យោងតាមប្រភពមួយចេញពីសេតវិមាន បានបង្ហាញឲ្យដឹងថា ប្រទេសឥណ្ឌា កំពុងកាត់បន្ថយការនាំចូលប្រេងពីប្រទេសរុស្ស៊ីចំនួន ៥០%។ នេះបើតាមការចុះផ្សាយពីសារព័ត៌មាន Reuters។
ប្រភពដដែលនេះ បាននិយាយទៀតថា រដ្ឋាភិបាលទីក្រុងវ៉ាស៊ីនតោន និងញូវដេលី បាននិងកំពុងធ្វើកិច្ចចរចាពាណិជ្ជកម្មប្រកបដោយផលិតភាព ដោយក្រុមហ៊ុនចម្រាញ់ប្រេងរបស់ឥណ្ឌា បានសន្យាថានឹងកាត់បន្ថយការនាំចូលប្រេងរបស់ពួកគេពីរុស្ស៊ីចំនួន ៥០%។
ប៉ុន្តែទោះជាយ៉ាងណាក៏ដោយ ក្រសួងប្រេងរបស់ឥណ្ឌា ហាក់មិនទាន់បានធ្វើការអត្ថាធិប្បាយណាមួយទៅលើតួលេខនៃការកាត់បន្ថយនេះនៅឡើយនោះទេ។
គួរឲ្យដឹងថា ប្រេងរបស់រស្ស៊ីមានចំនួន ៣៦% នៃការនាំចូលប្រេងសរុបរបស់ឥណ្ឌា ឬប្រហែល ១,៧៥ លានបារ៉ែលក្នុងមួយថ្ងៃ។ ហើយកាលពីថ្ងៃទី១៥ ខែតុលា ប្រធានាធិបតីអាមេរិក លោក ដូណាល់ ត្រាំ បានប្រកាសថា នាយករដ្ឋមន្ត្រីឥណ្ឌា លោក Narendra Modi បានសន្យាថានឹងបញ្ឈប់ការទិញប្រេងពីរុស្ស៊ី។
ជម្រាបជូនថា ឥណ្ឌាស្ថិតក្នុងចំណោមប្រទេសនាំចូលប្រេងឆៅធំជាងគេរបស់ពិភពលោក ដោយពឹងផ្អែកលើការផ្គត់ផ្គង់ពីបរទេសជាង ៨៥% នៃតម្រូវការរបស់ខ្លួន។ ទីក្រុងញូវដែលីពីមុនបានទិញប្រេងពីមជ្ឈិមបូព៌ា ប៉ុន្តែចាប់តាំងពីឆ្នាំ២០២២ ប្រទេសនេះបានផ្លាស់ប្តូរយ៉ាងខ្លាំងទៅការនាំចូលប្រេងពីរុស្ស៊ីដែលមានតំលៃថោក ហើយឥឡូវនេះជាអ្នកប្រើប្រាស់ប្រេងរុស្ស៊ីធំទីពីររបស់ពិភពលោកបន្ទាប់ពីប្រទេសចិន៕
