ប្រធានសភាពាណិជ្ជកម្មអាមេរិកប្រចាំកម្ពុជា លោក Casey Barnett បាននិយាយថា ការនាំចេញរបស់សហរដ្ឋអាមេរិកមកកម្ពុជា បានកើនឡើង ៩៦% បើប្រៀបធៀបនឹងឆ្នាំមុន សម្រាប់រយៈពេលពីខែសីហា ដល់ខែធ្នូ បន្ទាប់ពីកម្ពុជាមិនយកពន្ធលើទំនិញអាមេរិក។
លើកឡើងលើទំព័រហ្វេសប៊ុក នាថ្ងៃទី២០ ខែមករានេះ ប្រធានសភាពាណិជ្ជកម្មអាមេរិក បានលើកឡើងថា នៅខែសីហា ឆ្នាំ២០២៥ កម្ពុជាបានផ្តល់សិទ្ធិឱ្យសហរដ្ឋអាមេរិកនាំចេញទំនិញផលិតនៅសហរដ្ឋអាមេរិកទាំងអស់ចូលកម្ពុជាដោយមិនបង់ពន្ធគយ (duty‑free) ជាការអនុគ្រោះមួយ ដើម្បីកាត់បន្ថយពន្ធគយ “ទៅវិញទៅមក” (reciprocal tariff) របស់សហរដ្ឋអាមេរិក។ កម្ពុជាបានប្រឈមមុខនឹងពន្ធគយទៅវិញទៅមករហូតដល់ ៤៩% ដែលបានគំរាមកំហែងដល់វិស័យផលិតកម្មនាំចេញរបស់កម្ពុជា។ ៣៨% នៃការនាំចេញរបស់កម្ពុជាត្រូវបាននាំទៅសហរដ្ឋអាមេរិក។
លោកបន្តថា ដោយសារតែការផ្លាស់ប្តូរនេះ ការនាំចេញរបស់សហរដ្ឋអាមេរិកទៅកម្ពុជា បានកើនឡើង ៩៦% បើប្រៀបធៀបនឹងឆ្នាំមុន សម្រាប់រយៈពេលពីខែសីហាដល់ខែធ្នូ។ ការនាំចេញរបស់សហរដ្ឋអាមេរិកបានកើនឡើងក្នុង ៥៤ ចំណោម ៨៥ ប្រភេទផលិតផល។ អ្វីដែលគួរឱ្យកត់សម្គាល់ជាងគេគឺ ការកើនឡើង ៩ ដងនៃផលិតផលប្រេងឥន្ធនៈដែលបានចម្រាញ់។ ការកើនឡើងនេះក៏ត្រូវបានជំរុញដោយតម្រូវការបំបែកហានិភ័យ និងបង្វែរចេញពីផលិតផលប្រេងឥន្ធនៈពីថៃ ដោយសារការឈ្លានពានរបស់ថៃលើកម្ពុជា ដែលកំពុងបន្ត។
ដូចគ្នានេះដែរ ការនាំចូលផលិតផលទឹកដោះគោមួយចំនួនបានប្តូរពីថៃទៅសហរដ្ឋអាមេរិក។ ការកើនឡើងដែលគួរឱ្យកត់សម្គាល់ផ្សេងទៀត រួមមាន ការនាំចូលយានយន្តពីសហរដ្ឋអាមេរិកកើនឡើង ប្លាស្ទិក ក្រដាស ជាតិសរសៃសម្រាប់វាយនភណ្ឌ ផលិតផលអាហារ និងម៉ាស៊ីន/គ្រឿងចក្រ។
បើតាម ប្រធានសភាពាណិជ្ជកម្មអាមេរិកប្រចាំកម្ពុជា គូសបញ្ជាក់ថា កិច្ចព្រមព្រៀងដែលបានចរចានេះមានភាពលំអៀង និងអនុគ្រោះទៅខាងសហរដ្ឋអាមេរិកជាង ប៉ុន្តែជាក់ស្តែង នៅឆ្នាំ២០២៤ កម្ពុជាបាននាំចេញទំនិញទៅសហរដ្ឋអាមេរិកចំនួន ១២.៧ ពាន់លានដុល្លារ ខណៈដែលនាំចូលត្រឹមតែ ៣០០ លានដុល្លារ ប៉ុណ្ណោះ។ ផ្នែកមួយនៃភាពខុសគ្នានេះ កើតឡើងពីការខ្វះអំណាចទិញ (purchasing power) របស់ប្រជាជនកម្ពុជា ដើម្បីទិញទំនិញអាមេរិក។ ប៉ុន្តែផ្នែកមួយទៀតក៏បណ្តាលមកពីដំណើរការផ្តល់អាជ្ញាប័ណ្ណផលិតផល និងលក្ខខណ្ឌតម្រូវផ្សេងៗរបស់កម្ពុជា ដែលមិនសូវមានភាពច្បាស់លាស់ ដែលរារាំងមិនឱ្យទំនិញអាមេរិកឈានដល់ទីផ្សារកម្ពុជា។
ផ្នែកធំមួយនៃ “កិច្ចព្រមព្រៀងពាណិជ្ជកម្មទៅវិញទៅមក” រវាងសហរដ្ឋអាមេរិក និងកម្ពុជា ត្រូវបានឧទ្ទិសទៅលើវិធានការដែលតម្រូវឱ្យកម្ពុជាកែលម្អអភិបាលកិច្ច។ ឧទាហរណ៍ កិច្ចព្រមព្រៀងតម្រូវឱ្យកម្ពុជាបង្កើតតុលាការការងារឯករាជ្យ ផ្សព្វផ្សាយព្រាងបទប្បញ្ញត្តិ ផ្សព្វផ្សាយថ្លៃសេវាផ្លូវការទាំងអស់សម្រាប់សេវាសាធារណៈ និងប្រយុទ្ធប្រឆាំងការក្លែងបន្លំ។ ទោះបីជាលក្ខខណ្ឌទាំងនេះត្រូវបានទាមទារដោយសហរដ្ឋអាមេរិកក៏ដោយ ក៏អត្ថប្រយោជន៍ចម្បងនៃលក្ខខណ្ឌបែបនេះភាគច្រើនចូលទៅកាន់កម្ពុជា៕
