លោកអ្នកឧកញ៉ា ពុង ឃាវសែ ប្រធានសហព័ន្ធសមាគមចិនកម្ពុជា និងលោកអ្នកឧកញ៉ា ភាព ហៀក អនុប្រធានសហព័ន្ធសមាគម បានអញ្ជើញចូលរួមជាអធិបតីភាពក្នុងកម្មវិធីពិព័រណ៍វប្បធម៌ចិន–ខ្មែរ ដ៏ធំបំផុតប្រចាំឆ្នាំ “រីករាយបុណ្យចូលឆ្នាំប្រពៃណីចិន” ឆ្នាំ២០២៦ នៅទីតាំងសមាគមសម្ព័ន្ធខ្មែរ–ចិនកម្ពុជា (FKCC) ជ្រោយចង្វារ – OCIC។
កម្មវិធីពិព័រណ៍វប្បធម៌ចិន-កម្ពុជានេះ ក៏មានការអញ្ជើញចូលរួមពី តំណាងស្ថានទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា និងភ្ញៀវកិត្តិយសជាច្រើនរូប។ កម្មវិធីបានប្រារព្ធឡើងក្នុងរយៈពេល ៣ថ្ងៃ គឺថ្ងៃទី៦ ដល់ ៨ ខែកុម្ភៈ ឆ្នាំ២០២៦។
ក្រុមហ៊ុន OCIC បានឱ្យដឹងថា ក្នុងរយៈពេលបីថ្ងៃ ព្រឹត្តិការណ៍នេះទទួលបានអ្នកទស្សនាច្រើនជាង ៧,០០០ នាក់ បង្ហាញពីការកើនឡើងបន្តទៀតបើធៀបនឹងឆ្នាំមុន។ អ្នកចូលរួមទាំងអស់បានរីករាយជាមួយការសម្តែងសិល្បៈប្រពៃណី និងមានជម្រើសអាហារជាច្រើន ដែលបង្ហាញពីវប្បធម៌ដ៏សម្បូរបែបរបស់ចិន និងកម្ពុជា។
ពិធីបុណ្យនេះបាននាំសហគមន៍សហការគ្នា លើកកម្ពស់ការយល់ដឹងពីវប្បធម៌ និងបង្កើតអនុស្សាវរីយ៍មានន័យ សម្រាប់គ្រួសារ និងអ្នកចូលរួមទាំងអស់។ ខណៈដែលសហគមន៍ស្វាគមន៍បុណ្យចូលឆ្នាំថ្មី ក្នុងបរិយាកាសកក់ក្តៅ និងរីករាយ គ្រប់គ្នានឹងទន្ទឹងរង់ចាំព្រឹត្តិការណ៍វប្បធម៌ជាច្រើនទៀតនៅ Chroy Changvar Bay៕
