ស្ថាបនិកក្រុមហ៊ុនគ្រឿងសម្អាង APR លោក Kim Byung Hoon កាលពីពេលថ្មីៗនេះ បានឡើងងារជាមហាសេដ្ឋីម្នាក់របស់ប្រទេសកូរ៉េខាងត្បូង ជាមួយនឹងទ្រព្យសម្បត្តិសរុបប្រមាណ ១,៣ពាន់លានដុល្លារ ពីភាគហ៊ុនដែលកំពុងកើនឡើងក្នុងក្រុមហ៊ុនរបស់ខ្លួន ដោយសារតែប្រជាប្រិយភាព លើបណ្តាញសង្គម TikTok។ នេះបើតាមការចុះផ្សាយពីសារព័ត៌មាន VN Express។
ក្នុងវ័យត្រឹម ៣៦ឆ្នាំ លោក Kim កាន់ភាគហ៊ុនសរុប ៣១% ក្នុង APR នៅពេលដែលភាគហ៊ុនរបស់ក្រុមហ៊ុន បានកើនឡើងរហូតដល់ ២០០% នៅក្នុងឆ្នាំ២០២៥ នេះ ដើម្បីក្លាយជាក្រុមហ៊ុនថែរក្សាសម្រស់ធំជាងគេទីពីររបស់កូរ៉េខាងត្បូង ដោយផ្នែកតាមតម្លៃទីផ្សារ។
APR ឥឡូវនេះ ត្រូវបានគេរាយការណ៍ថាមានតម្លៃទីផ្សារប្រមាណ ៥,៦៥ទ្រីលានវ៉ុន (៤,១ពាន់លានដុល្លារ) ដោយថ្មីៗនេះ បានវ៉ាដាច់ក្រុមហ៊ុនខ្នាតយក្សលំដាប់ប្រទេស LG H&H ហើយតាមពីក្រោយតែក្រុមហ៊ុន Amorepacific ប៉ុណ្ណោះ។ នេះបើតាមការចុះផ្សាយពី ChosunBiz។
ជម្រាបជូនផងដែរថា ជុំវិញភាពរីកចម្រើនដ៏គួរឲ្យកត់សម្គាល់នេះ ក៏បានជួញរុញច្រានលោក Kim ឲ្យសាងទ្រព្យសម្បត្តិបានដ៏ច្រើនផងដែរ ចាប់តាំងពីលោកបានបង្កើត APR នៅក្នុងឆ្នាំ២០១៤ ដោយផ្តោតលើគ្រឿងសម្អាង មុនឈានដល់ការផលិតឧបករណ៍ថែរក្សាសម្រស់ ជាច្រើនទៀត តាមរយ:ការផ្សព្វផ្សាយជាចម្បងលើបណ្តាញសង្គម TikTok៕
