យោងតាមទិន្នន័យផ្លូវការមួយ បានបង្ហាញឲ្យដឹងថា សហរដ្ឋអាមេរិក បានវ៉ាដាច់ប្រទេសចិន ក្នុងនាមជាទីផ្សារនាចូលដូងដ៏ធំបំផុតរបស់វៀតណាម ដោយបានចំណាយទឹកប្រាក់រហូតដល់ទៅ ៨២លានដុល្លារ ក្នុងរយៈពេល ៧ខែដំបូងនៃឆ្នាំនេះ ពោលគឺបានកើនឡើង ១០០% បើធៀបទៅនឹងឆ្នាំទៅ។ នេះបើតាមការចុះផ្សាយពីសារព័ត៌មាន VN Express។
ប្រភពដដែល បានបង្ហាញឲ្យដឹងទៀតថា ចំនួនដូងដែលសហរដ្ឋអាមេរិក បានទិញនោះ ស្មើទៅនឹង ២៧% នៃការនាំចេញដូងសរុបតម្លៃ ៣០៦លានដុល្លារ របស់វៀតណាម ពោលគឺបានកើនឡើង ៤០%។
យ៉ាងណាមិញក្រុមហ៊ុននាំចេញវៀតណាម បានសន្មតថា ការកើនឡើងនៃតម្រូវការខ្លាំងពីបណ្តាញលក់រាយ នបិងឧស្សាហកម្មភេសជ្ជៈ ចំពេលមានការកើនឡើងនៃប្រជាប្រិយភាពនៃដូងស្រស់របស់វៀតណាម នៅក្នុងទីផ្សារសហរដ្ឋអាមេរិក។
គួរឲ្យដឹងផងដែរថា កន្លងមកចិន ដែលជាអ្នកទិញដូងកំពូលជាយូរមកហើយ បានបង្កើនការនាំចូលរបស់ខ្លួនតែបន្តិចបន្តួចប៉ុណ្ណោះ នៅក្នុងតម្លៃប្រមាណជាង ៦៧លានដុល្លារ។
ជម្រាបជូនផងដែរថា ចំពោះទីផ្សារមួយចំនួនផ្សេងទៀត ក៏បានឃើញពីកំណើនខ្ពស់ផងដែរ ដោយការនាំចេញដូងរបស់វៀតណាម ទៅប្រទេសអូស្ត្រាលីបានកើនឡើង ៧៧% ខណៈប្រទេសអារ៉ាប់រួម និងអេស្ប៉ាញបានបង្កើនការទិញទ្វេដង ស្របពេលការនាំចេញទៅកាន់ប្រទេសព័រតូរីកូ បានកើនឡើងជិតប្រាំបីដង៕
