លោកជំទាវ យឹម ឆៃលីន បានស្លៀកសំលៀកបំពាក់បែបប្រពៃណី ចូលរួមក្នុងព្រះពិធីវិវាហមង្គលអាពាហ៍ពិពាហ៍ ព្រះអង្គម្ចាស់ក្សត្រីយ៍ នរោត្តម ពង្សសូរិយា និងលោក អុឹង សុីវឈន់ កូនប្រុសរបស់ អ្នកឧកញ៉ា អុឹង ប៊ុនហ៊ូវ ក្នុងព្រះទីន័ងទេវាវិនិច្ឆ័យ ព្រះបរមរាជវាំងចតុម្មុខសិរីមង្គល កាលពីថ្ងៃទី២៦ ខែវិច្ឆិកា ឆ្នាំ២០២៥ ម្សិលមិញនេះ។
ពិធីវិវាហមង្គលអាពាហ៍ពិពាហ៍នេះ កូនស្រីគឺ ព្រះអង្គម្ចាស់ក្សត្រីយ៍ នរោត្តម ពង្សសូរិយា ជាព្រះបុត្រីរបស់ សម្តេចក្រុមព្រះ នរោត្តម ចក្រពង្ស និងកូនប្រុសនាម អុឹង សុីវឈន់ ជាកូនប្រុសរបស់ អ្នកឧកញ៉ា អុឹង ប៊ុនហ៊ូវ និងលោកជំទាវ ហេង សុខា។ ព្រះរាជពិធីបានប្រារព្វឡើង ក្រោមព្រះរាជាធិបតីភាពដ៏ខ្ពង់ខ្ពស់បំផុតនៃ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថសីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ក្នុងពិធីវិវាហមង្គល តាមព្រះរាជបវេណីក្នុងព្រះទីន័ងទេវាវិនិច្ឆ័យ ព្រះបរមរាជវាំងចតុម្មុខសិរីមង្គល ព្រមទាំងមានការអញ្ជើញចូលរួមពីខ្សែរាជវង្ស និងសាច់ញាតិមេបាទាំងសងខាងផងដែរ។
ក្នុងឱកាសនោះដែរ លោកជំទាវ យឹម ឆៃលីន ដែលល្បីលើបណ្តាញសង្គមថាជាជំទាវស្រស់ស្អាតក្មេងជាងវ័យ ជាពិសេស រាល់ពេលរៀបចំតុបតែងខ្លួន មិនថាកាលៈទេសៈណានោះ ក៏បានបង្ហាញខ្លួនស្លៀកសំលៀកបំពាក់ចងក្បិនអាវប៉ាក់បែបប្រពៃណីខ្មែរ ចូលរួមអមដំណើរព្រះអង្គម្ចាស់ក្សត្រីយ៍ នរោត្តម ពង្សសូរិយា និងកូនកំលោះ ចូលគាល់ព្រះមហាក្សត្រ ព្រះករុណាជាអម្ចាស់ជីវិតលើត្បូង និងសម្តេចព្រះវិររាជមាតាជាតិខ្មែរ ក្នុងព្រះបរមរាជវាំងផងដែរ។ សូមជម្រាបថា លោកជំទាវ យឹម ឆៃលីន ជាកូនស្រីរបស់ ឯកឧត្តម យឹម ឆៃលី ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា៕
