តុលាការកំពូលរបស់សហរដ្ឋអាមេរិក បានយល់ព្រមអនុញ្ញាតឲ្យប្រធានាធិបតី លោក ដូណាល់ ត្រាំ បង្កកជំនួយបរទេសក្នុងចំនួនប្រហែល ៤ពាន់លានដុល្លារ ដែលត្រូវបានបម្រុងទុកសម្រាប់ឆ្នាំសារពើពន្ធ ២០២៥។ នេះបើការចុះផ្សាយពីសារព័ត៌មាន Reuters។
តុលាការកំពូលរបស់អាមេរិក កាលពីថ្ងៃទី២៦ ខែកញ្ញា បានប្រកាសពីការយល់ព្រមរបស់ខ្លួនលើសំណើរបស់ក្រសួងយុត្តិធម៌ ដើម្បីរារាំងការសម្រេចចិត្តរបស់ចៅក្រមសហព័ន្ធលោក Amir Ali ដែលពីមុនបានតម្រូវឲ្យរដ្ឋបាលលោក ត្រាំ បញ្ចេញកញ្ចប់ជំនួយប្រទេសយ៉ាងឆាប់រហ័សក្នុងចំនួនរហូតដល់ទៅ ៤ពាន់លានដុល្លារ។
គួរឲ្យដឹងថា នៅមុននេះ រដ្ឋបាលរបស់លោក ត្រាំ បាននិយាយថា ខ្លួនចង់បង្កកប្រាក់ចំនួន ៤ពាន់លានដុល្លារ ដោយសារតែវាបានប្រឆាំងទៅនឹងគោលនយោបាយការបរទេសដែលបន្តដោយសហរដ្ឋអាមេរិក។ ក្រុមអ្នកសង្កេតការណ៍ក៏បាននិយាយទៀតផងដែរថា នេះគឺជាផ្នែកមួយនៃកិច្ចខិតខំប្រឹងប្រែងដើម្បីកាត់បន្ថយជំនួយបរទេស ដើម្បីដើរតាមរបៀបវារៈ “America First” របស់លោក ត្រាំ ។
ជម្រាបជូនថា សភាសហរដ្ឋអាមេរិកកាលពីឆ្នាំមុនបានអនុម័តជំនួយបរទេសរាប់ពាន់លានដុល្លារដែលក្នុងនោះមានប្រហែល ១១ពាន់លានដុល្លារនឹងផុតកំណត់នៅចុងឆ្នាំសារពើពន្ធ២០២៥ ដែលកំណត់នៅថ្ងៃទី៣០ ខែកញ្ញា ខាងមុខ៕
