តុលាការយោធាចិន បានកាត់ទោសប្រហារជីវិតទៅលើអតីតរដ្ឋមន្ត្រីការពារពីររូប គឺលោក Wei Fenghe និង Li Shangfu ក្រោមការចោទប្រកាន់ពីបទប្រព្រឹត្តិអំពើពុករលួយ។
យោងតាមការចុះផ្សាយពីទីភ្នាក់ងារសារព័ត៌មាន Xinhua បានរាយការណ៍កាលពីថ្ងៃទី៧ ខែឧសភាថា អតីតរដ្ឋមន្ត្រីការពារជាតិ លោក Wei Fenghe ត្រូវបានកាត់ទោលប្រហារជីវិតពីបទសូកប៉ាន់ ខណៈពេលដែលអតីតរដ្ឋមន្ត្រី លោក Li Shangfu បានទទួលទោសស្រដៀងគ្នានេះផងដែរ ពីបទទួល និងផ្តល់សំណូក។
ប៉ុន្តែទោះជាយ៉ាងណាក៏ដោយ តាមច្បាប់របស់ប្រទេសចិន អ្នកទោលដែលត្រូវបានកាត់ទោលប្រហារជីវិតនេះ នឹងត្រូវបានផ្តល់ការព្យួរទោសប្រហារជីវិតរយៈពេលពីរឆ្នាំ។ ហើយប្រសិនបើមានអ្វីផ្លាស់ប្តូរក្នុងអំឡុងពេលអនុវត្តនេះ ការកាត់ទោសនឹងត្រូវកាត់បន្ថយមកនៅត្រឹមជាប់ពន្ធនាគារអ់ស់មួយជីវិត។ នេះជាការកាត់ទោសដ៏ធ្ងន់ធ្ងរបំផុតសម្រាប់អតីតមន្ត្រីយោធាជាន់ខ្ពស់ គិតចាប់តាំងពីប្រធានាធិបតីចិន លោក ស៊ី ជិតពីង បានចាប់ផ្តើមយុទ្ធនាការប្រឆាំងអំពើពុករលួយរបស់លោក នៅក្នុងឆ្នាំ២០១២ មក។
យោងតាមសេចក្តីសម្រេចរបស់តុលាការ អតីតរដ្ឋមន្ត្រីទាំងពីររូបក៏ត្រូវបានដកហូតសិទ្ធិនយោបាយរបស់ពួកគេអស់មួយជីវិត និងទ្រព្យសម្បត្តិផ្ទាល់ខ្លួនទាំងអស់របស់ពួកគេត្រូវបានរឹបអូស។ ហើយសូម្បីតែបន្ទាប់ពីទោសរបស់ពួកគេត្រូវបានកាត់បន្ថយមកត្រឹមជាប់ពន្ធនាគារអស់មួយជីវិតក៏ដោយ ក៏ពួកគេមិនមានសិទ្ធិទទួលបានការលើកលែងទោស ឬការកាត់បន្ថយទោសក្នុងទម្រង់ផ្សេងទៀតដែរ។
ជម្រាបជូនថា លោកឧត្តមសេនីយ៍ Wei Fenghe ធ្លាប់បានបម្រើការជារដ្ឋមន្ត្រីក្រសួងការពារជាតិចិនចាប់ពីខែមីនា ឆ្នាំ២០១៨ ដល់ខែមីនា ឆ្នាំ២០២៣ ខណៈលោកឧត្តមសេនីយ៍ Li Shangfu បានឡើងជំនួសលោក Wei ហើយកាន់តំណែងនេះរយៈពេលប្រាំពីរខែ៕
