជាង ៦០% ឯណោះ ដែលតម្រូវការភាគច្រើនមិនមែនជាថ្នាក់បរិញ្ញាបត្រនោះទេ ប៉ុន្តែជាជំនាញបច្ចេកទេសជាក់ស្ដែង។

ជាមួយគ្នានេះដែរ អ្នកឧកញ៉ាបានលើកឡើងថា ការរៀនជំនាញវិជ្ជាជីវៈខ្លីៗ ឆាប់ចប់ និងចេះពិតប្រាកដ អាចផ្ដល់ឱកាសឱ្យទទួលបានប្រាក់ខែខ្ពស់ ពេលខ្លះអាចខ្ពស់ជាងអ្នកបញ្ចប់ថ្នាក់បរិញ្ញាបត្រជាន់ខ្ពស់ (Master’s Degree) ទៀតផង។ ជាក់ស្ដែង អ្នកជំនាញបច្ចេកទេសដូចជា ជាងម៉ាស៊ីនត្រជាក់ ជួសជុលរថយន្ត អេឡិចត្រូនិក មេកានិច សំណង់ ឬជំនាញ Software ផ្សេងៗ គឺសុទ្ធសឹងជាជំនាញដែលទីផ្សារត្រូវការខ្លាំង និងទទួលបានប្រាក់ខែល្អ ហើយភាគច្រើនតម្រូវត្រឹមតែវិញ្ញាបនបត្រ (Certificate) ឬសញ្ញាបត្រវិជ្ជាជីវៈ (Diploma) ប៉ុណ្ណោះ។ បច្ចុប្បន្ន រាជរដ្ឋាភិបាលក៏កំពុងជំរុញ គាំទ្រ និងផ្តល់អាហារូបករណ៍ជាច្រើនលើផ្នែកជំនាញវិជ្ជាជីវៈនេះផងដែរ៕

The post អ្នកឧកញ៉ា គួច ម៉េងលី៖ ការធ្លាក់បាក់ឌុប មិនមែនជាទីបញ្ចប់នៃជីវិត ហើយក៏មិនអាចកាត់ក្ដីវាសនារបស់យើងបានឡើយ appeared first on .

ជាដំបូង សិស្សានុសិស្សត្រូវធ្វើការស្រាវជ្រាវអំពីគ្រឹះស្ថានសិក្សាឱ្យបានច្បាស់លាស់ ថាតើគួរជ្រើសរើសចូលរៀននៅសាកលវិទ្យាល័យដើម្បីយកបរិញ្ញាបត្រ ចូលរៀននៅវិទ្យាស្ថាន TVET យកបរិញ្ញាបត្រជំនាញ ឬក៏រៀនវគ្គវិជ្ជាជីវៈផ្សេងៗ។ បច្ចុប្បន្ន ប្រទេសកម្ពុជាមិនបានផ្ដោតតែលើសាកលវិទ្យាល័យមួយមុខនោះទេ ពីព្រោះក្នុងនាមជាប្រទេសកំពុងអភិវឌ្ឍន៍ កម្ពុជាត្រូវការកម្លាំងពលកម្មផ្នែកជំនាញវិជ្ជាជីវៈរហូតដល់ជិត ៦០% ទៅហើយ។ ដូច្នេះ ការជ្រើសរើសជំនាញសិក្សា មិនថានៅសាកលវិទ្យាល័យ ឬនៅវិទ្យាស្ថាន TVET ឡើយ គឺត្រូវជ្រើសរើសជំនាញណាដែលឆ្លើយតបនឹងអនាគត និងតម្រូវការទីផ្សារការងារជាក់ស្តែង ដោយមិនត្រូវរៀនតាមតែចំណង់ចំណូលចិត្តមួយពេលនោះទេ។

ចំណុចបន្តទៀត សម្រាប់សិស្សដែលមានការខ្វះខាតផ្នែកថវិកា គឺត្រូវខិតខំស្វែងរកអាហារូបករណ៍ ដែលបច្ចុប្បន្នមានប្រភពយ៉ាងច្រើនសន្ធឹកសន្ធាប់ ទាំងពីរាជរដ្ឋាភិបាល ក្រុមហ៊ុនឯកជន និងសប្បុរសជននានា។ ទន្ទឹមនឹងនេះ សិស្សក៏ត្រូវគណនា និងប្រៀបធៀបថ្លៃសិក្សា រវាងការរៀននៅរាជធានីភ្នំពេញ និងនៅតាមបណ្តាខេត្ត ដោយត្រូវសិក្សាអំពីការចំណាយលើការរស់នៅប្រចាំថ្ងៃឱ្យបានល្អិតល្អន់ ប្រសិនបើត្រូវមកសិក្សានៅរាជធានីភ្នំពេញ។

ជាចុងក្រោយ អ្នកឧកញ៉ាក៏បានគូសបញ្ជាក់ដែរថា បន្ទាប់ពីប្រឡងជាប់ សិស្សមិនចាំបាច់ត្រូវចូលរៀននៅមហាវិទ្យាល័យភ្លាមៗនោះទេ ប្រសិនបើស្ថានភាពជីវភាពមិនទាន់អំណោយផល។ សិស្សអាចជ្រើសរើសទៅធ្វើការងារពេញម៉ោង ឬធ្វើការងារ Part-time មួយរយៈសិន ដើម្បីរកប្រាក់ចំណូលផ្គត់ផ្គង់ខ្លួនឯង និងបង្កើតឱកាសសម្រាប់បន្តការសិក្សានៅថ្ងៃខាងមុខ៕

The post អ្នកឧកញ៉ា គួច ម៉េងលី៖ ជាប់ឬធ្លាក់បាក់ឌុប គ្រាន់ជាជំពូក១នៃជីវិត តែដើម្បីបន្តដំណើរទៅមុខទៀត គួរត្រៀមខ្លួនអ្វីខ្លះ? appeared first on .

នៅថ្ងៃទី២៩ ខែកក្កដា ឆ្នាំ២០២៦ អ្នកឧកញ៉ា គួច ម៉េងលី ស្ថាបនិក ប្រធាន​ក្រុម​ប្រឹក្សាភិបាល និងជា​អ​គ្គ​នាយ​ក​​ប្រ​តិ​ប​ត្តិ​នៃក្រុ​ម​ហ៊ុន ម៉េងលី ជេ. គួច អេឌ្យូខេសិន​ បានបង្ហោះសារលើបណ្តាញសង្គមហ្វេសប៊ុក អបអរដល់កូនស្រី​បែបនេះថា៖ “កូនស្រីជាទីស្រឡាញ់របស់ប៉ានិងម៉ាក់, ថ្ងៃនេះ គឺជាថ្ងៃដ៏ពិសេសដែលប៉ានិងម៉ាក់មានមោទនភាព​ និងរំភើបចិត្តយ៉ាងក្រៃលែង។

សូមអបអរសាទរកូនស្រីជាទីស្រឡាញ់ដែលបានបញ្ចប់ការសិក្សាថ្នាក់បរិញ្ញាបត្រដោយជោគជ័យ ពីសាកល​វិទ្យាល័យ Queen Mary University of London ក្នុងលំដាប់ First Class Honours។ នេះជាសមិទ្ធផលដ៏​អស្ចារ្យនិង​ស័ក្តិសមបំផុត បន្ទាប់ពីកូនបានប្រឹងប្រែងអស់មួយរយៈពេលកន្លងមក។

ទន្ទឹមនឹងនេះដែរ ប៉ានិងម៉ាក់មានក្តីសោមនស្សនិងមោទនភាពយ៉ាងខ្លាំង ដែលកូនបានបន្តការសិក្សាថ្នាក់​បរិញ្ញាបត្រ​ជាន់ខ្ពស់​ផ្នែកវិទ្យាសាស្ត្រសេដ្ឋកិច្ចនិងយុទ្ធសាស្ត្រអាជីវកម្ម នៅ Imperial College London ដែលជាសាកលវិទ្យាល័យលំដាប់ពិភពលោកមួយ។

សមិទ្ធផលទាំងអស់នេះមិនមែនកើតឡើងដោយចៃដន្យទេ! ប៉ុន្តែដោយសារតែកូនបានខិតខំដោយមិនបោះបង់ មានភាពអត់ធ្មត់ខ្ពស់ មានវិន័យ មានទំនួលខុសត្រូវ និងតស៊ូ។ ប៉ានិងម៉ាក់ពិតជាកោតសរសើរ និងមានមោទនភាព​ណាស់ ចំពោះភាពរឹងមាំនិងការប្តេជ្ញាចិត្តខ្ពស់របស់កូន”។

អ្នកឧកញ៉ា បានបន្ថែមថា៖ “នៅពេលដែលកូនចាប់ផ្តើមបោះជំហានលើវិថីសិក្សាថ្មីនេះ ចូរកូនចាំជានិច្ចថា ជីវិតនឹងមានទាំងឱកាសនិងបញ្ហាប្រឈម។ ម៉្លោះហើយ ចូរកូនប្រកាន់ខ្ជាប់នូវភាពសុភាពរាបសា ស្មោះត្រង់ និងសុចរិតភាព។ ភាពជោគជ័យពិតប្រាកដមិនអាចវាស់វែងត្រឹមតែសន្លឹកសញ្ញាបត្រឬមុខតំណែងបាននោះទេ ប៉ុន្តែដោយសារបុគ្គលិកលក្ខណៈ ឥរិយាមារយាទ ភាពសប្បុរស និងសមានចិត្តចំពោះមនុស្សជុំវិញនិងសង្គមជាតិ។

មិនថាកូនទៅទីឆ្ងាយយ៉ាងណាឬជួបបញ្ហាប្រឈមបែបណាឡើយ ចូរកូនចងចាំថា កូននឹងតែងតែទទួលបាន​ក្តីស្រឡាញ់ ការគាំទ្រ និងភាពជឿជាក់ពីប៉ានិងម៉ាក់ជាប់ជានិច្ច។ សូមជូនពរកូនស្រី Jasmine Jing-Yian Quach ជាទីស្រឡាញ់ឱ្យទទួលបានជោគជ័យកាន់តែធំធេងក្នុងការសិក្សានៅ Imperial College London ព្រមទាំងមាន​សុខភាពល្អ ប្រាជ្ញាវាងវៃ កម្លាំងចិត្តរឹងមាំ សុភមង្គល និងសម្រេចបាននូវក្តីស្រមៃនិងគោលដៅ​ទាំងអស់នៅ​ក្នុងជីវិត។ ដោយក្តីស្រឡាញ់ពី ប៉ានិងម៉ាក់”។

គួររំឭកថា កូនស្រីច្បងរបស់ អ្នកឧកញ៉ា គួច ម៉េងលី ឈ្មោះ Jasmine Jing Yian Quach ​​​​បាន​បញ្ចប់​ការ​សិក្សា​​កម្រិត​ថ្នាក់​វិទ្យាល័យ ​​នៅ​សាលា Northbridge International School Cambodia (NISC) កាលខែសីហា ឆ្នាំ២០២២៕

The post កូនស្រីច្បងអ្នកឧកញ៉ា គួច ម៉េងលី បញ្ចប់ការសិក្សាថ្នាក់បរិញ្ញាបត្រនៅចក្រភពអង់គ្លេស ជានិស្សិតពូកែ appeared first on .

អ្នកឧកញ៉ា គួច ម៉េងលី ម្ចាស់សាលារៀន អន្តរទ្វីបអាមេរិកកាំង (AIS) និង​មជ្ឈមណ្ឌលភាសា អេអាយអាយ (Aii) ​​បាន​បង្ហោះសារ​​លើ​ហ្វេសប៊ុក នៅ​ថ្ងៃទី២៤ ខែឧសភា ឆ្នាំ២០២៦ ​ថា៖ សូមអបអរសាទរកូនស្រីជាទីស្រឡាញ់​របស់ម៉ាក់ និងប៉ា! ថ្ងៃនេះ មិនត្រឹមតែជាថ្ងៃបញ្ចប់ការសិក្សាប៉ុណ្ណោះទេ ប៉ុន្តែក៏ជាជំហានដ៏មានន័យមួយក្នុងជីវិត​របស់កូនផងដែរ។ ការមើលឃើញកូនលូតលាស់ធំធាត់ពីក្មេងស្រីតូចម្នាក់ ទៅជាយុវតីដែលរឹងមាំ មានចិត្តល្អ និងឆ្លាតវៃ ធ្វើឱ្យម៉ាក់ និងប៉ា មានមោទនភាព និងក្តីអំណរខ្លាំងណាស់”។

“ម៉ាក់ និងប៉ា ក៏មានមោទនភាពយ៉ាងខ្លាំង ដែលកូននឹងបន្តដំណើរសិក្សារបស់កូននៅសាកលវិទ្យាល័យ King’s College London ចក្រភពអង់គ្លេស។ នេះគឺជាឱកាសដ៏អស្ចារ្យមួយ និងជាការចាប់ផ្តើមនៃជំពូកថ្មីដ៏មានន័យ​ក្នុងជីវិតរបស់កូន។ នៅពេលកូនត្រៀមខ្លួនចាប់ផ្តើមជំពូកថ្មីនៃដំណើរជីវិត និងបន្តការសិក្សានៅបរទេស សូមកូនចងចាំថា ភាពជោគជ័យពិតប្រាកដ មិនមែនវាស់វែងត្រឹមតែតាមរយៈការសិក្សា និងការសម្រេចបាន​ប៉ុណ្ណោះទេ ប៉ុន្តែវាស្ថិតនៅលើអត្តចរិត វិន័យ និងជម្រើសដែលកូនត្រូវជ្រើសរើសក្នុងជីវិត”។ អ្នកឧកញ៉ា បានបន្ត។

អ្នកឧកញ៉ា គួច ម៉េងលី បានបន្ថែមថា៖ “កូនត្រូវជ្រើសរើសមនុស្សល្អៗនៅជុំវិញខ្លួន រក្សាគុណតម្លៃល្អរបស់ខ្លួន ហើយកុំឈប់រៀនសូត្រ និងអភិវឌ្ឍខ្លួនឯង។ មិនថាកូនទៅដល់ទីណាទេ កូននឹងនៅតែជាកូនស្រីជាទី​ស្រឡាញ់​របស់ម៉ាក់ និងប៉ា ជានិច្ច ហើយម៉ាក់ និងប៉ា នឹងតែងតែស្រឡាញ់ គាំទ្រ និងជឿជាក់លើកូនជានិច្ច។ ស្រឡាញ់កូន​ជានិច្ច ពីម៉ាក់និងប៉ា”។

គួររំឭកថា កាលខែសីហា ឆ្នាំ២០២២ កូនស្រីច្បងរបស់ អ្នកឧកញ៉ា គួច ម៉េងលី ឈ្មោះ Jasmine Jing Yian Quach ​​​​ក៏បាន​បញ្ចប់​ការ​សិក្សា​​កម្រិត​ថ្នាក់​វិទ្យាល័យ ​​នៅ​សាលា Northbridge International School Cambodia (NISC) ផងដែរ៕

The post កូនស្រីអ្នកឧកញ៉ា គួច ម៉េងលី មួយរូបទៀត បញ្ចប់ការសិក្សានៅសាលារបស់អ្នកឧកញ៉ា គិត ម៉េង appeared first on .

ក្នុងវីដេអូឃ្លីបចែករំលែកបទពិសោធន៍ជូនដល់សិស្សានុសិស្ស កាលពីពេលថ្មីៗនេះ អ្នកឧកញ៉ា បានលើកឡើងថា លោកគ្រូដល់អាយុ ៥៧ឆ្នាំ បានមានផ្ទះខ្លួនឯងរស់នៅ ដោយពីមុនគឺជួលផ្ទះគេរស់នៅរហូត។ ដូច្នេះសូមក្មួយៗកុំ​ខ្វល់ គ្មាននរណាមកខ្វល់រឿងយើងនោះទេ។ និយាយពីរឿងរថយន្ត រហូតដល់អាយុ ៤០ឆ្នាំជាង ទើបលោកមាន​រថយន្ត​ជិះផ្ទាល់ខ្លួន ហើយរថយន្តនេះលោកជិះមកទល់បច្ចុប្បន្ន។ ឱ្យតែយើងលាងស្អាត ជូតស្អាត គឺនៅតែឃើញថ្មី ហើយ​បើរថយន្តថ្មី ខ្ជិលលាងសម្អាត នោះមើលទៅក៏ចាស់ដែរ។ ចំពោះរថយន្តរបស់លោក ជិះជិត២០ឆ្នាំហើយ នៅតែថ្មី។ អ្នកខ្លះគេ​មាន​លុយ គេទិញឡានថ្មី រីឯអ្នកខ្លះមានលុយ គេមិនទិញឡានថ្មី ព្រោះគេមិនចង់ខ្ជេះខ្ជាយ ឬមានហេតុផល​ច្រើន​ទៀត។

អ្នកឧកញ៉ា បានបន្ថែមថា ដូច្នេះធ្វើអ្វីដែលយើងចង់ធ្វើ ធ្វើអ្វីដែលយើងចូលចិត្ត បើយើងនៅតែធ្វើតាមគេ យើងនឹង​រស់នៅ​ដោយ​តឹង​តែងអារម្មណ៍ យើងនឹងរស់នៅដោយគ្មានន័យ។ សូមរស់នៅដោយសប្បាយចិត្ត រស់នៅដោយ​មានសេចក្តីទូលំទូលាយ ពោរពេញដោយអារម្មណ៍របស់ខ្លួនឯង កុំចង្អៀតចង្អល់ កុំទិទាន កុំច្រណែន កុំគុំគួន កុំស្អប់ខ្ពើម កុំរិះគន់​មើលងាយ​គេ កុំពូជសាសន៍និយម នោះយើងនឹងសប្បាយ គេងលក់ស្រួល ញ៉ាំឆ្ងាញ់ ហើយ​មិនមានរឿងរ៉ាវអាស្រូវ មិនដេក​ភ័យ អង្គុយភ័យនោះទេ។ សូមរស់នៅដោយសាមញ្ញ ជីវិតយើងមានតែមួយពេលទេ អ្នកខ្លះអស្ចារ្យដល់ស្អែកឡើង​ទៅបាត់ មិនទាន់បានចាយលុយផង មិនទាន់បានលាកូនចៅផង ដូច្នេះសូមរស់នៅ​ដោយក្តីសប្បាយ ហើយបើក្រគឺក្រឱ្យថ្លៃថ្នូរ៕

The post អ្នកឧកញ៉ា គួច ម៉េងលី៖ សេចក្តីសុខដ៏សាមញ្ញ គឺការរស់នៅដោយមិនប្រៀបធៀបជាមួយអ្នកដទៃ appeared first on .

តាមរយៈបណ្តាញសង្គម នៅថ្ងៃទី១៦ ខែមេសា អ្នកឧកញ៉ា បានលើកឡើងថា ក្នុងនាមជាវេជ្ជបណ្ឌិត និងអ្នកអប់រំ លោកតែងតែណែនាំសិស្សានុសិស្ស និងសាធារណជន ដូចខាងក្រោម៖

១.ការហាត់ប្រាណគឺដូចជាថ្នាំ៖ បើហាត់តិចពេក នាំឱ្យរាងកាយខ្សោយ បើហាត់ខ្លាំងពេក អាចប៉ះពាល់ និងរបួស។ ដូច្នេះចំណុចសំខាន់គឺ តុល្យភាព។

២.តើគួរហាត់ប្រាណប៉ុន្មានដងក្នុងមួយសប្តាហ៍? ៣–៥ ដងក្នុងមួយសប្តាហ៍ ដោយមិនចាំបាច់ហាត់រៀងរាល់ថ្ងៃទេ។ ច្បាប់ងាយចងចាំ គឺមួយថ្ងៃហាត់ មួយថ្ងៃសម្រាក ហើយអាចធ្វើចលនារៀងរាល់ថ្ងៃបាន ប៉ុន្តែត្រូវសម្រាកពេលចាំបាច់។ សាច់ដុំត្រូវការពេលសម្រាក ដើម្បីលូតលាស់ និងជាសះស្បើយវិញ។

៣.តើគួរហាត់ម្តងប៉ុន្មាននាទី? ៣០–៦០ នាទីក្នុងមួយលើក អប្បបរមា ៣០ នាទី ឬល្អជាងនេះ ៤៥–៦០ នាទី។

៤.ប្រភេទហាត់ប្រាណងាយៗ៖ ដើរ រត់ ជិះកង់ (២០–៣០ នាទី), ចុចដៃ អង្គុយឡើង Plank (១០–២០ នាទី), លាតសន្ធឹង (៥–១០ នាទី)។

៥.ចំណាំសំខាន់ៗ៖ កុំហាត់ខ្លាំងពេករៀងរាល់ថ្ងៃ កុំមើលរំលងការឈឺចាប់ កុំប្រកួតប្រជែងជាមួយអ្នកដទៃ។ ហាត់ប្រាណសម្រាប់សុខភាព មិនមែនសម្រាប់បង្ហាញ។ 

៦.ច្បាប់ងាយចងចាំ៖ ពេលវេលាល្អបំផុត គឺពេលដែលអ្នកអាចហាត់បានជាប្រចាំ។ ពេលព្រឹក ល្អសម្រាប់បង្កើតទម្លាប់, ពេលល្ងាច ល្អសម្រាប់កម្លាំង និងសមត្ថភាព, ជៀសវាងពេលក្តៅខ្លាំង៕ 

The post អ្នកឧកញ៉ា គួច ម៉េងលី ចែករំលែកគន្លឹះល្អៗ ៦ចំណុច សម្រាប់ការហាត់ប្រាណ appeared first on .

ក្នុងឱកាសទិវានៃក្តីស្រឡាញ់ និងបុណ្យចូលឆ្នាំថ្មីប្រពៃណីចិន ឆ្នាំ២០២៦នេះដែរ អ្នកឧកញ៉ា ក៏បានផ្ញើសារជូនពរ​ដល់​ គណៈគ្រប់គ្រង លោកគ្រូ អ្នកគ្រូ និងបុគ្គលិក ព្រមទាំងប្រជាជនខ្មែរទាំងអស់ សូមជួបប្រទះតែសេចក្តីសុខ​សុភមង្គល សុខភាពល្អបរិបូរ និងជោគជ័យគ្រប់ភារកិច្ចទាំងអស់។ សូមរីករាយថ្ងៃឈប់សម្រាក និងសូមឱ្យ​ការ​ធ្វើ​ដំណើរ​ប្រកបដោយសុខសុវត្ថិភាព។

សូមជម្រាបថា ទិវានៃក្តីស្រឡាញ់ ត្រូវបានប្រព្រឹត្តឡើងរៀងរាល់ឆ្នាំ នៅថ្ងៃទី១៤ ខែកុម្ភៈ។ បុណ្យនេះគឺជាថ្ងៃ​ដែលបញ្ជាក់អំពី​សេចក្ដីស្រឡាញ់ជាទូទៅ ដោយមិនចាំបាច់សម្រាប់តែគូស្នេហ៍នោះទេ។ រីឯបុណ្យចូលឆ្នាំថ្មី​ប្រពៃណីចិន ឆ្នាំ២០២៦នេះ នឹងប្រារព្វឡើងរយៈពេល ៤ថ្ងៃ ចាប់ពីថ្ងៃទី១៦ ដល់ថ្ងៃទី១៩ ខែកុម្ភៈ។ បុណ្យចូល​ឆ្នាំថ្មីប្រពៃណីចិន ឬបុណ្យរដូវផ្ការីក គឺជាពិធីបុណ្យដ៏ធំបំផុតរបស់ជនជាតិចិន។ ពិធីនេះផ្តោតលើការជួបជុំគ្រួសារ ការសែនព្រេនដូនតា ការតុបតែងផ្ទះពណ៌ក្រហម និងការផ្លាស់ប្តូរអាំងប៉ាវ ដើម្បីនាំសិរីសួស្តី និងលាភសំណាង​សម្រាប់ឆ្នាំថ្មី។

The post អ្នកឧកញ៉ា គួច ម៉េងលី អនុញ្ញាតឱ្យបុគ្គលិក គណៈគ្រប់គ្រង លោកគ្រូអ្នកគ្រូ ចូលជួបសម្តែងការគួរសម ក្នុងឱកាសទិវានៃក្តីស្រឡាញ់ និងបុណ្យចូលឆ្នាំថ្មីប្រពៃណីចិន appeared first on .

អ្នកឧកញ៉ា បានលើកឡើងក្នុងពិធីប្រគល់ និងទទួលវិញ្ញាបនបត្របញ្ចប់ការសិក្សា សិស្សថ្នាក់ទី១២ ឆ្នាំសិក្សា ២០២៤-២០២៥ កាលពីថ្ងៃទី៦ ខែកញ្ញា ឆ្នាំ២០២៥ ថា ការជ្រើសរើសជំនាញមិនគួរត្រឹមតែផ្អែកលើការងាយស្រួលរកការងារធ្វើទេ ប៉ុន្តែគួរត្រូវបានគិតពិចារណាតាមតម្រូវការជាក់ស្តែងរបស់ប្រទេស និង ជំនាញសំខាន់ៗ ដែល១០ឆ្នាំទៅមុខទៀត សូម្បីប្រទេសជឿនលឿនទូទៅ ក៏គេត្រូវការដែរ។ ជំនាញទាំងនេះរួមមាន បច្ចេកវិទ្យា បញ្ញាសិប្បនិម្មិត្ត វិស្វកម្ម និងហេដ្ឋារចនាសម្ព័ន្ធ វិទ្យាសាស្រ្តសុខាភិបាល អប់រំ វិទ្យាសាស្រ្តសង្គម និងបច្ចេកវិទ្យាកសិកម្ម ជាដើម។

អ្នកឧកញ៉ា ស្ថាបនិកសាលា AIS បានបន្ថែមថា ជាក់ស្តែងបច្ចុប្បន្ននេះ ប្រទេសកម្ពុជា កំពុងត្រូវការជំនាញវិស្វកម្ម និងហេដ្ឋារចនាសម្ព័ន្ធ ដើម្បីគាំទ្រការអភិវឌ្ឍដូចជា ការគូរប្លង់ ការសាងសង់អាគារ សាងសង់ផ្លូវថ្នល់ ស្ពាន អគ្គិសនី និងទីក្រុងវៃឆ្លាត។ លើសពីនេះ បច្ចេកវិទ្យាកសិកម្ម ក៏ត្រូវបានគេចាត់ទុកថាជាកត្តាសំខាន់សម្រាប់ការធានាសន្តិសុខស្បៀង និងការឆ្លើយតបចំពោះបញ្ហាប្រែប្រួលអាកាសធាតុផងដែរ។ លើសពីនេះ អ្នកឧកញ៉ា គួច ម៉េងលី ក៏បានលើកទឹកចិត្តឱ្យសិស្សនិស្សិតខិតខំស្រាវជ្រាវ សរសេរសៀវភៅឱ្យបានច្រើន ដើម្បីចែកចាយចំណេះដឹង ទុកជាកេរមរតកសម្រាប់មនុស្សជំនាន់ក្រោយ។

សូមជម្រាបថា អ្នកឧកញ៉ា គួច ម៉េងលី គឺជាអ្នកវិនិយោគលើវិស័យអប់រំមួយរូបជាច្រើនឆ្នាំមកហើយ។ លោកជាម្ចាស់សាលា Aii និង AIS ហើយជានិច្ចកាលលោកតែងតែចែករំលែកសារលើកទឹកចិត្តដល់យុវជន សិស្ស-និស្សិត និងធុរជន ព្រមទាំងវិធីសាស្រ្តក្នុងការសិក្សារៀនសូត្រ ក៏ដូចជាបំណិនជីវិតផ្សេងៗ ដើម្បីទទួលបានជោគជ័យក្នុងជីវិត៕

The post អ្នកឧកញ៉ា គួច ម៉េងលី ផ្តល់ដំបូន្មានដល់សិស្សទើបចប់ថ្នាក់ទី១២ អំពីការជ្រើសរើសជំនាញឱ្យបានត្រឹមត្រូវ appeared first on .

តាមរយៈបង្ហាញសង្គម អ្នកឧកញ៉ា បានលើកឡើងថា តើមានអ្វីកើតឡើងបន្ទាប់ពីការប៉ះទង្គិចគ្នា? ពេលវេលាដែលត្រូវប្រុងប្រយ័ត្ន ការស្ដារឡើងវិញ និងឯកភាពជាតិ។ ផលវិបាកនៃជម្លោះប្រដាប់អាវុធនាំមកនូវការខូចខាតច្រើនជាងការខូចខាតរាងកាយទៅទៀត។ ជម្លោះនេះបន្សល់ទុកនូវរបួសស្នាមផ្លូវចិត្ត វិបត្តិមនុស្សធម៌ និងទំនួលខុសត្រូវរបស់ជាតិដ៏ស្មុគស្មាញ។ នៅពេលនេះ ប្រទេសកម្ពុជាស្ថិតនៅលើចំណុចប្រសព្វដ៏សំខាន់មួយដែលកម្លាំង ឯកភាព និងផែនការយុទ្ធសាស្រ្តត្រូវតែដឹកនាំផ្លូវយើងដើម្បីឆ្ពោះទៅមុខ។

១. ការត្រៀមខ្លួនសម្រាប់ការសងសឹកដែលអាចកើតមាន
ក្នុងពេលភ្លាមៗ និងរយៈពេលវែង យើងត្រូវទទួលស្គាល់លទ្ធភាពនៃភាពតានតឹងបន្ថែម ឬការវាយប្រហារសងសឹកពីសត្រូវ។ កងកម្លាំងសន្តិសុខ និងអាជ្ញាធរមូលដ្ឋានត្រូវតែប្រុងប្រយ័ត្នជានិច្ច។ ទន្ទឹមគ្នានោះផងដែរ សាធារណជនត្រូវតែដឹង រៀបចំ និងសហការតាមការណែនាំពីថ្នាក់ជាតិ ដើម្បីធានាបាននូវសុវត្ថិភាព និងស្ថិរភាព។ ត្រូវមានការប្រុងប្រយ័ត្ន និងមិនត្រូវភ័យស្លន់ស្លោទេ ព្រោះនេះគឺជាទំនួលខុសត្រូវរបស់ជាតិ។

២. ការគាំទ្រដល់ទាហាន និងក្រុមគ្រួសារគាត់
ទាហានក្លាហានរបស់យើងដែលបានការពារប្រទេសជាតិត្រូវទទួលបានកិត្តិយស និងការយកចិត្តទុកដាក់។ ការគាំទ្រនេះរាប់បញ្ចូលទាំងជំនួយផ្នែកវេជ្ជសាស្ត្រសម្រាប់អ្នករបួស សេវាផ្លូវចិត្តសម្រាប់របួសផ្លូវចិត្ត ការស្តារនីតិសម្បទារយៈពេលវែង សំណងសមរម្យ និងការថែទាំប្រកបដោយនិរន្តរភាពសម្រាប់គ្រួសារគាត់។ ការលះបង់របស់គាត់មិនត្រូវបំភ្លេចឡើយ ការដឹងគុណរបស់យើងចំពោះគាត់ត្រូវតែបង្ហាញតាមរយៈសកម្មភាព។

៣. ជំនួយមនុស្សធម៌សម្រាប់ជនភៀសសឹក
មនុស្សរាប់សែននាក់ត្រូវបង្ខំចិត្តចេញពីផ្ទះដោយសារការប៉ះទង្គិចគ្នានេះ។ គ្រួសារទាំងនេះប្រឈមនឹងការបាត់បង់ ការភ័យខ្លាច និងភាពមិនច្បាស់លាស់។ យើងត្រូវតែធានាឱ្យពួកគាត់ត្រឡប់ទៅសហគមន៍វិញដោយសុវត្ថិភាព ដោយមានការកសាងលំនៅដ្ឋានថ្មីនៅក្នុងទីតាំងដែលមានសុវត្ថិភាព មានចំណីអាហារគ្រប់គ្រាន់ ទីជម្រក សេវាសុខភាព និងជំនួយសុខភាពផ្លូវចិត្ត។ កម្មវិធីអប់រំ និងការងារត្រូវតែបង្កើតឡើងវិញឱ្យបានឆាប់រហ័ស ដើម្បីធ្វើឱ្យជីវភាពរស់នៅរបស់ប្រជាពលរដ្ឋបានប្រសើរឡើងវិញ។

៤. សមាហរណកម្មពលករចំណាកស្រុកដែលវិលត្រឡប់មកវិញ
ពលករចំណាកស្រុកជាច្រើនកំពុងត្រឡប់មកផ្ទះវិញដោយមិននឹកស្មានដល់។ ជារឿយៗ គាត់គ្មានការងារធ្វើ គ្មានផ្ទះសម្បែង ឬប្រាក់ចំណូលឡើយ។ ភាគច្រើនក៏មិនមានឱកាសធ្វើស្រែចម្ការ ឬរៀបចំសម្រាប់ការវិលត្រឡប់ចូលស្រុកវិញដែរ។ ត្រូវតែចាត់វិធានការជាបន្ទាន់៖
-ផ្តល់លំនៅដ្ឋានបណ្តោះអាសន្ន និងតម្រូវការមូលដ្ឋាន
-ផ្តល់ការបណ្តុះបណ្តាលការងារ និងការគាំទ្រការងារ
-ផ្តល់ឯកសារ លិខិតស្នាម អត្តសញ្ញាណ ការចុះឈ្មោះសន្តិសុខសង្គម និងការទទួលបានសុខុមាលភាព
-គាំទ្រការធ្វើសមាហរណកម្មទៅក្នុងសហគមន៍ដោយសេចក្តីថ្លៃថ្នូរ និងទទួលបានឱកាស។

៥. ការកសាងហេដ្ឋារចនាសម្ព័ន្ធ និងសេវាសាធារណៈឡើងវិញ
ការកសាងឡើងវិញត្រូវតែចាប់ផ្តើមភ្លាមៗរួមមាន ផ្លូវថ្នល់ សាលារៀន មណ្ឌលសុខភាព ប្រព័ន្ធទឹក និងឧបករណ៍ប្រើប្រាស់សំខាន់ៗ។ អភិបាលកិច្ចមូលដ្ឋានគួរតែត្រូវបានផ្តល់សិទ្ធិអំណាច និងធនធានដើម្បីកសាងតំបន់រងផលប៉ះពាល់ឡើងវិញប្រកបដោយប្រសិទ្ធភាព និងសមភាព។

៦. ការពង្រឹងសុវត្ថិភាពសង្គម
ទាំងជនភៀសសឹក និងអ្នកត្រលប់មកវិញនឹងត្រូវការការគាំទ្ររយៈពេលវែង។ ការពង្រីកការការពារសង្គម រួមទាំងជំនួយស្បៀងអាហារ ប្រាក់ចំណូលមូលដ្ឋាន ការធានារ៉ាប់រងសុខភាព និងការទទួលបានការអប់រំ គឺជារឿងសំខាន់បំផុត។ ប្រព័ន្ធទាំងនេះនឹងជាមូលដ្ឋានគ្រឹះសម្រាប់ការស្តារឡើងវិញប្រកបដោយនិរន្តរភាព និងភាពធន់។

៧. ការលើកកម្ពស់ការព្យាបាល និងការស្តារនីតិសម្បទាផ្លូវចិត្តជាតិ
យើងត្រូវតែយកចិត្តទុកដាក់មិនត្រឹមតែសម្រាប់រូបកាយប៉ុណ្ណោះទេ ប៉ុន្តែក៏សម្រាប់ផ្លូវចិត្តផងដែរ។ បុគ្គលជាច្រើន ជាពិសេសកុមារ កំពុងជួបប្រទះការប៉ះទង្គិចផ្លូវចិត្ត និងការបាត់បង់។ ការព្យាបាលតាមសហគមន៍ ជំនួយសុខភាពផ្លូវចិត្ត ការអភិរក្សវប្បធម៌ និងគំនិតផ្តួចផ្តើមសាមគ្គីភាពជាតិនឹងជួយស្ដារឡើងវិញនូវអារម្មណ៍នៃកម្មសិទ្ធិ និងសន្តិភាព។

៨. កៀរគរកិច្ចសហប្រតិបត្តិការជាតិ និងអន្តរជាតិ
ទំហំនៃតម្រូវការគឺជារឿងសំខាន់។ ការណ៍នេះទាមទារឱ្យមានការសម្របសម្រួលគ្នារវាងរដ្ឋាភិបាល សង្គមស៊ីវិល វិស័យឯកជន និងដៃគូអន្តរជាតិ។ ការបរិច្ចាគ ជំនួយ និងជំនួយបច្ចេកទេសគួរតែត្រូវផ្ដល់ជូន ប្រកបដោយតម្លាភាព និងប្រសិទ្ធភាព ដើម្បីបង្កើនផលជះ។

៩. រក្សាភាពជាអ្នកដឹកនាំប្រកបដោយទំនួលខុសត្រូវ និងទំនុកចិត្តសាធារណៈ
ភាពជាអ្នកដឹកនាំដ៏រឹងមាំគឺជាការណ៍ចាំបាច់បំផុត នោះគឺជាភាពជាអ្នកដឹកនាំដែលមានទំនួលខុសត្រូវ មេត្តាធម៌ និងបរិយាប័ន្ន។ រដ្ឋាភិបាលត្រូវបន្តដឹកនាំប្រកបដោយការទទួលខុសត្រូវ ភាពច្បាស់លាស់ និងទំនាក់ទំនងប្រកបដោយប្រសិទ្ធភាព។ តម្លាភាព យុត្តិធម៌ និងការឆ្លើយតបនឹងជំរុញការទុកចិត្តសាធារណៈ និងការរួបរួមជាតិ។

អ្នកឧកញ៉ា បានគូសបញ្ជាក់ថា រួមគ្នាដើម្បីអនាគតកម្ពុជា នេះគឺជាពេលវេលាដែលត្រូវកំណត់។ ប្រទេសរបស់យើងមិនត្រឹមតែត្រូវស្ដារឡើងវិញពីរបួសភ្លាមៗនៃជម្លោះប៉ុណ្ណោះទេ ប៉ុន្តែក៏ត្រូវតែពង្រឹងមូលដ្ឋានគ្រឹះរបស់ខ្លួនសម្រាប់អនាគតផងដែរ។ ការណ៍នេះនឹងតម្រូវឱ្យមានការខិតខំប្រឹងប្រែងពីគ្រប់ស្ថាប័នដូចជា រដ្ឋាភិបាល អង្គការ សហគមន៍ និងបុគ្គលម្នាក់ៗ។ យើងត្រូវតែរួបរួមគ្នា កៀកស្មាគ្នា គាំទ្រគ្នាទៅវិញទៅមកទាំងផ្នែកហិរញ្ញវត្ថុ សម្ភារ ផ្លូវចិត្ត និងផ្លូវកាយ។ សូមឱ្យពេលនេះមិនមែនជាពេលវេលានៃការភ័យខ្លាចឡើយ ប៉ុន្តែជាពេលវេលានៃការរួបរួមគ្នា។ នេះក៏មិនមែនជាពេលវេលានៃការបែកបាក់ទេ តែជាពេលវេលានៃការតាំងចិត្តរួមគ្នា។

អ្នកឧកញ៉ា គួច ម៉េងលី ក៏សូមអំពាវនាវដល់បងប្អូនខ្មែរទាំងអស់គ្នា ក្រោកឡើងដើម្បីប្រឈមមុខនឹងបញ្ហាដោយក្តីមេត្តា ភាពក្លាហាន និងការប្តេជ្ញាចិត្ត ដើម្បីកសាងប្រទេសយើងឡើងវិញ ដើម្បីការពារ និងធានាថាប្រទេសកម្ពុជាងើបឡើងកាន់តែរឹងមាំ សុវត្ថិភាព និងមានឯកភាពជាតិជាងពេលមុនៗទៅទៀត៕

The post អ្នកឧកញ៉ា គួច ម៉េងលី បង្ហាញយុទ្ធសាស្ត្រ ៩ចំណុច សម្រាប់កម្ពុជា បន្ទាប់ពីមានជម្លោះប្រដាប់អាវុធជាមួយថៃ appeared first on .

ក្នុងវេទិកាចែករំលែកចំណេះដឹងលើបណ្តាញសង្គមហ្វេសប៊ុកផ្ទាល់ខ្លួន អ្នកឧកញ៉ា គួច ម៉េងលី បានលើកឡើងថា ការចែករំលែកគឺជាចំណុចមួយធំធេងណាស់លើលោកនេះ ហើយប្រទេសណាក៏ដោយ កាលណាមានប្រជាជនមានវប្បធម៌ចែករំលែកប្រទេសនោះមានភាពជឿនលឿន លូតលាស់ ហើយមិនឈ្លោះគ្នានោះទេ។ ចែករំលែកគឺចែករំលែកវប្បធម៌ល្អ ចំណេះដឹងល្អ អនាគតល្អ ជំនាញល្អ ទឹកចិត្តល្អ ដើម្បីឱ្យក្មេងជំនាន់ក្រោយមើលឃើញ ជាគម្រូដ៏បរិសុទ្ធមួយ។

ជាមួយគ្នានេះដែរ អ្នកឧកញ៉ាបានបន្តថា អ្នកមានៗខ្លះមានការភ្លេចខ្លួន ដូច្នេះបើចង់មានតម្លៃបន្ថែមក្នុងសង្គម គឺត្រូវតែចេះបន្ទាបខ្លួន ពិសេសចេះជួយដល់អ្នកក្រីក្រ ជួយដល់អ្នកខ្វះខាត ហើយត្រូវចេះធ្វើបុណ្យធ្វើទាន ជាទឹកប្រាក់ ជាទឹកចិត្ត ឬជាសកម្មភាពចេញពីក្រអៅបេះដូងបរិសុទ្ធ ដោយគ្មានបំណងចង់បានអ្វីមកវិញ។

សូមជម្រាបថា អ្នកឧកញ៉ា គួច ម៉េងលី គឺជាអ្នកវិនិយោគលើវិស័យអប់រំមួយរូបជាច្រើនឆ្នាំមកហើយ។ លោកជាម្ចាស់សាលា Aii និង AIS ហើយជានិច្ចកាលលោកតែងតែចែករំលែកសារលើកទឹកចិត្តដល់យុវជន សិស្ស-និស្សិត និងធុរជន ព្រមទាំងវិធីសាស្រ្តក្នុងការសិក្សារៀនសូត្រ ក៏ដូចជាបំណិនជីវិតផ្សេងៗ ដើម្បីទទួលបានជោគជ័យក្នុងជីវិត៕

The post អ្នកឧកញ៉ា គួច ម៉េងលី ប្រាប់ពីវិធីសាស្ត្រអនុវត្ត បើចង់បានកេរ្តិ៍ឈ្មោះល្អក្នុងសង្គម appeared first on .